युहन्ना 19

1इहअ करै बझ़ैल़ै पिलातुसै सपाही का ईशू लै कोल़ै#19:1 कोल़ै कोल़े सज़ा हआ ती रोम राज़े ज़मानैं बडी घोर सज़ा। कोल़अ हअ त च़ाम्भल़ेओ राशी ज़िहअ छिऊंटअ तेथ हआ तै तिछै हाड चैल़ै दै। ज़ांऊं तेता करै च़िका तै सह धेल़ा त घेरी का मास बी। बाहणैं। 2तेखअ बणांअ तिन्नैं सपाही गुंदी करै एक झ़रीलै कांडैओ मुगट। सह लाअ ईशूए मुंडै और तेऊ का बन्हैऊंऐं बैंज़णीं रंगे झिकल़ै। 3तेखअ लागै तेऊ सेटा एछी करै तेऊए सुहांगा करदै, “हे यहूदी लोगे राज़ैआ, नमस्ते।” संघा लागै तेऊ लै च़ैंडै बाहंदै।

4पिलातुस आअ तेखअ भी बागा लै और तिन्नां लै बोलअ, “भाल़ा, मंऐं लाअ सह तम्हां सेटा लै भी आणी, ताकि तम्हैं जाणीं सके कि तेऊ दी निं किछ़ै दोश आथी।” 5तेखअ तिन्नैं ईशू मुंडै कांडैओ मुगट, घेरी दी बैंज़णीं रंगे झिकल़ै बान्हअ द तिधी आणअ, और पिलातुसै बोलअ तिन्नां लै, भाल़ा, एऊ मणछा?

6ज़ांऊं तिन्नैं बडै परोहितै और मांदरे पहरी ईशू भाल़अ ता तिन्नैं बोलअ झांशा क्रुंगा काढी, “एऊ छ़ड़ाऊआ क्रूसा दी”, तेखअ बोलअ पिलातुसै तिन्नां लै, “तम्हैं ई छ़ड़ाऊआ एऊ क्रूसा दी, पर मुखा निं एऊ दी किछ़ै दोश शुझणअ।”

7यहूदी मुखियै दैनअ तेऊ लै ज़बाब, “म्हारअ बी आसा एक बधान, तेऊ बधाने साबै आसा अह मारनै जोगी, किल्हैकि अह बोला आप्पू लै परमेशरो शोहरू।” (लेबी बधान 24:16)

8ज़ांऊं पिलातुसै अह गल्ल शूणीं ता सह डरअ होर बी, 9तेखअ नाठअ सह दालता भितरा लै और ईशू का पुछ़अ, “तूह किधो आसा?” पर ईशू निं कोई ज़बाब दैनअ। 10पिलातुसै बोलअ ईशू लै, “तूह मुखा किल्है निं बोलदअ? मुखा आसा सारै हक, ताह हुंह छ़ाडी बी सका और ताह हुंह क्रूसा दी बी सका छ़ड़ाऊई।”

11ईशू दैनअ तेऊ लै ज़बाब, “ज़ै अह हक उझै का नांईं भेटदअ, तै निं मुंह दी तेरअ किछ़ै हक हणअ त। तैहीता ज़ुंणी मणछै हुंह तेरै हाथै दैनअ, तेऊओ पाप आसा खास्सअ।”

12एसा गल्ला शूणीं च़ाहा त राजपाल पिलातुस ईशू छ़ाडणअ पर यहूदी लोगै बोलअ बडअ हाल्लअ-गोल्लअ पाई, “ज़ै तूह एऊ छ़ाडे, तै समझ़णअ हाम्हां कि तेरअ साथ निं माहा राज़ै संघै आथी, ज़ुंण बी आप्पू लै राज़अ बोला सह हआ माहा राज़ैओ बरोधी।”

13इना गल्ला शूणीं काढअ पिलातुसै ईशू बागा लै ज़िधी च़ौकअ आसा त, ज़ेता लै इब्रानी बोली दी गब्बतअ बोला, और आप्पू बेठअ न्याय आसना दी। 14एसा धैल़ी ती ओवार्णे थैरे तैरी लागी दी ईंयां आसा दपहरा पैहलै गल्ला, तेखअ बोलअ पिलातुसै यहूदी लै,

“भाल़ा, इधी आसा थारअ राज़अ।”

15पर तिन्नैं पाअ हाल्लअ-गोल्लअ, “निंऊं, निंऊं क्रूसा दी छ़ड़ाऊआ एऊ।”

पिलातुसै बोलअ तिन्नां लै, “हुंह थारै राज़ै लै क्रूसे सज़ा दैंऊं?”

