Génesis 24
24
Isaacö nija, suwä a däamaö
lä bufino wei tä a̦
1Bei. Ablaamö a bälöaö nö dedeama yalo, a wa̦lobadaoma. Jödödöwä tä taö lä bädaono wei tä ma cui ja, Jeobaanö showadi a bayeliblaö fa cuaanö, bejedi lä, a bayeliblamoma. 2A nosie juamobä e bada nija, Ablaamö a wa̦ fama, jödödöwä ebä nofi tabobä, a lä lämabono wei nija. Bei wacu ja imicö walimabolanö, a wa̦ nö wäamama. Abinaja e cuma.
—Bei ya wacu ja, wa imicö walilanö, 3bäfä a̦ nö nia wäamaö showadao. A jolemo dijä. Jeobaa a malä cule, judu mösö ma cui jamö, bita a ma cui jamö, Yai Bada a nosiemou lä ayai a lä cui. ¿Ö̦jö tawä? Ijiluyä nija, Canaanateliyoma a suwä däama dijä. Ö̦jö bä nija ya ma co̦cao wei ma cui, ei Canaanateliyoma bä nabä suwä shöma dijä. 4Iba tä ulifi yai jamö wa fa alunö, camiyäteli yamacö nija wa suwä fa nacaludunö, ijiluyä Isaacö nija wa e dämalä —a nowa tama.
5A nosie juamobä e lä cui, abinaja e cuma.
—Camiyä nija a suwä yauo bufiomi dicowä ja, ¿wedinaja ya li cuaabä? Afä wa tä ulifi lä daqueno wei jamö, ¿ijilufä ya shömaö co̦obä tawä?
6—¡Ma, ma, mlaicätä! —Ablaamö e cuma—. Ö̦jamö lä, ijiluyä a shömaö co̦daa dijä. 7Jeobaa a lä cuinö, fedu jamö tä Yai Bada lä culadinö, eja wale tamabou malä waiquile. Fayänö bä ca̦i lä bälöono wei bä nijamö, ya oshe lä cublaliyono wei jamö, wale co̦a waiquilema yalo, wale yömölaö cadidio malä waiquiono wei. A wa̦ nö wäo ja, abinaja a cuma. “Ijilufä bä nodiwä bä nija, ei ya tä ulifi jöböaö wä”, a cuma. Ö̦jö a wa̦ nö lä wäono wei a lä cuinö, cama etä a̦jele fa junö, wa lulubou cadidofälöö weicätä. Wa fa lulubofälönö, ö̦jö bä nija, ijiluyä nija suwä wa däamabä. 8Ö̦jö ma cui, cafä nija suwä a yauo bufiomi ja, bäfä a̦ nö wäamaö ma cui, cafä nija ya tä nowa nia taboimi. Inaja tä cuo ma bädao däjä ma cui, ö̦jamö lä ijiluyä wa shömaö dodijio mlai —a nowa tama.
9Inaja cäcöbö nowa fa tayolunö, Ablaamö a nosie juamobä e a̦ no wäoma. A wa̦ nö wäo ja, Ablaamö bei wacu ja imicö walilanö, abinaja a cuma.
—Wa lä cufenaja, ya cuaaö cadidio weicätä —e cuma.
Lebeca a lä damolaliyono
wei tä a̦
10Ö̦jö däjä, a nosie juamobä e lä cui, a shu̦lucou showadaoma. Täbä dobäjälobä, cama bada ebä madofi ja, bä dodijidawä yaialalema. Ö̦jö bä madofi yefimabobä, Ablaamö cameyo ebä ja, 10 ebä ca̦i däa mö fedulema. Ö̦jö däjä, Mesobodamia tä ulifi jamö, Nacolo a shabonobö jamö a ayofälöma.
11Ya̦cumö, Nacolo a shabonobö ajede jamö, mau uca jamö a waloquema. Suwä bänö, showadi mau ubä weyade lä yaquei wejei däjä, ö̦jö däjä a waloquema. Cameyo bä fa dijoamanö, a itoblaliyoma. 12Jeobaa nija a wa̦ fama.
