Mark 6
6
Jesus Nulunpappù Nazareth Po
(Matthew 13.53-58; Luke 4.16-30)
1Màlà tùpo Jesus wennappoppù màlà pata yapai tùpatasek Nazareth pona.Inenupa ton wechippù ya'là. 2Wàlàkka'nà weyu yattai, Jesus uya tok yenupappù synagogue tau. Tukke kappon yamùk wechippù màlà molo. Molopai yetasak tùuya'nokon yau tok usenumenkappù kulu màlà. “I'nai motau là ken uchi tamù'nawolon sàlà yamùk yepotai?” teppù tok uya. “Yà'là yekkwa ken uchi sàlà ittutok ke ilepasak nai'nùk? Tensan yekkwa pen nà kuttoppe ya,” teppù tok uya. 3“Mùkkàlà ken na' tapùi yamù pàk tùwessen pen, Mary mule, James, Joseph, Judas, molopai Simon yamùk lui pen ken na' mùkkàlà? Iwàlichi ton pen ken na' mùkyamlo talà nai'nannùk?” tukaik tok usekamappopàtùppù. Màlàpàk tok uya inulunpappù. 4Màlàyau Jesus uya, “Katù Maimu yenpoikanài mùkkàlà tùnamasen pata yamùk yawàlà, tùse ipata yau pùla, molopai itonpa yamùk kùlottau pùla, molopai itùwùk tawon kon kùlottau pùla nàlà,” teppù. 5Yà'làlà eke ton Katù yapàikketù yenpoikappù ya pen. Tùse tukke pùla e'nek ton ipittàpàtùppù ya temyatù tùnonkase tok pona. 6Ichenumenkappù kulu màlà ailon tetok pùla tok wechi pàk.
Jesus Uya 12 Pan Kon Tùnenupassan Yeunoko
(Matthew 10.5-15; Luke 9.1-6)
Tùpata woinokon pata yamùk yawàlà kappon yamùk yenupa pàk Jesus usalàppù. 7Tùnenupassan kà'mappù ya tùpyak, molopai tok yeunokoppù ya asa'là'ne. Àli akkwalù yentaikanài apàikek ke tok lepappù ya. 8Màlàyau tok yelupappù ya, “Yà'làlà kùsatàu àutà kon yau, tùwenantu ke kùtàtàu, enkui paikiyi kùsatàu molopai pùlayatta kùsatàu apakittiyi kon yau, etekessemu kon neken matàik. 9“Àutà kon màlà attassa kon yau neken molopai, asa'là là àpon pùloppon kùsatàu,” teppù ya. 10Tok yelupatukkappù ya “Pata yak àuyàssak kon yau Ànù'là uya tùwùk tak eyewonnùssak kon yau, molo mettàik àutàtok kon màlà pata yapai uya eyepolo kon ponalà. 11Ewelepansak kon pata yak yanùmù kappon yamùk uya pùla iwechi yau wapùla euselupa kon yeta tok uya pùla iwechi yau màlà pata mùnàntàik, inonù mùtu'metàik ata kon poi. Sàlà wechi màlà tok yekamappotok pe,” teppù Jesus uya tok pàk. 12Tok utàppù Wakù Itekale yekamaik tùmakuyi kon winàpai kappon yamùk welatà toppe. 13Tukkan kon làichi yapai àli akkwalù yamùk yenpakkapàtùppù tok uya màlà. Molopai e'nek ton kalapaimapàtùppù tok uya, molopai tok ipittàpàtùppù tok uya.
John Enpataukanài Welikùppù
(Matthew 14.1-12; Luke 9.7-9)
14Kin Herod uya yetappù, masapùla wakù kupù Jesus uya usekaletàppù pata yamùk yawàlà. Tùulon kon uya, “John Enpataukanài we'wuluukasak tùwuluwachi yapai pe iwechi màlà! Wa iwechi pàk wakù kuttok ya yapùiketù yesappe iwechi nai'nùk,” teppù màlà. 15Tùse tùulon kon uya, “Elijah pe nen iwechi màlà,” teppù. Molopai tùulon kon uya, “Katù Maimu yenpoikanài pe nen iwechi màlà penalok kon kasa iwechi,” teppù.
