युहन्ना 5

ठत्ती साला ओर्ही बमार मणछ ठीक करनअ

1इना गल्ला बाद हुअ यहूदी लोगो एक थैर और ईशू नाठअ येरुशलेम नगरी लै। 2येरुशलेम नगरी आसा भेड़ प्रऊल़ी सेटा एक सअर, तेता लै बोला इब्रानी बोली दी “बैतसैदा”। तेते आसा ती पांज़ कोफरी बणीं दी।

3तेथ सरा फेर रहा तै कई कांणै, लाट्टै, शुक्कै दै आंगा आल़ै पाणीं खदमांऊदै न्हैल़ै लाम्मै पल़ी। 4ज़ेभै साईत हआ ती तेभै होथा त तिधी परमेशरो स्वर्ग दूत सरा भितरी पाणीं खदमाऊंदअ। ज़ांऊं पाणीं खदमाईंआं, तेभै ज़ुंण सोभी का पैहलै पाणीं दी पेठे, सह हआ त बमारी का ठीक। च़ाऐ सह ज़ेही बी बमारी होए।

5तिधी त एक मणछ ठत्ती साला ओर्ही त तिधी बमार पल़अ द। 6ईशू भाल़अ सह तिधी और तेऊ का गअ थोघ लागी कि अह आसा खास्सी साला ओर्ही इधी पल़अ द। ईशू पुछ़अ तेऊ का, “कै तूह ठीक हणअ च़ाहा?”

7तेखअ बोलअ तेऊ बमार मणछै ईशू लै इहअ, “हे प्रभू, मुखा निं इहअ कोहै मणछ आथी ज़ुंण मुंह च़की करै पाणीं दी पाए, ज़ेभै पाणीं खदमाईंआं, तेता का पैहलै जा कुंण होर सरै पेशी ज़ेभै तैणीं घिसरदी-घिसरदी हुंह पुजा, और हुंह हआ भाल़अ?”

8तेखअ बोलअ ईशू तेऊ दरंगे मरीज़ा लै, “हुंह बोला ताल्है, उझ़ू आपणैं एऊ बछ़ाऊणैं च़क संघा डेऊ आपणैं घरा लै।”

9सह मरीज़ उझ़ुअ तेभी सोभी सम्हनै खल़अ, संघा लागअ सह आपणैं बछ़ाऊणैं च़फल़ी करै हांढदअ फिरदअ। सह आसा ती बशैघे धैल़ी।#5:9 बशैघे धैल़ी। (एसा धैल़ी निं यहूदी परमेशरे आराधना का सुआई होर किछ़ काम करदै तै।)

10ज़ुंण सह मणछ बमारी का ठीक हुअ त, यहूदी मुखियै बोलअ तेऊ लै, “आझ़ आसा बशैघे धैल़ी और बधाने साबै निं तेरै ईंयां बछ़ाऊणैं च़कणैं ठीक आथी।” (यिर्मयाह 17:21)

11तेऊ दैनअ तिन्नां लै ज़बाब, “ज़ुंणी हुंह ठीक किअ, तेऊ बोलअ मुल्है इहअ कि आपणैं बछ़ाऊणैं च़क और हांढदअ लाग।”

12तिन्नैं पुछ़अ तेऊ का, “सह कुंण आसा ज़ुंणी ताल्है इहअ बोलअ, बछ़ाऊणैं च़की लाग हांढदअ?” 13पर ज़ुंण सह बमारी का ठीक हुअ त, तेऊ का निं थोघै त कि सह कुंण आसा, तिधी आसा तै खास्सै लोग और ईशू गअ त तिधा का डेऊई।

14तेखअ भेटअ ईशू सह मांदरै, संघा बोलअ ईशू तेऊ लै इहअ, “भाल़ तूह आसा गअ द ऐबै बमारी का ठीक हई, हेरे, ऐबै निं भी पाप करी, इहअ निं हआ कि ताह प्रैंदै पल़ा होर बी बडी बमारी।”

15तेखअ खोज़अ तेऊ मणछै तिधा का डेऊई करै तेऊ सोभी यहूदी मुखियै का, “ज़ुंणी हुंह बमारी का ठीक किअ, सह आसा ईशू।” 16एता पिछ़ू लागै यहूदी ईशू तंग करदै, किल्हैकि सह करा त इना इहै कामां बशैघे धैल़ी। 17एसा गल्ला लै बोलअ ईशू तिन्नां लै, “मेरअ बाप्पू करा अज़ी बी काम और हुंबी करा।”

18तैही लागै यहूदी ईशू मारनें भरपूर कोशिशा करदै कि सह एकी बाखा ता बशैघे धैल़ीओ बधान चोल़ा, संघा बोला दुजी बाखा इहअ कि परमेशर आसा एऊओ बाप्पू, और आपणैं आप समझ़ा परमेशरा बराबर।

शोहरूओ हक

19एसा गल्ला शूणीं बोलअ ईशू तिन्नां लै, “हुंह खोज़ा तम्हां का सत्त कि शोहरू निं आपणैं आप किछ़ै करी सकदअ। पर सह भाल़ा आपणैं बाप्पू करदै, ज़ुंण-ज़ुंण काम तेऊओ बाप्पू करा, शोहरू बी करा तिन्नां तेसा ई रिती।

20 “किल्हैकि बाप्पू डाहा आपणैं शोहरू संघै झ़ूरी और ज़ुंण काम सह आप्पू करा, तिन्नां रहैऊआ सह शोहरू का बी। तेऊ रहैऊंणै बमारी का ठीक करनै का बी बडै काम ताकि तम्हां रहैनी होए।

21 “ज़िहअ बाप्पू मूंऐं दै मणछा ज़िऊंदै करा, तिहअ ई ज़हा बी शोहरू च़ाहा तिन्नां करा सह ज़िऊंदै।

22 “बाप्पू निं कोहिओ न्याय करदअ, तेऊ सभाल़ी अह सज़ा दैणें ज़िम्मैंबारी मुखा। 23एते तैणीं कि ज़िहअ सोभ लोग बाप्पूओ अदर करा, तिहअ ई शोहरूओ बी करे। ज़ुंण शोहरूओ अदर नांईं करदअ, सह निं तेऊ बाप्पूओ बी अदर करदअ ज़ुंणी सह छ़ाडअ द आसा।

24 “हुंह खोज़ा तम्हां का सत्त कि ज़ुंण मेरअ बैण शूणीं करै मुंह छ़ाडणैं आल़ै दी विश्वास करा, सदा रहणैं आल़ी ज़िन्दगी आसा तेऊए और तेऊ लै निं सज़ा हणीं। पर सह मुक्कअ मौता पार करी करै सदा रहणैं आल़ी ज़िन्दगी लै डेऊई।

25 “हुंह खोज़ा तम्हां का सत्त कि इहअ बगत आसा एभै और इहअ ई हणअ कि मूंऐं दै शुणनअ परमेशरो बैण, और शूणीं करै हणैं तिंयां ज़िऊंदै।

26 “ज़ेऊ साबै बाप्पू आप्पू दी ज़िन्दगी डाहा, तेऊ ई साबै आसा तेऊ आपणैं शोहरू लै बी आप्पू दी ज़िन्दगी डाहणेंओ हक दैनअ द। 27इधी तैणीं कि मुंह मणछे शोहरू लै आसा सोभी लोगा प्रैंदै न्याय करनैओ बी हक दैनअ द।

28 “एसा गल्ला शूणीं तम्हैं रहैन निं हआ, अज़ी एछणअ इहअ बगत बी, ज़ेतरै घोरी दाबै दै आसा, तेऊओ बैण शूणीं करै निखल़णैं बागा लै। 29ज़ुंणी भलाई की दी होए, तिंयां ज़िन्दगी ज़िऊंणें तैणीं ज़िऊंदै, और ज़ुंणी बूराई होए की दी, तिंयां हणैं नरके सज़ा पाणें तैणीं ज़िऊंदै।” (दानिएल 12:2)

ईशूए बारै गवाही

30 “हुंह निं आपणीं बाखा किछ़ै करदअ, हुंह आसा मेरै बाप्पू छ़ाडअ द, और तेऊ खोज़अ मुखा कि किहअ न्याय करनअ। मेरअ न्याय आसा शुचअ इहअ करै कि हुंह निं आपणीं मरज़ी करदअ पर हुंह च़ाहा तेऊए मरज़ी पूरी करनअ ज़ुंणी हुंह स्वर्गा का आसा छ़ाडअ द।

31 “ज़ै हुंह आपणैं बारै आप्पै खोज़ूं, ता मेरी गवाही निं शुची हणीं। 32पर एक होर आसा ज़ुंण मेरै बारै खोज़ा, मुखा आसा थोघ कि ज़ुंण सह बोला, सह गवाही आसा शुची। 33तम्हैं बझ़ैल़अ पुछ़-ज़ाच़ करनै आल़ै युहन्ना डुबकी दैणैं आल़ै सेटा और तेऊ दैनी मेरै बारै शुची गवाही।

34 “पर हुंह निं आपणैं बारै कसा मणछे गवाही च़ाहंदअ; तैबी खोज़ी मंऐं ईंयां गल्ला एते तैणीं कि तम्हां लोल़ी उद्धार भेटअ।

35 “सह ज़ुंण ज़ल़दअ और च़मकदअ प्रैशअ आसा त; तम्हां लागअ तेऊए प्रैशै दी मगन रहणअ बधिया। 36पर मुखा आसा एही गवाही ज़ुंण युहन्ने गवाही का बी बडी आसा।

“ज़ुंण काम बाप्पू परमेशरै पूरअ करना लै मुखा आसा सभाल़अ द, मतलब ज़ुंण काम हुंह करा। तिंयां आसा मेरै गवाह कि बाप्पू परमेशरै आसा हुंह छ़ाडअ द।

37 “मेरै बाप्पू परमेशरै ज़ुंणी हुंह आसा छ़ाडअ द, तेऊ ई दैनी मेरी गवाही। तम्हैं नां ता तेऊओ बैण शूणअ और नां तेऊओ रूप आपणीं आछी आथी भाल़अ द। 38नां तम्हैं तेऊए बैणा आपणैं मनैं च़की डाहंदै। किल्हैकि ज़ुंण तेऊ आसा छ़ाडअ द; तम्हैं निं तेऊओ विश्वास करदै।

39 “तम्हैं लोल़ा पबित्र शास्त्रा दी, इहअ समझ़ी कि सदा रहणैं आल़ी ज़िन्दगी भेटणीं तम्हां, और अह आसा सह ई ज़ुंण मेरी गवाही दैआ।

40 “पर तैबी निं तम्हैं सदा रहणैं आल़ी ज़िन्दगी पाणा लै मुंह सेटा एछणअ च़ाहंदै। 41हुंह निं मणछा का अदर च़ाहंदअ। 42पर मुखा आसा थारअ थोघ कि तम्हां दी निं परमेशरे झ़ूरी आथी।

43 “हुंह आसा आपणैं बाप्पू परमेशरे नांओंऐं आअ द, पर तम्हैं निं मुंह मंदै आथी। ज़ै कुंण आपणैं ई नांओंआं करै एछा, सह हेरनअ तम्हां मनी।

44 “तम्हैं च़ाहा एकी दुजै का अदर। पर ज़ुंण अदर पबित्र परमेशरा का एछा, तेऊ निं च़ाहंदै, नां कोई गल्लो विश्वास करदै! 45इहअ निं समझ़ा कि मुंह लाणअ आपणैं बाप्पू सेटा तम्हां लै कोई दोश। तम्हां लै दोशा लाणैं आल़अ आसा सह ई मुसा गूरो बधान ज़ेथ थारी आशा आसा।

46 “किल्हैकि, ज़ै तम्हैं मुसा गूरो शुणदै, तै करनअ त तम्हां मेरअ बी विश्वास, इहअ करै कि तेऊ आसा मेरै बारै लिखअ द। (लुका 24:27) 47पर ज़ै तम्हैं तेऊए बधाना दी लिखी गल्ला दी विश्वास नांईं करदै, तै मेरी गल्ला दी किहअ करै लाअ तम्हैं विश्वास करी!”

Currently Selected:

युहन्ना 5: OSJNT

Highlight

Copy