1 ŴaKorinte 7
7
Mafumbu pa nthengwa
1Kweni paku vyo mungundilembe: nkhwamampha ku munthu kukwaska munthukazi cha. 2Kweni chifukwa cha ulakalaka wa liŵavu, munthurumi yose waŵe ndi muwoli waku yija, ndi munthukazi yose waŵe ndi mrumi waku yija. 3Munthurumi wamuninkhe muwoli wake cho nchakumwenere: ndipo kwakulingana munthukazi nayo ku mrumi wake. 4Kuti munthukazi ngwamtufu pa liŵavu lake cha, kweni mrumi wake: ndipo kwakulingana munthurumi nayo kuti ngwamtufu pa liŵavu lake cha, kweni muwoli wake, 5Mungakaniyananga cha, kweni iku asani mpha phanganu kwakanyengo kakuti, mungaziŵa kujipatuwa mwakuti mujipereke ku kuromba pavuli pake muŵe pamoza so, alinga kuti warekenge Satana yo kumwesani chifukwa cha uzirakujitintha winu. 6Kweni ichi ndikambiya nge nkhumurongozgani, nge nkhumulangulani cha. 7Ndikhumba ŵanthu wose kuŵa ulaka nge ndine. Kweni munthu yose we nacho chawezi chaku yija kutuwa kwaku Chiuta, uyu cha karusu yaka, uyu chaku ka.
8Ku ŵamphara ndi vyoko, nkhwamampha kwaku wo kujijariya ulaka nge ndine. 9Kweni asani ŵalive kujitintha, ŵatorane: chifukwa nkhwamamphaku kutorana kwakuruska kukolezga mtima. 10Kweni ndiŵalanguliya wo mbakutorana kali (ine cha, kweni Ambuya), munthukazi wangapatana ndi mrumi wake cha, 11(ndipo asani wapatukako iku wajijariye wambura kuŵirwa, pamwenga wawojeke ku mrumi wake); munthurumi wareke kupata muwoli wake.
12Kweni ku ŵakujapo ndikamba ndine Ambuya cha, asani mbali yumoza we nayo muwoli wake wambura kuvwana, ndipo munthukazi wazomera kuja nayo, wangampata cha. 13Ndipo munthukazi yo we ndi mrumi wake wambura kuvwana, ndi munthurumi iyo wazomera kuja nayo, wareke kumpata mrumi wake. 14Chifukwa munthurumi yo wambura kuvwana wapaturiskikiya mu muwoli wake, ndipo muwoli yo wambura kuvwana wapaturiskikiya mu mrumi wake; asani kuti kenga viyo cha, mphanyi ŵana ŵinu ŵenga ŵambura kutowa; kweni sono mbakupaturika. 15Kweni asani munthurumi pamwenga munthukazi wambura kuvwana yo watijigaruska, ipu wagaukeko; mbali yo munthurumi pamwenga mzichi kuti wakoreka mu uŵanda pa nthowa nge ndi iyi cha. Pakuti Chiuta watidaniya mu chimangu. 16Chifukwa uziŵa uli wamunthukazi we, kuti vinu panyake umtaskenge mrumi wako? Pamwenga uziŵa uli wamunthurumi we, kuti vinu panyake umtaskenge muwoli wako? 17Chakwenere nchakuti munthu yose wendenge kwakulingana ndi mo Chiuta wamuteme, ndipo nge ndimo Chiuta wamudaniya. Ili ndi langulu langu mu mipingu yose. 18Asani yumoza wangudanika wati wachinjika kali; wareke kupenja kuti mphanyi wangutuzgapo umchinju wake. Asani munyake wangudanika wenga wandachinjike, wareke kupenja kuti mphanyi wanguchinjika. 19Mchinju wo kuti nkhanthu cha, ndipo uwuramchinju kuti nkhanthu cha; kweni kusunga marangu ghaku Chiuta ndiko. 20Munthu yose wajaririye mu mdanu mwenimo wanudanikiya. 21Mungudanika kumbi pakuŵa muŵanda? Urigaphwerengako ndi ichi cha. Asani napo ungaŵa mwanangwa, ipo ukoreske wanangwa wo. 22Chifukwa yo wangudanikiya mu Ambuya, pakuŵa muŵanda, ndi mwanangwa mu Ambuya: kwakulingana nayo wangudanika pakuŵa mwanangwa, ndi muŵanda waku Kristu. 23Mungugulika mtengu; mungaŵanga ŵaŵanda ŵa ŵanthu cha. 24Mwa ŵabali, munthu we yose wajaririye pamoza ndi Chiuta mwenimo wangudanikiya.
