MAADOCO 15

Pidaato je’taca Jesuuquidiito wei’jödö

1Yaawä tööjanaacadä Wanaadi wwä töwa’deuwaamo edhaajotoncomo cöne’jummaicho inchoncomo jadäiñe, judhío owaanomannamo jadäiñe mmaja, tameedä äcamma’jonnamo jadäiñe mmaja. Tönwanno tömööe Jesuuquidiito cönaadoicho; Pidaato wwä cuntuicho. 2Yaawä Pidaato Jesuuquidiito cöneecamma’joi:

—¿Judhío Cajiichaanaichomo amäädä? quee cönä’döaacä.

Jesuuquidiito cöneccujä’acä; cönä’döaacä chäwwä:

—Ee, öwö ñäädä; quee.

3Ñanno Wanaadi wwä töwa’deuwaamo edhaajotoncomo jooje cöneementa’to. 4Yaawä Pidaato cöneecamma’joi chea; cönä’döaacä chäwwä:

—¿Aaquene aneccujäätö’da manto dea? Etaacä’ma jooje cone’da äjääcä na’deuwaatoodö; quee Pidaato cönä’döaacä Jesuuquidiito wwä.

5Jesuuquidiito aneccujäätö’da dea cöneiyacä. “ ¿Aaqueneeto mädä?” quee Pidaato cöntö’tajä’acä yaawä.

Tämaamöje Jesuuquidiito ecamma’jödö

6Yää comjedensiyai’chädö tödöödawä Pidaato weichö cönä’jaacä tooni jedeeso tunu’ca, ñäädä soto nijummadööcomo. 7Yaawä jedeesoje cönä’jaacä dhanwa, Wadaawa täätö. Töwö jedeesoje cönä’jaacä acu’shänä jadä yeewänä’to’jocoomo jadäiñe, soto ema’jödö weijäcä chäwwäiñe. 8Yaawä soto cöneejoto Pidaato döiña, yää iiñöeetö dea cönnöja’to chäwwä. 9Yaawä Pidaato cönä’döaacä chäwwäiñe:

—¿Judhío Cajiichaanaichomo ca u’cajo’se maato öwwä?

10Töwö yääje cönä’döaacä towaanäcä yeijäcä tö’neniiyöcoomoje Wanaadi wwä töwa’deuwaamo edhaajotoncomo wwäiñe Jesuuquidiito utu’jödö yeichö. 11Yaawä ñanno Wanaadi wwä töwa’deuwaamo edhaajotoncomo soto cöni’jedoicho, Wadaawa u’cajoodö wetä Pidaato wwä. 12Yaawä Pidaato cönä’döaacä soto wwäiñe:

—Yääje yeiya’jäcä, ¿aaquene Jesuuquidiito tödööjo’se maato, ñäädä judhío Cajiichaanaichomooje töne’tä määnetäänedö? quee cönä’döaacä Pidaato.

13Tönwanno cöncä’tömjä’a’to yaawä:

—Cuduusa jäcä ajoijojoocä; quee.

14Yaawä Pidaato cönä’döaacä chäwwäiñe:

—¿Ane’cotoojo? ¿Äshono yää conemjönö iiñö’jödö?

Tönwanno jooje’cä mma cöncä’tömjä’a’to yaawä:

—Cuduusa jäcä ajoijojoocä; quee.

15Yaawä Pidaato soto a’cwaima’se töweijäcä Wadaawa cunu’cajoi jedeesoje yeichö jonno. Jesuuquidiito mmaane aiju’jojäätödö’jo cuntui suddau wwäiñe, cuduusa jäcä ajoijodö wetä yaawä chäwwäiñe.

16Yääje mma yaawä ñanno suddau Jesuuquidiito cönaadoicho acu’shänä ’dodoi aca. Tameedä töjimmotoncomo cöni’jummaicho yaawä. 17Tönwanno Jesuuquidiito cönwontoicho seweichato que. Wesooca aca’ajä ijeemiichöje cönnöicho. 18Cönaajäntoicho yaawä a’dejjajäätödö; cönä’döa’to chäwwä:

—Amäädä ñäädä judhío Cajiichaanaichomo; quee cönä’döa’to.

19Tönwanno cömjana’mojo’a’to dee que; cöneeta’däjä’a’to dea. Ije’taca tä’mudhe cönä’döjä’a’to, etaana’tadööje. 20Yaawä enno’jätö’jeje tönwanno cönwoncaicho seweichato que; yoomö neene que cönwontoicho yaawä. Cömja’caicho yaawä cuduusa jäcä ajoijodö wetä.

Cuduusa jäcä Jesuuquidiito ajoijo’jödö

21Yää ai soto cöneeja’dä’acä, audaajä acaano’jödö yeejödö. Sideene ñano cönä’jaacä, Simónje chäätö, Aadejantudu, Duuju umöötoncomo. Ñäädä wwä Jesuuquidiito cuduusai cönaadojoicho.

22Ñanno suddau Jesuuquidiito cönaadoicho yaawä Coodocoota ña. Ye’caichö’jödö ñano; quee töwä’dö’se yeichö yää Coodocoota, quee naadö. 23Yaawä chääjedöödö eccudu yoocödööje cunu’a’to, äji jadä oimaajä. Töwö aneenö’da cöneiyacä. 24Yaawä cuduusa jäcä cönaajoijoicho. Yää ’jeje ñanno suddau Jesuuquidiito womö’jödö töwaadäiñe cöneemecantoicho, töwä’cana’cadööcomo’jo.

