लूका 8

यीशु री सेवा केरनु आल़ी बेटड़ी

1ऐथा न बाद यीशु शहरा-शहरा न होर ग्राँ-ग्राँ न परमेश्वरै रै राज्य रै खुशी रै समादा रा प्रचार केरदै लागै, होर ते बारा च़ेले बी यीशु सैंघै ती, 2किछ़ बेटड़ी भी ती ज़ो बुरी आत्मा न होर बीमारी न ठीक केरीदी ती ते यीशु सैंघै ती होर ते ऐ सी: मगदला ग्राँ री मरियम मगदलीनी ज़ौसा न यीशुऐ सौत बुरी आत्मा खोली ती, 3राज़ा हेरोदेसै रै मुन्शी खुज़ै री लाड़ी योअन्ना, सुसन्नाह होर बोहू सारी बेटड़ी ती, ते आपणी कमाई न यीशु होर तिन्हरै च़ेले री सेवा केरा ती।

बेज़ा बाहंणु आल़ै रा उदाहरण

4ज़ैबै शहरा-शहरा न एज़िया लोकै री बोहू भीड़ यीशु हागै कठा हुई, ता यीशुऐ तिन्हां बै एक उदाहरण दैसु। 5“एक बेज़ै बाँहणु आल़ा बेज़ै बाँहदा लागा, बाँहदी घेरै किछ़ बेज़ा बौतै रै बौढ़ा न पौऊ होर लोकै री ज़ोंघा हेठै जैखडुआ, होर सर्गा रै सौ च़िड़ूऐ च़ुगू।” 6किछ़ बेज़ा रड़खड़ी ज़मीना पैंधै पौऊ, सौ बेज़ा निकता पर पांणी नी मिलणै री बजहा सैंघै ते बुटै शुकै। 7किछ़ बेज़ा कौन्डै रै झ़ौकड़ा ज़ोंदरै पौड़ू होर झ़ौकड़ बढ़ै होर तिन्हैं ते बुटै दबाऐ। 8“होर किछ़ बेज़ा शोभली ज़मीना न पौऊ, सौ बेज़ा निकता होर शौऊ गुणा फ़ौल़ आंणु।” तुंईन बाद यीशुऐ ज़ोरा सैंघै बोलू, “तुसै ज़ो शुणु सा तेथा बै ध्याना सैंघै शुणित्।”

उदाहरणा रा मतलब

9तेइरै च़ेले यीशु न पुछ़ू, “एई उदाहरणा रा मतलब कि सा?” 10तैबै यीशुऐ तिन्हां बै ज़वाब धिना, “तुसाबै परमेश्वरै रै राज्य रै भेदा री समझ़ धिनी सा, पर होरी बै ऐ उदाहरणा न दसिआ सा; तैबै

‘ते हेरिया भी नी हेरदै,

होर शुणिया भी नी शुणदै होर न समझ़दै’

बेज़ा बाहंणु आल़ै उदाहरणा रा मतलब

11 “ऐसा कथा रा मतलब ऐ सा कि बेज़ा परमेश्वरा रा वचना सा। 12किछ़ लोका बौतै रै बौढ़ा न पौऐ दै बेज़ै सांही सी। ऐ लोका परमेश्वरा रा वचन ता शुणा सी पर शैतान एज़िया तिन्हरै मना न तेई वचना बै नेआ सा, ताकि तिन्हैं वचना पांधै बशाह केरिया मुक्ति नी पाई लोड़ी। 13किछ़ लोका रड़खड़ी ज़मीना पैंधै पौऐ दै बेज़ै सांही सी, ते परमेश्वरा रा वचन ता शुणा सी होर वचना बै खुशी सैंघै ग्रहण बी केरा सी पर वचन तिन्हरै मनै री गहराई तैंईंयैं नी पुज़ै री बजहा सैंघै ते थोड़ी देर ता बशाह केरा सी पर ज़ैबै परीक्षा एज़ा सी ता ते तेई वचना पैंधै बशाह नी रखदै। 14होर झ़ौकड़ा न औल़ूदा बेज़ा सौ सा, ज़ुणियै वचन शुणू, होर दुनिया री चिंता, ढैबुऐ रा धोखा होर हर किस्मै री चीज़ा मौज़-मस्ती न फसा सी, होर तेथै री बजहा सैंघै ते परमेशवरा बै खुश केरना रा कोम नी केरदै। 15शोभली ज़मीना रा बेज़ा सौ सा, ज़ुणा वचना बै शुणिया ग्रहण केरा सी होर ते शौ गुणा फ़ौल़ आंणनु आल़ै बुटै सांही परमेशवरा बै खुश केरना रा कोम केरदै रौहा सी।

