शधाणूं 8
8
1शाऊल नांओं मणछ बी त इना आपणीं आछी भाल़णैं आल़अ और सह बी आसा त स्तिफनुस मारना लै राज़ी।
विश्वासीए मंडल़ी संघै उपद्रभ
तेसा ई धैल़ी हुअ येरुशलेम नगरीए विश्वासीए मंडल़ी लै बडअ खास्सअ उपद्रभ और शधाणूं छ़ाडी होर कई विश्वासी छिंघुऐ यहूदा और सामरी लाक्कै लै। 2कई परमेशरे भगत मणछै डाहअ स्तिफनुस घोरी दी दाबी और तेऊ लै लागै लेरदै-पकारदै। 3शाऊल त विश्वासीए मंडल़ी बरैबाद करदअ लागअ द। सह आसा त लागअ द घरै-घरै पेशी करै विश्वासी मर्धा और बेटल़ी घिशी-तल़िंगी करै कैद खानै दी पांदअ।
सामरी लाक्कै फिलिप्पुसो प्रच़ार
4ज़ुंण विश्वासी ओर्ही-पोर्ही छिंघुऐ, तिंयां नाठै हर ज़ैगा खुशीए समादा खोज़दी। 5फिलिप्पुस बी लागअ सामरी लाक्कै डेऊई करै सोभी लोगा मांझ़ै मसीहे बारै लोगा का खोज़दअ। 6ज़ुंण गल्ला फिलिप्पुसै बोली और ज़ुंण सह नछ़ैण सह रहैऊआ त तेता भाल़ी करै लागै सोभ लोग तेऊए गल्ला धैन-मन लाई शूणैं। 7किल्हैकि फिलिप्पुस दैआ त हुकम और कई का निखल़अ भूत लैल़ा-पकारा पाई बागा लै और बडै भारी दरंगे बमारी आल़ै, और लाट्टै हुऐ राम्बल़ै। 8तेसा नगरीए लोग हुऐ बडै भारी खुश।
शमौन ज़ादू करनै आल़अ
9तेसा नगरी त शमौन नांओं मणछ, सह करा त ज़ादू करी करै सामरी लाक्कै होरी ज़ातीए लोगा रहैन और आपणैं आप खोज़ा त लोगा का कि सह आसा आप्पू एक महान मणछ। 10कई होछ़ै का बडै तैणीं तेऊ मनी करै बोला तै इहअ कि अह मणछ आसा परमेशरे एक शगती, ज़हा लै महान बोला। 11तेऊ तै तिंयां बडै भारी धैल़ै ओर्ही आपणैं ज़ादू करै डाहै दै रहैन करी; तैहीता तेऊ तिंयां बडै भारी मना तै।
12पर ज़ांऊं तिन्नैं फिलिप्पुसे गल्ला दी विश्वास किअ ज़ुंण परमेशरे राज़ और मसीहा ईशूए नांओं खुशीओ समाद खोज़ा त, ता सोभ लोग, कै मर्ध, कै बेटल़ी लागै पाप करनअ छ़ाडी करै मना बदल़णें डुबकी लंदै। 13तेखअ शमौनै आप्पू बी विश्वास किअ और डुबकी लई करै लागअ फिलिप्पुसा संघै रहंदअ और सह हआ त नछ़ैण और बडै-बडै शगतीए कामां और च़मत्कारा भाल़ी करै रहैन।
सामरी लाक्कै पतरस और युहन्ना
14ज़ुंण शधाणूं येरुशलेम नगरी तै आऐ दै तिन्नैं ज़ांऊं शूणअ कि सामरी लाक्कै हेरअ परमेशरो बैण मनी, तेखअ छ़ाडै तिन्नैं पतरस और युहन्ना तिन्नां सेटा लै। 15तिन्नैं की तिधी पुजी करै तिन्नां लै प्राथणां कि पबित्र आत्मां करे भर्हिए। 16किल्हैकि पबित्र आत्मां निं अज़ी बी तिन्नां कोही दी आअ त, तिन्नैं ती अज़ी तैणीं सिधी प्रभू ईशू नांओंए डुबकी लई दी। 17तेखअ डाहै तिन्नैं तिन्नां प्रैंदै हाथ और तिन्नां दी आई पबित्र आत्मां।
18ज़ांऊं शमौनै भाल़अ कि शधाणूंए हाथा लाणैं करै एछा पबित्र आत्मां, ता तेऊ तिन्नां सेटा ढबै आणी करै बोलअ, 19“एसा शगती दैआ तम्हैं मुल्है बी; कि ज़हा प्रैंदै हुंह हाथ डाहूं, तेऊ लोल़ी पबित्र आत्मां भेटी।”
20पतरसै बोलअ तेऊ लै इहअ, “तेरै ढबै लोल़ी ताह संघै बरैबाद हुऐ किल्हैकि तंऐं किअ परमेशरो दान ढबै करै मोल लणेंओ बच़ार! 21एसा सेऊआ दी निं तेरअ हेस्सअ आथी और नां किज़ै बांड; किल्हैकि तेरै मनैं निं परमेशरा सम्हनै सुंबल़ी गल्ल आथी। (भज़न 78:37) 22आपणअ मना बदल़ और एही बूरी गल्ला सोठणें पाआ छ़ाड़ और प्रभू का कर प्राथणां, हई सका कि तेरै मनो बच़ार माफ होए। 23बूराईए बाता का हआ दूर थारै मनैं आसा हाम्हां लै कल़बिश भरी दी। तम्हैं आसा सदा बूरै करदै रहणैं आल़ी सोठे बशै हुऐ दै! तम्हैं निं परमेशरे सज़ा का बच़ी सकदै।” (बधान 29:18; लामण 3:15)
