युहन्ना 21

तिबरियस समुंदरे बाढै च़ेल्लै लै प्रगट हणअ

1इना गल्ला हणैं का बाद हुअ ईशू तिबरियस समुंदरे बाढै आपणैं च़ेल्लै सेटा प्रगट। तिधी हुअ इहअ कि 2शमौन पतरस और थोमा ज़हा लै दिमुस बोला, और गलील लाक्के काना नगरी का आसा तै होर बी, नतनेल और जबदीओ शोहरू और ईशूए च़ेल्लै मांझ़ा का बी तै दूई होर च़ेल्लै तिधी कठा हुऐ दै।

3शमौन पतरसै बोलअ तिन्नां लै, “तम्हैं बेशा और हुंह आणू तम्हां लै माह्छ़ली ढाकी।”

पर तिन्नैं बोलअ, “हाम्हैं बी च़ाल्लै ताह संघै।” तिंयां सोभ ज़ण्हैं किश्ती दी बेठै पर सारी राची निं तिन्नां किछ़ भेटअ।

4ज़ांऊं राच भैई, ता ईशू खल़्हुअ समुंदरे बाढै पर तिन्नैं च़ेल्लै निं तज़ी बी सह बछ़ैणअ कि अह आसा प्रभू ईशू। 5तेखअ बोलअ ईशू तिन्नां लै, “लान्हैंओ, तम्हां का किज़ै खाणां लै बी आसा?”

तिन्नैं बोलअ, “किछ़ निं आथी।”

6तेखअ बोलअ ईशू तिन्नां लै, “किश्तीए दैहणीं बाखा शोटा ज़ाल़ तेथ भेटणीं तम्हां माह्छ़ली।” तेखअ तिन्नैं किअ तिहअ ई। कै हुअ कि तेऊ ज़ाल़ा दी शाची एतरी माह्छ़ली कि ज़ाल़ निस्सअ तिन्नें पाणीं का उझै खिंच़ुई।

7इहअ करै तेऊ च़ेल्लै ज़हा लै ईशू झ़ूरी करा त, तेऊ बोलअ पतरसा लै, “अह ता म्हारअ प्रभू आसा।” शमौन पतरसै ज़ांऊं इहअ शूणअ कि प्रभू ईशू आसा, तेऊ बान्हअ च़ोल़अ किल्हैकि तेऊए आधी घेर ती नांगी और तेऊ दैनी समुंदरे छ़ाहल़ और सह पुजअ तैरी करै प्रभू ईशू सेटा सोभी का पैहलै, 8पर होर च़ेल्लै आऐ किश्ती दी बेशी माह्छ़ली करै भरै ज़ाल़ा खिंच़दी, समुंदरे बाढा का तै तिंयां कोई दूई शौ हाथ दूर।

9ज़ांऊं तिंयां समुंदरे बाढै पुजै, ता तिन्नैं कै भाल़अ कि तिधी आसा कोयले आग और तेथ प्रैंदै आसा माह्छ़ली डाही दी सिटणा लै छ़ड़ाऊई और रोटी बी आसा।

10ईशू बोलअ तिन्नां लै, “ज़ुंण माह्छ़ली तम्हैं एभै ढाकी, तेता मांझ़ा का दैआ थोल़ी ज़ेही।” 11शमौन पतरस उखल़अ किश्ती दी और बडी-बडी माह्छ़ली करै टिरा बहूंदअ ज़ाल़ खिंच़अ समुंदरे बाढा शुक्की ज़ैगा लै। पर साबा का खास्सी माह्छ़ली हई करै बी निं सह ज़ाल़ धेहल़ुअ। 12ईशू बोलअ तिन्नां लै, “एछा, खाआ।” पर च़ेल्लै मांझ़ै निं कोही इहअ पुछ़णें हिम्मत हुई कि तूह कुंण आसा? तिन्नां का त थोघ कि अह आसा प्रभू ईशू। 13ईशू आअ और तिन्नां लै दैनी रोटी और माह्छ़ली खाणां लै। 14अह त चिऊथी बारी कि ईशू मरनै का बाद ज़िऊंदै हई करै दैनै च़ेल्लै लै दर्शण।

ईशू और पतरस

15रोटी खाणैं का बाद ईशू शमौन पतरसा का बोलअ, “शमौन, युहन्ने शोहरूआ, तूह कै मुंह संघै इना होरी का खास्सी झ़ूरी डाहा?”

पतरसै बोलअ, “हाँ प्रभू, ताखा आसा एसा गल्लो थोघ कि हुंह ताल्है केतरअ झ़ूरी डाहा।”

ईशू बोलअ तेऊ लै, “मेरै मिम्मूं च़राऊ।”

16ईशू पुछ़अ पतरसा लै दुजी बारी भी, “शमौन युहन्ने शोहरूआ, तूह मुंह संघै बेघै झ़ूरी डाहा?”

तेऊ दैनअ ज़बाब, “हाँ प्रभू, ताखा ता आप्पै आसा थोघ कि हुंह केतरी झ़ूरी करा।”

ईशू बोलअ तेऊ लै, “मेरी भेडे हेर-सभाल़ कर।”

17चिऊथी बारी तेऊ भी पतरसा लै बोलअ, “शमौन युहन्ने शोहरूआ, तूह मुंह संघै बेघै झ़ूरी डाहा?”

पतरस हुअ बडअ दुखी कि तेऊ बोलअ चिऊथी बारी, “तूह मुंह संघै झ़ूरी करा?” तेखअ बोलअ तेऊ, “हे प्रभू, तूह ताखा आसा सोभी गल्लो थोघ, ताखा आसा थोघ कि हुंह ता संघै केतरी झ़ूरी करा।”

तेखअ बोलअ ईशू तेऊ लै, “मेरी भेडा च़राऊ।”

18तेखअ बोलअ ईशू तेऊ लै, “हुंह खोज़ा ताखा सत्त कि ज़ेभै तूह ज़ुआन त, तेभै बान्हां त तूह आपणीं गाची आप्पै और तूह ज़िधी च़ाहा त तिधा लै डेओआ त हांढा-फिरा। पर ज़ांऊं प्रोढअ हणअ तेभै करनै ताह आपणैं हाथ लाम्मै और तेरी गाची बान्हणीं होरी। ता ज़िधा लै तूह नांईं बी च़ाहंदअ, तूह निंणअ तिन्नां तिधा लै बी।”

19इना गल्ला बोली खोज़अ तेऊ इहअ कि पतरसा केही मौता मरी करै रहैऊंणअ परमेशरो प्रतप, संघा इहअ बोली करै तेऊ लै बोलअ, “मुंह पिछ़ू एछ”।

ईशू और तेऊओ च़ेल्लअ

20पतरसै भाल़अ पिछ़ू सह च़ेल्लअ एछदअ ज़हा संघै ईशू झ़ूरी डाहा त, ज़ुंणी ईशू का ओवार्णे थैरे भोज़ खांदी ईशूए हिक्का बाखा ढूल़ी करै इहअ पुछ़अ त, “हे प्रभू, ताह ढाकणैं बझ़ैल़दअ कुंण आसा?” 21तेऊ भाल़ी बोलअ पतरसै ईशू लै, प्रभू, “एऊओ कै हाल हणअ?”

22ईशू बोलअ तेऊ लै, “ज़ै हुंह इहअ च़ाहूं कि मुंह एछणैं तैणीं ज़िऊंदअ रहे, एते ताह कै पल़ी? तूह एछ मुंह पिछ़ू।” 23इहअ करै पल़ी तिन्नां सोभी भाई मांझ़ै अह गल्ल कि ईशूओ सह च़ेल्लअ निं मरनअ आथी। तज़ी बी निं ईशू इहअ बोली त कि सह निं मरनअ आथी, पर तेऊ बोलअ त इहअ कि, “ज़ै हुंह च़ाहूं कि मुंह एछणें तैणीं सह ज़िऊंदअ रहे, एते ताह कै पल़ी?”

नचोल़

24अह आसा सह ई च़ेल्लअ ज़ुंण इना गल्ले गवाही दैआ और ज़ुंणी ईंयां गल्ला लिखी दी आसा, और हाम्हैं ज़ाणा कि तेऊए गवाही आसा शुची।

25होर बी आसा बडै भारी काम ज़ुंण ईशू किऐ, ज़ै तिंयां एक, एक करी करै सोभ लिखै हंदै, ता हुंह समझ़ा इहअ कि तेते हणीं ती एतरी कताबा कि पूरै संसारै बी निं च़ाल्ली ती तिंयां एछी।

Currently Selected:

युहन्ना 21: OSJNT

Highlight

Copy