Lucas 19

Saqueo a lä

bayeliblamono wei tä a̦

1Jelico jamö Jesús a fa waloicunö, a jayuaö cuaama. 2Lomateli bada bä befi bä blada lä doano wei a bada lä cui, ö̦jamö a bada bälöoma. Saqueo a wa̦fa cuoma. A nö madofiböo dodijioma. 3Jesús a möö bufi doblaoma ma cui, bä lä co̦camou wei bä fa mashiquionö bä läo dicooma. A labajao fa mlacunö a möö doblonomi. 4Ö̦jö cudeenö, Jesús a juu cuaafälöbä jamö a läläa fa balölönö, ico fi bada ja a dua balöbedayoma. Ö̦jamö a nia malä jayuano wei.

5Saqueo a döcäodayobä jamö Jesús a fa waloicunö, a mö fa nonodalunö a nowa tama.

—Saqueo. Lobe a da itolu. Fei däjä, afä yafi jamö ya nia malä cuo wei —a nowa tama.

6Ö̦jö cudeenö, Saqueo a shi jaliwä itolayoma. Cama e yafi jamö, bufi doblalolanö Jesús a walomaquema. 7¿Ö̦jö tawä? Saqueo nija Jesús a co̦blou fa dalalöjenö, ai bä bufi bluca jushujudaliyoma.

—Wa̦lidiwä talewä nijamö a nofi fama lä waloicufe —bä nowa tayoma.

8Ö̦jö däjä, Bada a nija Saqueo a fa ubladalunö, abinaja a cuma.

—Bada tä. Ya bä bluca lä tabole, bä nö jo̦lili lä bleaaö wei bä nija ai ya bä mashi nia shelelaö cuaaö. ¿Ö̦jö tawä? Ai ya ebä blada däa lä ja̦toleno wei ya bä nia co̦amaö. Ya bä co̦amaö ja, ya bä lä däleno wei ya tä co̦amaö bädao mlai, ai ya bä nia yädädamaö cuaaö majöo. Moli ya lä däleno wei a ja, 4 ya bä nia co̦amaö. Inaja showawä ya bä nia yädädamaö cuaaö—a cuma.

9Abinaja Jesúsnö a nowa tama.

—Ablaamö a lä cuinö, Yai Bada a nofi lä mölabono weinaja wa nofi mölabou nodia cua yalo, afä wa bä ca̦i lä cule wamacö nia bayeliblamou. Wamacö nia lä jucäamou wei, cafä wamacö nija tä a̦ fei däjä waloqueyoluu lä cufe. 10Camiyä ya lä yanowamöblaleyoluno wei ya lä cuinö, bä lä mojoluu wei ya bä dayäabä ya malä waloqueyoluno wei, ya bä co̦ablaö co̦obä —a nowa tama.

Bada anö blada bä omaö

juo lä bufino wei tä a̦

11Jesús a wa̦ ji̦lifälöbeje jamö, Jelusale jamö bä ajedou waiquia yalo, shominaja tä a̦ li wäyäö yacläoma. “Fei däjä, Jelusale jamö Yai Bada tänö cama ebä nia ca̦i cuo dodijio”, bä bufi ca̦i jole cuma cudeenö. 12Ö̦jö cudeenö, abinaja Jesús a cuma.

—A nia bada läo lä nomöjöono wei a wa̦lo cuoma. Bada a yai tablamodayobä, blajai jamö a nia juu balöoma. Ö̦jö däjä, cama etä yai ulifi jamö a nia waloo co̦oma. 13A juu showao mlao däjä, a nosie juamobä 10 bä yai lä dodijano wei ebä nacalema. Ö̦jö 10 bä nija, blada moli ebä jöbödaö fa cuaanö, 10 ebä jöböa taquema, bä nowa lä bluca wei. Abinaja bä nowa tafälöma. “Ya waloo showao mlao däjä, dodijidawä iba wama bä blada nia nomöjöaö juo, wama bä omaö juobä”, bä nowa tafälöma.

14’¿Ö̦jö tawä? —a cuma—. Ö̦jö ma cui, cama ai ebänö a nofi wa̦libomaje. A nofi fa wa̦libojenö, ai ebä shömöa nodia jelemaje, bada a tabladayobeje jamö, ebä a̦ läobä. “Camiyä yamacö nijamö a bada bälöobä, yama a bufiimi waiquiwä”, bä cubä. 15Ö̦jö ma cui, a bada tablamaö fe fa yadiojenö, a co̦a co̦bema. A co̦a fa co̦bonö, cama a wa̦ juamobä 10 ebä nacamaö bufima, blada bä ja bä lä dobälalefälöno wei bä lä cui. Cama blada ebä oa lä jämaleno wejei, bä nia bluca fa mönö, bä nia wa̦lima.

