Luke 23
23
Jesus wechi Pilate Yemloto Po
(Matthew 27.1-2, 11-14; Mark 15.1-5; John 18.28-38)
1Tamù'nawàlà tukkan kon kappon yamùk we'wuluukappù molopai Jesus yalàppù tok uya Pilate yemlotopona. 2Molo Jesus talumattà pe tok uselupappù, “Pùsàlà kàyik yepotai ina, ina tonpa yamùk yennaka ya. Caesar yemyak pùlayatta tùlù tok uya tukaik, molopai tùmàlà pe Christ pe nekkuttai, Kin pe,” teppù tok uya. 3Pilate uya yekamappoppù, “Jew yamùk kinù ken na' àmàlà?” tukaik. “Wa mùkayaik làkku,” tukaik Jesus uya yeikuppù. 4Màlàyau nen uchi Pilate uya eke ton paatele yamùk molopai tukkan kon kappon yamùk pàk, “Pùsàlà kàyik talumattàtok iwenai woton yeposak uya pùla man,” teppù. 5Tùse màlà yentak tok uya, “Enupantok tùuya ke wepanta'mantok samo'lùkayan kappon yamùk kùlottau! Tamù'nawàlà Judea yawàlà, iwepyattàppù màlà Galilee po, molopai nen uchi iyàssak man sàlà motak,” teppù.
Jesus wechi Herod Yemloto po
6Sàlà yetasak tùuya yau, Pilate uya, “Galilee pon ken na' pùsàlà kàyik?” tukaik tok yekamappoppù. 7Herod wettok itepulu pe pata, yapaino pe Jesus wechi ittusak tùuya yau, Pilate uya Jesus yeunokoppù Herod piyak. Herod wechippù nàlà màlà Jerusalem po màlà yattai. 8Herod utauchinpasak kulu wechippù màlà Jesus yensak tùuya yau, masapùla itekale yetappù ya màlà molopai enenpai kulu iwechippù tachin pe. Enpen iwechippù Jesus uya tùnkupù kupù yene tùuya pàk. 9Màlàpàk Herod uya Jesus yekamappopàtùppù tukke, tùse Jesus uya yeikuppù lùkkwà là pen kulu. 10paatele yamùk yepulu ton molopai Law pàk enupannan wechippù molo sattippe, molopai àli pe tok uselupappù Jesus winàkàik, italumattà pe. 11Herod molopai ichoichayi yamùk wàkklàppù màlà Jesus pàk, tok uya imottùnpappù. Molopai wakù pon yak tok uya ipontàppù molopai Pilate piyak tok uya yeunotukkappù. 12Màlà wei yattai là màlà Herod molopai Pilate tawonnan wenappù echi wechi yakon pe. Sàlà wapiya màlà esseyaton pe tok wechippù.
Iwàtok Yak Jesus Tùlùppù
(Matthew 27.15-26; Mark 15.6-15; John 18.39—19.16)
13Pilate uya eke ton paatele yamùk, ennài nan molopai kappon yamùk kà'mappù tamùkke, 14molopai tok pàk, “Pùsàlà kàyik nessak auya'nokon man upyak molopai kappon yamùk yennakayan mùkatàu. Sàlà pe tenpàssaik eyemloto kon po, tùse yà'là là àli pe iwettok yepolo uya pùla neppàssan iwinàkàik àli pe euselupappù kon nùppù. 15Herod uya nàlà àli pe iwettok yepolo pùla iwessak man, màlàpàk yeunottu'masak ya man kùpyakù'nokon. Yà'làlà àli kussak pùsàlà kàyik uya pùla man tùwelittok ipàkànsau woton pe. 16Màlàpàk ipoppàttoppe neken nà màlà ikupù uya molopai tàwà iità toppe,” teppù ya. [ 17Usentaka'nàppà pàk Uta'lettàntok yattai' ne Pilate uya tewinnà yachisak lùppù nonkapàtùppù màlà kappon yamùk ponaloppe.] 18Tamù'nawàlà tukkan kon kappon yamùk wentaimeppù màlà, “Iwàkà! Tàwà Barabas làkku inonkakà!” tukaik. 19Barabas yachisak wechippù màlà wepanta'mantok iwekkussak lùppù pata yau wenai, molopai kappon wàsak ya wenai. 