Yohana 19

Mi ndre, agu nderi!

1Pilato nga di Yesuni ’du ji, co ninisi. 2Asikari nga oci ekila okuru, su eri dria, nga vini eri esu bongo ondrala kondralarisi; 3#Yoh 18:22yi nga emu eri vu, kini, Mi zi mi ci ci, Opi Yahudini lou! Yi nga eri sa urisi. 4Pilato fu amve dika, ’yo yi ria kini, Mi ndre, ma eri ofu emi vu ’di, emi ma ni ani ma isuni ezata eri ma alia aluni ku. 5Yesui nga di fu amve ani, oci okururi be dria azini bongo ondralakondralaruri be ruaa. Pilato ’yo yi tia, Mi ndre, agu nderi! 6Kuhani amboru ’diyi pi yi vile asikari ’diyi be ka eri ndre ra, yi nga oyu uru kini, Ma di eri pati ruaa, ma di eri pati ruaa! Pilato nga ’yo yi tia, Emi ngulupi ma ji eri dizu pati ruaa emi’i, te maruni ma isuni ezata eri ’ma alia aluni ku. 7#Yoh 5:18; 10:33; Lev 24:16’Ba Yahudini nga e’yo omvi eri tia, Azita amani indi, azita ’diri le eri ma dra ra, erini i ngulupi ’bale Mungu ma Mvarurisi. 8Pilato ka e’yo ’diri eri ra, uri bi di eri aga ra 9eri fi dika riidri e’yo lizuria, eri ’yo Yesu tia, Mi ibi enga ngoa ya? Te Yesu omvini e’yo eri tia ku. 10Pilato nga ’yo eri tia ani, Mi ’yoni ma ria ku ya? Mi nini ma okpo be mi truzu, azini ma okpo be mi dizu pati ruaari ku ya? 11#Yoh 10:18; ’Yeta 2:23Yesu omvi e’yo eri ria kini, Okpo mini afa azini ’yezu ma ruaani yo, ka ovu fezaru mi dri engazu ’bua ku; ’dini ’ba ma ejipi fepi mi driri ma ezata aga ra.

Li Yesu ma e’yo drazu ra

12 # ’Yeta 17:7 Engazu ’disi Pilato nda geri eri truzu ra, te ’ba Yahudini yi oyu uru kini, Mi ka ’ba ’diri tru ra, de di mi agyi Kaisarini yo; ’ba dria alu alu i ’bapi opiruri mbu Kaisari ruaasi amve. 13Pilato ka di e’yo ’diyi eri ra, eri nga Yesuni ji amve, nga ri va oguna e’yo lizuri ma dria, pari ’bani omvele Oni Otiza’iria, te Ebrania tisi eri Gabata’i. 14Isu o’du ’dari eri Edeza agaza ’ba drilesiriari’i; etu eca ekile aziale. Eri nga ’yo ’ba Yahudini ma tia, Mi ndre, Opi eminiri! 15#Yoh 19:6Yi nga otre uru ani, Ma ji eri ’dale, ma ji eri ’dale, ma di eri pati ruaa! Pilato nga ’yo yi tia, Ma Opi eminiri di pati ruaa ya? Kuhani amboru yi nga e’yo omvi, Opi amani yo pe lu Kaisari’i, 16#Mat 27:31-50; Mar 15:20-37; Luk 23:26-46Eri nga di eri fe yi dri ani dizu pati ruaa.

Yesuni dizu pati ruaari

17Yi ji Yesu ani, erini pati alaza i ngulupini jiria, eri fu mu pari ’bani omvele ’Ba dri fala’iria, yini omvele Ebrania tisi Gologota’iri. 18Yi di eri pati ruaa ’daa, yi di ’ba azini iri eri be tualu, alu kala aluria, alu kala aziniria, Yesuni yi eselia agadua, 19Pilato si e’yo eri ma e’yo e’dazuri, ’ba eri pati alaza ma dria; e’yo siza ovu ’dini, YESU ’BA NAZARETIA, OPI YAHUDINIRI’I. 20’Ba Yahudini kakau nga e’yo e’daza ’diri la, a’elisiku pari yini Yesuni dizu pati ruaari ovu ogogo aku amboru ma ageia; yi si e’yo siza nde Ebrania tisi, Rumi tisi, Giriki usi. 21Kuhani amboru ’ba Yahudini ma drilia ’diyi nga ’yo Pilato ma tia ani, Mi si, Opi Yahudiniri’i ’dini ku, te mi si, Eri ’yo ra kini, Ma Opi Yahudiniri. 22Pilato nga e’yo omvi, E’yo mani sile ’bori ma si te de ’bo.