16’A jaba lä waloqueno wei, bada nija a icuquema —Jesús a cuma—. A fa icuicunö abinaja e cuma. “Bada tä. Camiyä nija afä wa blada lä jämaqueno wei, dodijidawä ya nomöjöaö fa juonö, 10 ya bä blada yädäblamaö co̦layoma”, e cuma. 17Abinaja bada anö a nowa tama. “¡Wa dodijaö juo waiquioma lä! Ya blada wai da jöböquii a ma moliono wei ma cui, wa dodijaö juo fe yadioma yalo cafä bada bäfä nia tablamaö. Shabono 10 bä jamö wa nia bada läo”, a nowa tama.

18’¿Ö̦jö tawä? —Jesús a cuma—. Ai e mö feduwä lä cui, ö̦jö a icua nomöjöquema. Abinaja a cuma. “Bada tä. Camiyä nija afä wa blada lä jämaqueno wei, dodijidawä ya nomöjöaö fa juonö, 5 ya bä blada yädäblamaö co̦layoma”, e cuma. 19Cama nija a wa̦ faö mö feduo ja, abinaja e cuma. “Shabono 5 bä jamö wa bada läobä cafä wa”, a nowa tama.

20’Ai e icua fa nomöjöicönö, abinaja e cuma. “Bada tä. Camiyä nija afä wa blada lä jämaqueno wei, ei a. Camishi acadafu cäcönö ya fa ja̦loblalönö ya ja̦lobou showaa lä cule. Bei. 21Bäfä daö yalo ya malä quilino wei. Afä wa bä fe blacäjamaö talei. Ai bä ojodamobä jamö showadi cafä wa shino bayeliblamou talei”, e cuma.

22’¿Ö̦jö tawä? —Jesús a cuma—. Abinaja bada enö a nowa tama. “Cafä wa wa̦ showawä ja, bäfä nia dobloimi jömaö. Wale a̦ juaö dobloimi waiquiwä. Cafä wa wa̦ faö ja, iba ya bä fe jo̦wa lä blacäjamaö wei wa tä jo̦wa daö waiquioma. Ai bä ojodamobä jamö camiyä ya jo̦wa shino lä bayeliblamou wei wa tä ca̦i malä dale. 23Inaja ya jo̦wa cuaaö waiquiwä ja lä, iba wa blada omabä, ¿wedi tabä bei wa li wabäonomi, ö̦jö lä? Bä blada lä nomöjöaö wejei bä nija wa blada majöaö fa cunoja, iba ai wa bä nö shino wai co̦cablamalebö wei”, a nowa tama.

24’Ö̦jö däjä, bä ublao lä ajedeono wei bä nija abinaja bada a cudaliyoma. “Quijinö moli a blada lä tabole a da co̦leje. 10 bä lä tabole nija e jöbäa da majöcöje”, a cuma. 25Bada nija abinaja bä cuma. “Ma, bada tä. Ö̦jö 10 ebä li cua malä waiquile”, bä cuma. 26Ö̦jö däjä, bada a wa̦ fama. “Ma, cafä bämacö nowa taö lä cule. Bä li dodijaö yalo, bä lä tabolajei bä nija ai bä nia jöböamou co̦o. Ö̦jö ma cui, bä tabou lä mlajei bä nija, wiisibö a tabou ma bälajei ma cui, a nia co̦amamou, bä li dodijaimi waiquiwä cudeenö.

27’Ja̦o. Ö̦jö ma cui, camiyä nija bä nö lä nabämou wei ya bä nö nia yai bleaamaö, bada wale lämaö nofi lä wa̦libono wejei bä lä cui. Eja ö̦jö bä bluca ca̦i da juimaje. Ya mamo showao däjä wama bä shäyolubä”, a bada cuma. ¿Ö̦jö tawä? —Jesús a cuma.

28Ö̦jö tä a̦ wäyäö fa waiconö, Jelusale jamö bä lulua taa co̦lefälöma.

Bulo a ja Jesús a

befi ca̦i lä juno wei tä a̦

29Befajeiteli bä lä bälöle jamö, Jesúsnö cama ebä ca̦i ajedeblaleyoma, Bedaniateli bä ca̦i bälöo mö lä fedule jamö. Oliba tä balöcö jamö bä ca̦i fa waloicunö, ö̦jamö culanö bä lä nocamabono wei ai cäcöbö shömöa balölema. 30Abinaja cäcöbö nowa tama.

—Wafäcö juu fa shaliloimadunö, quiji a shabono jamö cäcöbö da yafilujulu. Wafäcö lä co̦blole jamö, yalo bulo a nata lä cule wafä a nia ijilubö dablajalayou, täbä döcämabou showaono lä mlai. Ö̦jö wafä a nata fa cushälänö, äyämö a ca̦i juböö da co̦ima. 31Ai anö wafäcö wa̦lii bädao ja, “¿Wedi tä tabä wafä a nata cushälei cufe?”, a cuu bädao ja, abinaja wafäcö cuu. “Bada anö a majöamaö bufii cublei”, wafäcö cubä —Jesúsnö cäcöbö nowa tama.