Mafumbu ndi ŵambura kuto ndi vyoko
25Kweni pa zimbeta ndirive langulu la Mbuya: kweni ndipaska cheruzgu nge ngwakuchitikiya lisungu ndi Mbuya kuŵa wamagomezgeka. 26Viyo ndipima kuti pakufinyirizgika ndi umoyo wa makono ghano, nkhwamampha ku munthu kujijariya mo waliri. 27Kumbi wamangikiya ku munthukazi? Ungalembenga munthukazi cha. 28Kweni asani napo ungato kuti walakwa cha; ndipo asani mbeta yingaŵirwa kuti yalakwa cha. Kweni kwaku wo ŵatorana ŵaŵenge ndi suzgu mu umoyo waliŵavu: ndipo ine fundu yangu njakumutuzganiko. 29Kweni chenichi ndititi, mwa ŵabali, nyengo njakufupiskika; viyo kwanda sono wo mbakuŵa ndi ŵawoli ŵaŵe nge mbakuŵavi. 30Ndipo wo mbakuliya, ŵaŵe nge mbakuliya cha; wo mbakukondwere, ŵaŵe nge mbakukondwa cha; wo mbakugula, ŵaŵe nge kuti ŵenga navyo cha, 31ndipo wo mbakutakataka ndi charu, ŵaŵe nge mbakutangwanikamo viŵi cha. Chifukwa karuta viyo kaŵiru kacharu chino.
32Kweni ndikhumba muŵevi malikweŵeka. Yo ngwambura kuto wakweŵeke vya Ambuya, mo wangakondweske Ambuya; 33kweni wakuto wakweŵeke vya charu, mo wangakondweske muwoli wake, 34ndipo likondwa lake ligaŵikana. Viyo munthukazi nayo wakuŵirwa wapambana ndi mbeta. Yo ngwambura kuŵirwa wakweŵeke vya Ambuya, alinga kuti waŵe wakupaturika mu liŵavu ndi so mu mzimu: kweni yo ngwakuŵirwa wakweŵeke vya charu, mo wangakondweske mrumi wake. 35Ndipo chenichi ndikambiya ku wanduzi waku mwaŵeni; alinga kuti ndikuŵikiyeni chikhwiriki cha, kweni ndovyeko kwaku cho nchamarumbika, ndi kuti Ambuya kwambura nthangwatangwa.
36Kweni asani munthu wapima kuti wachitiya mbeta yake kwambura kwene, ndikuti wendi chilakolako chikuru paku iyo, po watondeka kujiko, wachite cho wakhumba; kuti walakwa cha; ŵatorane. 37Kweni yo ngwakujiko mu mtima wake wambura khumbiru ili, kwani ngwakuŵandi mtufu pa khumbu laku yija, ndipo wateme mu mtima wake chenichi, chakuti wayisunge mbeta yake yambura kuŵirwa, wachitenge umampha. 38Viyonthu yo watonge mbeta yake wachita umampha; ndipo yo wareka kuyito wachitenge umampha kwakuruska.
39Munthukazi wamangika nyengo yose po weche wamoyo mrumi wake; kweni asani wafwa mrumi wake ndi mwanangwa kuŵirwa kwaku yo wakhumba malinga ndi nthengwa ya mu wanasi wa Ambuya. 40Kweni mucheruzgu changu ndititi ngwakukondwa kwakuruska asani wajaririya mo waliri. Ndipo nane so ndirunguruka kuti nde ndi Mzimu waku Chiuta.
Currently Selected:
1 ŴaKorinte 7: TongaMw
Highlight
Share
Compare
Copy
Want to have your highlights saved across all your devices? Sign up or sign in
Bible Society of Malawi