Lucas 20

Bada bänö Jesús

a lä wa̦lino wejei tä a̦

1Ai däjä, Yai Bada etä yafi jamö Jesúsnö bä damaö co̦oma. Tä a̦ lä dodijidai tä a̦ wäyäö däjä, bada bänö a nabä icuquemaje. Nofi bäyäalewä blowäjäwä bä ma cuinö, Moisesi tä a̦ ja täbä lä damaö wejei bä ma cuinö, judio ai bä bada ma cuinö, Jesús a nabä fa icuicunö, 2abinaja a nowa tayolumaje.

—Bei. Yamalecö da yömöla. Einaja wa cuaabä, ¿cafä bada bei wa tawä? ¿Wedinö bada bei wa li tablamalema, ö̦jö lä? —a nowa tamaje.

3Jesús a wa̦ juo ja, abinaja bä nowa tama.

—Cafä wamacö ma cui, bämacö nia wa̦lii mö feduo. Wamale da yömöla, ö̦jö lä. 4Ja̦o. ¿Wedinö Juan a shömölema, täbä fe ojomabä? ¿Yai Bada tänö a shömölema tawä? Ma, ¿yanowamö täbänö a shömölema sijewä? —Jesúsnö bä nowa tama.

5Bä nowa nia lä juo wei tä a̦fa wayoaö balöoje ja, bä a̦ shino läablalodii buoma. Abinaja bä nowa tayoma.

—“Juan a lä cui, Yai Bada tänö a shömölema”, bämacö cuu dicoo ja, “Inaja lä wama a nofi ma tabole ma cui, ¿wedi tä tabä, wama a wa̦ bejedi li bufinomi?”, a nia cuu majöo dicoo. 6Ö̦jö ma cui, “Yanowamö täbä nija a shömamoma”, bämacö cuu dicoo ja, ei täbä bluca lä ublale bä nia jushudou. Maa ma bänö bämalecö nia shäyäöje. “Yai Bada a wa̦no wäyälewä Juan a cuoma”, bä cuu malä shalilio wei —bä nowa tayoma.

7Ö̦jö cudeenö, bä a̦ jo̦wa mojodumoma.

—Cuwi. “Ö̦jönö Juan a shömölema a”, yama a nofi ca̦i taboimi —bä cuma.

8—Ja̦o —Jesús e cuma—. Camiyä ma cui, cafä wamacö nija “Ö̦jönö wale shömölema ya”, ya ca̦i nia cuu ayaomi —a cuma.

Ficali täca jamö shomi

täbä lämabou lä juono wei tä a̦

9Shominaja ei tä a̦ nia wäyäö yaclämou ja, bluca bä nija Jesús a wa̦ faö co̦oma.

—Ai anö uba too tobä bluca fa döalalönö, shomi täbä bälömaquefälöma, etäca nowamaö juobeje. Ö̦jö däjä, shomi täbä ulifibö jamö a fa alufälönö, a nö dedeadayoma.

10’Uba a fabä tä cublou däjä, ficali ca ja bä lä bälöblamabole bä nija, a nosie lä juaö wei ai e fa shömölönö, uba bä yefimaö co̦o bufima. Ö̦jö ma cui, bä lä bälöblamabole bä lä cuinö a nabä quea mö fa baicöjenö, a si yafelilalemaje. A shinoco ca̦i shömöa mö yabaa co̦lemaje. 11Cama ai e shömöa ma co̦leno wei ma cui, bä doblou co̦o fa mlacunö a si yoalalemaje. Ö̦jö däjä, a shinoco shömöa mö yabaa co̦lemaje. 12Ö̦jö däjä, ai e shömöa nomöjölema. Ö̦jö a famia fa balömalöjenö, a fa ja̦ilöjenö a i̦cali sibomalemaje.

13’Ö̦jö däjä, cama ficali etäca lä cuono wei abinaja a bufi cuma. “¿Wedinaja ya li cuaabä da tawä? Ja̦o. Iba ijiluyä ya lä nofimaö wei ya nia shömaö. Ö̦jö a nofi tabou ja̦too wejeicätä”, a bufi cuma. 14Ö̦jö ma cui, bä lä bälöblamabole bä lä cuinö, bada tä ijilubö e cadidiwä fa dalalöjenö abinaja bä nowa tayolayoma. “Ei bada tä ijilubö e cadidiwä, ficali ca nia obi tabou lä juo wei. Ö̦jö bäma a shäa fa showadalönö, camiyä bämacönö bäma täca ficali tabou juo nomöjöobä”, bä nowa tayolayoma. 15Ö̦jö däjä, ficali täca casö jamö a fa ja̦ilöjenö, a shälemaje.

¿Ö̦jö tawä? —Jesús a cuma—. Bada anö ¿wedinaja ö̦jö bä nia taamaö, ö̦jö lä? 16Wedinaja mlai. Bä nia waicaö mö juimaö. Shomi täbä nija täca nia jöböamou majöo —Jesús a cuma.

Ö̦jö a wa̦ fa ji̦liläjenö, cama bä a̦fa lä wayoale bä nö fa ö̦jöbömolunö, bä ushuyaimou dodijioma.

