Yeunossak kon Wotokoyi 5
5
Ananias Molopai Sapphira
1Tùse kàyik wechippù molo Ananias itesek, molopai inoppù yesek wechippù Sapphira. Pùsamlo uya tù'mà kon chilanmappù, 2tùse pùlayatta tonpa kupùppù ya tùponalok kon pe. Inoppù uya ittuppù, molopai iwà'nànsak lùppù tùlùppù ya yeunossak kon yemyak. 3Peter uya, “Ananias, yà'là peichi iwechi pàk Settan uya eyewan yanùkkasak màlà, aukaseita pa Wakù Akkwalù winàkàik. Umà yepeppù pe enepoloppù pùlayatta tonpa kupù tùpo àponalok pe? 4Màlà umà chilanma auya wapiya àponalok pe iwechippù màlà, molopai ichilanma auya tùpo pùlayatta wechippù àponalok pe. Yà'là pe ken uchi iwechi pàk mesenumenkai eyewan yau sàlà kupù pa? Kappon yamùk winàkàik kasei pe ewessak pen màlà, tùse Katù winàkàik!” teppù ipàk. 5Yetasak tùuya pe là Ananias wekkawai'mappù ekek pe. Molopai tamù'nawàlà sàlà yetan nan nùssan usenalippasak wechippù. 6Umoine ton we'wuluukappù, itàkàpù wontùppù tok uya, molopai yenpakkappù tok uya iwu'nattàse.
73 hours tùpo inoppù wewomùppù, yà'làlà wekkupùppù ittuppù ya pen. 8Peter uya yekamappoppù, “Yekamakà upàk, sàlà neken na' màlà tamù'nawàlà pùlayatta enepoloppù kon umà pàk?” tukaik. “Ewaik, sàlà neken màlà,” tukaik yeikuppù ya. 9Màlàyau Peter uya, “Yà'là peichi iwechi pàk Itepulu Yakkwalù ittuiche asak ewessak kon màlà? Masa yetakà, kàyik yamùk atayappù wu'nattàn nan nùssan manatta po man, molopai eyenpakka nàlà tok uya màlà!” teppù ipàk. 10Màlà yattai là asse'ne iwekkawai'mappù itta piyau, iwelikùppù. Màlàyau nen uchi umoine ton wewomùppù molopai tok uya iwelichak yepoloppù, tok uya yenpakkappù, molopai iwu'nattàppù tok uya itayappù piyau. 11Tamù'nawàlà kappon yamùk sochi tawon kon molopai tamù'nawàlà tùulon kon usenalippasak wechippù sàlà yetasak tùuya'nokon yau.
Katù Meluntàlù Usenpoika
12Tukke tensan pen yamùk, enumenkan nan wekkupùppù màlà kappon yamùk kùlottau yeunossak kon winà. Tamù'nawàlà ailon tawonnan wessepoloppù màlà tamùkke Katù yùwùk we'na tau Solomon patassek yau. 13Tùulon kon ànù'yan nà tok kùlottawon kon pen wechippù tok kùlottak itàpai pùla, kappon yamùk uselupa lànen wakù pe tok pàk tùse. 14Tùse màlà yentak tukke kàyik yamùk molopai nossan yamùk uya ailon teppù Itepulu pàk molopai mùkyamlo uya tok tonpattàppù. 15Wa iwechi pàk, kappon yamùk uya e'nek ton nepùppù asantak molopai tok nonkappù tok uya tok yapon yamùk po, Peter yakkwalùppù uya neken nà tok yappàttoppe iità yattai. 16Molopai tukke kappon yamùk uyàpùppù pata yamùk Jerusalem woino kon yapai. Tok uya e'nek ton nepùppù molopai mùkyamlo àli akkwalù ke iitakkwalùttàsak kon, molopai tamù'nawàlà tok uchipittàppù.
Yeunossak kon Talumattàppù
17Màlàyau Eke kulu paatele molopai tamù'nawàlà iwechi yakon non, Sadducees tonpa yamùk, wanùpùppù kùlùmàlunnàtok ke. 18Tok uya yeunossak kon yachippù molopai tok uya tok tùlùppù ayupo patikichi tak. 19Tùse màlà yewalupàyi tau Itepulu inchelùyi uya patikichi mùlatta yakkokappù, yeunossak kon yenpakkappù ya, molopai tok pàk, 20“Itàtàk kon Katù yùwùk tak à'mùssakkatan tàk kon, molopai sàlà emennak wema'nàtok yekamatantàk kon kappon yamùk pàk,” teppù ya. 21Yeunossak kon wechippù imaimu yawàlà, màlàyau ko'làma tok wewomùppù Katù yùwùk tak, tok wepyattàppù màlà kappon yamùk yenupa pàk.
