युहन्ना 18

ईशू ढाकणअ

(मत्ती 26:47-56; मरकुस 14:43-50; लुका 22:47-53)

1एही प्राथणां करी करै नाठअ ईशू आपणैं च़ेल्लै संघै किदोन नाल़ा पार बाखा लै, तिधी त एक बगिच़अ, ईशू और तेऊए च़ेल्लै नाठै तेऊ बगिच़ै दी। 2तेखअ यहूदा ज़ुंणी सह ढाकणैं त लाअ द बझ़ैल़ी, तेऊ का बी त एसा ज़ैगो थोघ, किल्हैकि ईशू और तेऊए च़ेल्लै रहा तै तिधा लै एछदै लागी। 3तेखअ आणै यहूदा आप्पू संघा बडै परोहित, शास्त्री, फरीसी, मुखियै और खास्सै लोग तलबारा पाई, राची मसालै और लाटू ज़ाल़ी हाथै अस्त्र-शस्त्र पाई तिधी।

4तेखअ हेरी ईशू तिंयां गल्ला ज़ाणीं ज़ुंण तेऊ लै आजू ती हणैं आल़ी, सह आअ तिन्नां सेटा लै, संघा बोलअ तिन्नां लै इहअ, “तम्हैं कसा लोल़ै आसा लागै दै?”

5तिन्नैं बोलअ तेऊ लै, “हाम्हैं लोल़ा नासरत नगरीए ईशू?”

ईशू बोलअ तिन्नां लै, “सह आसा हुंह।” करोती गराऊंओ यहूदा बी त तिधी। 6ईशूए इहअ बोलदी, “सह आसा हुंह।” तिंयां फिरै पिछ़ू और तिंयां बधल़ुऐ माटै प्रैंदै। 7तेखअ पुछ़अ ईशू भी, “तम्हैं कसा लोल़ै आसा लागै दै?”

तिन्नैं बोलअ भी तिहअ ई, “नासरत नगरीए ईशू।”

8ईशू दैनअ तिन्नां लै ज़बाब, “मंऐं हेरअ तम्हां का बोली कि सह आसा हुंह। ज़ै तम्हैं मुंह लोल़ै आसा लागै दै, तै दैआ इना होरी डेऊणैं।” 9अह हुअ तै कि ईशू आप्पै बोलअ द सह बैण पूरअ होए, “ज़ुंण तंऐं मुल्है आसा दैनै दै तिन्नां मांझ़ै निं मंऐं एक बी बरैबाद किअ।”

10शमौन पतरसा का आसा ती तलबार तेऊ बाही तेता करै बाही माहा परोहिते एकी टैहलू लै और तेऊओ दैहणअ कान शोटअ धरनीं। तेऊ टैहलू नांअ त मलखुस। 11पर ईशू बोलअ पतरसा लै, “आपणीं तलबार डाह काठी भितरी, ज़ुंण अह दुखो बतिल्लू मेरै बाप्पू परमेशरै मुल्है दैनअ। सह कै मुंह झुटणअ निं आथी?” ईशू लाअ तेऊओ कान धरना का बापस और सह हुअ पैहलै ज़िहअ राम्बल़अ।

हन्ना सम्हनै ईशू

12तेखअ तिन्नैं सपाही, सुबैदारै और यहूदी लोगे सपाही ढाकअ ईशू संघा बान्हअ राशी करै। 13तेखअ निंयं पैहलै तिन्नैं सह हन्ना सेटा लै। हन्ना त काईफा माहा परोहितो शौहरअ ज़ुंण तेसा साला माहा परोहित त। 14अह त सह ई काईफा ज़ुंणी यहूदी लै सलाह दैनी ती, “हाम्हां लै आसा अह ज़रूरी कि म्हारै लोगा लै एक मणछ मरे, ताकि सारी ज़ाती ता बरैबाद नां होए।”

