Yeunossak kon Wotokoyi 4
4
Peter Molopai John Wechi Eke Ton Yemloto Po
1Peter molopai John tawonnan uselupa lùppù tùse paatele yamùk, Katù yùwùk yelasu pe tùwessan yepulu molopai Sadducee yamùk uyàpùppù tok piyak. 2Tok we'naikasak wechippù, masapùla tok uya kappon yamùk yenupa pàk, molopai Jesus yau iwelichak lùppù we'wuluukatok yekama tok uya pàk. 3Màlàyau tok uya Peter molopai John tawonnan yachippù molopai patikichi tak tok uya tok tùlùppù pata wemapù yakon wei pe ponalà, masapùla ko'man pe kulu iwechi pàk. 4Tùse tukke kappon yamùk itekale yetan nan nùssan uya ailon teppù, molopai kàyik yamùk neken wenappù 5,000 yailà'ne là.
5Iwemassak pe Jew yamùk yepulu yamùk, Eke ton, molopai Law pàk enupannan wepilipùppù Jerusalem pona. 6Tok wessepoloppù Eke kulu paatele Annas, Caiaphas, John, Alexander, molopai tùulon kon eke kulu paatele tonpa yamùk pokonpe. 7Tok uya Peter molopai John nepùppù temloto kon pona, molopai tok uya tok yekamappoppù, “Atta ken sàlà mùkuttantàu? Yà'là yekkwa ken meluntà apyau'nokon nai, wapùla ànùk yesek ken mapulàtantàu?” tukaik.
8Peter, iwanùssak Wakù Akkwalù ke uya tok maimu yeikuppù, “Kappon yamùk yepulu molopai Eke ton. 9Ina yekamappopàtù sàlà pe wakù kussak lùppù tùusasen pen kàyik pàk yau, molopai yà'là kasa là ipittàppù pàk, 10Ittutàk kon, molopai tàwà tamù'nawàlà kappon tamùk Israel pon kon nùttui, pùsàlà kàyik wechi satippe eyemloto kon po tamù'nawàlà ichipittàsak Jesus Christ Nazareth pon yesek meluntàlù yai, mùkkàlà ànpukapàtùppù kon pulusuk pona, molopai Katù nùwuluukappù weli'nàtok yapai. 11Jesus mùkkàlà Katù Maimu uselupatok ipàk, màlà tàk amyamlo tapùi yamùn nan nùnulunpappù, wenasak man tapulàsen pe kulu yà'làlà yentai,’ tukaik. 12Wepùikattàntok wessepolo màlà mùkkàlà neken winà. Masapùla ànù'là yesek pùla iwechi màlà sàlà non po Katù nùtùlùppù kappon yamùk piyak wepùikattàntok iwinà pe,” tukaik.
13Jew yamùk yepulu ton usenumenkappù kulu màlà Peter molopai John tawonnan wettalipa pùla iwechi pàk, molopai ichenupasak kon pe pùla tok wechi tùulon kon kappon yamùk kasa ittu tùuya'nokon pàk. Màlàpàk tok uya Jesus ya'lon kon nà lùssan pe tok wechi ittuppù. 14Tùse yà'làlà tetok tok uya pùla iwechippù, masapùla kàyik ichipittàsak lùppù wechi satippe molo Peter molopai John tawonnan pokonpe pàk. 15Màlàyau Jew yamùk Yepulu ton uya tok wepakka toppe tùpyapai'nokon yekamappù molopai tok uselupappù tùyiwalà'nokon. 16“Yà'là pe sàlà pùsamlo kàyik yamùk kupù?” tukaik tok usekamapopàtùppù. “Tamù'nawàlà Jerusalem pon kon uya ittu màlà sàlà tùkussen yentaino wekkussak tok yai, molopai ailon pen màlà, te kùuya'nokon pen màlà ipàk,” teppù tok uya. 17Tùse sàlà useta miya kappon yamùk kùlottawàlà tukaik tok yekamapopai man, ànù'là yelupa tok uya Jesus yesek yai tu'ma tukaik,” teppù tok uya. 18Màlàyau tok uya Peter molopai John tawonnan kà'matu'mappù. Molopai tok uya yà'là yattai là mùkyamlo uselupa wapùla kappon yamùk yenupa tok uya Jesus yesek yai tukaik yekamapppù.