16Yetasak tùuya pàk Herod uya, “John Enpataukanài mùkkàlà. Ippai yattàtoppe unkupùppù lùppù, tùse iwennappokasak màlà pàli'yau iwechi,” teppù. 17Herod uya tàmàlà pe kàyik yamùk yeunokoppù màlà John yachiik. Tok uya yaulonpàtùppù, molopai tok uya itùlùppù patikichi tak. Herod uya sàlà kupùppù màlà, Herodias pàkànsau. Herod uya màlà Herodias mali'mappù Philip, takon noppù pe là nen iwechi tùse. 18John Enpataukanài uya Herod yelupa ko'mankappù màlà, “Ikasa pùla nen man, ayakon noppù yak ewessak, ima'li'massak auya.” tukaik. 19Màlà wenai Herodias uya John kupùppù tewamma pe. Ànwàpai iwechippù màlà, tùse Herod wechippù imaimu yawàlà pùla. 20Herod uya John namappù masapùla wakù pe, molopai ikasa iwechi pàk. Tùse yachichak ya neken nen wechippù màlà. John uselupa enetapai iweppàtùppù taimelunpa ya lànen ittu tùuya tùse, ichelupa yetappù ya tùwakùli pe.
21Màlà yattai Herodias weyu woton uyàpùppù màlà. Herod wentuppù lùppù weyu pe iwechippù tùuta'letàtok kon pe tok uya ikonekappù tamù'nawolon kon eke ton nà itepulu yamùk, soicha yepulu yamùk, molopai Galilee pon kon yepulu yamùk pokonpe. 22Herodias mule ulichan uyàpùppù màlà amanùnse. Imananùppù màlà, màlàyau Herod molopai ikaklamu yamùk là yauchinpappù ya tùmananù ke. Màlàyau Kin uya, “Yà'là là iche ewettok yekamappokà upàk molopai elepa uya màlà ike,” teppù 23“Ailon pe wa te uya sàlà, ukaseita pen. Elepa uya yà'làlà yekamaposak auya upàk yau, itesappe wessai'nàk upata latoi ke là,” teppù Herod uya ipàk. 24Ulichan wepakkappù tùsan yekamappoik, “Yà'là yenna uya lùk uchi sàlà?” tukaik. “John Enpataukanài ippai iche wessaik, kakkà,” teppù ichan uya. 25Asse'ne iwennapoppù kin Herod piyak. “Ulepa auya iche wessaik talà sàlà pe, John Enpataukanài ippaippù ke palipi po,” teppù ya. 26Kin usewankono'mappù kulu màlà “Kane,” te ya yentai iwechipàk inulunpa ya pùla masapùla, “Ailon pe wa te uya sàlà, ukaseita pen,” te tùuya yetasak kappon yamùk uya pàk. 27Màlàyau asse'ne màlà Herod uya pata yelasu yeunokoppù, John ipaippù nesse. Patikichi tak iitàppù molopai John ippai yattàppù ya. 28Inepùppù ya palapi po molopai ulichan yemyak itùlùppù ya, mùkkàlà uya nen uchi tùsan yemyak itùlùppù. 29Màlà yetasak tùuya'nokon yau, John nenupassan utàppù itàkàpù u'nattàik.
Jesus Uya 5000 Pan Kon Yewetùppù
(Matthew 14.13-21; Luke 9.10-17; John 6.1-14)
30Yeunossak kon nùssan wennapposak wessepoloppù Jesus pokonpe, molopai Jesus pàk tamù'nawàlà tùnkupùppù kon lùppù yekamappù tok uya molopai kappon yamùk yenupappù tùuya'nokon lùppù là yekamappù tok uya. 31Tukke kappon yamùk uyàpùppù essentak, Jesus molopai inenupa ton uta'lettàtok là yattai pùla. Màlàyau tok pàk, “Utànpai'nokon iwalàwannà esse, molo àwàlàkapù kon pa,” teppù ya. 32Tok utàppù kanau yau tùmyamlo pe neken tùkkenan pata yak.
33Màlà tùse tukkan kon kappon yamùk uya tok utà yeneppù. Mùkyamlo pe tok ituppù tok uya. Màlà yattai tamù'nawàlà pata yapai tok wakkàse tok utàppù paluppolo aitun pe, tok wapiya tok welepamùppù. 34Tùwepalùka pe Jesus uya ilinà pe kappon yamùk yeneppù, màlàpàk Jesus usentupappù tok pàk, masapùla itesak pùnon kalinilu yamùk kasa tok wechi pàk. Tok yenupa pàk iwepyattàppù, tukkan yà'là yekkwa ton nà pàk. 35Pata uko'mamù yau inenupa ton uyàpùppù ipyak, “Pata uko'mansak man molopai sàlà nàlà màlà tùkkenan pata. 36Kappon yamùk yeunokkà pata yamùk meyon kon pen umà yamùk molopai pata yamùk yak tùyiwalà teipa kon woton ye'ma toppe tok uya,” teppù tok uya Jesus pàk. 37“Amyamlo'nokon pe là tok ilepatàk kon tok yeipa ke,” tukaik Jesus uya tok maimu yeikuppù. Tok uya yekamappoppù, “Ina utà ken na' iche messan, 200 kaichalon pùlayatta pun ke pùlomù pusak ye'maik tok ya'lettà toppe?” tukaik. 38Màlàyau, “Yà'là kaichalà ken uchi pùlomù pusak lùkwà nai? Imasa yentantàk kon,” teppù Jesus uya tok pàk. Màlàyau ittuppù tok uya, “5 pe kaichalà neken man, molopai asa'là neken molok yamùk man” teppù tok uya.