—Jeobaa. Iba bada Ablaamö a lä cuinö, cafä wa lä bufiblaö wei wa e dodijiwä. Showadi Ablaamö wa lä nofimaö wei, tä da wawämaliyo. Camiyä nija tä nabä lä shömöqueno wei tä ja, wale da cadidama, ¿ö̦jö tawä?
13’Bei —a cuu co̦oma—. Ei mau uca ja, ya waloquei lä cufe. Ei täbä lä bälöle täbä suwänö, mau ubä yaquei mö juu lä cuimajei. 14Isaacö nija, wa nosie juamobä a lä cui nija, suwä wa e däamaö bufi lä doblao wei, a da jömöba. Dodijidawä yale a̦ lä juaö wei tänö, ya suwä nö ö̦jöböabä. Abinaja ya nowa taö balöobä. “Suwä cä tä”, ya cubä. “Afä jolocodofä a da itomalö, ya amishi co̦obä”, ya e fa cunö, “Ja̦o, wa amishi co̦obä lä”, a li cama cubä. “Afä cameyo ya bä amishi ca̦i coamaö mö feduo showaobä”, a cuu ja, ya moyawäo showaobä. Inaja tä cublou ja, “Showadi iba bada a nofimaö yalo, a bayeliblaö co̦layou lä cufe”, ya bufi cubä —a cuma, Yai Bada nija.
15A wa̦ faö showao däjä, Lebeca a falayoma, Bedueli bä tää Lebeca e lä cui. Micla nija, Ablaamö bei fääshä Nacolo a lä cuinö, bei ijilubö Bedueli a lä taqueno wei tääbö. Mau ubä jiquebä, jolocodo a döcämaboma.
16A moco liyäjäwä fe balojooma. Wa̦lo bä nija a jubamou dao lä mlai a cuoma. Mau uca jamö a fa dömöbalufälönö, jolocodo a ja, mau u fa yaquelönö, a dolequea co̦befälöma. 17Ablaamö a nosie juamobä e lä cui, lobe a fa icuicunö, a wa̦ falayoma.
—¡Suwä cätä! Jolocodofä a ja, mau wa ubä lä döcämabole u ja, ya amishi da co̦o.
18Abinaja a suwä cuma.
—Ja̦o. A amishi da co̦olu, bada tä —a fa cunö, jolocodo lobe a fa itomalönö, a amishi coamalema.
19A amishi fa coamalönö, abinaja a cuma.
—Afä cameyo ya bä amishi ca̦i bluca coamaö showadaobä, ya u nia jiqueaö co̦ocölöö. Bä amishi showawä ja, ya u löäö co̦oyoluu weicätä —a cuma.
20Ö̦jö cudeenö, yalo bä amishi coamabeje, showadi mau u lä löblaano wejei tä jamö, shee u fa löcöfälönö, ai u yaqueaö co̦o ja, a läläa co̦layoma. Cameyo ebä amishi bluca coamaö ja, ubä löblaayoluma. 21Ablaamönö a wa̦lo lä shömöleno wei a lä cui, Jeobaa nija tä nö bayeli lä nacano wei tä nia wawäblou fa mönö, mamicai e mamo showaoma.
22Cameyo bä amishi coamaö waicono wei ja, a suwä dobäbä, baushi modolewä ebä olo wawäblamalema. Bei fi̦yoca ja, a nia lä jumabou wei, dodijidawä judäjäwä a cuoma. Bei bocucu ja, modolewä cäcöbö nia lä ya̦mabou wei, cäcöbö olo dodijidawä yai jude cuoma. Bä nowa baushi blucao fe balojooma. 23A nowa suwä taö showadaoma.
—Wale da yömöla. Cafä ¿wedi bätää bei wa e li? Faafä e nano ja, ¿iba ya bä ca̦i miobä, tä yafi ji̦shiquiwämi tawä? —a cuma.