पतरसो हुधणअ

(मत्ती 26:69-70; मरकुस 14:66-68; लुका 22:55-57)

15शमौन पतरस और एक होर च़ेल्लअ बी नाठै ईशू पिछ़ू-पिछ़ू, और अह च़ेल्लअ त परोहितो भेतू बछ़ैणूं और ईशू पिछ़ू नाठअ सह माहा परोहिते खोल़ै तैणीं। 16पर पतरस रहअ दुआरे डेहल़ा बागै खल़्हुई। तेखअ आअ सह दुजअ च़ेल्लअ बागा लै ज़ुंण माहा परोहितो भेतू बछ़ैणूं त। तेऊ निंयं दुआरे पहरी का गल्ला करी करै पतरस भितरा लै। 17तेसा टैहलू बेटल़ी ज़ुंण तिधी दुआरै पहरी ती, तेसा बोलअ पतरसा लै, “तूह कै एऊ मणछे च़ेल्लै मांझ़ै आसा?”

पतरसै बोलअ, “नांईं हुंह निं आथी”।

18किल्हैकि टैहलू और पहरी तै शेल़ै-ठांढै आगी ज़ाल़ी करै फेर नैथदै बेठै दै और पतरस बी लागअ तिन्नां मांझ़ै खल़्हुई नैथदअ।

माहा परोहिते ईशू का सुआल पुछ़णै

(मत्ती 26:59-66; मरकुस 14:55-64; लुका 22:66-71)

19तेखअ पुछ़अ माहा परोहितै ईशू का तेऊए शिक्षा और तेऊए च़ेल्ले बारै। 20ईशू दैनअ तिन्नां लै ज़बाब, “मंऐं की संसारे सोभी लोगा का खुल्ही करै गल्ला, मंऐं दैनी मांदरै और आराधना कोठी दी शिक्षा ज़िधी यहूदी कठा हआ और मंऐं निं च़ोरी करै किछ़ै किअ। 21तूह मुंह किल्है पुछ़ा? तिन्नां शुणनै आल़ै पुछ़ कि मंऐं तिन्नां का कै खोज़अ? तिंयां ज़ाणा कि मंऐं किज़ै बोलअ?”

22ज़ांऊं ईशू इहअ बोलअ ता तेऊ सेटा ज़ुंण मांदरे पहरी तै खल़्हुऐ दै तिन्नां मांझ़ै बाही एकी ईशू लै च़ैंडै संघा बोलअ इहअ, “तूह माहा परोहिता संघै एही गल्ला करा?” (लुका 22:63; मीका 5:1)

23ईशू बोलअ तेऊ लै, “ज़ै मंऐं किज़ै बूरअ बोलअ, तेता खोज़ सोभी का, ज़ै मंऐं भलअ बोलअ, तै तंऐं मुल्है च़ैंडै किल्है बाही?”

24हन्ना छ़ाडअ ईशू बान्हीं करै माहा परोहित काईफा सेटा लै।

पतरसो दुजी बारी हुधणअ

(मत्ती 26:69,70; मरकुस 14:66-68; लुका 22:58-62)

25शमौन पतरस त खल़्हुअ द नैथदअ, तेखअ बोलअ तिन्नैं तेऊ लै, “तूह बी आसा एऊओ च़ेल्लअ भाल़ी?”

पतरसै बोलअ, “नां-नां हुंह निं आथी।”

26थोल़ी घल़ी बाद बोलअ माहा परोहिते टैहलू मांझ़ै एकी ज़ुंण तेऊए टबरा बाखा त, ज़सरअ कान पतरसै काटअ त, “तूह मंऐं एऊ ईशू संघै बगिच़ै दी निं भाल़अ आथी?” 27पतरसै किअ भी तेऊ लै नांईं और तेभी मुर्गअ बी बाशअ।

राजपाल पिलातुसे दरबारै ईशू

(मत्ती 27:1,2,11-14; मरकुस 15:1-5; लुका 23:1-5)

28तेखअ निंयं ईशू तिन्नैं माहा परोहित काईफा सेटा का दोती दोथी दालता लै राजपाल पिलातुसा सेटा लै। आप्पू निं तिंयां भितरा लै नाठै ताकि तिन्नां छ़ोत नां लागे और ओवार्णे थैरो भोज़ खाई सके। 29तेखअ निखल़अ पिलातुस तिन्नां सेटा बागा लै और बोलअ, “तम्हैं एऊ मणछा लै किज़ू गल्लो दोश लाआ?”