बडै परोहितै बोलअ, “माहा राज़ै छ़ाडी निं म्हारअ कोहै राज़अ आथी।”

16तेखअ दैनअ पिलातुसै ईशू तिन्नें हाथै क्रूसा दी छ़ड़ाऊई मारना लै।

क्रूसा दी छ़ड़ाऊंणअ

(मत्ती 27:32-44; मरकुस 15:21-32; लुका 23:26-43)

तेखअ निंयं तिन्नैं ईशू। 17ईशू च़कअ आपणअ क्रूस आपणीं कान्हा तेसा ज़ैगा तैणीं, ज़िधा लै खोपल़ीए ज़ैगा बोला, और इब्रानी बोली दी बोला तै तिधा लै गुलगुता। 18तिधी छ़ड़ाऊअ तिन्नैं ईशू क्रूसा दी। तेऊ संघै छ़ड़ाऊऐ दूई होर बी क्रूसा दी एक दैहणै और एक बाऊंऐं और तिन्नां मांझ़ै ईशू। 19पिलातुसै लिखअ एकी तगती दी ईशूओ दोश और सह टोकी क्रूसा दी, तेथ त लिखअ द, “नासरत नगरीओ ईशू यहूदी लोगो राज़अ।” 20सह तगती ती यूनानी, लतीनी और इब्रानी बोली दी लिखी दी। तेसा तगती दी लिखअ द दोश पहल़अ कई यहूदी लोगै ताकि कई लोग पहल़ी सके। ज़िधी ईशू क्रूसा दी छ़ड़ाऊअ, सह ज़ैगा ती येरुशलेम नगरी नेल़।

21तेखअ यहूदी लोगे कई बडै परोहितै बोलअ पिलातुसा सेटा डेऊई करै, “यहूदी लोगो राज़अ निं लिखै, पर इहअ लिख कि तेऊ बोलअ इहअ कि हुंह आसा यहूदी लोगो राज़अ।”

22पिलातुसै ज़बाब दैनअ, “ज़ुंण मंऐं लिखी हेरअ, सह हेरअ मंऐं लिखी।”

23ज़ांऊं सपाही ईशू क्रूसा दी छ़ड़ाऊई मुक्कै, तिन्नैं किऐ ईशूए झिकल़े च़ार भाग और हर सपाही बांडणां लै ढाकअ कुर्तअ बी पर कुर्तअ त प्रैंदा का थाल्लै तैणीं एकी ज़ोल़ै बूणअ द, तेता भाल़ी बोलअ तिन्नैं, अह निं हाम्हां धेल़णअ आथी पर एते पाणीं हाम्हां परच़ी, और ज़सरी परच़ी एछे, तेऊओ हणअ अह कुर्तअ। 24तिन्नैं सपाही किअ तिहअ ई। अह हुअ तै कि पबित्र शास्त्रे लिखी दी गल्ल पूरी होए कि तिन्नैं बांडै मेरै झिकल़ै और मेरै झिकल़ै लै पाई परच़ी। (भज़न 22:18)

25ईशूए आम्मां, तेसरी बैहण, और कलोपासे लाल़ी मगदल़ गराऊंए मरिअम ती तिधी क्रूसा सेटा खल़्हुई करै भाल़ी लागी दी। 26ज़ांऊं ईशू आपणीं आम्मां और आपणअ च़ेल्लअ ज़हा संघै ईशू झ़ूरी करा त, तिधी खल़ै भाल़ै, ईशू बोलअ आपणीं आम्मां लै, “हे आम्मां, भाल़, अह आसा तेरअ शोहरू।” 27तेखअ बोलअ ईशू तेऊ च़ेल्लै लै, “अह आसा तेरी आम्मां।” तेखअ निंईं तेऊ च़ेल्लै तेभी सह आपणैं घरा लै।

ईशूए मौत

(मत्ती 27:45-56; मरकुस 15:33-41)