39Jesus uya tùnenupa ton uya tamùkke'ne kappon yamùk weleuta toppe tok kuttoppe yekamappù. 40Màlàpàk tok weleutappù tamùkke'ne, 100 pe'ne, molopai 50 pe'ne. 41Jesus uya pùlomù pusak yanùmùppù molopai asa'lon kon molok yamùk, tenu tùlùppù ya epùn winàkàik tenki teppù ya Katù pàk. Pùlomù pusak pilipàtùppù ya molopai tùnenupa ton yemyak itùlùppù ya kappon yamùk lepapàttoppe tok uya. Asa'lon kon neken làma molok yamùk yekamùppù ya tok yemyak. 42Tamù'nawolon kon uta'lettàppù màlà iche tùwettok kon yawàlà. 43Inenupa ton uya pùlomù pusak molopai molok tompappù pilipùppù 12 pe kaichalà eketon walicha. 44Yewessak kon nùssan wechippù màlà 5000 pe kàyik yamùk.
Jesus Usalàppù Tuna Polo
(Matthew 14.22-33; John 6.15-21)
45Tewinanpa, Jesus uya tùnenupa ton yeunokoppù kanau yau tùwapiya Bethsaida pona, palau latoi pona, ilinà kappon yamùk utàpàttoppe yekamai'ma. 46Tamù'nawolon kon pàk utàpà'nàpai'nokon te tùpo iitàppù wùk pona àpùlemaik. 47Pata wewalumansak pe kanau wechippù màlà palau yapploppo Jesus wechi a'mun po tewincha tùse. 48Tùnenupa ton wechi tùkanwa kon yuklaiche yeneppù ya, masapùla assetun utasse'mappù màlà tok winàkàik. Màlàyau pata wemapù pe iyàpùppù tuna polo. Tok wenailà iitàppù. 49Tùse tuna polo iiyàpù yeneppù tok uya, “Wolo'yan là nen mùkkàlà,” tukaik, tùsenumenka kon yau tok wentaimepàtùppù. 50Tok wettalipasak kulu wechippù yensak tùuya'nokon yau. Tùse tewinanpa Jesus uya tok yekamappoppù, “Meluntà pe eyewan kon yau ettàk kon. Iulà Mùkkàlà Jesus. Kesenalipatàu!” teppù ya. 51Tok piyak iwenukuppù kanau yak molopai assetun wàttù'nàppù màlà. Inenupa ton usenumenkappù kulu màlà, ichelupa pùla tùwenaik. 52Masapùla yà'là yekamasak 5000 pan kon yewessak uya ituppù tok uya pùla lùppù iwechippù, tok usenumenkatok uya yachi pùla iwechippù.
Jesus uya E'nek Ipittàppù Gennesaret Po
(Matthew 14.34-36)
53Tok ukklàtùppù màlàyau tok welepamùppù Gennesaret pona, molo tùkanwa kon yewattàppù tok uya. 54Màlà kanau yapai tok wepalùka pe kulu kappon yamùk uya Jesus ituppù. 55Tok utàppù pata yamùk yawàlà yekamaik. Molopai i'nai motau là iwechi yetasak tùuya'nokon yau, e'nek neppàtùppù tok uya tok yapon po. 56I'nailàlà Jesus utàsak yau, pata yamùk lùkwà pona wapùla eke pata yak, wapùla umà yak là yau, kappon yamùk uya e'nek ton nepùppù màlà, yà'làlà chilanmatok molopai yà'làlà ye'matok motak. Molopai Jesus pawanatàppù tok uya ipon yeppi neken nà yappàttoppe tok uya iku toppe ya. Molopai tamù'nawolon kon ipon yeppi yappà'nài nan nùssan uchipittàppù màlà.
Currently Selected:
Mark 6: PNTR
Highlight
Share
Copy
Want to have your highlights saved across all your devices? Sign up or sign in
Patamuna New Testament Revised © United Bible Societies, 1973, 2019.
