युहन्ना 20

रित्ती घोर

(मत्ती 28:1-8; मरकुस 16:1-8; लुका 24:1-12)

1हबते पैहली धैल़ी मगदल़ गराऊंए मरिअम दोती-दोथी धुंमधुंमै न्हैरै नाठी घोरी सेटा और तेते मोहरै दी लाई दी बडी टोल्ह भाल़ी तिन्नैं पोर्ही बदल़ी दी। 2एता भाल़ी ठुर्ही सह तिधा का शमौन पतरसा और तेऊ दुजै च़ेल्लै सेटा लै, ज़सरी ईशू झ़ूरी लागा ती, और तिन्नां सेटा एछी करै बोलअ, “तिन्नैं निंयं प्रभू घोरी का काढी और हाम्हां का निं थोघै कि ऐबै किधी आसा सह डाह द?”

3तेखअ ठुर्है पतरस और सह दुजअ च़ेल्लअ घोरी सेटा लै, 4और तिंयां तै दुहै संघा-संघा घोरी सेटा लै ठुहर्दै लागै दै पर सह दुजअ च़ेल्लअ निखल़अ पतरसा का आजू और सह पुजअ घोरी सेटा पैहलै। 5तेऊ भाल़ै बागा का भाल़ी करै कि ल्हास निं तिधी आथी और तिधी आसा तै सिधै झिकल़ै पल़ै दै और सह निं भितरा लै नाठअ।

6तेखअ पुजअ शमौन पतरस तेऊ पिछ़ू-पिछ़ू, संघा भाल़अ तेऊ घोरी भितरा लै डेऊई करै कि तिधी आसा सिधै झिकल़ै। 7ज़ुंण शाटअ ईशूए मुंडै आसा त पल़ेटअ द, सह निं तिधी आथी त, पर सह आसा त दुजी ज़ैगा ज़ुदअ ज़िहअ च़फल़ी डाहअ द। 8तेखअ आअ सह दुजअ च़ेल्लअ बी घोरी भितरा लै ज़ुंण पैहलै पुजअ त, इहअ भाल़ी हुअ तेऊ बी भरोस्सअ। 9तिंयां निं अज़ी बी पबित्र शास्त्रे एसा गल्ला समझ़ै, “तेऊ हणअ त मरी करै ज़िऊंदै।” (भज़न 16:10) 10तेखअ नाठै ईंयां च़ेल्लै घरा लै फिरी।

मगदल़ गराऊंए मरिअमा लै प्रगट हणअ

(मत्ती 28:9-10; मरकुस 16:9-11)

11पर मरिअम रही घोरी बागै खल़्हुई लेरदी लागी, संघा लागी लेरदी-लेरदी घोरी भितरी भाल़ी। 12तेसा का शुझुऐ शेतै च़मकदै झिकल़ै बान्हैं दै दूई स्वर्ग दूत ज़िधी ईशूए ल्हास ती डाही दी, एक आसा त शरैहणैं और एक खूरा सेटा बेठै दै। 13तिन्नैं बोलअ तेसा लै, “हे बैहण, तूह किल्है आसा लागी दी लेरदी?” तेसा बोलअ तिन्नां लै,

“तिन्नैं निंईं म्हारै प्रभूए ल्हास इधा का च़की, ऐबै मुखा निं थोघै कि तिन्नैं सह किधी आसा डाही दी।”

14इहअ बोली करै ज़ांऊं तेसा पिछ़ू भाल़अ ता पिछ़ू त ईशू खल़्हुअ द। पर तेसा निं बछ़ैणीं कि अह आसा ईशू। 15ईशू बोलअ तेसा लै, “हे बैहण, तूह किल्है आसा लागी दी लेरदी? तूह कसा लोल़ी आसा लागी दी?”

तेसा बोलअ बगिच़ेओ बेठू समझ़ी करै तेऊ का, “हे मालक, ज़ै तंऐं सह इधा का च़कअ, तै खोज़ मुखा कि तंऐं किधी आसा सह डाहअ द।”

16ईशू बोलअ तेसा लै, “मरिअम”

तेसा भाल़अ पिछ़ू और इब्रानी बोली दी बोलअ, “रबूनी”, मतलब “गूरू।”

17ईशू बोलअ तेसा लै, “मुंह निं छ़ूंऐं आथी, हुंह निं अज़ी आपणैं बाप्पू परमेशरा सेटा लै उझै नाठअ। पर मेरै तिन्नां साथी भाई सेटा लै डेऊ और तिन्नां का बोलै कि हुंह च़ाल्लअ आपणैं बाप्पू और थारै बाप्पू और आपणैं परमेशर और थारै परमेशरा सेटा लै उझै डेऊई।”

