युहन्ना 4
4
ईशू और सामरी लाक्के बेटल़ी
1ज़ांऊं ईशू का थोघ लागअ कि फरीसी लोगै शूणीं ईंयां गल्ला कि ईशू दैआ डुबकी और तेऊए हुऐ युहन्ना का बी खास्सै च़ेल्लै। 2(ईशूए च़ेल्लै दैआ तै डुबकी, आप्पू निं सह डुबकी दैंदअ त)। 3तेखअ नाठअ ईशू यहूदा का गलील लाक्कै लै।
4गलील लाक्कै लै डेऊणअ त तेऊ सामरी लाक्कै बाती। 5इहअ करै पुजअ सह सुखार नांओंऐं सामरी लाक्कै एकी गराऊंऐं। अह गराअं आसा तेसा ज़ैगा ज़ुंण याकूबै आपणैं शोहरू युसुफा लै दैनी ती। 6याकूबो कुंअ बी आसा त तिधी; ईशू पुजअ लाम्मै सफरा का थकी करै संघा बेठअ तेऊ कुंऐं सेटा तिधी। ईंयां गल्ला हुई धैल़ी दपहरै।
7तेतरी आई एक सामरी बेटल़ी तेऊ कुंऐं दी पाणीं भरदी। ईशू बोलअ तेसा लै, “मुखा बी पणैंऊ पाणीं।” 8ईशूए च़ेल्लै तै तेसा नगरी नाठै दै खाणां लै रोटी लंदै।
9सामरी बेटल़ी ईशू लै बोलअ, “तूह आसा यहूदी#4:9 यहूदी यहूदी तै सोभी का बडी ज़ातीए और यहूदी छ़ाडी ज़ुंण बी होर तै तिंयां तै होरी ज़ातीए तिन्नां संघै निं यहूदी खांदै पिंदै तै। और हुंह आसा सामरी#4:9 सामरी सामरी लाक्कै रहणैं आल़ै लोग। ईंयां नांईं तै यहूदी आथी और यहूदी करा तै इना संघै किछ़ै बभार डाहंदै तै। यहूदी मांझ़ै निं सामरी लोगे हाथै कोहै मणछ पाणीं झुटदअ त और नां रोटी खांदै और नां तिन्नें घरै डेऊंदै तै। बेटल़ी। तूह मुखा किल्है मांगा पाणीं?” (शधाणूं 10:28)
10ईशू दैनअ तेसा लै ज़बाब, “ज़ै ताखा परमेशरे बरदानो थोघ हंदअ, और इहअ थोघ हंदअ कि तूह कसा संघै आसा लागी दी गल्ला करदी, तै मांगदी तूह मुखा और मुंह दैणअ त ताल्है सदा रहणैं आल़ी ज़िन्दगी दैणैं आल़अ पाणीं।” 11तेसा बेटल़ी बोलअ, “हे मालक ताखा पाणीं भरना लै ता किछ़ै निं आथी, और कुंअ आसा डुघअ; तै ताखा ज़िन्दगी दैणैं आल़अ पाणीं किधा का आअ?” 12तूह कै म्हारै पित्तर याकूबा का बडअ आसा, ज़ुंणी हाम्हां लै अह कुंअ दैनअ, संघा एऊ ई कुंऐं का आप्पू बी झुटअ, आपणैं शोहरू का बी पणैंऊंअ और आपणैं डागै-धणा का बी पणैंऊंअ।
13ईशू दैनअ तेसा लै ज़बाब, “ज़ुंण एऊ पाणीं झुटे, तेऊ एछणी भी चिशै। 14पर ज़ुंण तेऊ पाणीं झुटे ज़ुंण मुंह दैणअ, तेऊ निं कधि चिशै एछणी। होर ता होर, ज़ुंण पाणीं मुंह तेऊ लै दैणअ, तेते निखल़णीं तेऊ दी ज़िन्दगी दैणैं आल़ी सोबल़ और तेता दैणीं तेऊ लै सदा लै ज़िन्दगी।”
