मरकुस 15

पिलातुसा रै सामनै यीशु

1होर दोथ होंदैआ तुरन्त मुख्यपुरोहिते, स्याणै, होर शास्त्रियै बल्कि सैभी महासभा रै लोकै यीशु बोनणै द्याऊ, होर सौ नेइया पिलातुस राज़पाला रै हौथा न धिना।

2होर राज़ा पिलातुसै यीशु न पुछ़ू, “तुसै कि यहूदी लोका रै राज़ा सी?” यीशुऐ ज़वाब धिना, “कि तू आपुऐ ता बोलदा लागा सा।”

3होर मुख्यपुरोहित तेई पैंधै बोहू गैला रा दोष लांदै लागै ती। 4पिलातुसै यीशु फिरी पुछ़ू, “तू कि कोई ज़वाब नी देंदा, हेर ऐ लोका तौ पैंधै केतरी गैला रा दोष ला सी?” 5यीशुऐ फिरी भी कोई ज़वाब नी धिना, औखै तैंईंयैं कि पिलातुसा बै भी हेरानी हुई।

मौऊती रा हुक्म

6होर सौ ऐसा फसह रै त्यौहारा न कोई भी एक कैदी बै ज़ुणिबै लोक चाहा ती, तिन्हरी तैंईंयैं छ़ौड़ा ती। 7तेई बौगता बरअब्बा नाँ रा एक डाकू किछ़ लोका सैंघै कैदखानै न रखू ती, ज़ुणियै हत्या केरी ती, ज़ैबै तिन्हैं रोमी सरकारा रै बरोधा न बलवा केरू ती। 8होर सैभी री भीड़ ऊझै जाईया अर्ज़ा केरदी लागी, कि आसरी तैंईंयैं ज़ैण्ढा तू केरदा आऊ सा तैण्ढा केर। 9पिलातुसै तिन्हां बै ज़वाब धिना, “तुसै चाहा सी कि हांऊँ तुसा री तैंईंयैं यहूदी रै राज़ा बै छ़ौड़नू?” 10किबैकि सौ ज़ाणा ती, कि मुख्यपुरोहिते सौ जलन केरिया ढौकणै द्याऊ सा। 11पर मुख्यपुरोहिते लोका भड़काए ती, कि बरअब्बा बै आसरी तैंईंयैं छ़ौड़। 12ऐ शुणिया पिलातुसै तिन्हां लोका न फिरी पुछ़ू, “कि ज़ुणिबै तुसै यहूदी रा राज़ा बोला सी, तेई सैंघै हांऊँ कि केरनु?” ते लेरा मारिया बोलदै लागै कि तेइबै क्रूसा पैंधै च़ढ़ा। 13पर ते होर ज़ोरा सैंघै लेरा मारदै लागै, “कि तेइबै क्रूसा पैंधै च़ढ़ा।” 14पिलातुसै तिन्हां बै बोलू, “किबै, ऐईयै कि बुरा कोम केरू सा?” पर तै होर भी जौरे सैंघै चीखे, “तेइबै क्रूसा पैंधै च़ढ़ा।” 15तैबै पिलातुसै भिड़ा बै खुश रैखणै री तैंईंयैं, बरअब्बा डाकू तिन्हरी तैंईंयैं छ़ौड़ू, होर यीशु बै कोड़ै लाईया तिन्हरै हवालै केरू कि क्रूसा पैंधै च़ढ़ा।

सपाई द्वारा यीशु री बेइज़ती

16होर सपाहिये सौ किलै रै आँध्रलै ब्राम्दै बै नेऊ ज़ुण न्याय री ज़ैगा ती होर सारी सैना री पलटन तौखै कठा केरिया शाधी। 17होर तिन्हैं तेइबै बैंगनी रंगा रा झिकड़ा लाऊ, होर कौन्डै रा मुकट बणाईया तेइरी मुँडी न लाऊ। 18होर ऐ बोलिया तेइबै नमस्कार केरदै लागै, “कि ओ यहूदी रै राज़ा, नमस्कार!” 19होर ते तेइरी मुँडी न नगाल़ी रै डँडै सैंघै मारदै, होर तेई पैंधै थूकदे, होर घुटनै पैंधै बैशिया तेइबै नमस्कार केरदै लागे। 20होर ते ज़ैबै तेइरा मज़ाक उड़ाइया बेठै, ता तेई पैंधै न बैंगनी झिकड़ै खोलिया तेइरै झिकड़ै लायै, होर सौ क्रूसा पैंधै च़ढ़ाणै री तैंईंयैं बाहरै नेऊ।