25Anunnaque ä’döjai’cha dea shii cönä’jaacä cuduusa jäcä ajoijodaawä. 26Cuduusa jäcä imennaajä ajoijaajä cönä’jaacä, Edä jo’tädööje määdhä näämai; quee ene’ju’tojooje. “Judhío Cajiichaanaichomo;” quee imennaajä cönä’jaacä. 27Aacä tämeena’como cuduusa jäcä cönaajoijoicho dea yaawä. Ääjato ñanno cönä’ja’to Jesuuquidiito nnäcä. 28Mädääje Wanaadi a’deddu imennaajä nönge cönä’döi yaawä, yää yääje yä’dödö naichö: “Conemjönö dönnamo jimmäje cöne’toicho;” quee.

29Yäätoncomo weja’dätäädö cönincha’me’ca’to, etaana’tadööje; cönä’döa’to:

—Dhamma jeene, amäädä Wanaadi weichojo emajjojaicho wätä’tädö’jödö, aaduwaawä anooto amääjaicho tö’ta’jödö mmaja. 30Amäädä dea ääwanaacacä; ädhä’täcä cuduusa jäcoono; quee cönä’döa’to Jesuuquidiito wwä.

31Mädääje mmaja Wanaadi wwä töwa’deuwaamo edhaajotoncomo cönenno’jä’a’to, dea, judhío owaanomannamo mmaja. Tönwannö cönä’döa’to:

—Anejjacoomo töneewanaacaiñe cönä’jaacä; töwö dea ääwanaacajai’cha na eduuwa. 32Ñaa neneedöje cuduusa jäconno nä’to’ñojo mä’dä Äwaanacaanei, iisadaaediitacoomo Cajiichaanaichomo, ñaa ecamjöiye yaawä; quee cönä’döa’to.

Yääje mmaja cöneetana’ta’to dea ñanno iiñäcä cuduusa jäcä ajäija’como.

Jesuuquidiito wääma’jödö

33Yaawä anunnaque yeichö tameedä nono weichö wa’cä cöntööjamöi, i’ya’wä tödööene. 34I’ya’wä yeichö Jesuuquidiito töcä’de cöncä’tömöi:

—Edoi, Edoi ¿dama sawaacataani? quee cönä’döaacä. Jaaja Wanaadi, ¿ane’que’nei co’nomjai? quee töwä’dö’se yeichö.

35Yää eta’jäcä anejjacoomo yäätoncomo wwä, tönwanno cönä’döa’to:

—Etaatäcä’ma, Edía na’dejjaadö; quee.

36Yaawä soto cöneeca’tömöi. Chääjedöödö eccudu casantaajä aca camiisha cönennöichai yaawä. Dee jo’wä cöneenejoi yaawä Jesuuquidiito wwadäädä, shuumajoodö wetä chäwwä, edääje töwä’döancädä:

—Äcuude mma, enö’tä Edía weejödö queenetäiye; quee töwä’döancädä.

37Yaawä jäduuje töcä’tömöödö’jo Jesuuquidiito cönaatacoichai. 38Yääje mma yaawä Wanaadi weichojo acä’jaajä a’dutu cöneeshiichai annai, yujuudacanno yo’waca tödööene. 39Yääje Jesuuquidiito wäämadö eneea’jäcä suddau edhaajotoncomo wwä, ñäädä ije’taca cönä’ja’dö wwä, töwö cönä’döaacä:

—Wanaadi nnedö dämma määdhä nä’jaanä; quee cönä’döaacä.

40Yäätä cönä’ja’to dea anejjacoomo wodiiñamo, amoinchenno ene’madööje. Chääjadäiñe cönä’jaacä Madía Maacadeena; yää ’jeje Madía mmaja, Jacoowo mude’cäjaato dhenö, ñäädä José dhenö dea. Saadomé mmaja cönä’ja’dea chääjadäiñe. 41Ñanno cönä’ja’to Caadideea ña Jesuuquidiito jadoncomo’jödö, i’wa’tännamo’jödö. Jooje anejjacoomo wodiiñamo mmaja cönä’ja’to dea, Jesuuquidiito jadä Jesuudadén ña ye’a’como’jödö.

Jesuuquidiito ewaaca’jödö

42Yää anooto cönä’jaacä wäädeetatoojo anooto owaajo wecoonecaajo’tojo. Yääje yeijäcä cho’momöödawä 43José Aadimaatea ñano Pidaato cönnoncai; chäwwadäädä cöntämä Jesuuquidiito equeejödö e’ca’e. Ñäädä José cönä’jaacä täneejucaato, äcamma’jonnamo jimmä, Wanaadi cajiichaanaje yä’dötoojo yoomo’nei mmaja. 44Pidaato aneecamjö’da cönä’jaacä Jesuuquidiito töwääma yeichö. Suddau edhaajotoncomo cöna’dejjajoi yaawä Jesuuquidiito töwääma yeichö ecamma’jodö wetä. 45Suddau edhaajotoncomo wwä töwääma Jesuuquidiito weichö ecamma’jäcä Pidaato Jesuuquidiito equeejödö cöneecammai yaawä José wwä. 46Yääje mma yaawä töwö José saawana tajääde’dato cöneejemai. Cuduusa jäconno Jesuuquidiito equeejödö enö’ta’jäcä yää saawana que cönaiñantäi yaawä. Yää ’jeje cöneewaacai yaawä äwa aca, täju töcaajä aca. Äwa nata’tajo täju cöni’wodiiñacai yaawä, dha’dutuuje. 47Madía Maacadeena mmaja, Madía, José dhenö mmaja, cöneenea’to ewaacadö.

Currently Selected:

MAADOCO 15: MCH

Highlight

Copy