32Ö̦jö cudeenö, cäcöbö lä shömöleno wei cäcöbö aa fa showalöfälönö, Jesús a lä cuno weinaja, inaja showawä tä dabölalema. 33Bulo a nata ijilubö fa cushäblabölönö, cama ebä yalo lä cuono wei abinaja ebä cuma.

—¿Wedi tä tabä bulo bei wafä a nata li ijilubö cushäaö cule? —ebä cuma.

34—Bada tänö a majöaö bufii cublei —cäcöbö cuma.

35Jesús nija bulo a ca̦i waloböa co̦queyoluma. Cäcöbö ca̦i waloböa fa co̦iquiyonö, yalo a mabucabö ja, cama cäcöbö camishibö maquea fa balöaböcönö, Jesús a döcämaböquema. 36Ö̦jö däjä, Jesús a befi ca̦i jufälöbä jamö, bufi doblalolanö a befi ca̦i jayuamamaje. A befi ca̦i nia lä jayuono wei yo jamö, bä camishibö ca̦i jilablaamou läafälöma.

37Oliba tä balöcö ja, yo dömöobä ja bä fa waloicunö, Jelusale tä casö ja bä ajedolanö, Jesús nija bä lä nocaono wei bä a̦ shi bluca dou cuaama. Jesúsinö Yai Bada tä lojode dablamaö lä cuaano wei tä ja, a noshi jaliwä fa queboimadujenö, Yai Bada tä nofi doablaö cuaaö dodijiofälömaje. 38Abinaja bä cufälöma.

—¡Yai Bada a wa̦nö a lä juimi, ö̦jö Bada cä tä! ¡Ö̦jö lä a shino yai bayeliblamobä a! Fedu jamö tä lä cule a sho, ¡dodijidawä bämacö bälöo yanöcöobä! ¡Bada tä lä culadi a nofi shino yai doablamobä! —bä cufälöma.

39Bä lä co̦camono wei bä nija, faliseo bä bada lä coyocoono wei bä a̦ fama.

—Tä a̦ wäyäle. Wa bä lä nocamabole bä a̦ da wasö —bä cuma.

40Ö̦jö ma cui, abinaja Jesús a cudaliyoma.

—Cafä bämacö nowa taö lä cule. Ei bä a̦ waidou fa cunoja, wale nofi doablabeje, maa mabä ma cui mabä a̦ nö bädou nomöjölayobö wei —a cuma.

Jelusaleteli bä nija Jesús

a lä wajäblaliyono wei tä a̦

41Jelusaleteli bä shabonobö jamö Jesús a ajedolanö, bä yafibö dablaö däjä a fa wajäblalunö, bä nofi ojode taö ja, a ö̦cöma. 42Abinaja a blajawä cuma.

—Wamacö bufi nia yai lä yanöcöo wei wama tä daö fa cunoja, fei däjä ma cui wamacö nö bayeliblamou showadaobö wei. Ö̦jö ma cui, cafä wamacö nija Yai Bada tänö tä a̦ jo̦yabou lä cule.

43’Wamacö nö nia lä bleaaö wei tä nia obi wawäö. Bä nö lä nabämou wei bänö wamacö nabä fa juimajenö, wamacö fe fa fa̦yoblalöjenö bä nia alanamou shoqueaö, wamacö shi wa̦limabobeje. 44Cafä wamacö yafibö nabä fa quebojenö, wamacö lä bälöle wamacö mö nia watäblaöje. Wamacö yafibö wa̦lia fa jödödöblalöjenö, ai ma jamö ma nia maqueo feibloimi. Yai Bada tänö wamacö bayeliblabä ya ma waloqueyoluno wei ma cui, wamale nö ö̦jöböaö fa mlacunö wamacö nö nia bleaaö —a Jesús cuma.

Yai Bada etä yafi

nofi lä jalubono wei tä a̦

45Jelusale jamö a fa waloicunö, Yai Bada etä yafi sibo lä ji̦coloi jamö Jesús a lucälayoma. Ö̦jamö lä blada bä ja täbä madofi lä jöbäö wejei bä lä cui bä yashublaö ja, 46abinaja a cudaliyoma.

—Abinaja Yai Bada etä a̦ oni cuu.

Iba yafi a lä cui, camiyä nija bä nö bayeli nacaobä a yafi cuobä.

’Einaja etä a̦ ma cuu wei ma cui, täbä lä tomömou wei bei wama a yafi li tablaö bashiblalayoma —Jesús a cuma.

47Yai Bada etä yafi jamö showadi täbä yömöladima. Nofi bäyäalewä blowäjäwä bä ma cuinö, Moisesi tä a̦ ja täbä lä damaö wejei bä ma cuinö, judio ai bä bada ma cuinö, a shäbeje a nofi washuamaje. 48Ö̦jö ma cui, a wa̦ lä ji̦lii wejei bä bluca mashiquioma cudeenö a shäö ja̦toobeje etä cuonomi.

Currently Selected:

Lucas 19: GUU

Highlight

Copy