19Tùse Peter molopai John tawonnan uya tok maimu yeikuppù, “Amyamlo pe ittutàk kon i'nai wechi ikasa Katù yenu yau, amaimu kon yawàlà ka' we'nàtok lù wapùla Katù Maimu yawàlà we'nàtok. 20Masapùla ina weleuta tùuselupa kon tùneneppù kon molopai tùnetappù kon pàk yeselùk pùla man,” tukaik. 21Jew yamùk Yepulu ton uya tok yekamappoppù meluntà peiwa, tok uselupa Jesus yesek pàk tukaik. Màlàyau tok nonkappù tok uya. Tok uya tok talumattàtok tùuya'nokon woton yepolo pùla iwechippù, masapùla kappon yamùk uya Katù yapulà pàk, màlà iwekkussak lùppù pàk. 22Masapùla mùkkàlà kàyik Katù uya ipittàntok tùuya meluntàlù yenpoikappù ipàk lùppù wechippù màlà 40 yentai ikilichimochiyi.
Ailon Tawonnan Wàpùlema
23Tùnonkasak kon pe là, Peter molopai John tawonnan wennapoppù tùtonpa kon yamùk piyak molopai tok uya yà'là teppù là Eke ton paatele yamùk yepulu ton molopai Eke ton uya yekamappù tok pàk. 24Yetasak tùuya'nokon yau, tamù'nawàlà tamùkke tok wàpùlemappù Katù pàk, “Itepulu, epùn, non, palau molopai tamù'nawolon yawon kon konekanàippù! 25Wakù Akkwalù winà euselupappù ina tamo David, ayapyoto yai, ‘Yà'là pe iwechi pàk Jew yamùk pen wechi màlà àsà pe. Yà'là pe iwechi pàk kappon yamùk wepanta'ma Katù winàkàik yà'là woton pe pùla là? 26Kin yamùk non pon kon wekoneka tùwepanta'matok kon pe, molopai itepulu yamùk wessepolo tamùkke, Itepulu Katù molopai Christ winàkàik,’ te ya yau. 27Ailon pe iwechippù Herod molopai Pontius Pilate tawonnan wessepoloppù sàlà pata yau, Jew yamùk pen molopai Israel yamùk pokonpe Jesus talumattàik, wakù kulu ayapyoto Christ ananùmùppù lùppù. 28Tok wepilipùppù, tamù'nawàlà àmàlà emeluntàlù molopai eyeselu yau ànkupùppù iwekkutoppe kusse. 29Molopai sàlà pe, Itepulu, yenkà sa'man pe tok uselupappù. Molopai ina ayapyoto ton uselupa toppe eyekale pàk ikukkà tùwe'namaik pùla. 30Eyemyatù yenkakà, ipittànse, molopai yà'làlà wakù wapiya yensak lùppù pen enumenkannan wekkutoppe ikukkà, wakù kulu ayapyoto Jesus yesek yai,” teppù tok uya Katù pàk. 31Tok wàpùlema kassak yau, màlà pata tok wettok yau utattù'mappù. Tamù'nawàlà tok wanùssak wechippù Wakù Akkwalù ke molopai tok wepyattàppù Katù yekale yekama pàk meluntà pe.
Tamù'nawolon tamùkkenan
32Ailon tawonnan wechippù tewin ichenumenkatok molopai tewin itewan. Ànù'là uya temamin pàk uponalok sàlà teppù pen, tùse tok uya tamù'nawolon tùpyawon'nokon yekamùppù tùklottau'nokon. 33Eke meluntà ke yeunossak kon uya Itepulu Jesus we'wuluukappù yekamappù molopai wakù pe Katù wettok wechippù tok po. 34Ànù'là pùla iwechippù pùsamlo kùlottau yà'làlà iche kulu tùwessen. Masapùla mùkyamlo umà yesak wapùla tapùi yesak ton nà uya ichilanmappù molopai pùlayatta nepùppù tok uya yeposak lùppù itepeppù pe, 35molopai tok uya itùlùppù yeunossak kon yemyak. Molopai pùlayatta pantakappù tok uya tamù'nawolon kon yemyak iche kulu tok wettok yawàlà.
36Molopai wa iwechippù mùkkàlà Joseph, Levite pe iwechi, iwentusak lùppù Cyprus po, mùkkàlà yeunossak kon nesatù Barnabas tukaik, meluntàlùnpanài te ya pe iwechi. 37Tù'mà chilanmappù ya pùlayatta nepùppù ya molopai itùlùppù ya yeunossak kon yemyak.
Currently Selected:
Yeunossak kon Wotokoyi 4: PNTR
Highlight
Share
Copy
Want to have your highlights saved across all your devices? Sign up or sign in
Patamuna New Testament Revised © United Bible Societies, 1973, 2019.
