Mark 7
7
Kùtamo Kon Enupantok
(Matthew 15.1-9)
1Pharisee yamùk molopai Law pàk enupanài nan tonpa yamùk Jerusalem poi iyàssak kon wepilichak wechippù Jesus woi. 2Inenupa ton uya teipa kon napù temyatù kon tùkukaik pùla yeneppù tok uya. Màlà wechippù “Suwa mùyak tùkukasen tetok Pharisee yamùk uya kappon yamùk pàk yawàlà pùla.
3Pharisee yamùk molopai Jew yamùk wechippù màlà tùtamo kon yeselu lùssan ku'nài nan pe. Tok uta'lettà màlà mùyak kukatok yàwàlà tùuseyasse. 4Wapùla yà'làlà kùyali chilanmatok yau ye'masak kùyali na'nài nan pe pùla tok wechippù màlà. Wapiya tùkukase pùla. Tukkan tùwemattok kon yawàlà yawà tok wechippù, pùsau, àinà, tuna yen molopai tùwe'nùmù kon yapon kukatok yawàlà.
5Pharisee yamùk molopai Law pàk enupan nan uya Jesus yekamappoppù “Yà'là pe ken iwechipàk màlà kùtamo kon uya enupantok nekamappù kupù enenupaton uya pùla iwechi, tùusemyasse pùla tok uta'lettà?” tukaik. 6Jesus uya tok maimu yeikuppù, “Ikasa sa' Isaiah uselupappù màlà pena àpàkù'nokon. Wakù pe tukaik tùusennakasan amyamlo! Imenukappù ya kasa kulu.
‘Pùsamlo kappon yamùk unamanài nan tùmaimu kon ke neken, tùse tok yewan mei man uwinàpai. 7Iwoton pe pùla uyapulànnan mùkyamlo, masapùla kappon uya enupantok pàk enupanài nan mùkyamlo, uwinàpaino kasa kulu!’ te Katù uya,” tukaik.
8“Katù uya enupantok nonka auya'nokon mailà molopai, kappon yamùk uya neken nen uchi eyenupatok kon kupù auya'nokon,” tukaik.
9Jesus uya tok pàk, “Katù uya enupantok nulunpatok auya'nokon yawà molo man, eyeselu kon neken nen uchi kupù kon pa. 10Moses uya panamansak, ‘Àkàipùnù kon inamatàk kon molopai asan kon nàlà, ànù'là tùkàipùnù wapùla tùsan winàkàik àli pe àsàulàmappù, welittok wechi màlà,’ tukaik. 11‘Tùse enupan auya ànù'là kappon piyau yà'làlà wechi tùkàipùnù wapùla tùsan pùikattàtok ya ike pan, tùse Corban sàlà te ya (Katù ponaloppe man te ya pe iwechi). 12Sàlà pàkànsau nen uchi tùkàipùnù wapùla tùsan pùikattà ya pen màlà,’ tukaik enupanài nan amyamlo,” teppù. 13“Sàlà kasa tùulon kon yemyak sàlà enupantok auya'nokon tùlù auya'nokon ke Katù Maimu yenpà'nài nan amyamlo. Molopai tùulon kon sàlà yekkwa ton tuke molo man ànkupù kon,” teppù nàlà Jesus uya tok pàk.
Yà'làlà Àli Pe Kappon Ku'nài
(Matthew 15.10-20)
14Kappon yamùk kà'matukkappù Jesus uya tùpyak molopai tok pàk. “Eyelupa kon uya yetatàk kon molopai tekamayai'nàk mùttutàik,” teppù ya. 15“Yà'làlà newonyai'nàk ayak àli pe àkupù woton pùla iwechi màlà. Tùse ayapai neken nepakkayai'nùk màlà àli pe àku'nài,” teppù Jesus uya tok pàk. 16“Yetatàk kon, tùpana ke ewechi kon yau, yetatàk,” teppù Jesus uya.
17Màlà tùpo kappon yamùk tùnànse iwewonsak tapùi tak yau, inenupa ton uya yekamappopàtùppù ipantomù pàk. 18“Ittu ken na' uchi auya'nokon pùla nai?” teppù Jesus uya. “Yà'làlà polopon yeuno'masak auya uya àli pe àkupù pen màlà. 19Masapùla eyewan yak iità pen màlà, tùse àlotta yak. Molopai yenpakka auya àlotta yapai,” teppù Jesus uya. (Tamù'nawolon kùyali màlà tùnassen pe ikussak, te Jesus uya pe iwechippù.)