—¡Inaja dicoo mlai! —bä lobe cudaliyoma.

17Ö̦jö ma cui, cama bä nija Jesús a mamo fa showaicunö, abinaja a cuu nomöjöoma.

—¿Inaja mlai daanö? ¿Wedi tabä ei tä a̦ oniblalema, ö̦jö lä, camiyä wale a̦fa wäyäö lä balöono wei tä a̦ lä cui? Abinaja tä a̦ cuu.

Maa mabä ja a yafi nia lä i̦tamaö wejei bä lä cuinö, ma wailemaje. Ö̦jö ma cui, ma lä waileno wejei ma lä cui, a yafi colo lojodoobä ma yai li cublaliyoma.

’Einaja tä a̦ oni cuu. 18Ö̦jö ma jamö bä fa yudublaicunö bä lä quelayou wei bä lä cui, bä nö nia bleaaö fe balojoo. Ö̦jö bä nö nia ma bleaaö wei ma cui, ai bä lä cui, ö̦jö ma showawänö bä fe yai shäo däjä, ö̦jö bä nia yai cobequeblou fe balojoo —a cuma.

19Moisesi tä a̦ ja täbä lä damaö wejei bä ma cuinö, nofi bäyäalewä blowäjäwä bä ma cuinö, a mili juwäamaö showadaomaje. A wa̦ lä shomiano wei tä a̦ ja, cama bä nö malä ö̦jöbömolayono wei. Ö̦jö ma cui yanowamö täbä nö quili tamaje yalo, bä waiquidaliyoma.

20Bä jushuo waiquioma cudeenö, Jesús nija showadi bä mamo showadioma. Jai dodijidawä a nia fa wa̦liijenö cama ai ebä shömöa ja̦tolemaje. Jole jole bä nofimolanö a wa̦ nia fa ji̦liajenö, Lomateli bada a yai lä cui nija a wa̦no nia wäyäö majöomaje, ö̦jönö a yai juwäamabä. 21Jesús a wa̦liije ja, abinaja bä cuma.

—Tä a̦ wäyäle. Wa lä bejedimou wei bäfä daö. Wa bä yömölaö ja, wa wa̦ cadidou. Bada bä ma cui, bada bä lä mlai bä ma cui, wa bä nofi tabou fe usucuo fa showaonö, Yai Bada tänö bämalecö taamaö lä bufii wei, quilii mlai ja wa tä a̦ shino yai wäyäö shalilou. Ö̦jö cudeenö bäfä nia wa̦lii. 22Lomateli bada Sesa a lä cui, ö̦jö befi bä blada lä nacaö wejei, judio bämacö ma cuinö, ¿bäma bä blada jöböabä tawä? ¿Tä a̦ läami daanö? Ma, ¿tä a̦ läa tawä? —bä cuma.

23Ö̦jö ma cui, Jesúsnö bä daö waiquioma yalo a mölanomi. Abinaja a cuma.

24—Blada a da dodobla. Ei ¿wedi bei fe nö e̦le? ¿Wedi bei a wa̦fa oni? —a cuma.

—Lomateli bada tä Sesa —bä cuu mö feduoma.

25—Ja̦o —e cuma—. Sesa cama etäbä ja, wama a li dobäbä, ö̦jö lä. Yai Bada cama etäbä mö feduwä lä cui täbä ja, cama wama a li dobäö mö feduobä —a Jesús cuma.

26Bluca bä mamo showao däjä, Jesús a wa̦ shominajamaö bufi ma doblaono wejei ma cui, a wa̦ shaliliablalou yalo, mamicai bä bufi shino shädayaimou bädaoma.

Täbä jocädou lä co̦o wei tä ja

Jesús a lä wa̦lino wejei tä a̦

27Ö̦jö däjä, saduseo bä bada lä cuinö, Jesús a nabä icua nomöjöquemaje. Ö̦jö bä saduseo lä cui, abinaja bä bufi shino cuu. “Täbä lä nomaö wei bä demi jocädou co̦o mlaicätä”, bä bufi shino cuu. 28Inaja bä bufi cuu waiquiwä cudeenö, a wa̦ nia fa yaclämajenö a wa̦limaje.

—Tä a̦ wäyäle. Moisesi tä a̦ oni jamö, abinaja judio bämalecö nowa tama. A ijilubö cuo showao mlao däjä, ai e mashi nomaö dicoo ja, bä suwäbö e lä feiblou wei a nia däaö nomöjöo. Ö̦jö a suwä nija bä ijilubö ebä fa tacönö, a lä nomalayono wei a lä cui, ö̦jö bä ijilubö ebä a̦fa nia jilabou nodio juoje. ¿Ö̦jö tawä?

