Yohana 15

Yesuni pati raza adaruri’i

1 # Yer 2:21; Zab 80:8 Ma pati raza zabiburu adaruri’i, ma Atini ’ba eri edepiri, 2#Mat 15:13Eri adri pati arakala dria alu alu ovupi ma alia efi ’yapi kuri opi va; te eri adri pati arakala dria alu alu efi ’yapi rari ma rua ede alaru, eri ma ’ya ani efi azini aga ra beni. 3Curu’do emi eca di alaru e’yo mani ’yole emi tia ’borisi. 4Emi ma ovu ma alia ’dani, ma’i ma ovu emi alia indi. Ekile pati arakalani ecole efi ’yazaru eri drisi ku, eri ka ovu pati raza zabibururi ma alia kurile, awa’dini emi econi vini ku indi, emi ka ovu ma alia ku. 5#1 Kor 12:12, 27; 2 Kor 3:5Ma zabibu patini, emi arakalani, ’Ba ovupi ma alia ’dani, mani ovuzu eri ma alia indiri, ’ba ’diri eri efi ’ya tu, a’disiku emi ka esele co ma be econi emini e’yo ’yezaru aluni ku. 6#Mat 3:10; 13:40Te ’ba ka ovu ma alia ’dani ku, yi ’be eri ekile pati arakale, eri nga ’wi ra; yi arakala nde ’diyi oku o’bezu acia, yi nga ve ra. 7#Mar 11:24Emi ka ovu ma alia ’dani, azini e’yo mani ’yole ’diyi ka ovu emi alia ’dani, emi zi e’yo ngoni ngo emini leleri, eri nga i ’ye emi dri. 8#Mat 5:16Ma Ati isu diza e’yo ’disi, emini efi ’yale kakaurisi; te ’dini emi nga ovu ’ba mani imbale ’diyiru. 9Ekile Atani ma lelerile, ma le vini emi ’dini indi; emi ma ovu ’dani ale mani ma alia. 10#Yoh 8:29; 14:15; 1 Yoh 2:4, 8Emi ka azita mani ’diyi ma ta mba ra, emi nga ovu ’dani leta mani ma alia; ekile mani azita ma Atini ’diyi ma ta mbale ’bo, mani ovuzu ’dani leta erini ma aliarile. 11#Yoh 17:13Ma ’yo e’yo ’diyi emi tia ’bo, ’dini ayiko mani ma ovu emi alia ani, ayiko emini ma ga tre indi.

12 # Yoh 13:34; 15:17; 1 Yoh 3:11, 23; 2 Yoh 1:5; Mar 12:30 Azita mani eri ’di, emi ma le emi emi eselia, ekile mani emi lelerile. 13#Yoh 10:12; 1 Yoh 3:16’Ba aluni ovupi leta be ’diri agazuni yo, leta nde ’bani ani idri ini kuzu va i ma agyisiri’i. 14#Yoh 8:31; Mat 12:50; 28:20Emi ka e’yo mani azile emi tia ’diyi ’ye ra, de emi ma agyi. 15Ma omveni emi ati’baru dika ku, ati’boni e’yo opi i vilerini ’yeleri nile kurisi; ma omve te emi agyiru ’bo, a’disiku e’yo dria mani erile ma Ati vu ’diyi, ma ece yi emi dri nizu ra. 16#Yoh 6:70; 13:18Emi peni ma emi’i ku, te ma ope emi ma’i, ma ’ba emi emi ma mu ani efi ’yazu, efi emini ma ovu ’dani beni; ’dini e’yo ngoni ngo emini zile Ata vu ma rusiri, eri ma fe ani emi dri, 17Ma azi e’yo emi tia ’di, emi le emi le le,

Anguonzi nyakuniri

18 # Yoh 7:7; 1 Yoh 3:13 Nyaku ka emi ngu onzi, emi ni eri ’ba ndra ma ngu emini oko. 19#1 Yoh 4:5; 17:14; Luk 6:22Emi ka te ovu ’ba nyakuni, nyakuni te nga i ma afa le ra te di emini ovule ’ba nyakuni kurisi, azini mani emi opele nyaku eseliarisi, e’yo ’disi nyaku ngu di emi onzi ani ’di. 20#Mat 10:24; Luk 6:40; Yoh 13:16Emi ega e’yo mani ’yole emi tiari kini, Ati’bo agani opi ini ku. Yi ka ndra ma inza ra, yi nga emi inza alu indi; yi ka ndra e’yo mani ma ta mba ra, yi nga e’yo eminiri ma ta mba indi. 21#Yoh 10:22; 16:3; Mat 5:11; Mar 13:13Te yi nga e’yo ’diyi ’ye dria emi vu ma rusi, yini ’ba ma ti epepiri nile kurisi. 22Te ma ka ndra emu e’yo ’yozu yi tia ku, te’do yi ovuni e’yo onzi be ku; te curu’do yi ovuni e’yo be e’yo onzi yini onazu ku. 23#Yoh 5:23; 1 Yoh 2:23; Luk 10:16’Ba ma ngupi onziri eri ma Atini ngu onzi indi. 24#Yoh 14:11Ma ka ndra ’yeta ’ba azinini ’yele ku ’diyi ’ye yi eselia ku, te’do yi ovuni e’yo onzi be ku; te curu’do yi ndre azini ngu ama ma Ati be. 25#Zab 35:19; 69:4’Dini, e’yo ovupi sizaru azita yini ma alia kini, Yi ngu ma onzi toko-ri ma ’ye i ani. 26#Yoh 14:26; Luk 24:49Te ’Ba ’ba Aza Kopiri mani ngale ti epele emi vu engapi Ata vuri ka nga emu ra, eri Orindi e’yo adaruni, engapi Ata vori’i, eri nga e’yo mani ma eti nzeni; 27#Luk 1:2; ’Yeta 1:8; 5:32emi indi, emi nga vini e’yo eti nze indi, emini ovule ma be engazu driorisi.

Currently Selected:

Yohana 15: LB66

Highlight

Copy