15तेसा बेटल़ी ईशू लै बोलअ, “हे प्रभू तेऊ पाणीं दै मुल्है बी, मुंह निं लोल़ी कधि चिशै आई, नांईं लोल़ी मुंह पाणीं भरना लै एतरअ दूर पल़अ एछणअ।”
16ईशू बोलअ तेसा लै, “डेऊ आपणैं लाल़ै आण शादी।”
17तेखअ तेसा बेटल़ी बोलअ, “मेरअ निं लाल़अ आथी।” इहअ शूणीं बोलअ ईशू तेसा लै, “तंऐं खोज़ी शुची गल्ल कि तेरअ निं लाल़अ आथी। 18किल्हैकि तंऐं हेरै पांज़ घर बस्सी, ज़हा संघै तूह आझ़काला रहा, सह बी निं तेरअ लाल़अ आथी। अह खोज़ी तंऐं शुची गल्ल।”
19बेटल़ी बोलअ, “हे प्रभू मुखा ज़ाण्हिंआं इहअ कि तूह आसा परमेशरो गूर। 20म्हारै सामरी पित्तर करा तै एसा धारा दी परमेशरे भगती; और तम्हैं यहूदी बोला इहअ कि परमेशरे भज़न करने ज़ैगा आसा येरुशलेम नगरी?” (बधान 11:29)
21ईशू बोलअ तेसा लै, “हे ज़नानी, मेरी गल्लो विश्वास कर कि इहअ बगत एछणअ, नां ता तम्हां एसा धारा दी परमेशरे भगती करनी, नां येरुशलेम नगरी। 22तम्हैं सामरी ज़सरी भगती करा, तेऊओ निं तम्हां का खास्सअ थोघ आथी और हाम्हां यहूदी का आसा तेऊए सोभी गल्लो थोघ, उद्धार एछणअ यहूदी लोगा बाती। (याशायाह 2:3)
23 “आजू एछणअ इहअ बगत, इधी तैणीं कि सह बगत आझ़काला बी, शुचै भगता करनअ परमेशरो भज़न आत्मां और सत्ता दी रही करै, परमेशर लोल़ा आप्पू लै इहै ई भगती करनै आल़ै। 24परमेशर आसा आत्मां, और ज़रूरी आसा कि तेऊए भगती करनै आल़ै लोल़ी आत्मां और सत्ता दी रही करै भज़न किअ।”
25तेसा बेटल़ी ईशू लै बोलअ, “हुंह ज़ाणा कि मसीहा ज़ुंण महान मणछ आसा, सह आसा एछणैं आल़अ, ज़ेभै सह एछणअ, तेभै खोज़णीं तेऊ हाम्हां का सोभै गल्ला।”
26ईशू बोलअ तेसा लै, “हुंह ज़ुंण ताह संघै गल्ला करदअ आसा लागअ द, हुंह आसा सह ई।”
च़ेल्लेओ फिरी एछणअ
27तेतरी गऐ ईशूए च़ेल्लै बी पुजी, तिंयां हुऐ रहैन कि सह आसा त तेसा बेटल़ी संघै गल्ला करदअ लागअ द, पर तिन्नैं निं इहअ पुछ़अ कि तूह किज़ै च़ाहा और एसा संघै किज़ै गल्ला करा। 28सह बेटल़ी नाठी आपणैं पाणींए घल़ै तिधी छ़ाडी करै सोभी लोगा का खोज़दी नगरी लै, 29एछा, एकी मणछा भाल़ा, ज़ुंणी मेरै बारै कई गल्ला खोज़ी ज़ुंण मेरी ज़िन्दगी दी हुई बिती दी आसा, हेरा, अह मसीहा किनी आसा? 30इहअ शूणीं आऐ नगरी का बडै भारी लोग ईशू सेटा लै।
31तेतरी ईशूए च़ेल्लै बोलअ, “हे गूरू, रोटी लअ खाई।”
32पर ईशू बोलअ तिन्नां लै, “मुखा आसा खाणां लै एही रोटी ज़ेतो तम्हां का थोघ निं आथी।”
33च़ेल्लै लागै आप्पू मांझ़ै गल्ला करदै, “एऊ लै रोटी कै कुंणी आणी हेरी?”
34ईशू बोलअ तिन्नां लै, “मेरी रोटी आसा ईंयां कि हुंह तेऊए साबै सोभै गल्ला करूं ज़ुंणी हुंह छ़ाडअ द आसा, और तेऊओ काम पूरअ करूं। 35तम्हां का कै थोघ निं आथी कि फसला लऊंणा लै आसा अज़ी च़ार भिन्नैं बाकी? पर हुंह बोला खल़ै उझ़िआ और फेर दैआ भाल़णीं। फसल गई पाक्की और लऊंणा लै हई। 36लऊंणै आल़ै भेटा मज़दूरी, और सदा रहणैं आल़ी ज़िन्दगी लै डाहा फल़ कठा करी; ताकि बऊंणैं और काटणै आल़ै दुही लै नंद होए। 37एता लै आसा अह कहाबत कि बऊंणैं आल़अ आसा होर और काटणै आल़अ आसा होर। (मीका 6:15)
38 “मंऐं छ़ाडै तम्हैं तेऊ खेचा लऊंदै ज़ेथ थारी कोई मैन्थ निं आथी लागी दी, सह आसा होरी की दी और तम्हैं आसा हुऐ दै तेसा मैन्था का फसले साझ़ू।”
सामरी लोगो विश्वास करनअ
39कई सामरी लोगै किअ तेसा बेटल़ी खोज़ी दी गल्ला करै ईशू दी विश्वास, तेसा बोलअ इहअ, “एऊ मणछै खोज़ी तिंयां कई गल्ला ज़ुंण मेरी ज़िन्दगी दी हुई बिती दी आसा।”
40तिन्नैं सामरी की ईशू सेटा एछी करै अरज़ कि हाम्हां सेटा दै रहणैं; ईशू रहअ तेखअ दूई धैल़ै तैणीं तिधी। 41ईशूए बैणा शूणीं किअ होरी बी कई लोगै विश्वास। 42तिन्नैं बोलअ तेसा बेटल़ी लै, “हाम्हैं निं सिधअ तेरै बोल़णैं करै विश्वास किअ, पर हाम्हैं हेरअ आप्पै शूणीं और आप्पै भाल़ी कि अह ई आसा सच्च़ी एऊ संसारै उद्धार दैणैं आल़अ।”
43दूई धैल़ै बाद नाठअ सह तिधा का गलील लाक्कै लै। 44किल्हैकि ईशू आसा त आप्पै बोलअ द कि परमेशरे गूरो निं आपणैं घरै अदर हंदअ। 45ज़ांऊं ईशू गलील पुजअ, ता गलीली लोग आऐ बडी खुशी-खुशी मिलदै; किल्हैकि ज़ेतरै काम तेऊ येरुशलेम नगरी ओवार्णे थैरा दी किऐ तै, तिंयां काम भाल़ै तै तिन्नैं बी, किल्हैकि तिंयां बी तै येरुशलेम जाचा लै आऐ दै।
राज़ैए दरबारीओ शोहरू ठीक करनअ
46ईशू आअ भी तेखअ गलील लाक्के काना गराऊंआं लै बापस फिरी ज़िधी तेऊ पाणींओ अंगूरो रस बणांअ त। तिधी आअ एक राज़ैओ दरबारी, तेऊओ शोहरू त कफरनहूम नगरी बमार हुअ द। 47सह बी इना गल्ला शूणीं कि ईशू आसा आअ द यहूदा का गलील लाक्कै लै, तेऊ शधाणूं आअ कि हे प्रभू मुंह संघै एछी करै बच़ाऊ मेरै शोहरू एसा बमारी का; किल्हैकि तेऊओ शोहरू त मरने तैरी दी।
48ईशू बोलअ तेऊ लै, “ज़ेभै तैणीं तम्हैं नछ़ैण और बडै-बडै च़मत्कार नांईं भाल़े, तेभै तैणीं निं तम्हां कधि मेरअ विश्वास करनअ।” (दानिएल 4:2)
49राज़ैए दरबारी बोलअ, “हे प्रभू, मेरै शोहरू मरनै का पैहलै च़ाल्ल तूह मुंह संघै।”
50ईशू बोलअ, “डेऊ, तेरअ शोहरू आसा ज़िऊंदअ।” सह नाठअ ईशूए गल्ला दी विश्वास करी करै घरा लै। 51सह पुजअ त आधी बाता उंधै बापस फिरी कि तेऊए टैहलू पुजै तेऊ सेटा और तिन्नैं पजैल़अ तेऊ सेटा समाद, “तेरअ शोहरू आसा ज़िऊंदअ।” 52तेऊ पुछ़अ तिन्नां का, “कसा घल़ी हुअ सह राम्बल़अ?”
तिन्नैं बोलअ, “हिझ़ दपहरा बाद बेठअ तेऊओ ज़ौर।” 53तेखअ हेरअ तेऊ समझ़ी कि अह हुअ तैहा ई घल़ी, ज़हा घल़ी ईशू बोलअ तेऊ लै, “तेरअ शोहरू आसा ज़िऊंदअ।” तेऊए सारै घरानै किअ ईशू दी विश्वास। 54अह त ईशूओ दुजअ च़मत्कार ज़ुंण तेऊ यहूदा का एछी करै गलील पुजी किअ त।
Currently Selected:
युहन्ना 4: OSJNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
