लूका 2

यीशु रा जन्म

1तिन्हां ध्याड़ै न अगस्तुस महाराज़ै रोमी देशै रै सैभी लोकै रै नाँ दर्ज़ केरनै रा हुकुम धिना। 2ऐ पैहला नाँ दर्ज़ तेई बौगतै हुआ, ज़ैबै कविरिनियुस सीरिया देशा रा राज़पाल ती। 3सैभ लोका राज़ै रै हुक्मै रै मुताबक आपणा-आपणा नाँ दर्ज़ केरनै री तैंईंयैं तेई शैहरा बै नौठै ज़ौखै तिन्हरै बुज़ुर्ग रौहा ती। 4तैबै यूसुफ भी ज़ो दाऊदै रै खानदाना रा ती, गलील ज़िलै रै नासरत शैहरा न यहूदिया ज़िलै रै बैतलैहम शैहरा बै नाँ दर्ज़ केरदा नौठा। 5सौ आपणी लाड़ी मरियमा सैंघै नौठा, ज़ो ऐबै सुज़दी ती, आपणा नाँ लिखान्दा नौठा। 6ज़ैबै तै बैतलहम पूज़ै, तिन्हरी तैंईंयैं रौहणु आल़ै घौरा न कोई ज़ैगा नी ती, तैबै तै खुड़ा न रौहै, ज़ैबै मरियमै रै शोहरू ज़ोंणनै रै ध्याड़ै पूरै हुऐ। 7होर तेसै आपणै पैहलै बेटै बै जन्म धिना होर सौ फालड़ू न लपेटिया खुरली भीतरै रखू। ज़ुणीन लोका गौरु बै च़ारा देआ ती, किबैकि सराय न तिन्हरी तैंईंयैं ज़ैगा नी ती ऑथि।

स्वर्गदूत फुआला बै शोभली खबर देआ सा

8तेई देशा न किछ़ फुआल तेसा राती न छेता न आपणै भेड़ै रै छ़ुण्डा री पौहरैदारी केरदै लागै ती। 9तैबै एकदम प्रभु रा एक स्वर्गदूत तिन्हां सामनै प्रकट हुआ होर प्रभु री महिमा रा प्याशा तिन्हरै च़ोहू पासै च़मकू होर ते फुआल बोहू डौरै। 10पर स्वर्गदूतै फुआला बै बोलू, “डौरदै मता; शुणा मूँ तुसाबै बड़ी खुशी रा समाद दैसणा ज़ो सभी लोकै री तैंईंयैं होंणी, 11औज़ दाऊदै रै शैहर बैतलैहम नगरा न तुसरी तैंईंयैं एक मुक्ति देणु आल़ा पैदा हुआ सा होर ऐ मसीह प्रभु सा। 12तुसरी तैंईंयैं तुंई री ऐ पछ़ियाण सा कि तुसा एक शोहरू फालड़ू न लपेटुआदा खुरली भीतरै हेरना।” 13तैबै एकदम तेई स्वर्गदूता सैंघै बोहू सारै स्वर्गदूतै री मण्डली परमेश्वरै री स्तुति केरदी होर ऐण्ढी बोलदी हेरूई,

14“स्वर्गा न परमेश्वरै री महिमा होर

परमेश्वर बै खुश केरनु आल़ै, हर कोई बै धौरती पैंधै शान्ति लोड़ी हुई।”

फुआला रा बैतलहम बै ज़ाणा

15ज़ैबै स्वर्गदूत तिन्हां हागै न स्वर्गा बै नौठै, ता ते फुआल आपु न ढुणुयै कि “एज़ा आसा बैतलैहम बै ज़ाइआ घैटीदी ऐ गैला हेरनी, ज़ो प्रभुऐ आसाबै दैसीदी सा।” 16तिन्हैं फुआलै छ़ेकै ज़ाइआ मरियम, यूसुफ होर खुरली न रैखूदा सौ शोहरू हेरू। 17इन्हां हेरिया फुआलै ज़ो गैला तेई शोहरू रै बारै न स्वर्गदूतै तिन्हां बै दसी ती सौ प्रकट केरी। 18फुआलै री इन्हां गैला शुणिया सैभी शुणनु आल़ै बै बड़ी हैरानी हुई। 19पर मरियमै ऐ सारी गैला आपणै मना न रैखी होर तिन्हरै बारै न सोच़दी रौही। 20फुआलै ज़ो किछ़ शुणू होर हेरू तेथै री तैंईंयैं परमेश्वरै री जय-जयकार केरदै वापस नौठै। किबैकि स्वर्गदूतै तिन्हां बै ज़ैण्ढा बोलू ती सैभ किछ़ तैण्ढाऐ हुआ।

