Mark 5
5
Jesus Uya Kàyik Àli Akkwalù Ke Ittakkwalùttàsak Ipittàppù
(Matthew 8.28-34; Luke 8.26-39)
1Jesus molopai ya'lon kon welepamùppù Galilee latoi pona Gerasa pon kon kùlottak. 2Kanau yapai Jesus uttà pe, kàyik uya yepoloppù uluwaik kùlottapai. Pùsàlà kàyik yau àli akkwalù wechippù màlà. 3Uluwaik yamùk kùlottau tùwemassen pe iwechippù. Ànù'là uya yaulonpàtù sa'man chin ke là yentai iwechippù. 4Tukke itekkwa itta molopai itemyatù yamùk yaulonpàtùppù, tùse echipalà taulonpàttok yattàpàtùppù ya molopai sa'man nà chin yatànài pe iwechippù tùtta ke. Meluntà pe kulu iwechippù ànù'là uya yeleutanùpù yentai. 5Tàwàlàlà ewalupàttau molopai weinai tùwentaimepàtù pàk iwechippù màlà uluwaik kùlottau, wùk polo là iwechippù. Tàk ke tùusattàpàtù pàk iwechippù.
6Mei lùiwa echi'ma Jesus yensak tùuya yau, ittaitunpappù. Tese'muyok iwenappù itemlotopo. 7Màlàyau iwentaimeppù eke pe, “Jesus, Àmàlà Eke Katù Mumu! Yà'là pe ken ukupù auya màlà? Katù ponaloppe tàwà eyekamappo uya sàlà, kùtalumattài!” tukaik. 8(Sàlà teppù ya màlà masapùla Jesus uya, “Epakkakà, àli akkwalù, pùsà kàyik yapai!” te pàk.) 9Jesus uya yekamapoppù, “Ànùk ken eyesek?” tukaik. Màlàyau yeikuppù ya, “Uyesek màlà Mob, tukke ina wechi pàk!” tukaik. 10Màlàyau Jesus pawanattà pàk iwechippù, “Tok kùseunokoi sàlà pata yapai,” tukaik.
11Màlà yattai màlà pata piyau puluku yamùk wechippù tùwemo kon pàk wùk pùlakun po. 12Màlàyau àli akkwalù yamùk uya ipawanatàppù, “Puluku yamùk kùlottak ina yeunokkà tok yak ina wewontoppe,” tukaik. 13“Tàwà tok nepakkai,” teppù ya. Tok wepakkappù kàyik yapai, molopai puluku yamùk yak tok wewomùppù. Puluku yamùk wechippù màlà tukke, 2000 kaichalon kon. Tok utàppù nen uchi asse'ne aitun pe aiko i'nauwon yailà epukaik tuna kak molopai tok unalàppù.
14Puluku yamùk yennài nan utàppù aitun pe pata pona yekamaik molopai umà yawon kon pàk là yekamaik. Màlàyau kappon yamùk utàppù yà'là pe là iwessak yense. 15Jesus piyak tùuyàssak kon yau, molo kàyik yeneppù tok uya tukkan kon àli akkwalù yamùk wettok yau. Chichiu pe iwechippù tùpon ke molopai wakù pe ichenumentok. Màlàpàk tok usenalippappù. 16Yennàinan nùssan uya yà'là kasa àli akkwalù yen lùppù kàyik wechippù yekamappù kappon yamùk pàk molopai puluku yamùk wechi yà'là pe yennài nan nùssan uya yekamappù tok pàk. 17Màlàyau, “Talà ewechi iche pùla ina man, itàkà,” teppù tok uya Jesus pàk.
18Kanau yak Jesus wenuku tùse àli akkwalù yenpù lùppù kàyik uya ipawanattàppù, “Aya'là ka' utà lù?” tukaik. 19Tùse Jesus uya inulunpappù, “Ennappok apata yak àtonpa yamùk kùlottak Itepulu uya àpùikattàsak molopai wakù pe iwessak àpàk yekamata” tei'ma. 20Iitàppù nen uchi màlà ten pan pata yamùk yau yekama pe. Jesus uya tùpùikattàsak yekamappù ya. Yetanài nan nùssan usenumenkappù kulu màlà.