28तेखअ ईशू ज़ांऊं थोघ लागअ कि सोभ गल्ला गई ऐबै हई, ईशू बोलअ, “मुंह आई चिशै” इहअ हुअ तै कि पबित्र शास्त्रा दी लिखी दी गल्ला पूरी होए। 29तिधी त एक मिल्लै रसा करै भरअ द हांडअ, तिन्नैं डबेऊअ सिरकै दी चुशू और ज़ुफा नांओंए बूटे शाण्हटी दी चैल़ी करै दैनअ तेऊए खाखा च़ाखणा लै। (भज़न 69:21) 30सिरकै च़ाखी करै बोलअ तेऊ इहअ, “पूरअ हुअ” और मुंडकी ढोल़ी शोटै ईशू प्राण। (लुका 23:46; मरकुस 15:37)

बरछ़ै करै बिन्हणअ

31सह आसा ती ओवार्णे थैरे तैरी करने धैल़ी और बशैघे धैल़ी ती शुरू हणैं आल़ी। अह बशैघे धैल़ी ती खास बी किल्हैकि ऐहा धैल़ी त ओवार्णैओ थैर बी। यहूदी मुखियै निं च़ाहंदै तै कि बशैघे धैल़ी तिंयां ल्हासा क्रूसा दी रहे। तिन्नैं की पिलातुसा का अरज़ की कि तिन्नें ज़ांघा पाआ चोल़ी और तिन्नां काढा क्रूसा का धरनीं। (मरकुस 15:22; बधान 21:22-23)

32तेखअ चोल़ी सपाही तिन्नां दूई डाकुए ज़ांघा ज़ुंण ईशू संघै क्रूसा दी छ़ड़ाऊऐ तै। 33पर ज़ांऊं तिंयां ईशू सेटा एछी करै भाल़अ कि ईशू आसा गअ द मरी, तिन्नैं निं ईशूए ज़ांघा चोल़ी। 34पर तिन्नां सपाही मांझ़ै बाही एकी ईशूए कुछी बरछ़ै करै और बरछ़ै बाहंदी निखल़अ तिधा का लोहू और पाणीं। 35ज़ुंणी अह भाल़अ, तेऊ आसा गवाही दैनी दी और तेऊए गवाही आसा शुची। तेऊ का आसा थोघ कि सह बोला शुचअ कि तम्हैं बी करा विश्वास। 36ईंयां गल्ला हुई तै कि पबित्र शास्त्रा दी लिखी दी अह गल्ल हुई पूरी, “तेऊए निं कोहै हाड चोल़ै।” (लुआह 12:46; गणांई 9:12; भज़न 34:20)

37शास्त्रा दी एकी होरी ज़ैगा बी आसा लिखअ द, “हरेकी आछी भाल़णअ सह, इधी तैणीं ज़ुंणी तेऊ लै कील बरछ़ै बी बाहै तै तिन्नां का बी शुझणअ सह।” (जकर्याह 12:10)

ईशू दाबी डाहणअ

(मत्ती 27:57-61; मरकुस 15:42-47; लुका 23:50-56)

38तेखअ आअ अरमतियाह गराऊंओ युसुफ नांओं एक मणछ, सह आसा त आप्पू बी ईशूओ च़ेल्लअ, (पर यहूदी मुखिये डरै निं सह बोलदअ कि हुंह आसा ईशूओ च़ेल्लअ) तेऊ की पिलातुसा का अरज़ कि ईशूए ल्हास दै मुंह निंणै। पिलातुसै दैनी तेऊ लै ज़ाज़त। तेखअ निंईं तेऊ ईशूए ल्हास। 39निकूदिमुस ज़ुंण ईशू सेटा लै एकी बारी राची आअ त, तेऊ आणअ लोवान और खास्सअ खुशबूदार गंधरस ईशूए ल्हासा दी मल़णा लै।

40तेखअ च़की तिन्नैं ईशूए ल्हास संघा पल़ेटी यहूदी लोगे दाबणे रिती-रबाज़े साबै खुशबूदार गंधरस मल़ी करै मलमले च़ादरा दी। 41तेखअ ज़िधी ईशू क्रूसा दी मारअ त, तिधी त एक बगिच़अ और तेऊ बगिच़ै दी आसा ती एक नऊंईं घोर कोती दी, तेथ निं अज़ी कोहै डाहअ त। 42यहूदी लोगे ओवार्णे थैरे तैरी करने धैल़ी हणें तैणीं डाही तिन्नैं ईशूए ल्हास तेसा घोरी दी किल्हैकि सह आसा ती सोभी का नेल़।

Currently Selected:

युहन्ना 19: OSJNT

Highlight

Copy