यीशु रा नाँ रखणा

21ज़ैबै शोहरू औठ रोज़ा रा हुआ, तैबै पुरोहितै तेइरा खतना केरू होर तेइरै आमा-बापूऐ यीशु नाँ रखू। ऐ नाँ स्वर्गदूतै यीशु रै पैदा होंणै न पैहलै दैसू ती।

22ज़ैबै मूसै रै बिधाना रै मुताबक मरियम होर यूसुफै रै च़ोखै होंणै रै ध्याड़ै पूरै हुऐ ता तिन्हैं यीशु यरूश्लेम शैहरा रै मन्दिरा बै परमेश्वरा सामनै आंणु।#लैव्य. 12:6. 23ज़ैण्ढा कि मूसै रै बिधाना न लिखू सा, “हरेक ज़ेठा शोहरू प्रभु री तैंईंयैं च़ोखै ठहरिणा।” तिन्हैं तैण्ढाऐ केरू। 24होर मूसै रै बिधाना न लिखू सा: “कबूतरै रै दुई बच्च़ै या तिन्हां सांही दुई च़िड़ू री बलि च़ढ़ा।” एथै रै मुताबक मरियम होर यूसुफ भी बलि च़ढ़ाँदै नौठै।

शमौनै री भविष्यवाणी

25यरूश्लेम शैहरा न शमौन नाँ रा एक मांहणु रौहा ती। सौ धर्मी होर बड़ा भक्त ती। तेई आँध्रै पवित्र आत्मा ती। सौ तेई बौगता बै हेरदा लागा ती कि ज़ैबै इस्राएलै रै लोका बै तसल्ली देणु आल़ा मसीहा ऐणा। 26पवित्र आत्मै तेइबै दसू ती कि ज़ैबै तैंईंयैं सौ परमेश्वरै भेज़ै दै मसीह बै नी हेरला तैबै तैंईंयैं तेई नी मौरना। 27पवित्र आत्मै रै बोलणै सैंघै सौ मन्दिरा बै आऊ होर तेई ध्याड़ै न मरियम होर यूसुफै मूसै रै बिधाना न दैसीदी गैला बै पूरा केरनै री तैंईंयैं यीशु मन्दिरा बै आंणु। 28तैबै शमौने यीशु आपणै फाह्ड़ै न च़कू, होर परमेश्वरा रा धन्यवाद केरिया बोलू:

29“हे प्रभु, आपणै वायदै रै मुताबक,

आपणै ऐई नोकरा बै शान्ति सैंघै मौरनै दैआ।

30किबैकि मैं मुक्तिदाता हेरू सा, ज़ुणिबै तैं सैभी लोका बै बच़ाणै री तैंईंयैं भेज़ूदा सा।

31ज़ो कि तैं सैभी लोकै रै सामनै त्यार केरू सा।

32तेई एक प्याशा सांही होंणा ज़ो परमेश्वरा री सच़ाई बै होरी ज़ाति सामनै प्रकट केरनी, होर तेई इस्राएली रा आदर केरना,

होर तेरै इस्राएलै रै लोकै री तैंईंयैं महिमा री बजहा होंणा।”

33शमौन यीशु रै बारै न ज़ो किछ़ बोलदा लागा ती तेई शुणिया यीशु रै आमा-बापू हैरान हुऐ। 34शमौनै तिन्हां बै आशीष धिनी, होर तेइरी आमा मरियमा बै बोलू, “हेर परमेश्वरै ऐ निश्चय केरू सा कि ऐई शोहरू री बजहा न बोहू सारै इस्राएली लोका परमेश्वरा न दूर होंणै होर दुज़ै लोका परमेश्वरा धिराबै फिरना होर बोहू सारै लोका तेइरा बरोध केरना। 35तैबै बोहू सारै लोकै रै दिला आँध्रै ज़ो विच़ार सी ते प्रकट होंणै। ज़ो बर्ताव लोका तेई सैंघै केरना तेतै री बजहा न तौभै बड़ा भारी दु:ख होंणा।”

