Yohanes 21

Yesus kase tunju Dia pe diri pa Dia pe murit-murit di talaga Tiberias

1 # Yoh. 6:1 Abis itu, Yesus kase tunju Dia pe diri pa Dia pe murit-murit lagi di talaga Tiberias pe pinggir. Bagini dia pe carita: 2Satu kali, di talaga Tiberias pe pinggir itu, ada Simon Petrus, Tomas yang orang jaga pangge Kambar, Natanael dari kota Kana yang ada di daera Galilea, Zebedeus pe ana dua,#21:2: Zebedeus pe ana dua itu, Yakobus deng Yohanes (Mrk. 10:35). deng Yesus pe murit dua orang laeng lagi, dorang bakumpul di situ. 3#Luk. 5:5 Kong Simon Petrus bilang pa dorang, “Kita mo pi cari ikang.”

Kong dorang bilang pa dia, “Torang lagi mo iko deng ngana.” Turus dorang pigi di talaga pe pinggir kong nae di parau la mo pigi cari ikang. So satu malam dorang bacari ikang, tapi dorang tara dapa ikang sama skali.

4Kong waktu so mo pagi, Yesus badiri di talaga pe pinggir, tapi Dia pe murit-murit tara tau itu Yesus. 5Turus Yesus bilang pa dorang, “Woe, tamang-tamang! Ngoni dapa ikang ka tarada?”

Dorang jawab, “Tarada.”

6 # Luk. 5:6 Kong Yesus bilang pa dorang, “Kase lempar suda ngoni pe jala di parau pe sabla kanan, ngoni akan dapa ikang.”

Kong dorang kase lempar dorang pe jala, turus dorang tarik jala itu tapi dorang tara mampo hela jala itu, barang ikang yang dorang dapa itu banya skali.

7Kong murit yang Yesus sayang itu bilang pa Petrus, “Itu Tuhan!”

Waktu Petrus dengar itu Tuhan, dia pake dia pe baju, barang tadi dia ada buka baju, kong dia balumpa di talaga. 8Murit-murit yang laeng datang pa Yesus deng parau, barang dorang tara jao dari talaga pe pinggir, dia pe jarak kira-kira cuma saratus meter saja. Kong waktu dorang datang pa Yesus, dorang hela lagi dong pe jala yang so ponong deng ikang.

9Waktu dorang so sampe di talaga pe pinggir, dorang lia ada bara api kong di atas so ada ikang deng roti lagi. 10Yesus bilang pa dorang, “Bawa kamari suda ikang babarapa ekor yang ngoni baru tangka itu.”

11Karna itu Simon Petrus nae di parau kong hela jala itu di talaga pe pinggir, kong jala itu ponong deng ikang-ikang basar. Ikang itu pe banya ada saratus lima pulu tiga ekor, tapi biar ikang pe banya bagitu, jala itu tara tarobe.

12Yesus bilang pa dorang, “Mari suda, torang makang.” Tara ada satu dari murit-murit itu yang barani batanya pa Dia, “Bapa ini sapa?” Karna dorang tau, Dia itu Tuhan. 13Kong Yesus badekat pa dorang, Dia ambe roti, turus Dia kase bage-bage pa dorang, bagitu lagi deng ikang itu. 14Itu yang so ketiga kali Yesus kase tunju Dia pe diri pa Dia pe murit-murit abis Dia mati kong hidup ulang.

Yesus bicara pa Petrus

15Waktu dorang so abis makang, Yesus batanya pa Simon Petrus, “Simon, Yohanes pe ana, apa ngana sayang pa Kita lebe dari dorang ini?”

Simon jawab pa Yesus, “Iyo Tuhan, Tuhan tau, kita sayang pa Tuhan.”

Yesus bilang pa dia, “Kalu bagitu, urus bae-bae Kita pe umat, sama deng gembala yang urus bae-bae dia pe domba-domba.”

16Yesus batanya pa Simon untuk kedua kali, “Simon, Yohanes pe ana, apa ngana sayang pa Kita?”

Simon jawab pa Yesus, “Iyo Tuhan, Tuhan tau, Kita sayang pa Tuhan.”

Yesus bilang lagi pa dia, “Urus bae-bae Kita pe umat, sama deng gembala yang urus bae-bae dia pe domba-domba.”

17Yesus batanya lagi pa dia untuk yang ketiga kali, “Simon, Yohanes pe ana, apa ngana sayang pa Kita?”

Kong Petrus jadi sedi, barang Yesus ada tanya pa dia sampe tiga kali, apa dia sayang pa Yesus ka tarada. Kong Petrus jawab pa Yesus, “Tuhan, Tuhan tau samua hal, Tuhan tau kita sayang pa Tuhan.”

Yesus bilang lagi pa Petrus, “Urus bae-bae Kita pe umat, sama deng gembala yang urus bae-bae dia pe domba-domba.

18Inga bae-bae yang Kita mo bilang ini. Waktu ngana masi muda, ngana pake baju sandiri deng ngana bajalang ka mana saja ngana suka. Tapi kalu ngana so jadi tua, ngana mo kase ngana pe tangan kong orang mo ika, turus bawa pa ngana di tampa yang ngana tara suka mo pigi.”

19Yesus bilang bagitu untuk kase tau bagimana Petrus mo mati nanti. Kong deng Petrus pe cara mati itu, banya orang akan puji deng hormat pa Tuhan Allah. Abis Yesus bilang bagitu, Dia bilang lagi pa Petrus, “Iko suda pa Kita.”

Yesus bicara tentang murit yang Dia sayang

20 # Yoh. 13:25 Waktu itu, Petrus balia ka balakang, dia lia, murit yang Yesus sayang ada iko pa dorang. Murit itu yang dulu dudu baku dekat deng Yesus waktu dorang ada makang sama-sama sebelum Yesus mati. Kong waktu itu, dia itu yang ada batanya, “Tuhan, sapa yang mo bahianat pa Tuhan?” 21Waktu Petrus lia murit itu, dia bilang pa Yesus, “Tuhan, kong kalu deng dia ini, dia pe hidup bagimana nanti?”

22Yesus jawab pa Petrus, “Kalu Kita mau dia tetap hidup sampe Kita datang ulang yang kedua kali, itu bukang ngana pe urusan. Tapi ngana, iko suda pa Kita.”

23Abis Yesus bilang bagitu, kabar itu tasiar pa sudara-sudara yang percaya, bilang kata, murit satu itu tara akan mati. Padahal Yesus tara bilang murit itu tara akan mati, tapi Yesus cuma bilang kalu saja Yesus mau murit itu tetap hidup sampe Yesus datang ulang yang kedua kali, itu bukang Petrus pe urusan.

Kata-kata penutup

24Murit yang Yesus sayang itu, dia itu suda yang ada kase tau deng yang tulis samua yang ada di kitab ini. Torang samua tau, yang dia kase tau itu butul.

25Kong masi banya lagi hal-hal laeng yang Yesus biking. Kalu samua yang Yesus biking itu mo tulis satu-satu, kita rasa dunia ini tara cukup mo muat samua kitab yang ada tulis tentang apa yang Yesus biking itu.

Currently Selected:

Yohanes 21: PB MMU

Highlight

Copy