1 ŴaKorinte 15
15
Chiyuka chaku Kristu ku nyifwa
1Kweni ndimziŵiskiyani, mwa ŵabali, evangeli weniwo ndingumtauliyani, weniwo nawo munguronde, mwenimo so mumiya, 2mwaku weniwo so mutaskikiya, ne mukoreze mazu gho ndingumtauliyani; vinu ching'anamuka chinu chingaŵa cha ŵaka.
3Chifukwa mu vinthu vyakuzirwa vyakudanga ndingupereka kwaku imwe chenicho nacho ndinguronde, kuti Kristu wangufwa chifukwa cha vilakwa vidu, kwakulingana ndi malembo gho; 4ndipo kuti wanguŵikika; ndi kuti wanguyuskika pa zuŵa lachitatu, kwakulingana ndi malembo; 5ndi kuti wanguwoneka kwaku Kefa; pavuli pake ku chumi ndi ŵaŵi wo. 6Pavuli wanguwoneka ku ŵabali ŵakuruska machumi pe chumi ghankhonde pa malo ghamoza, ŵaku ŵeniwo ŵanandi ku ŵachalipo, kweni ŵanyake ŵara. 7Pavuli wanguwoneke Yakobe, pavuli pake ku ŵakutumika wose. 8Ndipo pakumariya limu wanguwoneka kwaku ine nane, ulaka nkhu wausoposka. 9Chifukwa ine nde mumana limu wa wakutumika, ndawambura kwene kutamulika wakutumika, chifukwa chakuti ine ndinguliŵemba eklesiya laku Chiuta. 10Kweni ndi wezi waku Chiuta nde ine mo ndiliri: ndipo wezi wake wakwaku ine kuti unguŵa wawaka cha; pakuti ndatakataka kwa nthazi ukongwa kwakuruska iwo wose; ndipuuli ine cha, kweni wezi waku Chiuta wo we nane. 11Viyo na manyi ndine, pamwenga iwo, tingutaula, ndipo imwe munguvwana.
Chiyuka chidu ku nyifwa
12Kweni asani Kristu wataulika kuti wakuyuskika ku ŵakufwa, ŵakamba uli ŵanyake mwaku imwe kuti chiyuska cha ŵakufwa palive? 13Asani chiyuska cha ŵakufwa kulive, iku chingana ndi Kristu kuti wakuyuskika cha; 14ndipo asani Kristu walive kuyuskika, chitaula chidu nchaumbughuya, ndipo chivwanu chinu nacho nchaumbughuya. 15Ndipo so tisanirika kuŵa visimisimi vitesi vyaku Chiuta; pakuti tingusimikizgiya ndi Chiuta kuti wanguyuska Kristu, mweniyo wengavi kunyuska, asani nadi ŵakufwa, kuti ŵayuskika cha. 16Chifukwa asani ŵakufwa kuti ŵayuskika cha, iku chingana ndi Kristu kuti wakuyuskika cha. 17Ndipo asani Kristu walive kuyuskika, chivwanu chinu nchaŵaka; mweche mu vyakulakwa vinu. 18Sono wo ŵakufwiya mwaku Kristu nawo mbakuyowa. 19Asani mu umoyo uno pe te ŵakugomekezga mwaku Kristu, iku mu ŵanthu wose ifwe te ŵasokwa kwakuruska.
20Kweni sono wayuskika Kristu ku ŵakufwa, mruwuku waku wo mbakura. 21Chifukwa mwakuti mu munthu yikuza nyifwa, mu munthu so chikuza chiyuska cha ŵakufwa. 22Chifukwa uli ndimo mwaku Adamu ŵafwiya wose, viyo so mwaku Kristu wose ŵasanduskikenge ŵamoyo. 23Kweni yose mu mindondomeku wake: Kristu mruwuku; pavuli pake wo mbaku Kristu, pa uzi wake. 24Pavuli po pe umari, penipo wampereka ufumu wo kwaku Chiuta Dada iyo, penipo wamwayuwa ura wose ndi mtufu wose ndi nthazi. 25Chifukwa kutenere iyo kuwusa, mpaka penipo waŵika ŵamawongu wose kusi ku marwayo ghake. 26Wamawongu wakumariya kwachiwayulika ndi nyifwa. 27“Chifukwa, Chiuta wathereske vinthu vyose kusi ku marwayo ghake.” Kweni po wanguti, “Vyose vyathereskeka,” kuwoneka kuti iyo ngwa pade yo wangumthereske vyose. 28Ndipo vyati vyathereskeke vyose kwaku iyo, po ndipo Mwana nayo watherenge kwaku mweniyo wangumthereske vyose, alinga kuti Chiuta waŵe vyose mwaku vyose.