30तिन्नैं दैनअ तेऊ लै ज़बाब, “ज़ै अह मणछ बूरै कामां करनै आल़ै निं हंदअ, तै नांईं तै हाम्हैं एऊ ताह सेटा लै आणदै।”

31राजपाल पिलातुसै बोलअ तिन्नां लै, “तम्हैं करा एऊओ न्याय आप्पै आपणैं बधाने साबै।”

यहूदी मुखियै बोलअ तेऊ लै, “हाम्हां लै निं अह हक आथी दैनअ द कि कसा लै मौत दैई सके।” 32अह हुअ तै कि ईशूए सह गल्ल पूरी हई सके, ज़ुंण तेऊ आपणैं बारै बोली ती कि तेऊए मौत किहअ करै हणीं।

33तेखअ नाठअ पिलातुस दालता भितरा लै और ईशू भितरा लै शादी करै पुछ़अ, “तूह यहूदी लोगो राज़अ आसा?”

34ईशू दैनअ तेऊ लै ज़बाब, “अह गल्ल तंऐं आपणीं बाखा बोली कि मेरै बारै होरी खोज़ी ताखा?”

35पिलातुसै ज़बाब दैनअ, “हुंह कै यहूदी आसा? बडै परोहितै और तेरी ज़ातीए लोगै दैनअ तूह मेरै हाथै, तंऐं एतरै जोगी किज़ै किअ?”

36ईशू दैनअ तेऊ लै ज़बाब, “मेरअ राज़ निं एऊ संसारो आथी, ज़ै मेरअ राज़ एऊ संसारो हंदअ, तै झ़घल़णै तै मेरै च़ेल्लै एता पिछ़ू और यहूदी लोगे हाथै निं हुंह कधि एछणअ त, पर मेरअ राज़ निं एऊ संसारो आथी।”

37पिलातुसै बोलअ ईशू लै, “तूह बोला कि हुंह आसा राज़अ, मंऐं आसा लअ द एते तैणीं ज़ल्म। संसारा लै आसा आअ द एते तैणीं कि सत्ते गवाही दैंऊं। तिंयां सोभ ज़ुंण शुचै झ़ूरा तिंयां बछ़ैणा एसा गल्ला कि ज़ुंण मंऐं बोलअ सह आसा शुचअ।” (1 युहन्ना 4:6)

मौते सज़ा दैणैंओ हुकम

(मत्ती 27:15-31; मरकुस 15:6-20; लुका 23:13-25)

38राजपाल पिलातुसै पुछ़अ, “अह सत्त कै आसा?” तेखअ नाठअ भी पिलातुस यहूदी मुखियै सेटा लै और तिन्नां लै बोलअ, “मुखा निं एऊ दी किछ़ै दोश ज़ाण्हदअ। 39पर थारअ आसा अह रबाज़ कि हुंह सका ओवार्णे थैरे धैल़ी तम्हां लै एकी मणछा नर्दोश करी छ़ाडी, तम्हैं इहअ च़ाहा कि हुंह तम्हां लै एऊ ‘यहूदी लोगे राज़ै’ करूं आज़ाद?”

40पर तिन्नैं बोलअ झांशा तरुंगा काढी, “एऊ निं छ़ाडी पर हाम्हां लै छ़ाड बरोबा।”

Currently Selected:

युहन्ना 18: OSJNT

Highlight

Copy