हन्ना नाँ री बेटड़ी गुआही देआ सा

36भविष्यवाणी केरनु आई बेटड़ी हन्ना बी तेई बौगतै मन्दिरा न ती। सौ अशेरै रै गोत्रा न ती। तेसरै बापू रा न फनुएल ती होर सौ बूढ़ी ती। सौ विधवा ती किबैकि ब्याह रै सौत बौर्षा बाद तेसरा लाड़ा मूँआ ती। 37तेसरी उम्र चौरासी बौर्ष ती होर सौ हाज़ी बी विधवा ती। सौ मन्दिरा बै छ़ौड़िआ कोइँछ़ै नी ती ज़ाँदी। सौ रात ध्याड़ व्रत रखिया होर प्रार्थना केरिया मन्दिरा न परमेश्वरै री पूजा केरा ती। 38ज़ौस बौगतै शमौन मरियम होर यूसुफा सैंघै गैला केरदा लागा ती, हन्ना बी तेई बौगतै तौखै पुजी होर परमेश्वरै रा धन्यवाद केरदी लागी। तेसै एज़िया यीशु रै बारै न तिन्हां सैभी बै दैसू ज़ो यरूश्लेम शैहरा रै लोका बै छड़ाणू आल़ै मसीहा रा इंतज़ार केरदै लागै ती।

नासरता बै वापस ऐणा

39होर ज़ैबै ते प्रभु रै बिधाना रै सारै कोम-काज़ निबटाइया यूसुफ होर मरियम गलीली ज़िला न आपणै शैहर नासरता बै वापस नौठै। 40शोहरू यीशु परमेश्वरै री दया सैंघै शरीर होर बुद्धि न बढ़दा रौहू किबैकि परमेश्वरा रा अनुग्रह तेई पैंधै ती।

प्रभु यीशु मन्दिरा न रुका सी।

41यीशु रै आमा-बापू हर साल फसह री जाच मनाँदै यरूश्लेम शैहरा बै ज़ा ती। 42यीशु ज़ैबै बारा बौर्षा रा हुआ ता ते आपणी रीति रै मुताबक फसह री जाच मनाँणै री तैंईंयैं यरूश्लेम शैहरा बै नौठै। 43जाच़ खत्म होईया ज़ैबै यीशु रै आमा-बापू वापस नासरता बै आऐ ता यीशु यरूश्लेम शैहरा न रुकु, पर यीशु रै आमा-बापू ऐसा गैल नी ति ज़ाणदै। 44यीशु रै आमा-बापुयै ऐ सोच़ू कि यीशु होरी मांहणु सैंघै होला। सौंझ़की ढौई ज़ैबै यीशु तिन्हां न नी हेरूआ ता ते आपणै सैंघी होर रिश्तैदारा ज़ोंदरै यीशु बै तोपदै लागै। 45ज़ैबै यीशु तिन्हां बै नी मिलू ता ते तेइबै तोपदै-तोपदै यरूश्लेम शैहरा बै वापस आऐ। 46तिन्हां बै यीशु त्रा रोज़ा बाद मन्दिरा रै ब्राम्दै न धर्मगुरू री गैला शुणदा होर तिन्हां सैंघै स्वाल केरदा मिलू। 47ज़ेतरै बी मांहणुयै यीशु री गैला शुणी ते तेइरी री समझ़दारी होर स्वालै रै ज़वाब देणै रै तरीकै हेरिया हैरान ती कि ऐ ऐतरी समझ़दारी री गैला कौखै न केरा सा। 48यीशु रै आमा-बापूऐ ज़ैबै सौ हेरू ता ते हैरान हुऐ। तेइरी आमा मरियमै यीशु बै बोलू, “बेटैआ, तैं आसा सैंघै ऐण्ढा किबै केरू? तेरा बापू ता हांऊँ तौभै तोपदै-तोपदै केतरै परेशान ती।”

49तैबै यीशुऐ तिन्हां बै बोलू, “तुसै मुँभै किबै तोपा सी, कि तुसै नी ज़ाणदै कि मुँभै आपणै बापू रै घौरा न होंणा चेहिऐ?” 50पर ज़ो गैल यीशुऐ तिन्हां बै बोली सौ गैल तिन्हैं नी समझ़ी। 51तैबै न बाद यीशु आपणै आमा-बापू सैंघै नासरता बै वापस नौठा होर आपणै आमा-बापू री गैल मनदा रौहू। पर तेइरी आमै ऐ सारी गैला दिला न डाही। 52यीशु बुद्धि होर शरीरा न बढ़दा रौहू। परमेश्वर होर लोका रा अनुग्रह तेई पैंधै ती।

Currently Selected:

लूका 2: KFX-NT

Highlight

Copy