24शमौनै दैनअ ज़बाब, “तम्हैं करा मुल्है प्रभू का प्राथणां कि ज़ुंण गल्ला तम्हैं बोली; तिन्नां मांझ़ै निं कोहै लोल़ी मुल्है हूई बिती।”
25तेखअ तिंयां गवाही दैई प्रभू ईशूओ बैण खोज़ी करै फिरै येरुशलेम नगरी लै बापस और सामरी लाक्के कई गराऊंआं बाती नाठै खुशीए समादा खोज़दी।
फिलिप्पुस और कूश देशो हाकम
26तेखअ प्रभूए एकी स्वर्ग दूतै फिलिप्पुसा लै बोलअ, “उझ़ू, और दखणा बाखा लै तेसा बाता डेऊ; ज़ुंण येरुशलेम नगरी का गाजा नगरी लै डेओआ, अह आसा उज़ल़ कराहणीं बात।” 27फिलिप्पुस उझ़ुअ और नाठअ, और हेरा, कूश देशो एक मणछ त लागअ द एछदअ, सह आसा त दपुर्षअ और कूश देशे राणीं कंदाकेओ भढारी त सह आसा त परमेशरे भगती करदअ येरुशलेम नगरी लै आअ द। 28सह आसा त आपणैं रथा दी बेठअ द, और परमेशरे गूर याशायाहे कताबा पहल़दी त सह लागअ द आपणैं घरा लै बापस डेऊंदअ।
29तेखअ बोलअ पबित्र आत्मां फिलिप्पुसा का, एऊ नेल़ डेऊ और एऊए रथा संघा-संघा हांढ।
30फिलिप्पुसै पुजअ ठुर्ही करै तेऊए रथा सेटा और सह मणछ शूणअ तेऊ परमेशरे गूर याशायाहे कताबा पहल़दअ। फिलिप्पुसै पुछ़अ तेऊ का, “तूह ज़ुंण पहल़ा, तेता तूह समझ़ा बी कि नांईं?”
31तेऊ दैनअ ज़बाब, “ज़ेभै तैणीं मुंह कुंण नांईं समझ़ाऊए, ता तेभै तैणीं किधी च़ाल्लअ हुंह समझ़ी?” तेखअ की तेऊ फिलिप्पुसा का अरज़ कि मुंह संघै बेश मेरै रथा दी। 32पबित्र शास्त्रो ज़ुंण पाठ सह पहल़दअ त लागअ द सह आसा त अह कि, (याशायाह 53:7-9)
“सह निंयं भेडा ज़िहअ
मारना लै,
और ज़िहअ मिम्मूं आपणैं ऊन कातणैं आल़ै सेटा
च़ुप्पी रहा,
तिहअ ई निं तेऊ बी किछ़ै बोलअ।
33तेऊए मानदार हणैं का बी तेऊओ न्याय निं हई बोलअ,
और तेऊ ज़मानें लोगे गल्ला
कसा करनी,
किल्हैकि पृथूई का च़की
तेऊए ज़िन्दगी उझै।”
34ज़ुंण दपुर्षअ और कूश देशे राणीं कंदाकेओ भढारी त, तेऊ बोलअ फिलिप्पुसा का एता लै इहअ, “ताह सेटा आसा मेरी एही अरज़ कि मुखा खोज़ इहअ कि अह परमेशरो गूर कसरै बारै बोला; आपणैं बारै, या कसा होरीए बारै?” 35तेखअ लागअ फिलिप्पुस तेऊ का खोज़दअ, संघा खोज़अ एऊ ई शास्त्रा का शुरू करी करै तेऊ का प्रभू ईशू मसीहो खुशीओ समाद।
36बाता हांढदी-हांढदी पुजै तिंयां एही ज़ैगा ज़िधी पाणीं त। तेखअ बोलअ तेऊ दपुर्षै, “भाल़, इधी आसा पाणीं बी, ऐबै मुल्है डुबकी लणा लै कै अल़च़न आसा?” 37फिलिप्पुसै बोलअ तेऊ लै, “ज़ै तूह सारै मना का विश्वास करा, तै सका हई। तेऊ दैनअ ज़बाब कि हुंह करा एसा गल्लो विश्वास कि मसीहा आसा परमेशरो शोहरू।” 38तेखअ किअ तेऊ रथा खल़ै करनैओ हुकम और फिलिप्पुस और सह दपुर्षअ होथै दुहै पाणीं दी और तेखअ दैनी फिलिप्पुसै तेऊ लै पाणीं दी डुबकी।
39ज़ांऊं तिंयां पाणीं का उझै निखल़ै ता प्रभूए आत्मां च़कअ फिलिप्पुस उझै और तेऊ दपुर्षै निं सह तेखअ भी भाल़ी, और सह नाठअ नंद खुशी दी आपणीं बाता। (1 राज़ा 18:12)
40फिलिप्पुस निखल़अ अशदोद नगरी का और ज़ेभै तैणीं कैसरिया निं पुजअ तेभै तैणीं रहअ सह बाता हांढदी हर नगरी और गराऊंऐं खुशीए समादा खोज़दअ लागी।
Currently Selected:
शधाणूं 8: OSJNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