24—Bedueli ya e. Ö̦jö bä nöö Micla nija ya amimou. Bä fö̦ö Nacolo nija ya a̦imou —a suwä cuma.
25Abinaja a ca̦i cuma.
—Yalofä dodijidawä bä cuobä, yama bä befi tabou. Bä iyabä ma cui, bölösö cäbä ja bä yäläobä ma cui, bä bluca cua waiquia. Cafä wamacö ma cui, afä wa bä ca̦i cuobä, yama tä yafi bada tabou lä cule —a cuma.
26Ö̦jö däjä, Ablaamönö a lä shömöleno wei a lä cui, a möfe boaliyoma. A bufi ayäyaimolanö, 27abinaja a cuma.
—¡Cama Jeobaa a nofi shino yai doablamobä! Iba bada Ablaamö a lä cuinö, tä lä bufiblaö wei tä showawä lä cui. Showadi Ablaamö a lä nofimaö wei, a nofimaö malä showale. A wa̦ nö wäo ja, a lä cuno wei tä ja, a cadidou showaoma. Camiyä ya ma cui, yale fa bayeliblalönö, yale waloa cadidimaquema. Ablaamö ebä mashi cadidiwä yafibö jamö, Jeobaanö wale lulubou cadidioma —a cuma.
Lebeca e yafi jamö
a lä waloqueno wei tä a̦
28Ö̦jö däjä, bä nöö enö ebä ca̦i lä cuono wei jamö, a moco fa lälälöfälönö, tä a̦fa bluca wäyäjäloma. 29Lebeca a̦iyobö Labano a lä cuinö, mau uca jamö, fama a nabä läläa showadalayofälöma. 30¿Ö̦jö tawä? Bei yaö e nija, fi̦yoca baushi fa damolalunö, bococu ca̦i baushi fa dalalönö, Lebeca a wa̦no ca̦i ji̦lilema yalo, a nabä fama icuquema. Mau uca casö jamö a dalalema. Cameyo bä nija, bei a wa̦lo icua ajedealiyoma.
31Abinaja e nowa tama.
—¿Wedi tä tabä, cafä Jeobaa nija wa lä bayeliblamou wei wa lä cui, sibo ja wa li cua dicoa cuboyoi? A da co̦blaliyo. Wa nia lä cuo wei yafi ya wawäblaö waiquilayoma. Cameyo bä ca̦i cuo mö feduobä, ya tä jödödöwä wawäblaö waiquilayoma —a cuma.
32Inaja a nowa taö ja, a yafilayoma. A fa yafilönö, bä ca̦i lä cuono wei bä mamicö bluca ya̦lömobä, Labanonö mau ubä jöböquema. Cameyo bä nija, madofi bä fa cushälalönö, bä yalo iyabä täbä ca̦i jöböaquema. Dodijidawä bä cameyo cuobä, bä nia lä yäläo wei jamö, bölösö bä jilaaquema. 33Ö̦jö däjä, a fama iyabä, cama nii ebä baquemaje. Ebä baquema ma cujei, abinaja a cuma.
—Ma. Ya iyano mlai ja, Ablaamönö tä a̦fa lä wäbeno wei, ya etä a̦ wäaö da balöo.
—Ja̦o. Inaja wa bufi cuu ja, a wa̦ da fa —Labano a cuma.
34Inaja a fa cunö, a wa̦ falayoma.
—Ablaamö a nosie juamobä ya e. 35Yale lä shömaö wei a lä cui, showadi Jeobaanö a bayeliblaö fa dodijionö, a bälöa dodijia lä cule. Jeobaanö a fa dobänö, yalo bä bluca tabou dodijia. Oweja bä ma cui, shibo bä ma cui, baca bä ma cui, bä bluca tabou lä cule. Blada bä ma cui, olo bä ma cui, ö̦jö bänö a nö madofibö dodijiwä. A nosie juamobä, wa̦lo bä ma cui, suwä bä ma cui, ebä ca̦i bluca cua. Cameyo ebä ca̦i bluca, bulo ebä ca̦i. 36¿Ö̦jö tawä? —a cuma—. Iba bada a lä cuinö, bei suwäbö Sara a suwäbada cuo ma waiquiocu däjä, ö̦jö nija ijilu a taquema. Ö̦jö bei ijilubö e lä cui nija, jödödöwä bä bluca lä tabole, Ablaamönö bä jöböaö nomöjöa waiquia lä cule.
37’Iba bada a lä cuinö, wale a̦ nö wäamama —a cuma—. Wale nowa taö ja, abinaja a cuma. “Ijiluyä nija, Canaanateliyoma a suwä däama dijä. Ö̦jöteli bä nija ya ma co̦cao wei ma cui, ei Canaanateliyoma bä nabä suwä shöma dijä”, a cuma. 38“Iba bä mashi lä bälöle jamö wa fa alunö, camiyäteli yamacö yai nija, wa suwä fa nacaludunö, ijiluyä Isaacö nija wa dämabobä”, wale nowa taö ja a cuma.
39’¿Ö̦jö tawä? —a cuu co̦oma—. Iba bada a nija, abinaja ya e cuu mö feduoma. “Eja a suwä juu moji dicoo ja, ¿wedinaja ya li cuaabä?”, ya ma cuno wei ma cui, 40abinaja wale nowa tama. “Jeobaa ya wa̦ lä juaö wei a lä cuinö, cama etä a̦jele fa shömölödunö, wa nia ca̦i juu, ya nabä lä shömale tä ja, wa doblou fe yadiobä. Ö̦jönö wa fa lululefälönö, iba mashi bä nija, camiyäteli bä yai nija, wa suwä fa nacaludunö, ijiluyä nija wa dämabobä”, wale nowa tama.
41’¿Ö̦jö tawä? Abinaja iba bada a ca̦i cuma. “Wa wa̦ nö ma wäo wei ma cui, wa tä taimi dicowä ja, cafä nija tä nowa nia cuo. Ö̦jö ma cui, iba mashi bä nija wa ma waloo däjä ma cui, cafä nija a suwä jöböaö bufiomije ja, ö̦jö däjä cafä nija ya tä nowa nia shino taboimi”, wale nowa tama.
42’¿Ö̦jö tawä? —a cuma—. Fei däjä, mau uca ja ya fa waloicunö, Jeobaa nija abinaja ya e cuma. “Jeobaa. Iba bada Ablaamö a lä cuinö, cafä wa lä bufiblaö wei wa e dodijiwä. Camiyä nija a nabä lä shömano wei tä ja, wale cadidamaö ja, abinaja tä cuobä. 43Ei mau uca ja, ya ublaa lä cule”, ya e cuma. “Ai a suwä lä cuinö, mau u coaö mö juu däjä, ya wa̦ nia wabäo. ‘Suwä cätä’, ya nia cuu. ‘Afä jolocodofä a ja, mau u wajaquemi da coamaliyo’. Inaja ya cuu ja, 44abinaja cama a cuu mö feduobä. ‘Awei, wa u coabä lä. Afä cameyo ya bä amishi ca̦i coamaö mö feduobä’. Inaja a suwä cuu ja, ya nö nia ö̦jöböaö”, ya e cuma. “Jeobaa wa lä cuinö, Ablaamö bei ijilubö nija, wa suwä däamaö lä bufii wei, ö̦jö tä li suwä cuobä”, ya cuma.
45’¿Ö̦jö tawä? —Ablaamö a nosie juamobä e lä cui a cuu co̦oma—. Bei ya bufi jamö ya wa̦ faö showao däjä, Lebeca a falayoma. Jolocodo a döcömaboma. Mau uca jamö a fa dömöbalöfälönö, jolocodo a ja, mau u jiquelema. Ö̦jö däjä, abinaja ya e cuma. “Suwä cätä. Ö̦jö u ja, ya amishi co̦obä”, ya e cuma. 46Inaja ya fa cunö, lobe jolocodo a fa itomalönö, abinaja a cuma. “Wa amishi co̦obä lä. Afä cameyo ya bä amishi ca̦i coamaö mö feduobä”, a cuma. Inaja a fa cunö, ya amishi co̦oma. Cameyo bä amishi coamaö mö feduo showaoma.
47’¿Ö̦jö tawä? —a cuma—. Ö̦jö däjä, ya wa̦lii cadidio showaoma. “Cafä ¿wedi bätää bei wa e li?”, ya e cuma. “Bedueli bä tää ya e”, a cuma. “Ö̦jö bä nöö Micla nija ya amimou. Bä fö̦ö Nacolo nija ya a̦imou”, a cuma. ¿Ö̦jö tawä? Inaja a cuu ja, bei fi̦yoca ja, olo modolewä ya e juuquema. Bei bococu ja, ai olo modolewä ya ecö ca̦i ya̦a mö fedua showaaquema. 48Ö̦jö däjä, ya bufi ayäyaimolanö ya möfe boaliyoma. Iba bada Ablaamö a lä cuinö, tä lä bufiblaö wei, ö̦jö ya tä nofi Jeobaa doablaö dodijioma. Wale lulubou fa cadidionö, iba bada bei ijilubö nija ya suwä däamabä, cama bä mashi cadidiwä nija, wale luluboma. ¿Ö̦jö tawä? —Ablaamö a nosie juamobä e lä cui a cuma.
49Abinaja a cuu co̦oma.
—Inaja tä cuoma. Fei däjä, ¿wedinaja wafäcö bufi cuu tawä? Iba bada wafä a mölamaö mlai ja, cäcöbö a̦ wawädoa da showadabo. “Awei”, cäcöbö cuu da showadao. “Ma”, cäcöbö ca̦i cuu da showadao. Wafäle yömölaböö showadao ja, ya tä nia taö lä nomöjöo wei tä ja, ya cadidou showadao nomöjöobä —a cuma.
50Ö̦jö däjä, Labano, Bedueli sho cäcöbö a̦ fama.
—Ei tä lä cublalufe, Jeobaa a mayo waiquiwä. Camiyä yafäcö a̦ fabä, yafäcö malä mlai. 51Fei Lebeca a malä cule. Wa luluaö showaofälöbä. Afä bada bei ijilubö nija, wa e suwä jöböabä, Jeobaa a lä cuno weinaja showawä —cäcöbö cuma.
52Ablaamö a nosie juamobä e lä cuinö, cäcöbö a̦ fa ji̦lilänö, mashita jamö a möfe deilanö, Jeobaa a wa̦fa bada doblao tama. 53Ö̦jö däjä, Lebeca a dobäbä, camishi bä ma cui, baushi bä nowa lä bluca wei bä ma cui, ö̦jö bä bluca ucäblalema. Ai bä baushi lä cui, blada bä ja bä cuoma. Ai bä baushi mö feduwä lä cui, olo bä ja bä cuo mö feduoma. Baushi ai bä nowa lä bluca wei bä ja, bei a̦iyobä e ma cui, bä nöö e ma cui, cäcöbö dobäa mö fedua showalema. 54Bä fa dobälalönö, cama ebä ca̦i fa iyalönö, ö̦jamö bä ca̦i cudou fe jalua showalayoma.
Bä la̦a fa fenalönö, Ablaamönö a lä shömöleno wei a wa̦ falayoma.
—Bei. Fei däjä, iba bada a nija, wamale shömaö co̦o da showadao—a cuma.
55Ö̦jö ma cui, Lebeca bei a̦iyobö e ma cui, bä nöö e ma cui, cäcöbö a̦ läblaliyoma.
—¡Ushu! Eja, camiyä yamacö nija, u̦asimi a nö dedejeblou balöobä. Ei ya imicö lä culenaja, a nö cublono mlai ja, a nia yauomi. Eja a nö dedeblou balölayono wei ja, a nia shino juu.
