यूहन्ना 10
10
फुआल होर भेड़ा रा उदाहरण
1 “हांऊँ तुसाबै सच़-सच़ बोला सा, कि ज़ो कोई दुआरा न भेड़ै रै खुड़ा बै नी ज़ान्दा, पर कोई होरी रस्तै ज़ा सा, सौ च़ोर होर डाकू सा। 2पर ज़ो कोई दुआरा आँध्रै बै ज़ा सा सौ भेड़ा रा फुआल सा। 3तेइरी तैंईंयैं दुआरा रै पौहरैदार दुआर खोला सा, होर भेड़ा तेइरी छेड़ शूणा सी, होर सौ आपणी भेड़ा बै नाँ लेइया शाधा सा, होर बाहरै बै नेआ सा। 4ज़ैबै सौ आपणी सारी भेड़ा बै बाहरै खोला सा, ता भेड़ै रै आगै-आगै औंढा सा, होर भेड़ा तेई रै पिछ़ै-पिछ़ै औंढा सी, किबैकि ते तेइरी छेड़ा बै पछ़ियाणा सी। 5पर तै पाखलै रै पिछ़ै नैंई जान्दी पर तेईन दूर भगा सी, किबैकि ते पाखलै री छेड़ नी पछ़ियाणदी।” 6यीशुऐ तिन्हां बै ऐ उदाहरण दसु, पर तिन्हैं नी बुझू कि ऐ कि गैला सी ज़ो सौ आसाबै बोलदा लागा सा।
यीशु शोभला फुआल सा
7तैबै यीशुऐ तिन्हां बै बोलू, हांऊँ तुसाबै सच़-सच़ बोला सा, भेड़ा रा दुआर हांऊँ सा। 8ज़ेतरै मूँ न पैहलै आऐ ती; ते सारै च़ोर होर डाकू ती, पर मेरी भेड़ै तिन्हरी नैंई शुणी। 9दुआर हांऊँ सा, अगर कोई मूँ न होईया एज़ा सा, परमेश्वरा तेई मुक्ति पाणी, होर ज़ो आँध्रै बाहरै औंढदा-फिरदा रोहला होर तेई च़ारा पाणा। 10च़ोर कोई होर कोमै री तैंईंयैं नी ऐन्दा पर च़ोरी केरनै री तैंईंयैं होर मारणै री तैंईंयैं एज़ा सा। हांऊँ तैबै आऊ कि ते ज़िन्दगी पालै होर पूरी तैरहा ज़ी सकलै।
11 हांऊँ शोभलै फुआला सांही सा, शोभला फुआल आपणी भेड़ै री तैंईंयैं आपणी जान भी देआ सा। 12नोकर ज़ो न ता फुआल ऑथि होर न भेड़ा रा मालक ऑथि, सौ भेड़ियै बै ऐन्दा हेरा सा होर भेड़ा बै छ़ौड़िआ भगा सा, किबैकि सौ तिन्हरा फुआल नी ऑथि। होर भेड़िया तिन्हां भेड़ा बै ढौका सा होर लग-लग केरा सा। 13सौ तैबै भगा सा किबैकि सौ नोकर सा, होर तेइबै भेड़ै री फ़िक्र नैंई ऑथि।
14 “शोभला फुआल हांऊँ सा, ज़ैण्ढा बापू मुँभै ज़ाणा सा, तैण्ढा हांऊँ भी बापू बै ज़ाणा सा। 15ऐण्ढी तैरहै हांऊँ आपणी भेड़ा बै ज़ाणा सा, होर मेरी भेड़ा मुँभै ज़ाणा सी, होर हांऊँ भेड़ा री तैंईंयैं आपणी जान देआ सा। 16मेरी होर भी भेड़ा सी ज़ो ऐई खुड़ा न नैंई ऑथि मुँभै तिन्हां बै भी शाधणा ज़रूरी सा। तिन्हैं मेरी हाक्का शुणनी, तैबै एकै छ़ुण्ड होर एकै फुआल होंणा। 17बापू मूँ सैंघै तैबै झ़ुरी डाहा सा, किबैकि हांऊँ आपणी जान देआ सा ताकि हांऊँ फिरी ज़िन्दा रौहणु। 18कोई मेरी ज़िन्दगी बै मूँ न नैंई छुड़ांदा, पर हांऊँ तेइबै आपुऐ देआ सा। मुँभै जान देणै रा भी हक्क सा होर लेणै रा भी हक्क सा ऐ हुक्म मुँभै मेरै बापू न मिलु सा।”
19इन्हां गैला री बजहा न यहूदियै न भी दरार पौड़ी। 20तिन्हां न बोहूऐ बोलदै लागै “तेईन बुरी आत्मा सा, होर सौ पागल सा तेइरी किबै शूणा सा?” 21होरी मांहणुए बोलू, “ऐ गैला ऐण्ढै मांहणु री नैंई ज़ुणीन बुरी आत्मा सा। एक बुरी आत्मा कैधी भी कांणै री औछ़ी खोली नैंई सकदी।”
