Mark 8
8
Jesus uya 4000 Pan kon Yewetùppù
(Matthew 15.32-39)
1Màlà yattai ilinà kappon yamùk wepilittukkappù màlà, tùse tok yeipa woton pùla iwechi yau, tùnenupa ton kà'mappù Jesus uya tùpyak, molopai tok pàk, 2“Usentuppayaik sa' pùsamlo kappon yamùk pàk, masapùla àsolùwau wei upyau tok wessak màlà, molopai yà'làlà tok nùnapù woton pùla man. 3Tok yeunoko uya tùpata kon yak iwan pe yau, tok wenpulumamù màlà tùutà kon yau. Masapùla tùulon kon uyàssak màlà mei pai,” teppù Jesus uya. 4Inenupa ton uya imaimu yeikuppù, “I'nailà là ken uchi sàlà wontaik yau tamù'nawàlà pùsamo kappon yamùk yewettok kùyali yepolo mùttuyan? Yà'là pùn yau là,” teppù Jesus pàk. 5Tok yekamappoppù ya, “Yà'là kaichalà neken ken uchi pùlomù pusak nai?” teppù ya. “7 pe,” teppù tok uya.
6“Eleutatàk kon non pona là,” teppù Jesus uya kappon yamùk pàk. Pùlomù pusak yanùmùppù ya, tenki teppù ya Katù pàk, molopai ipilipàtùppù ya. Tùnenupa ton yemyak itùlùppù ya, yekantoppe tok uya. Màlà yekamùppù tok uya. 7Molok yamùk lùkkwà nàlà wechippù màlà tok piyau, tukke pùla. Màlà yamùk pùlemappù ya, tok uya làma ilinà yemyak itùpàttoppe. 8-9Tamù'nawolon kon uta'lettàppù tùwakkotaik. 4000 yailà'ne kappon yamùk wechippù màlà molo. Jesus nenupa ton uya 7 pe walicha yamùk lùmà tanùkaik kùyali tonpappù yemaikappù. Molopai nen uchi Jesus uya kappon yamùk yeunokoppù. 10Màlà pe là kanau yak iwenukuppù tùnenupa ton pokonpe tok utàppù Dalmanutha pona.
Pharisee Yamùk Wechippù Jesus Ittuiche
(Matthew 16.1-4)
11Pharisee yamùk uyàpùppù Jesus piyak molopai tok wepyattàppù tùusàulàma kon pàk. Tok wechippù anaachipai màlàyau tok uya yekamappoppù yà'làlà kuttoppe ya tùmeluntàlù epùn winàpaino ke, ewaik pe Katù yapàiketù yesappe iwechi yentoppe tùuya'nokon. 12Jesus we'netukkappù meluntà pe molopai, “Yà'là peichi iwechipàk kappon yamùk Katù yapàikketù yenpoikanài wotoko ikukà ina nene pe tawonnan?” tei'ma. “Ailon kulu sàlà! Katù yapàikketù yenpoikanài woton wettùtok pùla iwechi màlà, màlà yekkwa ton piyak,” teppù Jesus uya tok pàk. 13Tok nàmàppù ya, kanau yak iwenukuppù tuna latoi pona nen uchi iwukklàtùppù.
Pharisee Yamùk Molopai Herod Yamùk
(Matthew 16.5-12)
14Inenupa ton uputtàkassak wechippù tukke lùiwa pùlomù pusak tùnesse pùla, tùse tewin neken nà tok piyau iwechippù kanau yau. 15Jesus uya tok panamappù, “Tùttuik kan mettàik tà nalippe, Pharisee yamùk molopai Herod tawonnan yeselu pàk so'li konekanài nan pàk. Mùkyamlo yeselu (so'li pe) amattanùttakù'nokon,” tukaik. 16Màlàyau tùyiwalà'nokon tok uselupappù, “Te ya màlà masapùla kùyu kon pùla iwechi pàk,” tukaik. 17Jesus uya tok usenumenka ittuppù, “Yà'là pe ichi iwechi pàk pùlomù pusak pùla iwechi tukaik tùuselupasan amyamlo? Ittuichi auya'nokon pùla lùppù messatàu? Ittutok auya'nokon pùla là na' nai, eusenumenkatok kon pùla là? tukaik Jesus uya tok yekamappoppù. 18“Tenu ke ku messatàik, yene ken na' auya'nokon pùla nai? Tùpana ke messatàik, yeta na' auya'nokon pùla nai? Ittu auya'nokon pùla? 19Yà'là kaichalà ken eke ton walicha pùlomù pusak tompappù yanukuppù auya'nokon mùttuyatàu 5 pan neken ke 5000 pan kon kappon yamùk yewetù uya tùpo?” tukaik tok yekamappoppù ya. “12 kaichalà,” teppù tok uya. 20“Molopai 7 pan pùlomù pusak pilipàssak ke nàlà 4000 pan kon yewetù uya tùpo, yà'là kaichalà nen eke ton walicha yamùk tanùkkaik itonpappù yanukuppù auya'nokon?” teppù ya tukka tok pàk. “7 kaichalà,” teppù tok uya. 21“Ittu auya'nokon pùla lùppù?” tukaik tok yekamappoppù ya.