56Inaja cäcöbö ma cuno wei ma cui, abinaja a cuma.
—Ma. Cäcöbö a̦ läo dijä. Jeobaanö wale fa bayeliblanö, tä cadejeblaö malä waiquilofe. Iba bada a nija ya co̦jamö co̦obä, wale shömaböö da co̦o —cäcöbö nowa tama.
57—U̦asimi yafä a nacaö balöobä —cäcöbö cuma—. Cama yafä a wa̦ ji̦liaö balöobä.
58Lebeca a fa nacabölänö, abinaja a nowa taböma.
—Fei fama a nijamö, ¿wa nocao showadao bufi doblaa culawä? —cäcöbö fa cunö,
—Awei, ya yauo weicätä —a suwä cuma.
Canaana tä ulifi jamö
bä co̦a lä co̦layono wei tä a̦
59Inaja a cuu ja, cama bä mashinö Lebeca a shömölemaje. Lebeca showadi a lä nowamano wei a ca̦i suwä shömöa mö fedua showalemaje, a bayelibobä. Ablaamö a nosie juamobä e ma cui, cama nija bä lä nocao wei bä ma cui, bä bluca shömöa mö fedua showalemaje. 60Bä lä juole däjä, Jeobaa nija Lebeca a bayeliblamaö balöo bufimaje. Abinaja a nowa tamaje.
—Camiyä mashi wa lä cui, ijilufä bä nodiwä fa balalönö, cafä nija bä nia lä amimou wei bä bluca cublobä. Jai bä nö wabamou doblobimi bä cublobä. Bä nofi lä wa̦libou wejei täbä fa yashuabodujenö, bä bälöo lojodoo juobä —a nowa tamaje.
61Inaja a nowa fa tajenö, Lebeca a bayelibobeje, bä moco lä yaumabono wei bä ca̦i co̦layoma. Cameyo bä ja bä befi ca̦i fa alunö, Ablaamönö a lä shömöleno wei nija, bä bluca nocalayoma. ¿Ö̦jö tawä? Inaja tä fa cublalunö, Ablaamö a nosie juamobä e lä cuinö, Lebeca a fa lululäfälönö, a ca̦i co̦a co̦layoma.
Isaacö, Lebeca sho cäcöbö
lä doayono wei tä a̦
62Bei. Isaacö a lä cui, Neque jamö a bälöoma. Tä cua shi lä wa̦lile tänö, wale lä dablale cou tä cule jamö a jaba fa cuonö, Neque jamö a bälöa yanöcöa co̦aliyoma.
63Sibo jamö Isaacö a weyade bufi dayäo ca̦i lä juaano wei jamö, tä fa möadalanö, cameyo bä juu ajedou dalalema. 64Lebecanö tä ca̦i möö fa cuaanö, Isaacö a fa dalalönö, cameyo a jamö a culanö, a itoblaliyoma. 65Ablaamö a nosie juamobä e nija a wa̦lima.
—Quiji ¿wedi bei a li, a juu mö lä baimi?
—Iba bada a —a cuma.
Ö̦jö a wa̦ fa ji̦lilänö, acadafu e cäcönö, a mö jo̦yablamolayoma.
66Bä fa waloicunö, Ablaamö a nosie juamobä e lä cuinö, Isaacö a yömölalema. Jödödöwä tä lä tano wei tä a̦fa wäyäö showaojoloma. 67Ö̦jö däjä, cama e yano jamö Isaacönö Lebeca a fa lululäfälönö, a däa cadidia showadalema. Lobe a nofia showadalema. A fa nofilänö, bä nöö nijamö Isaacö a wajäaö ma showai ma cui, a bufi lojodoblou co̦layoma.
Currently Selected:
Génesis 24: GUU
Highlight
Share
Copy
Want to have your highlights saved across all your devices? Sign up or sign in
©2012, All Rights Reserved
