1 ŴaKorinte 14
14
Vyawanangwa vinyake vyakupaskika ndi Mzimu Wakupaturika
1Rondoni chanju, ndipo khumbirani vyamzimu vyo, kweni ukongwa kuti mutaule. 2Chifukwa wakukambiya mu karongoroledu, kuti wakambiya ku ŵanthu cha, kweni kwaku Chiuta; chifukwa palive yumoza watuvwa; kweni wakamba mangari mu Mzimu. 3Mu fundu yinyake, yo wataula wakambiya ŵanthu mwakuti ŵazengeke, wakhwimiskike ndi ŵasangaluskike. 4Yo wakambiya mu karongoroledu wajizenga yija; kweni yo wataula wazenga eklesiya. 5Ndipo ndikhumba kuti mphanyi mose mwakambiyanga mu marongoroledu, kweni ukongwa viŵi kuti mutaule. Wakutaula yo ndi mura kwakuruska yo wakambiya mu marongoroledu, kweni kuti iku waŵepo wakung'anamuwa, mwakuti eklesiya lizengeke.
6Kweni sono, mwa ŵabali, asani ndingaziya kwinu wakukambiya mu marongoroledu, ndikwanduliyeninge chine, asani ndireka kumkambiyani mu uvumbuzi, pamwenga mu mziŵiru, pamwenga mu umchimi, pamwenga mu chisambizgu? 7Chingana ndi vinthu vyambura umoyo navyo, vyakumba mazu, fyoliro pamwenga bangwi, asani vireka kupambana mukakambiru kawo, chiziŵikwenge uli cho chifyororoskeka pamwenga chikambika? 8Pamwenga napo, asani mbata yingapaska mazu ghakudondeska, njani wajiskomiyenge ku nkhondo? 9Viyo namwe so, kwambura kuti ndi lilime mupaska mazu ghamateskeka, chiziŵikwenge uli cho mukamba? Iku muŵenge ŵakurongorole mude! 10Mu charu mwe mitundu yinandi ya mazu, ndipo palive ghamoza ghambura fundu. 11Viyo asani ndirive kuziŵa kang'anamulidu ka mazu gho, ndiŵenge nge ngwa mtundu kwaku yo wakamba, ndi wakukamba yo nayo so viyo kwaku ine. 12Viyo so imwe namwe, muchikhumbira vyawuvumbuzi wa vya mzimu, vilembeni mwakuti muruske pa kwachizenge navyo eklesiya lo.
13Ndiviyo wakukambiya ndi karongoroledu, warombe mwakuti waziŵe kang'anamuwa. 14Chifukwa asani ndirombe mu karongoroledu, Mzimu wangu uromba, kweni vinjeru vyangu viura chipasi. 15Viyo kwati? Ndirombenge ndimzimu, ndipo ndirombenge ndi vinjeru so: ndimbenge ndi mzimu, ndipo ndimbenge ndi vinjeru navyo. 16Ipu napo, asani utumbika ndi mzimu, yo ngwambura kuwamo wanenenge uli “Ameni” pa chiwonga chako, penipo walive kuziŵa cho urongoro? 17Chifukwa iwe ungawonga umamphavi, kweni munyake yo kuti wazengeka cha. 18Ndimwonga Chiuta chifukwa ine ndikamba ndi marongoroledu kwakuruska mose; 19kweni ndipuuli mu mipingu mphanyi ndikamba ndi vinjeru vyangu mazu ghankhonde, viyo kuti ndisambizge ŵanyake nawo, kwakuruska mazu vikwi chumi mu karongoroledu.
20Mwa ŵabali, mungaŵanga ŵana mu vinjeru; kweni mu uheni muŵe twana; ndipo mu vinjeru ŵakukhoma. 21Mu langulu lo kwalembeke, “Ndi ŵanthu ŵa malilime ghamwenga ndipo ndi milomo ya ŵalendo ndirongoronge ndi khamu ili; ndipo chingana kuŵi viyo kweni kuti ŵakandivwiyanga cha, atiti Ambuya.” 22Viyo marongoroledu gho nchisimikizgu, ku ŵakuvwana cha, kweni ku ŵazirakuvwana: kweni kutaula nchisimikizgu, ku ŵazirakuvwana cha, kweni ku ŵakuvwana. 23Viyo asani eklesiya lose laungana pamoza, ndipo wose ŵarongoro mu marongoroledu, sono asani ŵazirakuwamo pamwenga ŵazira-kuvwana, ŵaseremo asi wanenenge kuti mwafuntha? 24Kweni asani wose ŵataula, ndipo mzira-kuvwana pamwenga mzirakuwamo waseremo, wapanikisgika ndi wose, wateseka ndi wose; 25vibisibisi vya mtima wake viwoneka pakweru; ndi viyo pakuŵa pasi kavunama wamlambiyenge Chiuta; ndi kunena kuŵanthu wose kuti nadidi Chiuta we mukati mwinu.
26Na kwati, mwa ŵabali? Penipo muwunjikana, yose we ndi sumu#14.26 sumu: ndi buku lo ladanikanga Salmo. we ndi chisambizgu, we ndi uvumbuzi, we ndi karongoroledu, we ndi ching'anamuwa. Vinthu vyose vichitikiye kuuzengi. 27Asani munthu warongorole mu karongoroledu, ŵakambe ŵaŵi pe, pamwenga ŵatatu, kwakurulika, ndipo yumoza wang'anamuwenge, 28kweni asani wakung'anamuwa palivi iku wachetame mu mpingu; kweni wajikambiyenge pa mtima wake kwaku Chiuta. 29Ndipo ŵamchimi ŵaŵi pamwenga ŵatatu ŵakambenge, ndi ŵanyake ŵateskenge vyo vikambika. 30Kweni asani uvumbuzi wawoneka ku munyake waŵakutekapo, wakudanga yo wachetame. 31Chifukwa muziŵa mose kutaula, yumoza ndi yumoza alinga kuti wose ŵasambire, ndi wose ŵachinthiskike; 32ndipo mizimu nayo ya ŵamchimi yithereskeka ku ŵamchimi. 33Chifukwa Chiuta kuti ngwa chimtimbaheka cha, kweni ngwa chimangu. Uli ndi mu maeklesiya ghose gha wakupaturika, 34ŵanthukazi ŵachetame mu mipingu. Kuti kuzomerezgeka kwaku wo cha kukamba; kweni ŵathere, uli ndimo linene langulu nalo. 35Kweni asani ŵakhumba kusambira kanthu, ŵafumbe ŵarumi wawo ku nyumba; chifukwa nkhwasoni ku munthukazi kukamba mu mpingu. 36Mutitinji? Kumbi nkhwaku imwe ko mazu ghaku Chiuta ghangutuliya? Pamwenga kumbi nkhwaku imwe pe ko ghanguza?
37Asani munthu warunguruka kuti ndi mchimi, pamwenga wamzimu, waziŵe kuti vyo nditukulembiyani nchilangulu cha Mbuya. 38Kweni asani munthu wareka kuwamo ivi wareke kuwamo! 39Viyo mwa ŵabali ŵangu, khumbirani kutaula, mungakanizganga kukambiya mu marongoroledu cha. 40Kweni vinthu vyose vichitike kwaulemu ndi kwaurusu.
Currently Selected:
1 ŴaKorinte 14: TongaMw
Highlight
Share
Compare
Copy
Want to have your highlights saved across all your devices? Sign up or sign in
Bible Society of Malawi