Jairus Yenchi Molopai Nossan Jesus Pon Yappà'nàippù
(Matthew 9.18-26; Luke 8.40-56)
21Jesus wennappoppù tuna latoi pona, màlà motau, tukkan kon kappon yamùk wepilittukkappù iwoi. 22Jairus, synagogue yesak tonpa uyàpùppù molopai Jesus yene tùuya yau itta piyak iwettolùpattàppù. 23Màlàyau ipawanattàppù ya kulu màlà, “Uyenchi lùkwà tàwà e'neppe kulu man. Asse'neiwa àikkà, eyemyatù itùtanikkà ipona iwenna toppe,” tukaik. 24Jesus utàppù màlà ya'là. Màlàyau tukkan kon wechippù ipàkàlà. Tok wechito'chito'mappù iwinàkàik màwinàpai'ne.
25Molo nàlà nossan wechippù màlà 12 pe kilichimochi, mùn pàk e'neppe ikko'manpàssak. 26Tukkan kon nà tatta yamùk wechippù ipittàiche. Tamù'nawà tùpùlayattayi yu'makappù ya tipik pona, tùse ichipittà pùla iwechippù. Àsà pe nen uchi itepalan wenappù. 27Jesus uya e'nek ton ipittà yeta tùuya pàk, iitàppù ilinà kappon yamùk kùlottawàlà ite'mappù pàk. 28“Ipon neken nà yappàssak uya yau ken, uchipittà kulu ko,” te pàk iwechippù màlà. 29Ipon yappàtùppù ya, màlà yattai là immùntatok wa'munappù. Tùuchipittàsak tù'nau ittuppù ya tùutaimelunpatok yapai nen uchi. 30Asse'ne Jesus uya tapàikketù utà tapai ittuppù. Iwelattàppù ilinà kappon yamùk kùlottau. “Ànùk upon yappàtùi?” teppù ya. 31Inenupa ton uya, “ Kappon yamùk là na' uchi uya echito'chito'ma yenei'ma, ‘Ànùk uyappàtùi?’ tawon àmàlà,” teppù ipàk. 32Tùse tapà'nàippù yeneiche lùppù Jesus welattàpàtùppù ànùk pe là iwechi yeneiche. 33Mùkkàlà nossan uya yà'là kasa tùwessak ituppù. Màlàyau iyàpùppù tùwetalipaik kùkùkù pe. Tese'mu yok iwenappù itta piyak. Tamù'nawolon tùnkupùppù yekamappù ya ipàk. 34Jesus uya ipàk, “Uyenchi, ailon tetok auya uya eyipittàsak màlà. Itàkà wàlà'ka'nàtok yau, ittaimelunpatok pùla enakà,” teppù.
35Masa Jesus uselupa lùppù tùse, itekale ne'nài nan uyàpùppù Jairus yùwùk tapai. “Eyenchi nelikkappàssan. Yà'là pàk tachin pe là Enupanài wanittàpa pàk messan?” teppù tok uya Jairus pàk. 36Tok uselupa yetapàtùppù Jesus uya i'nùmla, tùse yelupappù ya, “Kesewankono'mai, ailon kakkà neken,” tukaik. 37Ànù'là utà ta'là iche pùla iwechippù tùse Peter, James, molopai yakon John tawonnan neken utàppù ya'là. 38Tok welepansak Jairus yùwùk motak yau Jesus uya utaimelunpan yeneppù, tukkan kon kappon yamùk wentaimepàtù molopai tok kalawù. 39Iwewomùppù molopai, “Yà'là wenai autaimelunpa kon màlà, yà'là pe iwechi pàk makalanyatàu? Mùkkàlà ulichan muleppù welichak pen màlà. Iwetun neken nen màlà,” teppù ya. 40Tok wàkklàppù ipàk. Màlàpàk tok yenpakkappù ya. Molopai mule kàippùnù, ichan molopai tùnenupa ton tawonnan neken yewonnùpùppù ya ta'là mule welichak patassek yailà. 41Ulichan muleppù yemyatù pàk yachippù ya, ‘Talita kumi’, tei'ma, “Ulichan muleppù, e'wuluukakà,” te ya pe màlà iwechi. 42Màlà yattai là asse'ne kulu ulichan muleppù we'wuluukappù molopai ichalàppù. (12 pe ikilichimochiyi màlà ulichan wechippù.) Sàlà wekkusak yau tok usenumenkappù. 43Màlàyau, “Sàlà kùsekamatàu ànù'là pàk,” teppù Jesus uya àsà pe tok pàk. “Iteipa woton ke neken ilepatàk kon,” teppù ya nàlà tok pàk.
Currently Selected:
Mark 5: PNTR
Highlight
Share
Copy
Want to have your highlights saved across all your devices? Sign up or sign in
Patamuna New Testament Revised © United Bible Societies, 1973, 2019.