दिऊऐ रा उदाहरण

16 “कोई भी मांहणु दिऊऐ भकेईया भाँडै लाइया नी खौटदा, होर न ता तेइबै माँज़ै हेठै रखदा, पर दिऊऐ बै पकेईया उथड़ी ज़ैगा पैंधै रैखा सी ताकि भीतरै ऐणु आऐ बै प्याशा होला। 17किबैकि ज़ो किछ़ गैला छुपीदी ती, एक रोज़ सैभी लोका ते गैला ज़ाणनी, होर ज़ो किछ़ छुपीदी सा एक रोज़ सैभ लोका ते पूरै प्याशै न हेरणा। 18ऐबै होशियार रौहात् कि तुसै कौस रीतियै मेरी गैला शुणा सी? किबैकि ज़ुणी हागै सा तेइबै होर भी देणा, होर ज़ुणी हागै नी ऑथि तेईन सौ भी वापस मुँगिणा ज़ुणिबै सौ आपणा बुझा सा।”

यीशु री आमा होर भाई

19एक रोज़ यीशु री आमा होर होछ़ा भाई तिन्हां बै मिलदै आऐ, पर भीड़ै री बजहा सैंघै तै तिन्हां हागै नैंई पुजी सकै। 20तैबै कौसियै तेइबै बोलू, “तुसरै आमा होर भाई, बैहण बाहरै खड़ै सी: ते तुसा सैंघै मिलणा च़ाहा सी।” 21तैबै तेइयै ज़वाब धिना, “मेरी आमा होर भाई ता ऐ सी ज़ो परमेश्वरा रा वचन शुणा सी होर तिन्हां पैंधै च़ला सी”

यीशु आँधी बै शान्त केरा सी

22एक रोज़ यीशु आपणै च़ेले सैंघै एकी किश्ती पैंधै च़ढ़ै, होर यीशुऐ च़ेले बै बोलू, “एज़ा आसा समुन्द्रा पौरै बै ज़ाणा।” तैबै तिन्हैं किश्ती खोली होर ते ज़ाँदै लागै। 23ज़ैबै ते किश्ती च़लांदै लागै ती तैबै यीशु सुतादा ती। झ़ीला न औढ़-काठ आऊ होर किश्ती पांणी सैंघै भौरीदी लागी होर तिन्हरी ज़िन्दगी खतरै न पौई। 24तैबै तिन्हैं भेटी एज़िया सौ बझ़ेऊ होर बोलू, “गुरू जी, गुरू जी आसाबै बच़ात् आसै नाश होंदै लागैदै सी।” तैबै यीशुऐ औढ़-पाणी बै बोलू शान्त हो होर सौ शान्त हुआ 25तैबै यीशुऐ तिन्हां बै बोलू, “तुसै बशाह किबै नी केरू?” ते डौरै होर हैरान होईया आपु न बोलदै लागै, “ऐ कुण सा, ज़ो बागर ब्याना होर पाणी बै भी हुक्म देआ सा होर ते ऐईरी मना सी।”