18मगदल़ गराऊंए मरिअमै खोज़ी ईंयां सारी गल्ला च़ेल्लै का, “मंऐं भाल़अ प्रभू और तेऊ की मुंह संघै ईंयां गल्ला-बाता।”

च़ेल्लै लै प्रगट हणअ

(मत्ती 28:16-20; मरकुस 16:14-18; लुका 24:36-49)

19तेसा ई धैल़ी ज़ुंण हबतेओ पैहलअ धैल़अ त, सान्हां ज़िहअ ईशू खल़्हुअ भितरा बाखा दुआरै ज़िधी च़ेल्लै तै। यहूदी मुखिये डरै तै तिंयां दुआर बंद करी करै भितरी बेठै दै।

ईशू तिन्नां सेटा खल़्हुई करै तिन्नां लै बोलअ, “तम्हां सोभी लोल़ी शांती हुई।” 20इहअ बोली करै फिरअ ईशू तिन्नां बाखा संघा रहैऊऐ ईशू तिन्नां का आपणैं हाथ खूर। तेखअ हुऐ तिंयां च़ेल्लै प्रभू ईशू भाल़ी बडै भारी खुश।

21ईशू बोलअ तिन्नां लै, “तम्हां सोभी लै शांती होए और ज़िहअ हुंह मेरै बाप्पू परमेशरै संसारा लै छ़ाडअ, तिहअ ई छ़ाडा हुंह ऐबै तम्हां।” 22इहअ बोली करै तेऊ तिन्नां लै एक फूंक मारी और बोलअ, “हुंज़ा, पबित्र आत्मां।” 23ज़सरै पाप तम्हैं माफ करे, तिंयां हणैं माफ हेरै दै करी, और ज़सरै पाप तम्हैं डाहे, तिंयां रहणैं।

थोमा लै प्रगट हणअ

24पर तिन्नां बारा च़ेल्लै मांझ़ा का एक च़ेल्लअ ज़हा नांअ थोमा दिमुस आसा, ज़ेभै ईशू आअ ता तेभै निं सह तिन्नां संघै त, 25ज़ांऊं होरी च़ेल्लै तेऊ का खोज़अ, “हाम्हैं भाल़अ प्रभू सह हुअ ज़िऊंदअ।” पर तेऊ निं विश्वास हुअ।

तेऊ बोलअ, “ज़ांऊं तैणीं हुंह तेऊए हाथै किला करै पल़ै दै खाढ निं भाल़ूं और तेथ दी आपणीं गुंठी निं पाई लऊं और तेऊए कुछी दी हाथ पाई निं भाल़ूं तेभै तैणीं निं हुंह विश्वास करदअ।”

26तेता का आठा धैल़ै बाद तै भी च़ेल्लै घरा भितरी दुआर बंद करी करै बेठै दै और थोमा बी त तिन्नां संघै। तेखअ आअ ईशू बी तिन्नां सेटा और तिन्नां सेटा खल़्हुई करै बोलअ, “तम्हां लै लोल़ी शांती हुई।” 27तेखअ बोलअ ईशू थोमा लै, “आपणीं गुंठी पाआ मेरी नथअई दी, और बैहम निं करै पर विश्वास कर कि हुंह आसा ज़िऊंदअ।” 28इहअ शूणीं थोमा ज़बाब दैनअ, “हे प्रभू, मेरै परमेशर”, 29ईशू बोलअ तेऊ लै, “तंऐं ता किअ मुंह दी भाल़ी हेरी करै विश्वास पर परमेशरा हणअ तिन्नां लोगा लै खुश, ज़ुंणी मुंह बाझ़ी भाल़ै हेरै किअ विश्वास।”

एसा कताबो मकसद

30ईशू रहैऊऐ आपणैं च़ेल्लै का होर बी कई नछ़ैण ज़ुंण एसा कताबा दी निं आथी लिखै दै। 31पर ईंयां गल्ला लिखी मंऐं एते तैणीं कि तम्हैं विश्वास करी सके कि ईशू ई आसा मसीहा परमेशरो शोहरू और तेऊए नांओंआं दी विश्वास करी करै भेटणीं तम्हां सदा रहणैं आल़ी ज़िन्दगी।

Currently Selected:

युहन्ना 20: OSJNT

Highlight

Copy