MATEO 26

Jesuuquidiito emaadö a’de’tä’jödö

1Yääje töwa’deuwödö töwä’ca’jäcä Jesuuquidiito cönä’döaacä tönoowanoomadö wwäiñe:

2—Änwanno odhoowanääcäiñe na jenammato ncadheeda yää Weja’dätä’jä anootoi’chädö jäcä tö’tajo’tojo anootoije yeichö. Yaawä öwö, Soto nnedö, wä’tuja’de cuduusa jäcä waatajoijojoodö wetä; quee cönä’döaacä Jesuuquidiito tönoowanoomadö wwäiñe.

3Yaawä cöne’jummaicho Wanaadi wwä töwa’deuwaamo edhaajotoncomo, judhío owaanomannamo mmaja, inchoncomo mmaja, ñanno judhío edhaajotoncomo. Tönwanno cönä’ja’to Wanaadi wwä töwa’deuwaamo edhaajotoncomo mmai chaca, ñäädä Caijaasaje chäätö cönä’ja’dö. 4Tacaade’da Jesuuquidiito ajäichö cöna’de’toicho yaawä, emaadö wetä. 5Tönwanno cönä’döa’to:

—Tanööcö dö’täiñe mmaane ajäijai’cha caato, soto mma ewoodoicha’noto; quee cönä’döa’to.

Juu shimi’jotoojo que Jesuuquidiito töjö’jödö

6Yääje mma yaawä Jesuuquidiito cönä’jaacä Wetaaniya ña, Simón mmai chaca, ñäädä woi ’jano’jödö. 7Yaawä wodi cöneejä jeteiya tajääde’dato dha’me, juu shimi’jotoojo täjeeto dhaca. Jesuuquidiito ju’jä de’cäcä cönaccai yaawä, töwö yääwashinchädaawä. 8Yää eneedö’jo ñoowanoomadö cone’da cönä’döjoicho; cönä’döa’to:

—¿Ane’cotoojo mädä nimaacudäi chea mä’dä? 9Mädä juu shimi’jotoojo täjeemajomje nä’jaanä joojato jödaata ejeetöje, chääje’jödö ecaamodö wetä yaawä wentumja’como wwäiñe; quee cönä’döa’to.

10Yää eta’jäcä Jesuuquidiito wwä, töwö cönä’döaacä chäwwäiñe:

—¿Ane’cotoojo määdhä maquiimaato? Aashichaato dajaane töwö nödöi jääcä. 11Wentumja’como ajaadäiñe naato’de yeichöje. Öwö mmaane yeichöje’daane ajaadäiñe weichojo na. 12Mä’dä wodi juu shimi’jotoojo que jöi nono aca yeewaacadö owaajo. 13Chäänönge yääje wä’döa äwwäiñe, tameedä yeichö wa’cä edä nono de’wä aashichaato wätunnä ecammajäätödaawä, määdhä wodi nödö’jödö mmaja necammaato’dede, töwö chääjäcä soto chö’tajä’to’comooje; quee cönä’döaacä Jesuuquidiito.

Jesuuquidiito utuudu ecamma’jödö Juudha wwä

14Yääje mma yaawä Juudha Icaadiyoote, ñäädä amoojadooto de’wä aaco’como jimmä, cöntämä Wanaadi wwä töwa’deuwaamo edhaajotoncomo döiñaiñe. 15Töwö cönä’döaacä chäwwäiñe:

—¿Ä’waasa’cä u’jai maato öwwä Jesuuquidiito utuudu eje’jödööje? quee cönä’döaacä.

Tönwanno jödaata cuntuicho chäwwä, tooni sotooto de’wä amoojadä. 16Yää ’jeje töwö Juudha töntö’tamme’que cönä’jaacä Jesuuquidiito u’tojo.

Awa’deene Santa Seena tödö’jödö

17Yaawä cönä’jaacä uu ummannä’cajootojo ’jemjönö täu’tojo waajäntotoojo anooto, judhío we’jummato’como cu’nädö. Yaawä Jesuuquidiito nowaanomaadö cöneejoto chäwwadäädä; cönä’döa’to chäwwä;

—¿Äsha äwääwashinchotoojo ñaa nichoonecaanä, yää Weja’dätä’jä anootoi’chädö awoono amiiñä’caajä mänäiye? quee cönä’döa’to.

18Töwö cönä’döaacä:

—Jataaca ojoncomo. Yäätä dhanwa mejoodöaato’de; edääje caichäcä’de chäwwä: “Yääje Owaanomaanei nä’döaanä: Cu’nädö amoinche’da nä’döi eduuwa. Noowanoomadö jadäiñe ämmai chaca wääwashinchä’se wa eduuwa Weja’dätä’jä anootoi’chädö awa;” quee caichäcä’de chäwwä; quee cönä’döaacä Jesuuquidiito tönoowanoomadö wwäiñe.

19Ñoowanoomadö cönnöicho yaawä Jesuuquidiito necamma’jödö nönge. Yäätä Weja’dätä’jä anootoi’chädö awoono wääwashinchotoojo cönconeecaicho.

20Yaawä cho’monga’jäcä Jesuuquidiito cönaatajiimai ñanno amoojadooto de’wä aaco’como tönoowanoomadö jadäiñe. 21Töwääwashinchädaawäiñe Jesuuquidiito cönä’döaacä:

—Chäänönge yääje wä’döa äwwäiñe, tooni adhantawäiñe naadö yu’a’de; quee.

22Tönwanno wentumje cönä’döjoicho yaawä. Töwaadäiñe Jesuuquidiito cöneecamma’ja’to:

—¿Öwööjönö ’quene, Cajiichaana? quee conä’döa’to.

23Jesuuquidiito cöneccujä’a’to; cönä’döaacä:

—Ñäädä yää dea jadaaji aca yaacä nääwashinchaadö yu’a’de. 24Soto nnedö nä’döja’de töjääcä imennaajä naadöje dea. Yaawääne’ wentumje na’de ñäädä Soto nnedö u’nei’jödö. Ennu’da mmaane töwö eijai yei’jödö; quee cönä’döaacä.

25Yaawä Juudha, ñäädä u’nei, cönä’döaacä:

—¿Öwö ca ñäädä, Owaanomaanei?

Jesuuquidiito cönä’döaacä chäwwä:

—Ee, amäädä mma’ne; quee cönä’döaacä.

26Yaawä töwääwashinchädaawäiñe Jesuuquidiito uu cönannäjöi. Chääjäcä töwa’deuwö’jeje cöni’yajäätöi. Tönoowanoomadö wwäiñe cuntui yaawä; cönä’döaacä:

—Edä; täu’täcä. Edä yää yeejö; quee.

27Wocö daja cönannäjöi chea yaawä. Chääjäcä töwa’deuwö’jeje chäwwäiñe cuntui yaawä; cönä’döaacä:

—Entäcä tameedä änwanno. 28Edä yää yaaquiyö, chäänönge Wanaadi necamma’jödö yeichö ene’ju’tojo, jooja’como soto jäcäinchädäiñe töja’emö, choone’nadiiyöcoomo choccatoojoje. 29Yääje wä’döa äwwäiñe, chääjedöödö eccudu aneenö’da wa’de eduuwa Wanaadi cajiichaanaje yäänejoodawä ajaadäiñe chääjedöödö eccudu töödööenö enöödö jonaane; quee cönä’döaacä Jesuuquidiito tönoowanoomadö wwäiñe.

Peedhodo wwä töjoome’dotoojo Jesuuquidiito necamma’jödö

30Yaawä tooniye töweecanta’ñä’jejeiñe, cöntonto yaawä Odiiwo ’jödö ña. 31Töötädaawäiñe Jesuuquidiito cönä’döaacä chäwwäiñe:

—Tameedä änwanno co’nomjaato’de edä coijaichawä, imennaajä nä’döaadöje: “Oweeja edai’chäneichomo waiju’ja’de; oweeja näämecantaato’de yaawä;” quee imennaajä wä’dödö na. 32Yaawä wäämaajo jonno waadonca’jäcä odhoowajoiñe wöta’de Caadideea ña; quee cönä’döaacä Jesuuquidiito tönoowanoomadö wwäiñe.

33Yaawä Peedhodo cönä’döaacä chäwwä:

—Tameedä anejjacoomo wwä adhe’nomjataame, adhe’nomja’da dea eijai wa öwö.

34Yaawä Jesuuquidiito cönä’döaacä chäwwä:

—Chäänönge yääje wä’döa äwwä, edä coijai chawä dea, wameedi wetöömödö owaajodä, aaduwaawäde cöjoome’da’de; quee cönä’döaacä Jesuuquidiito.

35Peedhodo cönä’döaacä chäwwä:

—Ajaadä wäämadö jonaane ojoome’däjai’cha wa; quee cönä’döaacä.

Mädääje mmaja tameedä Jesuuquidiito nowaanomaadö cönä’döä’to dea.

Jeseemaní ña Jesuuquidiito Wanaadi wwä ya’deuwö’jödö

36Yaawä Jesuuquidiito cönä’döi Jeseemaní ña tönoowanoomadö jadäiñe. Töwö cönä’döaacä chäwwäiñe:

—Eetä ataajimaatäcä, mänseedä’cä Wanaadi wwä ya’deutaame; quee.

37Töjaadä cönaadäi Peedhodo, Seewedheeo nnacoomo aaco’como mmaja. Cone’da cönä’döjoi yaawä; wentumje cönä’jaacä jooje. 38Yaawä töwö cönä’döaacä chäwwäiñe:

—Wentumje tö’tajä’a, äämajaicho wa’cä. Eetä cöwoomo’täcä; äädai’chätääcä; quee cönä’döaacä.

39Mänseedä’cä Jesuuquidiito cöntämä yaawä; tu’dhe cöne’mo’täi. Wanaadi wwä cöna’deuwöi; cönä’döaacä:

—Jaaja, yääje eijai yeiya’jäcä mädä jääcä töweeja’dä’emööje naadö mäiñetuncajoi’che öwwä. Amäädä ätö’tajäätödö woijeene, öwö woije’daane; quee cönä’döaacä Jesuuquidiito.

40Töwö cönennacai yaawä tönoowanoomadö döiñaiñe; wönö’näje cöneedantoicho. Peedhodo wwä cönä’döaacä:

—¿A’dhe’cä mmädä äädai’chäjai’cha mä’jaato jaadä? 41Äädai’chätääcä; Wanaadi wwä adha’deutäcä, mä’yunaacajooto’no. Jäduuje awei’she aweichaameiñe, ajuunucoomo mmaane jäduuje’da na; quee cönä’döaacä Jesuuquidiito.

42Töwö cöntännea yaawä; Wanaadi wwä cöna’deuwöi chea; cönä’döaacä:

—Jaaja, mädä äiñetunca’da eijai’cha weiya’jäcä, amäädä ätö’tajäätödö woije wei’ñojo; quee cönä’döaacä.

43Cönennacai chea yaawä tönoowanoomadö döiñaiñe mmaja. Wönö’näje mmaja cönä’ja’to dea, jooje wetuujeiñe töweichomjäcä. 44Cönnämäicho dea yaawä; cöntämä aaduwaawädeeto ai. Wanaadi wwä cöna’deuwöi chea yaawä, awa’de cöna’deuwöichöje mmaja. 45Yaawä tönoowanoomadö döiñaiñe cönennacai chea; cönä’döaacä chäwwäiñe:

—¿Wönö’näje deaane ca maato? Eneetäcä’ma chu’nädö aca yä’döaajä naadö. Soto nnedö nä’tuja eduuwa conemjönö dönnamo wwäiñe. 46Ääma’tätääcä; cöötätäiye eduuwa. Eneetäcä’ma yu’nei ne’aadö; quee cönä’döaacä Jesuuquidiito.

Jesuuquidiito ajäi’jödö

47Yääje Jesuuquidiito wa’deutaame dea Juudha cöneejä, ñäädä amoojadooto de’wä aaco’como Jesuuquidiito nowaanomaadö jimmä. Chääjadä cönä’ja’to jooje soto, dee dha’meiñe, sauda dha’meiñe mmaja. Tönwanno cönä’ja’to Wanaadi wwä töwa’deuwaamo nanontädööcomo, inchoncomo nanontädööcomo mmaja, ñanno judhío edhaajotoncomo. 48Edääje cönä’jaacä ñäädä Jesuuquidiito u’nei nene’ju’jo’jödö chäwwäiñe:

—Ñäädä wishuuma’dedö, ñäädä ñäädä. Ajäichäcä’de; quee cönä’jaacä Juudha nene’ju’jo’jödö.

49Jesuuquidiito döiña ñäädä Juudha cönä’döi yaawä, cönä’döaacä:

—¿Eetä ja ca’ manä, Owaanomaanei? quee cönä’döaacä.

Cunsuumai yaawä. 50Yaawä Jesuuquidiito cönä’döaacä chäwwä:

—¿Ane’cä döe meejä, weichacoono? quee.

Yaawä ñanno soto cöneejoto; Jesuuquidiito cönaajoicho yaawä.

51Yaawä dea mma tooni Jesuuquidiito jadoono tösaudai cunu’cai. Wanaadi wwä töwa’deuwaamo edhaajotoncomo anoonö cömjanaacätäi. 52Yaawä Jesuuquidiito cönä’döaacä chäwwä:

—Asaudai shoomacä. Tameedä ñanno sauda ca’como wewäänä’tädööcomo sauda canaadöje mmaja nä’ja’aato’de. 53¿Jaaja wwä a’deujai’cha ca cäcaanö’anä, amoojadooto de’wä aacä miide tamoodedö ene’jodö wetä chäwwä, ö’wa’tännamooje? 54Yaawääne’ mädääje tödööa’jäcä öwwä, ¿aaquene mmaja yää imennaajä öwö jääcä naadö ämja’dätäädö deeade’ yaawä? quee cönä’döaacä Jesuuquidiito.

55Yaawa Jesuuquidiito cönä’döaacä ñanno jooja’como soto wwäiñe.

—¿Aaquene tämeenato wwadäädä’da mmädä töwaichaqueiñe öwwadäädä me’ato? Anooto waadäi shuucu töweiye wä’jaaquene ajaadäiñe Wanaadi weichojo taca, soto owaanomaadöcoomoje. Yaajäi’cha töweiye mä’ja’quene yaawä. 56Mädä neja’dä’a jääcä Wanaadi wa’deuwödö ecammannamo nimenno’jocoomo nönge yeichö wetä; quee cönä’döaacä Jesuuquidiito chäwwäiñe.

Yaawä tameedä ñoowanoomadö cönäänejeicho, e’nomjadööje mma.

Äcamma’jonnamo je’tacaiñe Jesuuquidiito wei’jödö

57Ñanno ajäiñamo’jödö Jesuuquidiito cönaadoicho yaawä Caijaasa wwadäädä, ñäädä Wanaadi wwä töwa’deuwaamo edhaajotoncomo. Yäätä cönä’ja’to judhío owaanomannamo we’jumma’como, inchoncomo mmaja. 58Inchäcäiñe Peedhodo cöntaacä, amoinche, Wanaadi wwä töwa’deuwaamo edhaajotoncomo ’dodoi aca tödööene. Yäätä cönaatajiimai yaawä suddau jadäiñe, ene’ma, ¿aaquene tödöötaicho? quee töucwadööje.

59Ñanno Wanaadi wwä töwa’deuwaamo edhaajotoncomo, inchoncomo mmaja, tameedä anejjacoomo äcamma’jonnamo mmaja, jönaawä Jesuuquidiito ementädö cunuujiya’to, emaajodö wetä yaawä; 60yaawääne’ aneedantä’daane cöneiya’to. Jooje cönä’ja’todö’je ementännamo, chäänöngato ’je’daane. Yaawä äcuude aacä cönammöicho, jönaawä Jesuuquidiito ementännamo. 61Tönwanno cönä’döa’to:

—Yääje määdhä cönä’döaacä: “Wanaadi weichojo emajjojai wa anejja tödöödö wetä yaawä aaduwaawä anooto mma;” quee cönä’döaacä; quee cönä’döa’to ñanno Jesuuquidiito ementännamo.