यीशु बुरी आत्मा फैसूदै मांहणु बै ठीक केरा सी

26तैबै ते गिरासेनीयै रै तेई देशा न पुजै, ज़ुण गलीला रै सामनै ती। 27ज़ैबै यीशु बौढ़ा पैंधै किश्ती न उतरै ता तिन्हां बै तेई शैहरा रा एक मांहणु मिलू ज़ुणिबै बुरी आत्मा फैसीदी ती। सौ बोहू रोज़ा न झिकड़ै (कपड़ै) नीती लांदा होर न घौरा न नीती रौंहदा, सौ कब्रा न रौहा ती। 28ज़ैबै तेइयै यीशु हेरू ता सौ क्रींजा मारदा लागा होर तेइरै सामनै लोमै पौड़िया ज़ोरा सैंघै बोलू, “हे परमप्रधान परमेश्वरै रै बेटै यीशु, मेरा तौ सैंघै कि कोम? हांऊँ तुसा हागै अर्ज़ा केरा सा मुँभै कष्ट मता देंदै।” 29किबैकि यीशु तेसा बुरी आत्मा बै तेई मांहणु न फ़ेटै ज़ांणै री हुक्म देंदै लागै ती किबैकि सौ बुरी आत्मा तेई मांहणु बै घड़ी-घड़ियै आपणै वशा न केरा ती। लोका तेइबै शाँगीयै होर बेड़ियै लाइया बोना ती। पर सौ तिन्हां शाँगल़ी होर बैड़ी बै च़ोड़ा ती होर सौ बुरी आत्मा तेइबै सुनसान ज़ैगा न भगा ती। 30यीशुऐ तेईन पुछ़ू, “तेरा नाँ कि सा?” तेइयै बोलू “मेरा नाँ सेना सा,” किबैकि तेइबै बोहू सारी बुरी आत्मा फैसीदी ती। 31होर तिन्हैं तेईन अर्ज़ा केरी, “आसाबै नरका रै कुण्डा बै ज़ाणै रा हुक्म मता देंदैं।” 32तौखै ढौगा न सूँगरा रा एक छ़ुण्ड च़ौरदा लागादा ती। बुरी आत्मा यीशु हागै अर्ज़ा केरी, कि “आसाबै तिन्हां सूँगरा रै बिच़ा न ज़ाणै रा हुक्म दैआत्।” यीशुऐ तै बुरी आत्मा सूँगरा बै ज़ाणै धिनी। 33तैबै सौ बुरी आत्मा तेई मांहणु न निकल़िया तिन्हां सूँगरा बै फैसू होर सौ पूरा छ़ुण्ड ढौगै भयांऊ झ़ीला बै पौउ होर सौ खत्म हुआ

34सूँगरा च़ारनू आल़ै ऐ सैभ हेरिया भगै, होर ग्राँ न होर औरलै-पौरलै रै नगरा न ज़ाइआ होरी बै बी दैसू। 35होर लोका ऐ ज़ो हुआ ती तेइबै हेरणै री तैंईंयैं निकतै, होर यीशु हागै एज़िया ज़ुणीन बुरी आत्मा निकती ती, तेइबै यीशु री ज़ोंघा हागै सचेत बेठादा हेरू होर ते लोका डौरै। 36हेरणू आल़ै सैभी लोकै तिन्हां बै दसू कि ऐ मांहणु कैण्ढै तैरहा ठीक हुआ। 37तैबै गिरासेनी रै औरलै-पौरलै सैभी लोकै यीशु हागै इलाकै न फ़ेटै ज़ाणै री तैंईंयैं अर्ज़ा केरी; किबैकि तिन्हां बै बड़ी डौर पौई। यीशु झ़ीला न पार ज़ांणै री तैंईंयैं किश्ती न बेठै।

38ज़ुणी मांहणु न यीशुऐ बुरी आत्मा खोली ती सौ यीशु हागै अर्ज़ा केरदा लागा, “मुँभै आपु सैंघै ऐणै दै।” पर यीशुऐ तेइबै विदा केरिया बोलू; 39“तू आपणै घौरा बै ज़ा होर लोका बै दैस कि परमेश्वरै तेरी तैंईंयैं कैण्ढा नौखा कोम केरूदा सा। सौ मांहणु ग्राँ न ज़ाइआ सैभी लोका बै दसदा लागा कि यीशुऐ मेरी तैंईंयैं कैण्ढै बड़ै-बड़ै कोम केरै।”