29’Bei —bada bä cuu co̦oma, Jesús nija—. Cama cäbä mashi 7 cuoma. Jaba a lä cui, a suwä lä däleno wei a ijilubö cua showaa mlai ja, a mladaliyoma. 30Ö̦jö a mashinö e däa nomöjölema. Ö̦jö ma cui, bei ijilubö e cuo showao mlao däjä, cama a ma cui a ca̦i nomaa majölayoma. 31Cama ai a mashinö, e däa ma nomöjöleno wei ma cui, inaja showawä. ¿Ö̦jö tawä? Jödödöwä bä 7 lä cuinö, a suwä däa ma nodiadalano wejei ma cui, bä ijilubö cublou showao mlao däjä bä bluca nomalaliyoma. 32Ya̦cumö, suwä a ma cui, a ca̦i mladaliyoma.

33’¿Ö̦jö tawä? —bä cuma—. Inaja tä cuoma cudeenö bäfä wa̦lii. Yai Bada tänö täbä demi nia jo̦wa jocädamaö lä co̦o wei däjä, ¿wedi jamö a lä cui bei a suwäbö yai nia cuodayou, ö̦jö lä? Bluca bä 7 wa̦lo lä cuinö a däadalaö malä cuaano wejei —ebä cuma.

34Abinaja Jesúsnö bä nowa tama.

—Yanowamö täbä showadi doayou ma cui, 35Yai Bada tänö täbä demi jocädamaö co̦o däjä, täbä nia inaja cuaaimi. “Ei a ba̦limi cuobä a”, Yai Bada tänö täbä nofi lä tabou wei, täbä nia doayou co̦daaimi. Täbä nia ca̦i suwäbö jöböamou co̦daaimi. 36Täbä nia nomaö co̦daaö malä mlai. A̦jele täbä doayou lä mlainaja täbä li cublou showadalayou. Yai Badanö täbä demi jocädamaö yalo, ö̦jö ijilubö ebä nia yai cuo.

37’¿Ö̦jö tawä? —Jesús a cuma—. Täbä demi nia jocädou lä co̦o wei, Moisesi a ma cuinö tä a̦ jaba wawäblamalema. Fii defi wacö lä waono wei jamö Yai Bada a wa̦fa wäyämou däjä, abinaja a malä cuno wei.

Ablaamö a ma cui nija, Isaacö a ma cui nija, Jacobo a ma cui nija, ö̦jö bä nija ya lä bufiblamou wei ya.

’¿Ö̦jö tawä? —Jesús a cuma—. Einaja Yai Bada a cuma. 38A lä bufiblamou wei a lä cui, nomawä täbä nija a bufiblamoimi. Bä lä demi wei bä nija a yai bufiblamou. Yai Bada ebä bluca lä cui, bä demi malä tabole —a cuma.

39Ö̦jö däjä, Moisesi tä a̦ ja täbä lä damaö wejei, ai bä a̦ fama.

—Tä a̦ wäyäle. Wa wa̦ juo ja, wa wa̦ cadidoma —bä cuma.

40Bä malä quilino wei. Bä fa quililalunö a wa̦lii co̦daanomije.

David nodiwä

a lä wa̦lino wei tä a̦

41Jesúsnö bä bufi dayäamaö ja, abinaja bä nowa tama.

—A shömabä Yai Bada tänö a lä yaileno wei a lä cui, Bada tä David nodiwä e jo̦wa. ¿Wedinaja bä bufi li fa cunö, David nodiwä e a̦fa li jilabouje? 42David cama a showawä ma cui, amowa etä a̦ oni jamö, abinaja a malä cuno wei.

Iba Badayä a nija, abinaja Bada tä yai lä cui a cuma. “Äyämö, camiyä jayu ya boco mashi jamö a döcäa da balöiquiyo. 43Bä nö lä nabämou wei bä lä cui, cafä nija ya bä möfe nia quilili bomabou.”

’¿Ö̦jö tawä? —Jesús a cuma—. Einaja a cuma. 44Bada tä David a lä cuinö a nofi ma badabole ma cui, ¿bei e jo̦wa nia li nodiblou majöo tawä? Bä bufi da dayäo, ö̦jö lä —a cuma.

Bada bä a̦fa lä wäyäno wei tä a̦

45Bä yömöca bluca dao däjä, abinaja Jesús a cuma, bä lä nocamabono wei bä nija.

46—Moisesi tä a̦ ja täbä lä damaö wejei bä nija bä da moyaweicu. Camishi labe bä ja bä shino didio bufi doblao talei, bä nowa lä bluca wei bä ja. Madofi bä luluabeje jamö bä lä co̦camou wei bä lä cui nija, bä nö bada ö̦jöböamou bufi ca̦i doblao. Judio bämacö yododabä jamö, bada bä lä döcäo wei jamö bä döcäo yaimou mö feduo. Täbä iyaö ca̦i co̦camobä jamö ma cui, bada bä nijamö bä loo coyocoo bufi ca̦i doblao.

47’Ö̦jö bä lä cuinö, suwä bä lä feiblou wei bä fa mölamajenö, bä madofibö bluca däablaö läoje. Ö̦jö däjä, bä mömou nia liyäjäo fe fa yadionö, Yai Bada nija bä nö bayeli nacao ja bä a̦ jole jole labaaö bädao. Yai Bada tänö ö̦jö bä nö nia shino yai bleaamaö fe balojoo —a cuma.

Currently Selected:

Lucas 20: GUU

Highlight

Copy