29Iku ŵamchitanji wo mbakubatizikiya pa chifwa cha ŵakufwa wo? Asani kosekose ŵakufwa ŵareka kuyuskika, ŵabatizikiyanji chifukwa chawo? 30Ndipo nanga ifwe nafwe so tijariyanji mu urwani ora le lose? Kuti nthufwa zuŵa ndi zuŵa. 31Ndirapa mu kujikuzga ko ndenako mwinu mwa ŵabali, ndiko nde nako mwaku Kristu Yesu Ambuyafwe. 32Asani ulaka ndi munthu ndiguruwana ndi vikoku ku Efeso, nchine chanduwu changu? Asani ŵakufwa ŵareka kuyuskika; “Tirghenge ndi timwenge, chifukwa mawa tifwenge.” 33Mungaranda cha: “Mabwezi ghaheni ghatananga majaridu ghamampha.” 34Yukiyani ku urunji, ndi kuti mungalakwa cha; chifukwa ŵanyake mbajira mu kumuziŵa Chiuta; ndikamba namwe ichi alinga kuti mulengeke lilengu.
Chiyuka cha liŵavu
35Kweni panyake yumoza wafumbenge, “Wayuskika uli ŵakufwa? Ndipo ŵatuza ndi liŵavu lakutinji?” 36Mzereza we, cho umija iwe kuti chingasanduskika chamoyo cha, kwambura kuti chadanga chafwa. 37Ndipo cho umija, kuti umija iwe liŵavu lo likaŵangapo cha, kweni nje pe yija, akhumba ya trigu, pamwenga ya mbutu zinyake. 38Kweni Chiuta wayipaska liŵavu uli ndimo wangakhumbiya, ku mbeu yose liŵavu lake. 39Kuti nyama yose ndi nyama yakulinganalingana cha; kwenyama yinyake nja ŵanthu, yinyake ndi nyama ya vinyama, yinyake ndi nyama ya viyuni, ndi yinyake nja somba. 40Kwe maliŵavu ghakuchanya ndi maliŵavu ghapasi: kweni unkhankhu wa ghakuchanya ngwakuti e, ndipo wo wa ghapasi ngunyake. 41Kwe unkhankhu wakuti e wa dazi, ndi unkhankhu unyake wa mwezi, ndi unkhankhu unyake wa zinyenyezi; chifukwa nyenyezi yipambana ndi nyenyezi mu unkhankhu.
42Chiyuka nacho cha ŵakufwa che viyo. Limijika mu chivuzi; liyuskika mu uura-chivuzi. 43Limijika mu myuyu; liyuskika mu unkhankhu. Limijika mu unthomboru; liyuskika mu nthazi. 44Limijika liŵavu lakawi; liyuskika liŵavu lamzimu. Uli ndipo kuliri liŵavu lakawi, kwe liŵavu nalo lamzimu. 45Viyo so kwalembeka, “Munthu wakudanga yo Adamu, wanguŵa mzimu wakututa”; Adamu wakumariya yo wanguŵa mzimu wakupaska umoyo. 46Kweni kuti lo la mzimu ndakudanga cha, kweni lo lakawi; pavuli pake lamzimu lo. 47Munthu yo wakudanga ngwa pasi, ngwadongu: munthu yo wachiŵi ngwa kuchanya. 48Mo waliri wadongu yo, mbaviyo so ŵadongu; ndipo mo waliri wakuchanya yo, mbaviyo so ŵakuchanya. 49Ndipo uli ndimo tavwariya chikozgu cha wadongu yo, ndimu tamvwariya chikozgu so cha wakuchanya yo. 50Kweni chenichi ndititi, mwa ŵabali, nyama ndi ndopa kuti viziŵa cha kuhara ufumu waku Chiuta; chingana nchivuzi kuti chihara uwurachivuzi cha.
51Awonani, ndikukambiyani mangari. Tose kuti tamura cha, kweni tamsanduskika, 52mu ka nyengo kamanavi mu kukupiya kwa jiso, pa mbata yakumariya. Chifukwa mbata yamkumba, ndipo ŵakufwa ŵamyuskika ŵambura-chivuzi, ndipo ifwe tamsanduskika. 53Chifukwa lamawoleka ili litenere kuvwara uwurachivuzi, ndi lachifweni ili litenere kuvwara chivuzi, ndi lachifweni lenili litenere kuvwara uwura-nyifwa: 54kweni penipo lachivuzi lenili lavwara uwura-chivuzi, ndi lachifweni lenili lavwara uwura chifweni, po ndipo ghamukuŵapo mazu gho ghakulembeka,
“Nyifwa yamezeke mu upundi!
55Nyifwa'we, we pani upundi wako?
Nyifwa we, le pani liwozga lako?”
56Liwozga la nyifwa mbulakwi; ndipo nthazi ya ulakwi ndi langulu. 57Kweni viwongo viŵiye Chiuta, yo watipaska upundi mu Ambuyafwe Yesu Kristu. 58Viyo na, mwa ŵabali ŵangu ŵakwanjiwa, muŵe ŵakuti gwa, ŵambura manderezgeka, ŵakufurwiya nyengo zose mu nchitu ya Ambuya, pakuziŵa kuti mu Mbuya mlimu winu kuti ngwawaka cha.
Currently Selected:
1 ŴaKorinte 15: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi