MATEO 27
27
Pidaato je’taca Jesuuquidiito wei’jödö
1Yaawä tööjanaacadä tameedä Wanaadi wwä töwa’deuwaamo edhaajotoncomo tujummä cöna’deuwöicho inchoncomo jadä, ñanno judhío edhaajotoncomo. Jesuuquidiito emaadö cöna’de’toicho. 2Tönwanno tömööe Jesuuquidiito cönaadoicho yaawä; acu’shänä Pidaato wwä cuntuicho.
Juudha wääma’jödö
3Emaajodö wetä Jesuuquidiito adäädö eneea’jäcä Juudha wwä, ñäädä u’nei’jödö wwä, töwö cone’da cönä’döjoi yaawä. Yää tooni sotooto de’wä amoojadä jödaata cöniiñacai yaawä Wanaadi wwä töwa’deuwaamo edhaajotoncomo wwä, inchoncomo wwäiñe mmaja. 4Töwö Juudha cönä’döaacä chäwwäiñe:
—Conemjönö wödööne. Dhanwa aashichaato wu’ne; quee cönä’döaacä.
Tönwanno cönä’döa’to:
—Amäädä ’cä, owoijato dajaane mädä; quee.
5Yaawä Juudha jödaata cömjajoi Wanaadi weichojo tawä. Cöntämä yaawä töwä’jöncö’cadööje mma.
6Wanaadi wwä töwa’deuwaamo edhaajotoncomo yää jödaata cönancuicho yaawä; cönä’döa’to:
—Amoi mädä jödaata; Wanaadi weichojo choonecaatojooje tödööjai’cha caato, soto eje’jödööje yeijäcä; quee cönä’döa’to.
7Töwa’deuwödööcomo’jo nono cöneejemaicho yää jödaata que; Ädiiñä Tödönei’jödö ñano täätö yää nono cönä’jaacä. Yää tönwanno cönnöicho aneiñajancomo we’a’como ewaadöcoomo weichojooje. 8Yääje yeijäcä eduuwa naadö jona tödööene yää nono eetö na Munu ñanooje. 9Mädääje chäänönge cönä’döi Jeedemía nimennä’jödö, ñäädä Wanaadi wa’deuwödö ecammanei. Edääje Jeedemía cömmennäi: “Yää tooni sotooto de’wä amoojadä jödaata cöneicho; yää cönä’jaacä soto täje yeichö iisadaaediitacoomo necamma’jocoomo. 10Yää que cöneejemaicho nono, Ädiiñä Tödöönei’jödö ñano täätö, Cajiichaana öwwä cöneecammaichöje dea;” quee Jeedemía cömmennäi.
Jesuuquidiito ecamma’jo’jödö Pidaato wwä
11Yaawä Jesuuquidiito cönä’jaacä acu’shänä je’taca. Ñäädä cöneecamma’joi:
—Judhío cajiichaanaichomo amäädä? quee cönä’döaacä.
—Ee, ñäädä öwö, mecammaadö; quee cönä’döaacä Jesuuquidiito.
12Yaawä Wanaadi wwä töwa’deuwaamo edhaajotoncomo wwäiñe tämentädaawä, inchoncomo wwäiñe mmaja, töwö Jesuuquidiito aneccujäätö’daiñe cöneiyacä. 13Yaawä Pidaato cönä’döaacä chäwwä:
—¿Aneeta’da ca manä äjääcä jooje cone’da na’deuwaatoodö?
14Jesuuquidiito aneccujäätö’da dea cöneiyacä. Yääje yeijäcä ñäädä acu’shänä cone’da cönä’döjoi. “ ¿Aaqueneeto mädä;” quee cöntö’tajä’acä.
Tämaamöje Jesuuquidiito ecamma’jödö
15Yää comjedensiyai’chädö tödöödawä acu’shänä weichö cönä’jaacä tooni jedeeso tunu’ca, ñäädä soto nijummadööcomo. 16Yaawä jedeesoje iiñödööcomo cönä’jaacä dhanwa tacaadato, Wadaawa täätö. 17Yaawä soto we’jumma’comjäcä Pidaato cöneecamma’joicho:
—¿Äshono u’cajo’se maato öwwä, Wadaawa ’ja, Jesuuquidiitoone’, ñäädä Äwaanacaaneije tä’täämööne’ ? quee cönä’döaacä Pidaato soto wwäiñe.
18Töwö yääje cönä’döaacä towaanäcä yeijäcä tö’neniiyöcoomoje Jesuuquidiito utu’jödööje yeichö.
19Yaawä äcamma’jonei a’täi ye’wä Pidaato weichö ijiiñamo tanoonö cönaanontäi yöiña, edääje ecamma: “Conemjönö männöi’che ñäädä dhanwa aashichaato jäcä. Wäänetöödö ai weneeanä, cone’da wä’jaanä jooje;” quee ecamma.
20Yaawä Wanaadi wwä töwa’deuwaamo, inchoncomo mmaja, soto cöni’jedoicho Wadaawa u’cajoodö wetä Pidaato wwä, Jesuuquidiito emaajodö wetä mmaja. 21Yaawä acu’shänä cönä’döa’dea chäwwäiñe:
—¿Äshono u’cajo’se maato öwwä canno aacä naatoodö?
Tönwanno cönä’döa’to:
—Wadaawaane u’cacä.
22Pidaato cöneecamma’joicho:
—Yääje yeiya’jäcä, ¿aaquene Jesuuquidiito wödööanä, ñäädä Äwaanacaaneije tä’täämö? quee cönä’döaacä.
Tönwanno cönä’döa’to:
—Cuduusa jäcä ajoijojoocä; quee.
23Yaawä Pidaato cönä’döaacä chäwwäiñe:
—¿Ane’cotoojo? ¿Äshono yää conemjönö iiñö’jödö?
Tönwanno jooje’cä mma cöncä’tömjä’a’to yaawä:
—Cuduusa jäcä ajoijojoocä; quee.
24Pidaato dhowaanäcä cönä’jaacä yaawä soto e’jodheinchäjai’chaiñe töweichö. Jooje’cä mma soto wewoodoichadööcomo cöneeneaacä. Yääje yeijäcä töwö tuna cöne’catäi. Ñeenedööcomooje cönänwatöi; cönä’döaacä:
—Öwö woijemjönö mädä määdhä aashichaato emaadö; änwanno owoija’comoone; quee cönä’döaacä.
25Yaawä tameedä ñanno soto cöneccujä’a’to; cönä’döa’to:
—Cone’da määdhä emaadö yeiya’jäcä ñaa näntunaanö’a’de mma’ne, ñaa nnacoomo mmaja; quee.
26Yaawä Pidaato cunu’cajoi Wadaawa. Jesuuquidiito mmaane cönaiju’jojäätöi. Cuntui yaawä suddau wwäiñe cuduusa jäcä ajoijodö wetä.
27Yääje mma yaawä acu’shänä anoonö suddau Jesuuquidiito cönaadoicho acu’shänä ewöötö taca. Yöiña cöni’jummaicho tameedä töjimmotoncomo. 28Tönwanno cönwoncaicho yaawä. Seweichato que daja cönwontoicho yaawä. 29Wesooca aca’ajä ijeemöichöje cönnöicho. Dee cönnöicho yaawä chänwawä, ämu’demjönö dö’se. Ije’taca tä’mudhe cönä’döjä’a’to enno’jätöödöje. Etaana’tädööje cönä’döa’to:
—Amäädä ñäädä judhíocoomo Cajiichaanaichomo; quee cönä’döa’to.
30Tönwanno cöneeta’däjä’a’to dea. Yää dee chänwawoono’jödö que mmaja cömjana’mojä’a’to. 31Yaawä enno’jätö’jeje seweichato que cönwoncaicho; yoomö neene que cönwontoicho yaawä. Cönaadoicho yaawä cuduusa jäcä ajoijodö wetä.
Cuduusa jäcä Jesuuquidiito ajoijo’jödö
32Ääma taawä töötädääwäiñe cöneedantoicho dhanwa Sideene ñano, Simónje chäätö. Jesuuquidiito cuduusai cönaadojoicho chäwwä.
