Yohana 18

Yesu ma o’di nyazu, eri bizu indi

1 # Mat 26:36; Mar 14:32; Luk 22:39; 2 Sam 15:23 Yesu ka e’yo ’diyi ’yo ra, eri fu ’ba erini imbale ’diyi be zozu yi were Kidironi ma tia ’aa’daasi, pari amvuni ovuzuria, eri fi alenia ’ba erini imbale ’diyi be. 2#Mat 26:47-56; Mar 14:43-52; Luk 22:47-53#Luk 21:37Isu Yudasi ’ba eri ma o’di nyapiri ni angu nderi indi; a’disiku Yesu piyi adri yi oku ’daa ’ba erini imbale ’diyi be pale kakau. 3Yudasi ka ’di asikari ongulumuru ’du ’bo, azini asikari kuhani amboru ’diyi pini ’ba Farisaini vile ’diyi be, yi nga emu ’daa tala piyi be, alaka pie, afa a’di ’dizu ’diyi pie dria. 4#Yoh 19:28Yesuni e’yo dria ngapi yi ’yepi i ruaa ’diyi niria, eri fu mu, ’yo yi tia kini, Emi a’dini nda ya? 5Yi nga e’yo omvi eri tia, Yesu ’ba Nazaretiari’i. Yesu nga ’yo yi tia, Ma eri’i. Yudasi ’ba eri ma o’di nyapiri so pa yi be indi. 6Eri ka ’yo yi tia, Ma eri’i, ’dini, yi nga si vile ngukusi, nga o’de va nyakua. 7Eri nga zi yi tia dika ani, Emi a’dini nda ya? Yi nga ’yo ra, Yesu ’ba Nazaretiari’i. 8Yesu nga e’yo omvi, Ma ’yo te emi tia ma eri’i; te emi ka ma ndru’i, emi ku ’ba ’diyi ma mu. 9#Yoh 17:12’Dini e’yo erini ’yoleri ma ’ye i ani, kini, ’Ba mini fele ma ’dri ’bo ’diyi ma azi aluni avini ma dri ku. 10De Simoni Petero ovu sei be, eri nga nze ra, eri nga kuhani amboru ma ati’bo ma bi dri ndiari ga, li eri va. Ati’bo nde ma ru Maliko. 11#Mat 26:39; Mar 14:36; Luk 22:42Yesu nga di ’yo Petero tia ani, Mi omvi sei okporoa; okelea Atani fele ma driri, ma ngani eri mvu ku ya?

Yesuni ejizu kuhani agapiri ma driliari

12 # Mat 26:57-75; Mar 14:53-72; Luk 22:54-71 Asikari ongulumuru ’diyi pi ’ba amboru yi dri cepi ’diyi pie, asikari ’ba Yahudiniri ayule ’diyi pie, bi di eri ra, ’i eri, 13jizu Anasi vu okorisi; te Anasi ovu Kaifa ma anyi’i, Kaifa nde kuhani amboru eli ’dasiri’i. 14#Yoh 11:49-50Kaifa nderi ’ba e’yo amaza fepi ’ba Yahudini dri, kini eri onyiru ’ba alu ma dra ’ba driasiri’i.

Peteroni Yesuni gazuri

15 # Yoh 20:3; 21:20; ’Yeta 3:1 Te Simoni Petero nga Yesu vuti bi, ’ba erini imbaleri ma azi be. Isu ’ba nde erini imbaleri ni yi kuharu amboru be ra, eri fi ani Yesu be tualu kuhani amboru riidria, 16te Petero so pa jotilia amve. ’Ba nde erini imbale, te yi nipi kuhani amboru be rari fu ani amve, ’yo zamva jotile agei tepiri ma tia, nga Peteroni ofi joa. 17Zana jotile agei tepiri nga di ’yo Petero tia, Mi indi, mi ovuni ’ba agu ’dirini imbale ’diyi ma azi ku ya? Eri ’yo ra, Ma’i yo. 18Isu ati’ba piyi oso pa asikari ayule ayu ’diyi be, de yi edu aci olukuru ’daa anguni ambilerisi, yi de aci yuria; Peteroni yi be indi, pa soria aci yuria.