यीशु याईरै री मूँईदी बेटी होर एक बीमार बेटड़ी बै ठीक केरा सा

40ज़ैबै यीशु वापस आऐ ता लोकै तिन्हरा स्वागत केरू होर खुशी-खुशी तिन्हां सैंघै मिलै, किबैकि ते बड़ी बैसब्री सैंघै तिन्हरा इंतज़ार केरदै लागैदै ती। 41होर हेरा, तैबै याईर नाँ रा एक मांहणु यीशु हागै आऊ ज़े कि आराधनालय रा मुखिया ती सौ यीशु री ज़ोंघा पैंधै पौऊ होर अर्ज़ा केरदा लागा, कि “मेरै घौरा बै च़ला।” 42किबैकि मेरी ऐकै बेटी सा ज़ो बारा बौर्षै री सा होर सौ मौरनु आल़ी सा। ज़ैबै यीशु ज़ांदै लागैदै ती तैबै बोहू सारै लोका तिन्हां पैंधै पौड़े ती। 43तौखै एक बेटड़ी ती ज़ुणिबै बारा बौर्षा न लोहू बैंहणै री बीमारी ती, होर तेसै आपणी सारी कमाई लाज़ी न खर्च़ केरी ती। तैबै भी सौ ठीक नी हुई। 44तेसै पिछ़ै न एज़िया यीशु रै कुरतू रा पाला छ़ुँगू होर तेसरा लोहू बैंहणा एकदम बंद हुआ। 45तैबै यीशुऐ बोलू, “हांऊँ कुणिऐ छ़ुँगू?” ज़ैबै सब लोका शुणिया मुकरदै लागै, तैबै पतरसै होर तेइरै सैंघियै बोलू, “ओ मालक, बोहू भीड़ै री बजहा लोका तुसाबै छुँगदै लागै सी।” 46पर यीशुऐ बोलू, “कौसियै हांऊँ छ़ुँगू सा, किबैकि मुँभै पता च़लू होर मूँ न शक्ति निकती।” 47ज़ैबै तेसै बेटड़ियै हेरू कि हांऊँ छ़ुपी नी सकदी सौ डौरी होर कोमदैआ यीशु री ज़ोंघा पैंधै पौई। तैबै तेसै सैभी लोका सामनै दैसू, तेसै कुणी बजहा सैंघै ते छ़ुँगै होर सौ कैण्ढै बीमारी न एकदम ठीक हुई। 48यीशुऐ तेसा बै बोलू, “बेटी तेरै बशाहै तू ठीक केरी, शान्ति सैंघै घौरा बै ज़ा।” 49ज़ैबै यीशु ऐण्ढा बोलदै लागै ती, तैबै कौसियै आराधनालय रै प्रधाना रै औखा न एज़िया बोलू, “तेरी बेटी मूँईदी सा, ऐबै गुरू बै कष्ट मता देंदै।” 50पर ज़ैबै यीशुऐ ऐ शुणू ता तिन्हां बै ज़वाब धिना, “डौरदा मत; सिर्फ़ बशाह रैख। ता तेसा ठीक होंणा।” 51ज़ैबै ते तेई घौरा बै पुजै ता यीशुऐ पतरस, होछ़ै भाई यूहन्ना, याकूब होर तेसा शोहरी रै आमा-बापू छ़ौड़िआ होर कोई आपु सैंघै भीतरै नी ऐणै धिनै। 52सैभै लोका तेसरी तैंईंयैं रौंदै लागै ती, पर यीशुऐ तिन्हां बै बोलू, “रोंदै मता; सौ मूंइंदी नी ऑथि, पर सोंदी लागी सा।” 53ते ज़ाणा ती कि, ऐ मुँइंदी सा यीशु रा मज़ाक उड़ांदै लागै। 54पर यीशुऐ तेसरा हौथ ढौकिया बोलू, “हे बेटी उठ!” 55तैबै सौ ज़िन्दी हुई, होर सौ एकदम खड़ी हुई, तैबै यीशुऐ तिन्हां बै बोलू ऐसा बै किछ़ खाँणै बै दैआत। 56तेसरै आमा-बापू हैरान हुऐ, पर यीशुऐ तिन्हां बै चेताऊणी धिनी ज़ो किछ़ औखै हुआ सा, कौसी बै हेरेइत दसदै।

Currently Selected:

लूका 8: KFX-NT

Highlight

Copy