Jesus Uya Enpùn Kàyik Ipittàppù
22Bethsaida pona tok uyàpùppù. Molo kappon yamùk uya enpùn kàyik nepùppù Jesus piyak. “Yapàkà neken nà tàwà,” teppù tok uya Jesus pàk. 23Enpùn kàyik yapichippù Jesus uya itemyatù pàk yalàppù ya pata yapai. Itenu pona tùwetatta tùpo temyatù tùlùppù ya ipona. “Yà'làlà na' menyan?” tei'ma. 24Enpùn uya tenu tùlùppù, “Ewaik, kappon yamùk là tenyaik. Tùse yuk kasa tok usalà tenyaik,” teppù ya. 25Jesus uya temyatù tùtukkappù itenu pona. Sàlà yattai tenu tùlùppù ya, wakù pe nen uchi itenu wechippù màlà, tamù'nawolon yeneppù ya iwettok pe. 26Telupaik Jesus uya yeunokoppù itùwùk tak. “Pata yak kesenpoikai,” tukaik.
“Àmàlà Mùkkàlà Christ” Tetok Peter uya
(Matthew 16.13-20; Luke 9.18-21)
27Jesus utàppù tùnenupa ton pokonpe, Caesarea Philippi woinokon yawàlà. Asantau tùnenupa ton yekamappoppù ya, “Yekamatàk upàk ànùk te ken kappon yamùk uya sàlà upàk?” tukaik. 28“Tùulon kon uya John Enpataukanài pe ewechi” te màlà. “Tùulon kon uya Elijah te. Tùse tùulon kon uya Katù Maimu yenpoikanài tonpa pe eyesatù màlà,” teppù tok uya Jesus pàk. 29“Amyamlo nen? Ànùk mùkayatàu nen upàk?” tukaik tok yekamappoppù ya. Peter uya imaimu yeikuppù, “Christ nen àmàlà,” tukaik. 30“Kùyekamatàu ànù'là pàk,” teppù Jesus uya tok pàk.
Tùwettalumattàtok Molopai Tùwelittok Pàk Jesus Uselupa
(Matthew 16.21-28; Luke 9.22-27)
31Jesus wepyattàppù tùnenupa ton yenupa pàk, “Kàyik Mumu talumattàtok woton àsà pe. Tùnamasan itepulu yamùk, paatele yamùk yepulu yamùk, molopai Law pàk enupanài nan uya italumayippù pe inonkatok woton. Iwàtok woton, tùse iwe'wuluukatok woton àsolùwau wei tùpo,” tukaik. 32Ichelupappù màlà wakù pe kulu tok uya ittutoppe. Màlàyau Peter uya yalàppù miyaiwa molopai yàulàmappù ya. 33Tùse Jesus welattàppù tùnenupa ton winàkàik molopai àsà pe Peter yàulàma pe, “Itàkà uwinàpai Settan. Katù winàpaino pen màlà eusenumenkatok tùse kappon winàpaino nai'nùk,” tukaik.
34Jesus uya kappon yamùk kà'mappù tùnenupa ton pokonpe tùpyak. “Ànù'là uya'là àippaino wechi yau tàwà ne'nonkai sàlà wolù yau tùwemattok winàpai, tàwà tùwettalumattàtok yanùmài molopai nùyàpùi uya'là,” teppù ya tok pàk. 35“Ànù'là tùwemattok ichelok tùyiwalok pe neken uya màlà yenu'masak. Tàwàlàlà iwettalumattà. Tùse ànù'là tùwemattok yenu'manàippù upàkànsau molopai Wakù Itekale pàkànsau uya màlà tàwàlàlà wema'nàtok yepolo. 36Yà'là ken yepolo kappon uya tamù'nawà wolù yawon kon yeposak tuùya tùse tùwemattok yenu'masak tùuya yau? Ippla! 37Yà'làlà pùla iwechi màlà kappon nùtùlù woton tùwemattok yepo tukka toppe tùuya. 38Ànù'là upàk tùwekuli'masen molopai umaimu pàk nàlà sàlà pe nai'nannùk àliton kappon yamùk kùlottau, mùkkàlà pàk nàlà, Kàyik Mumu wekuli'ma màlà, tùkàipùnù yakkwayi yau tùuyàpù, wakù ton tùyinchelùyi yamùk pokonpe tùuyàpù yau,” teppù Jesus uya.
Currently Selected:
Mark 8: PNTR
Highlight
Share
Copy
Want to have your highlights saved across all your devices? Sign up or sign in
Patamuna New Testament Revised © United Bible Societies, 1973, 2019.