यीशु रा क्रूसा पैंधै च़ढ़ाया ज़ाणा

21होर सिकंदर होर रुफुस रा बापू, शमौन नाँ रा एक कुरेनी नगरा रा मांहणु ज़ुण छेता न बापिस ऐन्दा लागा ती, तिन्हैं सौ बिना मतलबै ढौकू कि यीशु रा क्रूस च़कला। 22होर ते तेइबै गुलगुता नाँ री ज़ैगा पैंधै, ज़ुणिरा मतलब खोपड़ी री ज़ैगा सा आंणु। 23होर ते यीशु बै गन्धरस मिलूदा अँगूरा रा रस पियांदे लागै, पर तेइयै नैंई पिऊ। 24तैबै तिन्हैं सौ क्रूसा पैंधै च़ढ़ाऊ, होर तेइरै झिकड़ै पैंधै चिट्ठी पाईआ, कि कुणी बै कि मिलला, होर बोंडै। 25ज़ैबै तिन्हैं सौ क्रूसा पैंधै च़ढ़ाऊ ती, तैबै दोथकै नौऊ बज़ै ती। 26होर तेइरा दोषपत्र तेई पैंधै लाऊ कि “यहूदी रा राज़ा।” 27होर तिन्हैं तेई सैंघै दुई डाकू, एक दैहिणै धिरै ता दुज़ा बांऊँई धिरै क्रूसा पैंधै च़ढ़ाये। 28तैबै पवित्र शास्त्रा न लिखूदा सौ वचन पूरा हुआ, कि अपराधी सैंघै तेइरी गिणती हुई। #यशा. 53:12. 29होर बौता न ज़ाणू आल़ै मुँडी थलाई-थलाइया ऐ बोलिया तेइरी निन्दा केरा ती, “कि वाह! मन्दिरा बै चोड़िया, त्रा रोजा न बनाणु आल़ै!#भज. 22:7; भज. 109:25. 30क्रूसा पैंधै न उतरिआ आपणै आपा बै बच़ाई लेया।” 31ऐण्ढी तैरहा मुख्यपुरोहिता भी, शास्त्रियै समेत, आपु न मज़ाक केरिया बोला ती, “कि ऐईयै होर लोका बच़ाए सी, पर आपु बै नैंई बच़ाई सकदा। 32अगर इस्राएला रा राज़ा, मसीह, ऐबै क्रूसा न उतरला, ता आसा हेरिया बशाह केरना।” होर ज़ुण क्रूसा पैंधै तेई सैंघै च़ढ़ाये ती, ते भी तेइरी बुराई केरा ती।

यीशु रा आखरी शाह

33होर ध्याड़ा च़ढ़ने पैंधै सारै देशा न निहारा हुआ, लगभग त्राई बाज़ै तक रौहू। 34त्राई बाज़ै न बाद यीशुऐ ज़ोरै री आवाज़ा न बोलू, “इलोई, इलोई, लमा शबक्तनी?” ज़ुणिरा मतलब सा, “ओ मेरै परमेश्वर, ओ मेरै परमेश्वर, तैं हांऊँ किबै छ़ौड़ू?”

35ज़ो लोका सैंघै खड़ै ती, तिन्हां मौंझ़ै केतरै ऐ शुणिया बोलदै लागै, “हेरा, ऐ एलिय्याह बै पुकारदा लागा सा।” 36होर एकियै ठोर मारिया स्पंज सिरकै न चौकू होर नगाल़ी रै डँडै न रखिया तेइबै चुसाऊ होर बोलू, “रुका; हेरणा, कि एलिय्याह ऐईबै उतारने री तैंईंयैं एज़ा सा कि नैंई।” 37तैबै यीशुऐ बड़ी ज़ोरै री आवाज़ केरिया प्राण छ़ौड़ै। 38तैबरै मन्दिरा रा पर्दा ऊझै न बुनै ढौई च़िरूआ होर दुई टुकड़ै हुऐ। 39ज़ुण सूबैदार तेई सामनै खड़ा ती, ज़ैबै यीशु ऐण्ढा प्राण छ़ौड़दा हेरू, ता तेइयै बोलू, “कि सच़िऐ ऐ मांहणु, परमेश्वरा रा बेटा सा!”

40कई बेटड़ी बी दूरा न हेरदी लागी ती तिन्हां मौंझ़ै मरियम मगदलीनी होर होछ़ै याकूब होर योसेसा री आमा मरियम होर सलोमी ती। 41ज़ैबै यीशु गलीला न ती, ता यीशु पिछ़ै औंढा ती होर तेइरी सेवा केरा ती, होर भी बोहू बेटड़ी ती ज़ुण तेई सैंघै यरूश्लेम शैहरा बै आई ती।

यीशु रा पौथिया ज़ाणा

42ज़ैबै सौंझ़ होंणु आल़ी ती, तैबै बशाँ रा ध्याड़ा लगभग ऐणु आल़ा ती। 43अरिमतिया ग्राँ रा रौहणु आल़ै युसूफ आऊ, ज़ुण एक मशहूर मंत्री होर आपु भी परमेश्वरा रै राज्य री गैला केरदै रौहा ती, सौ हिम्मत केरिया राज़ा पिलातुसा आगै नौठा होर यीशु री लाश मोंगी। 44पिलातुस ऐ शुणिया हैरान हुआ कि यीशु मूँआ सा, तैबै तेइयै सुबैदार शाधाऐ ज़ुणियै यीशु क्रूसा पैंधै च़ढ़ा ती होर तिन्हां न पूछू़, “कि यीशु पैहलै न मूँआ सा?” 45ज़ैबै सूबैदारै बै पुछ़िया सारा हाल पता केरू, तैबै लाश यूसुफा बै धिनी। 46तैबै तेइयै एक मलमलै रा कफन लेइया आंणु, होर लाश उतारिआ तेसा कफना न लपेटी, होर एक कब्रा न ज़ुण पात्थरा न कोती ती रखी, होर कब्रा रै दुआरा न एक बड़ा पात्थर रखू। 47होर मरियम मगदलीनी होर योसेसा री आमा मरियम हेरदी लागी ती, कि सौ कौखै रैखू।

Currently Selected:

मरकुस 15: KFX-NT

Highlight

Copy