33Coodocoota ña cönä’döicho yaawä. Ye’caichö’jödö ñano, quee töwä’dö’se yeichö yää Coodocoota, quee naadö. 34Yäätä chääjedöödö eccudu Jesuuquidiito wocöödöje cunu’a’to, tutuunato äji jadä oimaajä. Yää oneeja’jäcä Jesuuquidiito wwä aneenö’da cöneiyacä.
35Cuduusa jäcä Jesuuquidiito ajoijo’jeje ñanno suddau yoomö’jödö töwaadäiñe cöneemecantoicho, wä’cana’canä tödöödö’jo. Mädääje chäänönge cönä’döi Wanaadi wa’deuwödö ecammanei nimennä’jödö: “Woomö’jödö töwaadäiñe cönnöicho; wä’cana’canä cönnöicho chääjäcä;” quee imennaajä wä’dödö. 36Yaawä ñanno suddau cönaatajiimaicho yäätä, edai’chädööje. 37Jesuuquidiito ju’jä ejoodhe imennaajä ajoijaajä cönä’jaacä, edä jo’tädööje määdhä näämai, quee ene’ju’tojooje. “Määdhä ñäädä Jesuuquidiito, judhíocoomo Cajiichaanaichomo;” quee imennaajä cönä’jaacä.
38Aacä tämeena’como cuduusa jäcä cönaajoijoicho dea iiñäcä, ääjato. 39Yäätoncomo weja’dätäädö Jesuuquidiito cönincha’me’ca’to, etaana’tädööje. 40Edääje cönä’döa’to:
—Amäädä Wanaadi weichojo emajjojaicho wätä’tädö’jödö, aaduwaawä anooto amääjaicho tö’ta’jödö mmaja; amäädä dea ääwanaacacä. Wanaadi nnedööje aweiya’jäcä ädhä’täcä cuduusa jäconno; quee cönä’döa’to.
41Mädääje mmaja Wanaadi wwä töwa’deuwaamo edhaajotoncomo cönenno’jä’a’to dea, judhío owaanomannamo mmaja, jaadiseeocoomo mmaja, inchoncomo mmaja. Tönwanno cönä’döa’to.
42—Anejjacoomo töneewanaacaiñe cönä’jaacä; töwö dea ääwanaacajai’cha na eduuwa. Iisadaaediitacoomo Cajiichaanaichomooje yeiya’jäcä, cuduusa jäconno nä’to’ñojo eduuwa, ñaa ecamjöiye yaawä. 43Wanaadi ecaanö’nei töwö. Wanaadi wwä ijumma’jäcä, töwö newaanaca’ñojo, Wanaadi nnedööje yäätä’täätö’da; quee cönä’döa’to.
44Yääje mmaja ñanno tämeena’como cöneetana’ta’to dea, ñanno iiñäcä ajoija’como.
Jesuuquidiito wääma’jödö
45Yaawä anunnaque yeichö tameedä nono weichö wa’cä cöntööjamöi, i’ya’wä tödööene. 46I’ya’wä yeichö Jesuuquidiito töcä’de cöncä’tömöi:
—Edí, Edí, ¿dama sawaacataani? quee cönä’döaacä. Jaaja Wanaadi, ¿ane’que’nei co’nomjai? quee töwä’dö’se yeichö.
47Yää eta’jäcä anejjacoomo yäätoncomo wwä, tönwanno conä’döa’to:
—Edía na’dejja, ñäädä Wanaadi wa’deuwödö ecammanei’jödö; quee cönä’döa’to.
48Yääje mma yaawä anejja cöneeca’tömöi yaawä camiisha’cä wetä. Casamjato aca cönennöichai yaawä; dee jo’wä cöneenejoi Jesuuquidiito wwadäädä, shuumajoodö wetä chäwwä. 49Yaawä anejjacoomo cönä’döa’to:
—Äcuude mma, queenetäiye ewaanaca Edía weejödö, eejö’da yeichö jeiñe mma; quee.
50Jesuuquidiito töcä’de cöncä’tömöi chea yaawä; cönaatacoichai yaawä. 51Yääje mma yaawä Wanaadi weichojo aca’jaajä a’dutu cöneeshiichai annai, yujuudacanno yo’waca tödööene. Nono cönäätu’mei yaawä; täjuucomo cöneesaucwajäätöi. 52Äwa cöna’ta’ducaajätöi chea. Jooje Wanaadi sotoi’jödö wä’jajo’jocoomo conaadoncaicho yaawä. 53Ñanno cöneeja’caicho täwaadöcoomo acanno Jesuuquidiito töwäämaajo jonno yaadonca’jäcä. Tönwanno cöntonto yaawä jata aashichaato aca, yää Jeduusadén ñano; jooje soto wwäiñe cönäänejoicho.
54Nono wätu’medö eneea’jäcä, tameedä yääje yeeja’dätäädö eneea’jäcä suddau edhaajotoncomo wwä, Jesuuquidiito edai’chännamo wwäiñe mmaja, tönwanno jooje cönääcatoncaicho; cönä’döa’to:
—Wanaadi nnedö dämma määdhä nä’jaanä; quee cönä’döa’to.
55Yäätä cönä’ja’to jooje wodiiñamo, amoinchenno ene’madööje, ñanno Caadideea ñanno Jesuuquidiito jadä ye’a’como’jödö, töwö i’wa’tännamo’jödö. 56Chääjadäiñe cönä’jaacä Madía Maacadeena, yää ’jeje Madía mmaja, ñäädä Jacoowo, José dheenöötoncomo; Seewedheeo nnacoomo dhenöötoncomo mmaja cönä’ja’dea.
Jesuuquidiito ewaaca’jödö
57Yaawä cho’momöödawä cöneejä dhanwa tönsomaacato, Aadimaatea ñano, José täätö. Jesuuquidiito ecaanö’nei cönä’jaacä töwö. 58Töwö cöntämä Pidaato döiña Jesuuquidiito equeejödö e’ca’e. Yaawä Pidaato cönaadojoi chäwwä. 59Chääquejöödö eiya’jäcä ñäädä José wwä, töwö cönaiñantäi yaawä saawana tajääde’dato que. 60Töwö täwaadöje töweiyemööjato’jödö tödööenö aca cöneewaacai yaawä, täju töncajoodö aca. Äwa nata’tajo täju adai’joto i’wodiiñacaajodö’jo cöntämä yaawä. 61Yäätä cönä’ja’to yaawä Madía Maacadeena, ñäädä yeichacoono Madía mmaja. Shuucu cönä’ja’to äwa je’taca.
Jesuuquidiito ewaadö edai’chä’jödö
62Yää jenamma naadöje, wäädeetatoojo anooto owaajo choonecaajä’tojo anootoi’chädö jenamma naadöje, Wanaadi wwä töwa’deuwaamo edhaajotoncomo, jaadiseeo mmaja, tujuumä cöne’jummaicho Pidaato döiña; 63cönä’döa’to chäwwä:
—Cajiichaana, tötö’ta ñaa na ñäädä töwä’dunaato wä’dö’jödö nudä töweichö: “Aaduwaawä anoototo ai waadonca’de;” quee yä’dö’jödö. 64Yääje yeijäcä äwa edai’chädö jäcä anontocooto osootoi aaduwaawä anooto, Jesuuquidiito nowaanomaadö mma chääquejöödä ememme’que coijai eejö’noto, edääje soto wwäiñe ecammajäätödö wetä: “Töwäämaajo jonno Jesuuquidiito cönaadoncai;” quee töwä’dödööcomo wetä yaawä. Ätäncu’tojoojai ñaato yaawä soto, awa’deene töwei’jocoomo e’jodhe’cä jeene; quee cönä’döa’to jaadiseeo Pidaato wwä.
65Yaawä Pidaato cönä’döaacä chäwwäiñe:
—Suddau wanontaato, canno naatoodö; aashicha edai’chäjootäcä’de chäwwäiñe; quee Pidaato cönä’döaacä.
66Yääje mma yaawä ñanno jaadiseeo cöntonto. Äwa cömmadaaca’ñoicho yaata’duca’jödö ene’ju’tojooje. Yäätä suddaucoomo cönnämäicho, edai’chädööje.
Currently Selected:
MATEO 27: MCH
Highlight
Share
Copy
Want to have your highlights saved across all your devices? Sign up or sign in
© 2014 Reservados todos los derechos
