1 ŴaKorinte 11
11
1Muŵe ŵakwezga ine mo ine nane nditezge Kristu.
Kuvwinkha mutu pakusopa
2Sono ndimrumbani kuti mu vinthu vyose mwandikumbuka, ndi kuti mwasungirizga midauku yo, uli ndimo ndinguyipereke kwinu. 3Kweni ndikhumba muziŵe, kuti munthurumi yose mutu wake ndi Kristu; ndipo mutu wa munthukazi ndi murumi wake, ndipo mutu waku Kristu ndi Chiuta. 4Munthurumi yose wakuŵa ndi chivwinkhu pa mutu, wachiromba pamwenga wachitaula, walengeska mutu wake. 5Kweni munthukazi yose, mweniyo waromba pamwenga wataula ndi mutu wake wambura kufukika, walengeska mutu wake, wenge ngwakumeteka. 6Chifukwa asani munthukazi walive kufukika, iku wasenge sisi lake; kweni asani nkhwalilengu ku munthukazi kusengeka pamwenga kumeteka, iku wafukike. 7Munthurumi kuti watenere kufukika mutucha, pakuti iyo nchikozgu ndi unkhankhu waku Chiuta: kweni munthukazi mbunkhankhu wa munthurumi. 8(Chifukwa kuti munthurumi ngwa ku munthukazi cha; kweni munthukazi ngwaku munthurumi. 9Chifukwa nadi kuti munthurumi wangulengeke munthukazi cha; kweni munthukazi wangulengeke munthurumi.) 10Chifukwa chenichi muthukazi watenere kufukika mutu wake, pa chifukwa cha ŵangelo wo. 11Ndikweni, mu Mbuya munthukazi kuti we pade pa munthurumi cha, chingana ndi munthurumi pade pa munthukazi cha. 12Chifukwa uli ndimo munthukazi wangulengeke kutuwa ku munthurumi, viyo munthurumi nayo le wapapika ndi munthukazi. Kweni vyose vyakutuliya kwaku Chiuta. 13Mwaku mwaŵeni yeruzgani: kumbi kuyiyamu munthukazi kuti warombe Chiuta kwambura kufukika? 14Asi kaŵiru kija kakusambizgani kuti, asani munthurumi walimbika sisi, ndi lilengu kwaku iyo? 15Kweni asani munthukazi walimbika sisi, mbunkhankhu wake? Pakuti sisi lake likupaskikiya iyo nge nchivwinkhu. 16Kweni asani yumoza wachita suskano pakukhumba kususka waka, tirive ifwe karusu kaviyo, chingana ndimu mipingu yaku Chiuta.
Njonesku ya Ambuya
(Mateyu 26.26-29; Marko 14.22-25; Luka 22.14-20)
17Kweni ndichikulanguliyani ichi, kuti ndimrumbani cha, chifukwa kuti muwungana mu umampha cha kweni mu uheni. 18Chifukwa, chakudanga nchakuti muchiungana nge mbampingu ndituvwa mwe magaukanu mukati mwinu, ndipo kurwandi ndivwana. 19Chifukwa nadi mungwenere kuŵa magaukanu mukati mwinu, alinga kuti ŵawoneke wo mbakurumbika. 20Viyo muchiwungana pamoza, kuti muturgha nadi njonesku ya Ambuya cha. 21Chifukwa mu kurgha kwinu munthu we yose watinthimika pa kurgha kwaku yija, uyu waturgha ndi nja, ndipo uyu watumwa mpaka kuloŵe. 22Awa na, asi mwe nazo nyumba zakumwaŵeni mwenimo nungargha ndikumwa? Pamwenga kumbi muyuyuwa mpingu waku Chiuta, ndi kuŵalengeska wo mbakusauka? Nkhakambanganji namwe? Kumbi nkhakurumbaninga mwaku chenichi? Awa kuti nditikurumbani cha. 23Chifukwa ine ndinguronde ku Ambuya chenicho so ndingupereka kwaku imwe, kuti Ambuya Yesu mu usiku wo wakumbolekiyanga, wanguto chiŵande. 24Ndipo wanguti wawonga, wangumenya, ndipo wanguti, “Chenichi ndi liŵavu langu, lapa chifwa chaku imwe: chenichi chitani kwachikumbuka ine.” 25Viyo so nkhombo nayo, pavuli pa koneska, wakuti, “Nkhombo iyi ndi phanganu lifya mu ndopa zangu; chenichi chitani, penipo pose mutumwa, kwachikumbuka ine.” 26Chifukwa penipo pose muturgha chiŵande chenichi, ndi mutumwa nkhombo yeniyi, mutaula nyifwa ya Ambuya mpaka wazenge. 27Ndiviyo yose wakurgha chiŵande cho pamwenga wakumwa nkhombo yo ya Ambuya kwambura kwene, wakaŵanga wakalema ku liŵavu ndi ndopa vya Ambuya. 28Kweni wadange wajesa munthu ndi viyo warghepo chiŵande cho, ndi wamweko nkhombo yo. 29Chifukwa wakurgha ndi wakumwa pakureka kuteska liŵavu lo. Watijirghiya ndi watijimwiya chisusa. 30Chifukwa chenichi ŵanandi mbakutomboroka ndi mbarwali mwaku imwe, ndipo ŵanandi ŵara tulo. 31Kweni asani tajeruzganga taŵeni mu uneneska, mphanyi kuti tatinge teruzgikenge cha. 32Kweni pakweruzgika tilangika ndi Mbuya, alinga kuti tingasuskikiya pamoza ndi charu cha. 33Ndiviyo, mwa ŵabali ŵangu, muchiungana pamoza pakurgha, lindizganani. 34Ndipo asani yumoza watufwa msara, warghe kwake ku nyumba, alinga kuti mureke kuwungirana ku chisusa. Ndipo vyo vya jako ndazamurongoro po ndiziyenge.
Currently Selected:
1 ŴaKorinte 11: TongaMw
Highlight
Share
Compare
Copy
Want to have your highlights saved across all your devices? Sign up or sign in
Bible Society of Malawi