Eke kulu paatele molopai iwechi yakon non uya tamù'nawàlà Jew yamùk Yepulu ton kà'mappù tamùkke tùuselupa tok kon pe. Màlàyau tùmaimu kon yeunokoppù tok uya patikichi yennài nan piyak yeunossak kon nettoppe tok uya temloto kon pona. 22Tùse mùkyamlo tok neunokossan welepansak yau, tok yepolo tok uya pùla iwechippù. Màlàpàk tok wennapoppù Jew yamùk Yepulu ton piyak yekamase. 23“Patikichi tak ina welepansak yau manatta kiyittàsak sa'man pe yepoloi ina molopai yennài nan yene pàk nechii manatta po, tùse ina uya manatta yakkokasak yau ànù'là yepolo ina uya pùn!” teppù tok uya. 24Katù yùwùk yelasu ton yepulu molopai eke ton paatele yamùk yepulu ton uya sàlà yetasak yau, tok utaimelunpasak wechippù yà'là pe là yeunossak kon wechippù ànùttupai. 25Màlàyau kàyik wewomùppù, tok pàk, “Yetatàk kon! Kàyik yamùk patikichi tak àntùlùppù kon yamùk, satippe Katù yùwùk tau man kappon yamùk yenupa pàk!” teppù ya. 26Màlàyau Katù yùwùk yelasu yamùk utàppù tepulu kon pokonpe. Molopai yeunossak kon mùnappoppù tok uya. Tok uya tok yeka'nonkappù pen, masapùla tok usenalippappù, kappon yamùk uya tùwànà kon tàk ke yeselùkek iwechi pàk.
27Tok uya tok yewonnùpùppù molopai satippe Jew yamùk Yepulu ton yemloto po tok kupùppù tok uya. Molopai Eke kulu paatele uya tok yekamappopàtùppù. 28“Pùsàlà kàyik yesek yau kappon yamùk kùsenupatàu, nùkatai nàlà ku ina àpàkù'nokon, tùse enupantok auya'nokon utà kassak man tamù'nawàlà Jerusalem polo, molopai ina ànkuppai messatàik iwànài nan nùssan pe!” teppù tok uya. 29Peter molopai tùulon kon yeunossak kon uya yeikuppù, “Ina wechi nen Katù Maimu yawàlà sàlà, kappon pen. 30Ina kàipùnù yamùk Katùyi uya Jesus wuluukappù weli'nàtok yapai, ànwànàppù kon nùppù, yei pona tùpukapàsse. 31Molopai Katù uya iwuluukappù tùlaitanù yak, Itepulu pe molopai Pùikattànài pe. Kappon yamùk Israel pon kon welattàtoppe tùmakuyi kon winàpai. Tùmakuyi kon pàk usentuppantok yepotoppe tok uya. 32Ina mùkyamlo sàlà yamùk yekaman nan molopai nàlà Wakù Akkwalù, mùkkàlà Katù nùtùlùppù tùmaimu yawolon kon nà yemyak,” tukaik.
33Jew yamùk Yepulu ton uya yetasak yau, tok we'naikasak kulu wechippù màlàyau yeunossak kon àntùkkapai tok wechippù. 34Tùse tok tonpa, Pharisee Gamaliel itesek, law pàk enupanài, molopai eke kulu tamù'nawolon kon kappon yamùk nùnama, wà'mùssakappù Jew yamùk Yepulu ton kùlottau. Yeunossak kon yenpakka toppe malalà yekamappù ya. 35Màlàyau tok pàk “Israel pon kon kàyik yamùk, tùttuse ettàk kon yà'là pe là pùsamlo kàyik yamùk kupù auya'nokon yau. 36Wapiya Theudas usenpoikappù, eke pe iwekkupùppù. Màlàyau 400 yailà'ne kappon yamùk wessepoloppù ipyau. Tùse iwànàppù, màlàyau tamù'nawàlà ya'lon kon wetta'nùpùppù molopai iwotokoyi weleutappù. 37Sàlà ye'mappùtak, Judas Galilee pon usenpoikappù yà'là kaichalà là kappon yamùk wechi ittutok yattai, mùkkàlà uya nàlà kappon yamùk nepùppù te'mappù pàk, tùse iwànàppù nàlà molopai tamù'nawàlà ya'lon kon wetta'nùpùppù. 38Molopai wa iwechi pàk sàlà yekama uya àpàkù'nokon, yà'làlà kùkkuttàu pùsamlo kàyik yamùk winàkàik. Tàwà tok nechii, sàlà wekkuttok molopai wotoko wechi kappon nùkupùppù pe yau, iwekkupù pen màlà. 39Tùse Katù winàpai iyàssak pe iwechi yau, amyamlo uya tok yentaika pen màlà. Yattai pùla Katù winàkàik ewepanta'ma kon pe iwechi màlà!” teppù Gamaliel uya. Itepulu yamùk uya wa tetok ya kupùppù. 40Yeunossak kon kà'mappù tok uya, molopai tok ippoppàtùppù, molopai tok yàulàmappù tok uya tok uselupa tu'ma Jesus yesek yau tukaik. Molopai tok nonkappù tok uya. 41Yeunossak kon uya Jew yamùk Yepulu ton nàmàppù eke pe tùutauchinpatok ke. Masapùla wakù kuttok tok uya yattai wechippù wekuli'mantok yau, tok wettalumattàppù, Jesus yesek ponaloppe. 42Tok weleutappù pen wei kaichalà Katù yùwùk tau molopai kappon yamùk pata po tok uya kappon yamùk yenupappù molopai Wakù itekale Jesus wechi Christ pe yekamappù tok uya.
Currently Selected:
Yeunossak kon Wotokoyi 5: PNTR
Highlight
Share
Copy
Want to have your highlights saved across all your devices? Sign up or sign in
Patamuna New Testament Revised © United Bible Societies, 1973, 2019.