23Asikari ka Yesuni di pati ruaa ’bo, yi nga bongo erini o’du awa tindi su asikari alu alu vusi; yi nga koti erini ’du ’dini indi. Isu baka mile bongo ecizuri koti ruaa yo, yi ca ndra eri engazu uru kpere ele bongo aluru; 24#Zab 22:18yi nga ’yo yi eselia ani, Ama osi eri ku, te ama nya eri odrisi ’bezasi, ama nga ’ba ’dupiri a’eli’i yari ni ani. ’Dini e’yo siza ma ’ye i, kini,

Yi awa bongo mani yi eselia,

yi ’be odrisi koti mani nyazu. Asikari ’ye ani ’dini.

25Te andri erini pi oso pa pati alaza Yesuni ma ageia, andri ma amvi pie, Mariamu oku Kileopa vileri pie, Mariamu Magadaleni pie. 26#Yoh 13:23Yesu ka i andrini ndre, ’ba erini imbale erini leleri be erini pa soria ogogo, eri ’yo i andri tia, Oku la, mi ndre, mi mvini ’eli! 27Eri nga eli ’yo ’ba erini imbaleri ma tia, Mi ndre, mi andrini ’di! Engazu etu ’dasi ’ba erini imbale nderi ’du eri ji i vile joa.

28 # Zab 22:15; 69:21; Yoh 13:3; 18:4 E’yo ’diri ma vutia, Yesuni niria kini e’yo dria ’ye yi de ’bo, e’yo siza ma ’ye i ani, nga ’yo ra, Yi avijo fu ma ra. 29#Zab 69:21Isu yi ’ba te patiefi su drazaru imvu ma alia tre ’daa; yi nga afa ezekezeru su patiefi su takari ma alia, nga eri su pati sia, ’ba tilenia ani. 30Yesu ka patiefi su drazari a’i ’bo, eri ’yo ra, De i ’bo; eri nga i dri elu, ku orindi ini fuzu ra.

Yesu ma eje sozu ajusiri

31 # Azi 21:23 O’du ’darini ovule Edezanirisi, ’ba Yahudini nga zi Pilato tia ma onyo yi ma pa, ma otru yi jizu, yi ma avu kazu ovuzu pati alaza ma dria o’du sabatonisi ku (te o’du sabatoni ’dari eri o’du amboni) 32Asikari nga emu ani, nga ’ba okori pi ma pa onyo ’ba azini yiru dile eri beri be; 33te yi ka eca Yesu vu, ka ndre ra eri dra kai ’bo, yi onyoni pa erini ku. 34Te lasikari alu nga ejeni so ajusi, coti ari pi ’ba ra yi be ra ra. 35’Ba ndrepi rari nze e’yo nderi ma eti ’bo-e’yo eti erini nzeleri eri adaru, eri ni ra eri e’yo adaruri ’yo-emi ma a’i ani beni. 36#Efu 12:48; Kal 9:12; Zab 34:20Te e’yo ’diyi ’ye yi e’yo siza ma ovu ’yezaru ani, kini, Yi ngani fala erini nye aluni ku. 37#Zek 12:10; Eceza 1:7Te dika e’yo siza azini kini, Yi nga ’ba yini soleri ndre.

Yesu ma avu sazuri

38 # Mat 27:57-61; Mar 15:42-47; Luk 23:50-55 E’yo ’diyi ma vutia, Yusufu ’ba Arimateaari, eri ’ba Yesuni imbaleri, te di ndindiru erini ’ba Yahudini rulerisi, eri a’i Pilato tia i ma ’du avu Yesuni ji; Pilato nga a’i ra. Eri emu ani, avuni ’du ji ra. 39#Yoh 3:1-2; Mat 2:11Nikodemu nga emu alu indi, eri ’ba ndra emupi oko eri vu inisiri’i, eri nga ajinguru arikariru osale nzo beri eji, ekile ratili turu alule ’dipi. 40Yi ’du di avu Yesuni, nga eri oti bongo emverusi afa arikariruri be, ekile ’ba Yahudiniri adrile ’ba avu salerile. 41De amvu indi pari yini eri dizuria, azini gule o’diru ’ba sazu nga alenia kuri indi amvu nde ma alia. 42Erini ovule ’ba Yahudini ma o’du Edezanirisi, azini gule nderini ovule ogogorisi, yi nga di Yesuni ’ba ’daa.

Currently Selected:

Yohana 19: LB66

Highlight

Copy