62Yaawä Wanaadi wwä töwa’deuwaamo edhaajotoncomo cönämmöi; cönä’döaacä Jesuuquidiito wwä:

—¿Aneccujäätö’da ca manä? ¿Aaqueneeto mädä äjääcä na’deuwaatoodö? quee cönä’döaacä.

63Äucwätä’da cönä’jaacä Jesuuquidiito. Yaawä Wanaadi wwä töwa’deuwaamo edhaajotoncomo cönä’döaacä chäwwä:

—Ääcammacä eduuwa, Wanaadi nudooto netaadöje. ¿Ñäädä ca amäädä, Äwaanacaanei, Wanaadi nnedö? quee.

64Yaawä Jesuuquidiito cönä’döaacä chäwwä:

—Ee, ñäädä öwö, mecammaadö. Edääje mmaja wä’döa dea äwwäiñe, äcuude änwanno meneeato’de Soto nnedö weejödö ca’dutu de’wä, Jäduujato nnäcä, yaatajiimaajä, ämu’demjönö dö’se; quee cönä’döaacä Jesuuquidiito.

65Yaawä Wanaadi wwä töwa’deuwaamo edhaajotoncomo töwoomö cönshiichai; cönä’döaacä:

—Määdhä dhanwa cone’da na’deuwa Wanaadi jäcä. ¿Ane’cäämöne mma määtonno wa’deunä cämjummatäädö deeade’ ? ¿Metaato jönca Wanaadi wa’cotooje yäätä’tädö? 66¿Aaquene tödööemje nichö’taanä äwwäiñe? quee cönä’döaacä.

Ñanno cönä’döa’to yaawä:

—Conemjönö mä’dä; tämamje töwö na; quee.

67Yaawä ijeedö jäcä Jesuuquidiito cöneeta’doicho; cönaiju’jätöicho dea. Anejjacoomo cömjojeeta’mojä’a’to, 68edääje töwä’döancädäiñe:

—Ene’ju’cä amäädä Äwaanacaanei, ¿änääcö ajoojeta’moi? quee töwä’döancädäiñe.

Peedhodo wwä Jesuuquidiito jome’dä’jödö

69Peedhodo shuucu cönä’jaacä jödöödö awä. Yaawä tooni wodi dhanoonöcoomo yöiña cöneejä; cönä’döaacä chäwwä:

—Amäädä mmaja Jesuuquidiito Caadideea ñano jadä mä’jaaquennea; quee cönä’döaacä.

70Töwö Peedhodo cöneejome’däi tameedä ñeetadööcomooje:

—Yoowanääcä’da na mädä mecammaadö; quee cönä’döaacä.

71Yaawä jödo’na töweeja’cadaawä anejja wodi wwä cönäädantojoi chea yäätä. Ñäädä wodi cönä’döaacä yäätoncomo wwä:

—Määdhä mmaja cönä’ja’dea Jesuuquidiito Naasade ñano jadä; quee cönä’döaacä Peedhodo jäcä.

72Töwö Peedhodo cöneejome’däi chea yaawä; cönä’döaacä:

—Yoowanoojönö ñäädä mecammaadö; quee cönä’döaacä.

73Äcuude’cä ñanno yäätoncomo Peedhodo wwadäädä cöneejoto; cönä’döa’to chäwwä:

—Chääjadoncomo dajaane amäädä, chäänöngeiñe adha’deddu naadö naane’; quee.

74Yaawä Peedhodo cönä’döaacä:

—Yoowanoojönö ñäädä mecammaatoodö. Wanaadi dhowaanäcä yääje yeichö. Töwö maaminchajai ña wäätäncu’tädö yeiya’jäcä; quee cönä’döaacä.

Yääje mma yaawä wameedi cöneetömöi. 75Yaawä Peedhodo cöntö’tai töwwä Jesuuquidiito wa’deuwö’jödö jäcä: “Wameedi wetöömödö owaajo amäädä aaduwaawäde cöjoome’da’de;” quee yä’dö’jödö jäcä. Jödo’na cöneeja’cai yaawä; wentumje cönaamoaacä.

Currently Selected:

MATEO 26: MCH

Highlight

Copy