मरकुस 16

यीशु रा ज़िन्दा होंणा

1ज़ैबै बशाँ रा ध्याड़ा निभु, तैबै मरियम मगदलीनी, होर याकूबा री आमा मरियम, होर सलोमीऐ किछ़ खुशबूदार चीज़ा लेइया आंणी, कि एज़िया तेइरै शरीरा पैंधै तेल मौल़ली। 2हफ्ते रै पैहलै ध्याड़ै (तुआरा बै) दोथियै, ज़ैबै सूर्य निकता ती, ते कब्रा पैंधै आई, 3होर आपु न बोला ती, “आसरी तैंईंयैं कब्रा रै द्वारा पैंधै पात्थर कुणिऐ लुढ़काणा?” 4ज़ैबै तिन्हैं हेरू, कि पात्थर लुढ़कुदा सा! सौ बड़ा पात्थर ती। 5होर कब्रा आँध्रै जाईया, तिन्हैं एक ज़ुआन मांहणु शेतै झिकड़ै लाईया दैहिणै बेठादा हेरू, होर बोहू हेरान हुई। 6तेइयै तेइबै बोलू, “हैरान मता होंदै, तुसै यीशु नासरी बै, ज़ो क्रूसा पैंधै च़ढ़ाऊ ती, तोपा सी। सौ ज़िन्दा हुआ, औखै नैंई ऑथि, ऐ सौ ज़ैगा सा, ज़ौखै तिन्हैं सौ रैखु ती। 7पर तुसै ज़ाआत्, होर तेइरै च़ेले होर पतरसा सैंघै बोला, कि तेई तुसा न पैहलै गलील ज़िलै बै ज़ाणा; ज़ैण्ढा तेइयै तुसा सैंघै बोलू ती, तेई तुसाबै तौखै मिलणा।” 8होर तै निकल़िया कब्रा न भैगी; किबैकि कोमणी होर घबराहट तिन्हां मौंझ़ै छाई ती, होर तिन्हैं कोई सैंघै किछ़ नैंई बोलू, किबैकि तै डौरा ती।

मरियम मगदलीनी बै यीशु हेरुआ

9हफ्ते रै पैहलै ध्याड़ै (तुआरा बै) दोथ होंदैआ सौ ज़िन्दै होईया पैहलै-पैहलै मरियम मगदलीनी बै, ज़ुणी मौंझ़ै न तेइयै सौत बुरी आत्माएँ खोली ती, हेरूई। 10तेइयै जाईया तिन्हरै सैंघी बै ज़ो दुःखा न डूबै ती होर रोंदै लागै ती, समाद धिना। 11होर तिन्हैं ऐ शुणु कि सौ ज़िन्दा सा होर मरियमै सौ हेरू सा, बशाह नैंई केरु।

दुई च़ेले बै यीशु हेरूआ

12ऐथा न बाद सौ दुज़ै रूपा न तिन्हां मौंझ़ै दुई च़ेले बै ज़ैबै ते ग्राँ धिरै बै जाँदै लागै ती, हेरूआ।

13तिन्हैं बी जाईया होरी बै ऐ समाद धिना, पर तिन्हैं तिन्हरा बी बशाह नी केरू।

बड़ा हुक्म

14बादा न सौ तिन्हां ग्यारा बै भी, ज़ैबै ते रोटी खाँदै बेठै ती हेरूआ, होर तिन्हरै कम बशाह होर कठोर मना री तैंईंयैं सौ झिड़कै किबैकि ज़ुणियै सौ ज़िन्दै होंणै न बाद हेरू ती, तिन्हैं तेइरा बशाह नैंई केरु।

15होर तेइयै तिन्हां सैंघै बोलू, “तुसै सारै दुनिया न जाईया सारी दुनिया रै लोका बै खुशी रै समादा रा प्रचार केरा। 16ज़ो कोई बशाह केरला होर बपतिस्मा लेला तेई, मुक्ति पाणी, पर ज़ो कोई बिश्वास नैंई केरला, तेई दोषी बैणना। 17होर बशाह केरनु आल़ै री तैंईंयैं ऐ नशाण कि तिन्हां मेरै नाँ न बुरी आत्माएँ खोलणी; नोंऊँई-नोंऊँई भाषा बोलणी। 18तिन्हां कीड़ै च़कणै, होर अगर तै जेहरली चीज़ा पीलै तैबै भी तिन्हां रा कोई नुकसान नैंई होंणा; तिन्हां बीमारा पैंधै हौथ रखणै, होर तिन्हां ठीक होंणा।”

यीशु रा स्वर्गा बै ज़ाणा

19तैबै प्रभु यीशु तिन्हां सैंघै गैला ढूणनै न बाद स्वर्गा पैंधै च़किया नेऊ, होर परमेश्वरा रै दैहिणै धिरै बेठा (1 पतरस 3:22)। 20होर तिन्हैं निकल़िया हर ज़ैगा प्रचार केरू, होर प्रभु तिन्हां सैंघै कोम केरदा रौहू, होर तिन्हैं चमत्कारा रै द्वारा रिहाऊ कि वचना सच़ा सा। आमीन।

Currently Selected:

मरकुस 16: KFX-NT

Highlight

Copy