1 ŴaKorinte 10
10
Chenjezgu lakumikana ndi ŵachiuta ŵangoza
1Chifukwa kuti ndikhumba cha, mwa ŵabali, mureke imwe kuziŵa, kuti auskefwe wose ŵenga pasi pa mtambo wo, wose ŵanguporota mu nyanja yo; 2ndipo wose ŵangubatizikiya mwaku Mosese, mu mtambo wo ndi mu nyanja yo; 3ndipo wose ŵangurgha chakurgha cha Mzimu waku Chiuta unguŵapaska; 4ndipo wose ŵangumwa chakumwa cha Mzimu wo. Chifukwa ŵamwanga ku Jarawe lamzimu lakuŵarondo: ndipo Jarawe lo lenga Kristu. 5Kweni Chiuta wengavi kukondwa ndi urapasi waku wo; rekani ŵangumwaranikiya mu bozwa.
6Ndipo sono ivi vyakutichenjezga ifwe, mwakuti tingakhumbiranga ifwe viheni cha, uli ndimo ŵangukhumbiriya iwo. 7Ndipo tingaŵanga ŵakusopangoza cha uli mbanyake ŵaku wo; nge ndimo kwalembeke, “Khamu linguteka pasi kurgha ndi kumwa ndipo lingusoka kwachivina.” 8Ndipo tingaŵanga ŵareŵi cha, uli ndimo ŵanyake ŵaku wo ŵanguchitiya ndipo mu zuŵa limoza viguŵa vikwi machumi ghaŵi ndi vitatu. 9Tingesanga Ambuya cha, nge ndimo ŵangwese ŵanyake ŵaku wo, ndipo ŵangumara ndi njoka zo. 10Ndipo mungadinginikanga cha, nge ndimo ŵanyake ŵaku wo ŵangudinginikiya, ndipo ŵangumara ndi wakubaya yo. 11Ivi vinguŵaŵiya ŵa nge nchakuteskiyapo; ndipo vingulembeke kutichenjezga ifwe, paku taŵenifwe wafikiya umari wa migonezi. 12Viyo yo ngwakujipima kuti watuma, wacheŵe vinu wangawa. 13Kuti kakuziyanipo cha kesedu kakupambana ndiko kaziya pa munthu we yose. Ndipo Chiuta ngwamagomekezgeka, mweniyo kuti wangatayirizga imwe cha kuti mweseke kwakujumpha cho mungakunthiyapo; kweni pamoza ndi kesedu ko wapaskenge so nthowa yakuposomokiyapo, alinga kuti muziŵenge kukunthiyapo.
14Viyo mwaŵakwanjiwa ŵangu, thaŵani kusopa-ngoza. 15Ndikamba nge nkhu ŵakuwamo; jeruzgeni mwaŵeni cho ndinena. 16Chandi cha chitumbiku cho titumbika, asi tisangana mu ndopa zaku Kristu? Chiŵande cho timenya, asi tisangana mu liŵavu laku Kristu? 17Pakuti chiripo chiŵande chimoza, ifwe taŵanandi te liŵavu limoza; chifukwa tose tisanganapo pa chiŵande cho chimoza. 18Thoŵani kachitiru ka ŵaYisraele: asi wakurgha vya sembe vyo mbakusangana ndi jochero lo? 19Kumbi nding'anamuwanji ndi ichi? Ndiku kuti nchakubayikiya changoza nkhanthu kumbi? Pamwenga kuti changoza nkhanthu kumbi? 20Awa na, vyo ŵamitundu ŵabaya, ŵabayiya ŵademone, kuti ŵabayiya kwaku Chiuta cha. Kuti ndikhumba imwe kuŵa ŵakusangana ndi ŵademone cha. 21Kuti muziŵa cha kumwa chandi cha Mbuya ndi chandi cha ŵademone: kuti muziŵa cha kusanganapo gome la Mbuya ndi gome la ŵademone. 22Pamwenga tisosomole Mbuya ku sanji, kumbi? Kumbi te ŵanthazi ifwe kwakuruska iyo?
23“Vinthu vyose vyamachitika”; kweni kuti vyose vitovya cha. “Vinthu vyose vyamachitika”; kweni kuti vyose vizenga cha. 24Paŵevi yumoza wakujilembeze umampha wa paku vija kweni yose wapa munyake. 25Chose cho chiguliskika pa msika wa nyama rghani, ndipo rekani kufumbapo kanthu kakuguŵiskana mu njuŵi cha. 26Chifukwa, “Ncha Ambuya charu chapasi, ndi uzali wake.” 27Asani yumoza wa ŵambura chivwanu wakudanani, ndipo mukhumba kuruta; rghanipo chose cho chajarikikiya imwe, kwambura kufumbapo kanthu pa chifukwa cha njuŵi. 28Kweni asani yumoza watikuneniyani, “Ichi ncha vyakubayikiya changoza,” mungarghangapo cha, pa chifukwa chaku yuwa warongoro, ndi chifukwa cha njuŵi: 29kuti ndinena njuŵi zaku iwe wamweni cha, kweni za munyake yo; iku reka kurgha chifukwa wanangwa wangu uteruzgika uli ndi njuŵi za munthu munyake? 30Asani ine ndisanganapo pakurgha ko ndawonge kali, chifukwa chine ndisuskika kwawaka paku cho ndiwonge?
31Viyo chingana muturgha, chingana mutumwa, chingana muchitanji, chitiyani vyose ku unkhankhu waku Chiuta. 32Mungaguŵiska ŵaYuda, chingana mbaGriki, chingana ndi mpingu waku Chiuta cha: 33ulaka ndine nane mwaku vyose nditesa ndikondweska wose, ndawakulembe chanduwu chaku ndamweni cha, kweni cha ŵanandi wo, alinga kuti ŵataskike.
Currently Selected:
1 ŴaKorinte 10: TongaMw
Highlight
Share
Compare
Copy
Want to have your highlights saved across all your devices? Sign up or sign in
Bible Society of Malawi