Kuhani agapirini e’yo ozizu Yesu tiari

19Kuhani amboruri nga di zi Yesu tia ’ba erini imbale ’diyi ma ’e’yosi, imbata erini be. 20#Yoh 7:14, 26; Mat 10:27Yesu nga e’yo omvi eri tia, Ma ’yo ’ba nyakua ’diyi ma tia mgboru; ma adri ’ba imba pari ’bani yi okuzuria o’du dria azini hekalua, pari Yahudi driani yi okuzuria; ma ’yoni e’yo oyokolosi aluni ku. 21Mi zi ma tia a’disi ya? Mi zi e’yo mani ’yole yi tiari ’ba ma eripi ’diyi ma tia; mi ndre, ’ba ’diyi ni e’yo mani ’yole ’diyi ra. 22#Yoh 19:3; ’Yeta 23:2Eri ka e’yo ’diri ’yo ’bo, asikari yini alu pa sopi ogogori sa Yesuni drisi, kini, Mi e’yo omvi kuhani amboru ma tia ’dini ya? 23Yesu nga e’yo omvi eri tia, Ma ka ’yo onzi, mi nze onzi nde ma eti’i; te ma ka ’yo ’yeke, mi sa ma a’disi ya? 24Isu Anasi pe eri ti ’izaru Kaifa kuhani amboruri vu.

Peteroni Yesuni gazu dikari

25Isu Simoni Peteroni pa soria ad yuria. Yi nga ’yo eri tia, Mi indi, mi ovuni ’ba erini imbale ’diyi ma azi ku ya? Eri ga si, kini, Ma’i yo. 26Ati’ba kuhani amboruni ma azi alu, eri ’ba Peteroni bini lile vari ma ori’ba, ’yo kini, Ma ndreni mi te eri be amvu ma alia ku ya? 27Petero nga ga dika; coti a’nata nga cere ’be.

Yesuni Pilato ma drilia

28 # Mat 27:2, 11-30; Mar 15:1-19; Luk 23:1-25 Yi nga Yesuni ofu Kaifa vurisi eri jizu riidri e’yo lizuria. Isu de eri angu trani. Yi ngulupi fini riidri e’yo lizuria ku, yi rua kazu ovuzu ezazaru afa onzisi ku, te yi ma eco agaza ’ba drilesiri nyazaru beni. 29Pilato nga fu amve yi vu ani, nga ’yo ra, Asu emini sule agu ’diri ma ruaari ma e’yo ngoni ya? 30Yi nga e’yo omvi, ’yo eri tia, ’Ba ’diri ka te ovu ’ba onzi ’yepi’iri ku, ama ejini te eri fezu mi dri ku. 31#Yoh 19:6, 7; ’Yeta 18:15Pilato nga ’yo yi tia ani, Emi ma ’du di eri, ma li e’yo erini azita eminiri vusi. ’Ba Yahudini nga ’yo eri tia, Azita a’ini amani ’ba fuzu aluni ku. 32#Yoh 3:14; 12:32; 19:32, 33; Mat 20:19E’yo Yesuni ndra ’yole geri erini ngazu drazuri ma e’yo ecezuri ma ’ye i ani.

33Pilato nga fi dika riidri e’yo lizuria, nga Yesuni omve, nga ’yo eri tia, Mi Opi Yahudini ya? 34#Mat 16:13Yesu nga e’yo omvi, Mi ’yo e’yo ’diri mi drisi, kani ’ba azini olu e’yo mani mi tiani ya? 35#Yoh 1:11; Mat 21:39Pilato nga e’yo omvi, Ma Yahudiouni ya? Suru mini pi kuhani amboru ’diyi be eji mi fe ma drini; mi ’ye a’dini ya? 36Yesu nga e’yo omvi, Opi nyaza mani ovuni nyaku ’diria ku; opi nyaza mani ka te ovu nyaku ’diria, te’do asikari mani yi omba ’baria, ma ma ovu ani jizaru fezu ’ba Yahudini dri ku; te curu’do opi nyaza mani engani ’doa ku. 37#1 Tim 6:13; Yoh 8:47; 10:27Pilato nga ’yo eri tia ani, Mi di opini ya? Yesu nga e’yo omvi, Mi ’yo te ra ma opini. Osi ma e’yo ’disi, e’yo ’disi ma eca nyakua ani, ’dini ma ma nze e’yo adaruri ma eti. ’Ba dria alu alu e’yo adaruni ’diyi yi ma o’duko eri ra. 38Pilato nga ’yo eri tia, E’yo adaruri a’dini ya?

Eri ka e’yo ’diri ’yo ’bo, eri fu amve dika ’ba Yahudini vu, eri ’yo yi tia, Ma isuni ezata erini ku. 39Adriza eminiri vusi ma ma tru ’ba alu emi dri agaza ’ba drilesiri ma alia; emi le ma ma tru ani emi dri Opi Yahudiniri ya? 40Yi nga di otre dika kini, ’Ba ’diri’i yo, bani Baraba’i! Isu de Barabani oguouni.

Currently Selected:

Yohana 18: LB66

Highlight

Copy