1 ŴaKorinte 9
9
Mtufu ndi mlimu ya wakutumika
1Asi ndine mwanangwa? Asi ndine wakutumika? Asi ndawona Yesu Ambuyafwe? Asi ndimwe nchitu yangu mu Mbuya? 2Asani ku ŵanyake kuti ndi wakutumika cha, ndikweni kwaku imwe nde wakutumika, chifukwa imwe mwe chizighiriyu cha utumiki wangu mu Mbuya.
3Chivekeru changu ku ŵakunderuzga nchenichi. 4Kumbi tirive mtufu wapa vyakurgha ndi vyakumwa vyakutaŵeni? 5Kumbi tirive mtufu wakwende marwendo ndi muwoli wakuvwana, nge mbakutumika ŵakujapo, ndi ŵahurwa ŵa Ambuya, ndi Kefa? 6Pamwenga ine pe ndi Barnaba ndifwe tirive mtufu kujirekeska kutakataka?
7Njani wateŵeta nge ndi msilikari wa nkhondo pa mphoto ya mweneko yija? Njani wapanda munda wa mphereska, ndi wareka kurghapo chipasi chake? Pamwenga njani waliska mskambu, ndi wareka kumwapo mkaka wa mskambu wo?
8Kumbi ndikamba vyenivi kwakulingana ndi mazaza gha unthu? Pamwenga langulu nalo asi likamba vyenivyo pe? 9Chifukwa mu langulu laku Mosese kwalembeka, “Ungasunamiskanga cha, ng'ombe yakubura#9.9 yakubura: uku ndiku kuti ng'ombe yaku phwantha mbutu, kubura nkhuphwantha. mbutu.” Kumbi Chiuta watiziphwere ng'ombe? 10Pamwenga asi wakamba ndi pa chifukwa chidu? Inya kungulembeke pa chifukwa chidu, kuti wakulima watene kulimiya mu chigomekezgu, ndi kuti wakuvuna wavuniya mu chigomekezgu chakusanganapo pa vyakurgha vyo. 11Asani ifwe tingukumijiyani vyamzimu, nchinthu chikuru kumbi asani tivunenge ifwe tivunenge kwinu vya liŵavu? 12Asani ŵanyake ŵasangana mtufu uwu paku imwe, asi ifwe ukongwaku? Kweni kuti tinguchitiya mu mtufu weniwo cha; ifwe tikunthiyapo vyose, alinga kuti tingatangwamiska kose evangeli waku Kristu cha. 13Asi muziŵa kuti ŵakutakatakiya kasopi ŵaturghapo vya ku kasopi ndi kuti ŵalinda ŵapa jochero ŵasangana chigaŵa ndi jochero lo? 14Viyo Ambuya ŵaŵateme ŵakutaula evangeli, ŵasaniye umoyo wawo ku evangeli wo.
15Kweni ine kuti ndachitapo kanthu ndi mtufu uwu cha, ndipo kuti ndilembe yagha alinga kuti kuŵiye ine viyo cha. Chifukwa kungaŵa kwamampha kwaku ine kuti ndifwe kwakuruska kuti munthu wawayuwe kutumbwa kwangu. 16Chifukwa chingana nditaula evangeli, kuti ndiwo utindipaska nthowa yakujikuzgiya cha. Pakuti nditutuzgika mtima. Owe soka ine, asani ndireka kutaula evangeli. 17Chifukwa asani ndichita ichi mukhumbu laku ndamwene, nde nayo mphotu: kweni asani kuti ndimukhumbu langu cha nchifukwa chakuti: ndagaŵikiya mlimu uwu. 18Iku njine mphotu yangu? Mphotu yangu njakuti nadi muchitaula changu ndiŵike evangeli. 19Chifukwa pakuŵa mwanangwa kwaku wose, ndajisanduska muŵanda kwaku wose, alinga kuti ndanduwe ŵanandi. 20Ku ŵaYuda ndinguŵa nge ndi muYuda, alinga kuti ndanduwe ŵaYuda; ku ŵapasi pa langulu ndinguŵa nge ngwapasi pa langulu (chingana ndamweni kuti nde pasi pa langulu cha), alinga kuti ndanduwe ŵapasi pa langulu. 21Ku ŵakuwura langulu, nge ngwakuwura langulu (pakuŵa wakuwure dangu laku Chiuta cha, kweni wa mukati mu dangu laku Kristu), alinga ndiŵanduwe ŵakuwura langulu. 22Ku ŵadomboto ndinguŵa ŵadomboto, alinga kuti ndanduwe ŵandomboto: kwaku wose ndaŵa vyose, alinga kuti kosekose nditaske ŵanyake. 23Ndipo vyose, ndichitiya pa chifukwa cha evangeli wo, alinga kuti ndiŵi msangazi mu vitumbiku vyake.
24Asi muziŵa kuti ŵakuchimbiya mu maphara ŵachimbiya wose, kweni yumoza ndiyu waronde mphotu? Chimbiyani viyo kuti muronde. 25Ndipo yose wakulimbalimbiya mu maseŵero wajitintha mwaku vyose. Wachita viyo mwakuti waronde ndumbu yakuvunda; kweni ifwe njambura kuvunda. 26Ine ndichimbiya nge ngwakukayikakayika cha; kuti ndibakafuwa, nge ngwakukung'untha mude mwaŵaka cha; 27kweni ndijenyeska liŵavu langu, ndipo nditirithereska: vinu, ndati ndamemeze ŵanyake, ndamweni ndingaŵa wakupatika.
Currently Selected:
1 ŴaKorinte 9: TongaMw
Highlight
Share
Compare
Copy
Want to have your highlights saved across all your devices? Sign up or sign in
Bible Society of Malawi