20“Tùse yà'làlà nen kappon yewan yapai nepakkayai'nùk uya màlà àli pe ikupù,” teppù Jesus uya. 21Masapùla “I'napai, kappon yewan yapai nepakkayai'nùk màlà, àli pe usenumenkantok àli imakuyippù kuttoppe ya tesak ke iku'nài, amappe we'nàtoppe, we'wàntoppe, 22wemali'mannàpà ipokonpe pen pokonpe we'nàtok, tùuseka'nonkaik we'nàtok, yà'làlà àli ànkupai we'nàtok, ànù'là yenkuttàtok, àli kuttok tùwekuli'maik pùla, kùlùmàlunnàtok, ànù'là yesek talumattàtok tùpatakaik, ànù'là yentai weku'nàtok, molopai pakko pe tùttuik pùla we'nàtok. 23Tamù'nawàlà sàlà yamùk uya màlà kappon kupù àli pe itewan yapai tùwepakka ke,” teppù Jesus uya.
Ailon tetok Nossan Uya
(Matthew 15.21-28)
24Jesus utàppù pata Tyre piyawon kon pata yamùk yak. Tapùi tak iwewomùppù màlà molo molopai ànù'là uya molo tùwechi ittu iche pùla iwechippù màlà, tùse icho'namù pùla iwechippù. 25Nossan, àli akkwalù yen imle uya Jesus yekale yetappù, iyàpùppù tewinanpa molopai iwepeimappù itta piyau. 26Pùsàlà nossan wechippù màlà Jew pe pùla Phoenicia po iwentusak lùppù pe pata Syria yau. Àli akkwalù yenpakka toppe Jesus uya ipawanattàppù ya tùmle yapai. 27Tùse Jesus uya imaimu yeikuppù, “Masa mule yamùk làkku nùta'lettài wapiya. Ikasa pùla màlà, mule yamùk yeipa yanùmù molopai yenu'ma a'a yamùk yemyak wechi,” tukaik. 28“Ewaik, Uyepulu, tùse ku a'a yamùk mùkyamlo mule yamùk yeipa pùkkùlùppù lùkwà là wà'nànsak tok uta'letà yapon yo'no na'nài nan tà,” teppù nossan uya Jesus pàk. 29Màlàyau Jesus uya, “Ikasa umaimu meippàssaik, emeikkà, àli akkwalù wepakkappù emle yapai man,” teppù. 30Nossan wemeikuppù tùwùk tak molopai tùmle yepoloppù ya màlà tekkwek tau. Àli akkwalù wepakkappù yapai wechippù.
Jesus Uya Panattàppan Kàyik Ipittàppù
31Tewin itekkwalok lùppù pe Jesus utàppù Tyre yapai Sidon yawàlà tuna Galilee winàkàik, 10 pan pata yamùk yawàlà. 32Màlà yattai panattàppan kàyik wakù pe tùuselupassen pen nepùppù kappon yamùk uya ipyak, Jesus pawanattùpù tok uya temyatù tùnonkaik ipona ipittàtoppe ya. 33Ilinà kappon yamùk kùlottapai Jesus uya yamappù. Asakklàma ipana yeuta yamùk yak temyatù yamùk lùkkwà yemaikappù ya, molopai tetaku tappàsse, yani yappàtùppù ya. 34Epùn winàkàik tenu tùlùppù ya, molopai kusan pe iwe'netukkappù màlàyau kàyik pàk, “Ephphatha!” teppù ya, “Atakkokakà,” te ya pe iwechippù màlà. 35Màlà yattai ipana utakkokappù. Yani ipittàppù ya nàlà, molopai wakù pe ichelupappù tùwettalumattàik pùla. 36Jesus uya, “Sàlà tùkuppàssai'nàk kùsekamatàu kulu, ” teppù kappon yamùk pàk. Tùse tok uya yekamappù màlà màttawàlà. 37Tamù'nawàlà yetannùssan usenumenkasak kulu wechippù, “Wakù pe là tamù'nawolon kuppàssan. Panattàppan pana utakkokatoppe là iku'nài pe man molopai tùuselupasen pen nà uselupatoppe,” tukaik.
Currently Selected:
Mark 7: PNTR
Highlight
Share
Copy
Want to have your highlights saved across all your devices? Sign up or sign in
Patamuna New Testament Revised © United Bible Societies, 1973, 2019.