20Pilate wechippù màlà Jesus ànonkapai, màlàpàk kappon yamùk yekamappo tu'mappù ya. 21Tùse tok wentaimeppù, “Tàwà ipukapàtù nechii pulusuk pona! Tàwà ipukapàtù nechii!” tukaik. 22Pilate uya tu'ma icholùwano itekkwa pe tok pàk, “Yà'là ken uchi àli kussak ya nai? Yà'làlà àli inkupùppù iwelittok ipàkànsau woton yepolo uya pùla man! Ipoppàtoppe neken nà ikupù uya màlà molopai tàwà inonka uya,” teppù. 23Tùse tùwentaimepàtù kon pàk tok wechippù eke pe, Jesus pukapàttoppe pulusuk pona. Màlàyau nen uchi tok wentaimepàttok uya Pilate yentaikappù. 24Màlàpàk Pilate uya, Jesus welittok yak itùlùppù, kappon yamùk uya yennasak pàk. 25Kàyik, iche tok wettok nonkappù ya màlà, mùkkàlà patikichi tak itùsak lùppù wepanta'mantok wenai molopai wàntok ya wenai, molopai Jesus tùlùppù ya kappon yamùk yemyak iche tùwettok kon kuttoppe tok uya.
Jesus Pukapàssak Pulusuk Pona
(Matthew 27.32-44; Mark 15.21-32; John 19.17-27)
26Soicha yamùk uya miya Jesus yalàppù màlà, tùutà kon yau kàyik yepoloppù tok uya Simon itesek, Cyrene pon, mailàpai eke pata yak tùuyàssen. Màlàyau tok uya yachippù, molopai pulusuk tùlùppù tok uya ipona, Jesus ye'mappù pàk yatoppe ya tok uya ikupùppù.
27Tukkan kon kappon yamùk utàppù màlà ya'là, tok kùlottau nossan yamùk wechippù màlà tùkalawù kon pàk, molopai tùwentaimepàtù kon pàk tùwessan Jesus wenai. 28Jesus welattàppù tok winàkàik molopai tok pàk, “Nossan yamùk Jerusalem pon kon! Kakalantàu uwenai tùse ewenai'nokon molopai àmunkà kon yamùk wenai làkku akalantàk kon. 29Masapùla pata weyu nùyàssan, ‘Tùutauchinpasan mùkyamlo nossan yamùk imunkà pùnon. Molopai mule ke iwentusak kon pen. Molopai manak, yu'nasak lùppù pen!’ te tok kappon yamùk uya yattai. 30Màlà yattai uchi kappon yamùk uya màlà wùk yamùk pàk, ‘Ettùlùkkwakà ina pona!’ te, molopai ikklù yamùk pàk, ‘Ina iwaputtàkà!’ te màlà. 31Masapùla sàlà yekkwa ton wekkuppù màlà yei wechi nulà lùppù tùse, yà'là kasa ken uchi iwechi pe nai yei wechi aipù pe yau?” teppù.
32Tok uya nàlà asa'lon kon kàyik yamùk àli ku'nàinan nùssan yalàppù tok wàtoppe Jesus pokonpe. 33Pata “Puppà Yàppù Lùppù” tukaik tesassen motak tùuyàssak kon yau, Jesus pukapàtùppù tok uya pulusuk pona, àli ku'nàinan nùssan pokonpe tewin kamik pen winà molopai tewin kamik winà tukaik. 34Jesus uya, “Tok pàk esentuppakà, Ukàippùnù. Yà'là kupù tùuya'nokon ittu tok uya pùla man,” teppù. Tok uya ipon pantakappù màlà tùklottau'nokon elekkwà lùkkwà tàk walai tenu'mapàsse. 35Kappon yamùk wechippù màlà satippe yene pàk, Jew yamùk yennài nan wàkklà Jesus talumattà pe tùse. “Tùulon kon pùikattànài ku mùkkàlà, tàwàichi nepùikattài, Katù nanùmùppù pe, molopai Christ pe tùwechi yau!” tukaik. 36Soicha yamùk wàkklàppù nàlà màlà ipàk. Tok uyàpùppù màlà ipyak so'li tinchisen ke ilepase. 37Molopai, “Epùikattàkà, Jew yamùk kinù pe ewechi yau,” teppù tok uya. 38Sàlà menukasak wechippù màlà itepoi, “Pùsàlà mùkkàlà Jew yamùk Kinù,” tawon.
