1 ŴaKorinte 6
6
Nchakwenere kuti makani ghakubudirana ŵaKristu ghakambikiyenge mu mphara ya ŵaKristu
1Kumbi yumoza waku imwe, pakuŵa nako kafukwa pa munyake, wangatole mrandu ku ŵaziraurunji mu malo mwaku ŵakupaturika wo? 2Asi muziŵa kuti ŵakupaturika wo ŵakeruzganga charu? Ndipo asani charu chiteruzgika ndi imwe, kumbi imwe mulive kwene kweruzga tumirandu tumanatumana? 3Asi muziŵa kuti tikeruzganga ŵangelo? Na uli ukongwako vinthu vya umoyo uno? 4Viyo, asani mwe ndi mirandu ya vinthu vya umoyo uno, chifukwa chine mutiyiŵika pa ŵeruzgi ŵakubwaro wo mbakuyuyulika mu mpingu? 5Ndikamba chenichi kumulengeskani. Kumbi kwe viyo kuti mwaku imwe mulive yumoza wazeru, yo wangaziŵa keruzga pakati pa ŵabali? 6Kweni awonani mbali watole mbali ku mphara, paurongo pa ŵazira chivwanu!
7Awa na, kutore mrandu kumphara zakubwaro yumoza pa munyake nchifukwa chakutondeka kwa umoyo winu wachikristu. Chifukwa chine mureka kuvwiyapo uheni? Ukongwa viŵi murekiyanji kuti imwe ndimwe muphangike? 8Kweni imwe ndimwe muchita uheni muphanga, nadi mukwamphuwa ndi vya ŵabali ŵinu.
9Pamwenga asi muziŵa kuti ŵaziraurunji kuti ŵakaharanga ufumu waku Chiuta cha? Mungarandizgika cha: ŵareŵi, chingana mbakusopangoza, chingana mbarowozi, chingana mbauyaya, chingana mbakura ndi ŵanthurumi, 10chingana mbakupoka, chingana mbachipanira, kuti ŵakaharanga ufumu waku Chiuta cha. 11Ndipo mwaŵanyake mwenga ŵaviyo. Kweni mwasambiskika, mwapaturiskika, mwarunjiskikiya mu zina la Ambuya Yesu Kristu, ndi mu Mzimu waku Chiuta widu.
Maliŵavu ghidu ndi viŵaru vyaku Kristu
12“Kwaku ine vinthu vyose vyamachitika”; kweni kuti vyose vitovya cha. “Kwaku ine vinthu vyose vyamachitika,” kweni kuti nkhaŵanga muŵanda ku kanthu ke kose cha. 13“Vyakurgha vikuŵiyako chifukwa cha rufu, ndi rufu chifukwa cha vyakurgha”: kweni Chiuta wakamaranga ilo ndi ivyo so. Kweni liŵavu kuti nda ku ureŵi cha, kweni ku Ambuya; ndi Ambuya ku liŵavu. 14Inya, mo Chiuta wangumyuskiya Mbuya, ndimu so wayuskiyenge ifwe mu nthazi yake. 15Asi muziŵa kuti maliŵavu ghinu ndi viŵaru vyaku Kristu? Kumbi nditonge viŵaru vyaku Kristu, ndi kuvisanduska viŵaru vya munthukazi mureŵi? Kungaŵanga viyo cha! 16Pamwenga mulive kuziŵa kumbi kuti yo ngwakukorana ndi munthukazi mureŵi ndi liŵavu limoza nayo? Chifukwa watiti, “Wo ŵaŵi ŵaŵenge nyama yimoza.” 17Kweni yo ngwakurungikana ndi Mbuya watuŵa ndi mzimu umoza ndi iyo. 18Uthaŵeni ureŵi wo, chakulakwa chose cho wangachita munthu che kubwaro ku liŵavu; kweni yo ngwakureŵa walakwiya liŵavu laku yija. 19Pamwenga mureka kuziŵa kumbi kuti liŵavu linu ndi kasopi wa Mzimu Wakupaturika wakuŵa mukati mwinu, yo mwe nayo kutuwa kwaku Chiuta? Ndipo kuti mwe waku mwaŵeni cha; 20chifukwa mungugulika ndi mtengu. Viyo mkankhuskiyeni Chiuta mu liŵavu linu.
Currently Selected:
1 ŴaKorinte 6: TongaMw
Highlight
Share
Compare
Copy
Want to have your highlights saved across all your devices? Sign up or sign in
Bible Society of Malawi