यहूदी रा बशाह नैंई केरना
22यरूश्लेम शैहरा न प्रतिष्ठा केरनै रा त्यौहार मनांदै लागै ती, होर हिऊँदा रा मौसम ती, 23यीशु मन्दिरा न सुलैमाने री चाऊड़ी न फिरदै लागै ती 24तैबै यहूदियै लोकै यीशु घेरू होर पुछ़ु, “तू आसरै मना बै कैबै तैंईंयैं शका न डाहला? अगर तू मसीह सा ता आसाबै साफ़ दस।”
25यीशुऐ तिन्हां बै ज़वाब धिना, “मैं तुसाबै दसु सा पर तुसै बशाह केरदै नी। ज़ुणा कोम हांऊँ आपणै बापू रै अधिकारा न केरा सा, सौऐ मेरै गुआह सी। 26पर तुसै तैबै बशाह नी केरदै किबैकि मेरी भेड़ा मौंझ़ै न नैंई ऑथि। 27मेरी भेड़ा मेरी आवाज़ा बै पछ़ियाणा सी, हांऊँ तिन्हां बै ज़ाणा सा, होर ते मेरै पिछ़ै-पिछ़ै औंढा सी। 28होर हांऊँ तिन्हां बै हमेशा री ज़िन्दगी देआ सा। तिन्हां कैधी भी नाश नैंई होंणा, होर कोई तिन्हां बै मेरै हौथा न छड़ाई नी सकदा। 29मेरा बापू ज़ुणियै ते मुँभै धिनी सा, सैभी न बड़ा सा होर कोई तिन्हां बै बापू रै हौथा न छड़ाई नी सकदा। 30हांऊँ होर बापू एकै सी।”
31फिरी यहूदी लोकै यीशु पैंधै पात्थरै लाईया बाहणै री तैंईंयैं भी पात्थर च़ेकै। 32ऐथा पैंधै पभु यीशुऐ तिन्हां बै बोलू, “मैं तुसाबै आपणै आपु री धिरै न बोहू शौभलै कोम रिहाऐ सी, तिन्हां न कुणी ज़ेही कोमै री तैंईंयैं तुसै मूँ पैंधै पात्थरै लाईया बाहा सी?”
33यहूदी नेतै यीशु बै बोलू, “शौभलै कोमै री तैंईंयैं आसै तौभै नी मारदै, पर परमेश्वरा री निन्दा रै बजहा, होर तैबै कि तू मांहणु होईया आपणै आपा बै परमेश्वर बोला सा।”
34यीशुऐ तिन्हां बै ज़वाब धिना, “किबै तुसरै बिधाना न नैंई लिखू सा, ‘मैं बोलू, तुसै ईश्वर सी’?#भज. 82:6. 35अगर तेइयै तिन्हां बै ईश्वर बोलू, ज़ुणी हागै परमेश्वरा रा वचन पुजू सा (होर पवित्र शास्त्र री गैला बदली नैंई जाई सकदी) 36तुसै मुँभै किबै बोला सी, कि तुसै परमेश्वरा री निन्दा केरा सी, ज़ैबै हांऊँ बोला सा कि, ‘हांऊँ परमेश्वरा रा बेटा सा।’ ज़ुणिबै बापूऐ आँगी केरिया दुनिया न भेज़ू सा। 37अगर हांऊँ आपणै बापू रा कोम नैंई केरनु ता मेरा बशाह मता केरदै। 38पर अगर हांऊँ केरा सा, ता चाहै मेरा बशाह मता केरा पर तिन्हां कोमा रा ता बशाह केरा, तैबै तुसै ज़ाणलै होर समझ़लै कि बापू मूँ न सा, होर हांऊँ बापू न सा?” 39तैबै तिन्हैं फिरी यीशु बै ढौकणै री कोशिश केरी, पर सौ तिन्हां रै हौथा न नैंई आऊ।
40“तैबै यीशु यरदनै नौई रै पारै तेसा ज़ैगा पैंधै नौठै ज़ौखै यूहन्ना पैहलै बपतिस्मा देआ केरा ती, होर तौखै रौहै।” 41बोहू मांहणु यीशु हागै बै एज़िया बोलदै लागै, “यूहन्नै ता कोई भी नौखी नशाणी नैंई रिहाई, पर ज़ो किछ़ यूहन्नै इन्हां रै बारै न बोलू ती, सौ सैभ किछ़ सच़ ती।” 42होर तौखै बोहू मांहणुऐ यीशु पैंधै बशाह केरू।
Currently Selected:
यूहन्ना 10: KFX-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