39Tewin nà kàyik kappon wànàippù kaiwattàsak yei patài'masak pona uselupappù àli pe Jesus winàkàik. “Christ pen na' àmàlà? Epùikatàkàichi molopai ina nàlà ipùikattàkà!” tukaik. 40Tùse tùulon uya yàulàmappù, “Katù nama ken na' auya pùla nai? Talà we'nà'nokon man tamù'nawàlà weli'nàtok yau. 41Kùtalumattà nen sàlà ikasa, kùnkupùppù yepeppù yepolo nen sàlà nai'nùk. Tùse mùkkàlà uya yà'làlà iwalai pen nà kussak pùla man,” tukaik. 42Molopai Jesus pàk, “Kùyittuik tàwà Jesus, Kin pe àuyàpù yau!” teppù ya. 43Jesus uya, “Ailon kulu sàlà, sàlà pe upyau ewechi màlà epùn po,” teppù ipàk.
Jesus Welittok
(Matthew 27.45-56; Mark 15.33-41; John 19.28-30)
44Inakattapailà wei wettok yattai iwewalumamùppù, masapùla wei ulenpamù pùla iwechippù. Tamù'nawàlà ewalupà uya pata waputtàppù wei wetteilettà ponalà. 45Molopai awenek Katù yùwùk tawon iwakkàttok ike, solin pe tùwessen, wessala'moppù asa'là. 46Jesus wentaimeppù eke pe, “Ukàippùnù, eyemyak uyakkwalù nonka uya sàlà,” tukaik. Wate tùpo iwelikùppù. 47Soicha yamùk yepulu uya tùwekkussan yeneppù màlà, molopai Katù yapulàppù ya, “Ewaik, wakù pe pùsàlà kàyik wechippù pe man!” tukaik. 48Kappon yamùk yense iwepilichak kon uya tamù'nawolon tùwekkussan yeneppù, molopai tok wemeikuppù tùsewankono'maik, tùplopo kon wàpàtù pe. 49Tamù'nawolon kon wakù pe kulu Jesus ittun nan, molopai nossan yamùk ipàkàlà iitàsak kon Galilee poi wechippù mei satippe, sàlà yamùk yene pàk.
Jesus U'nattàtok
(Matthew 27.57-61; Mark 15.42-47; John 19.38-42)
50-51Kàyik wechippù màlà molo Joseph itesek, Jew yamùk patassek Arimathea pon. Wakù pe iwechippù màlà tùnamasen pe nàlà, Katù wettok itepulu pe uyàpù màmuku pàk tùwessen. Jew yamùk Yepulu yamùk tonpa pe lànen ichii'ma, tok usenumenkatok ikupù pàk molopai tok yeselu wechippù itewan yailà pùla. 52Iitàpù màlà Pilate piyak molopai Jesus yàkàpù yennappù ya ipàk. 53Màlàyau Jesus yàkàpù mokkappù ya pulusuk poi, molopai iwontàppù ya kuyalikku linen ke, molopai inonkappù ya uluwaik tùnakappù tàk yai yak. Emennak pe uluwaik wechippù màlà ànù'là napulàppù pe pùla. 54Pùlaite pe iwechippù màlà, molopai Jew yamùk wàlàkkattok yattai weppyattà winàkàik iwechippù.
55Nossan yamùk Jesus ya'là iyàssak kon Galilee poi utàppù màlà Joseph ya'là molopai uluwaik yeneppù tok uya molopai yà'là kasa là Jesus yàkàpù nonka sak yak. 56Màlà tùpo tok wemeikuppù màlà, molopai apoi'nan kalapa konekappù tok uya itàkàpù kalapaimatok woton.
Jew yamùk wàlàkkattok yattai tok wàlàkapùppù màlà, Moses winàpaino uya enupantok yawàlà.
Currently Selected:
Luke 23: PNTR
Highlight
Share
Copy
Want to have your highlights saved across all your devices? Sign up or sign in
Patamuna New Testament Revised © United Bible Societies, 1973, 2019.
