MAADOCO 16
16
Töwäämaajo jonno Jesuuquidiito waadonca’jödö
1Wäädeetatoojo anooto ’jeje Madía Maacadeena, yeichacoono Madía mmaja, ñäädä Jacoowo dhenö, Saadomé mmaja, cöneejemaicho juu shimi’jotoojo, Jesuuquidiito equeejödö töjöötojo. 2Yaawä tööjanaacadä, semaana waajäntädö anooto wawaanadaawä, tönwanno cönta’to äwa döiña, shii weja’cataame. 3Tönwannoje dea cönä’döa’to:
—¿Änääcö cöwwäiñe täju i’wodiiñacaatai äwa nata’tadö de’wonno? quee cönä’döa’to.
4Yaawä äwa döiña töwä’döa’comjäcä yää täju adai’joto täseeca cöneedantoicho. 5Äwa aca töwoomonga’comjäcä yäätä ääjömaanö cöneedantoicho shuucu, ämu’demjönö dö’se. Nuwaato awä cönä’jaacä, tajääde’de. Jooje cönääcatoncaicho yaawä. 6Ñäädä ääjömaanö cönä’döaacä chäwwäiñe:
—Määcatoncatäi. Änwanno mujiiyato Jesuuquidiito, Naasade ñano, ñäädä cuduusa jäcä yaatajoijojo’jödö. Töwö töwaadonca na; a’que na sadä. Eneetäcä’ma chääquejöödö iiñö’jocoomo naadö. 7Ojoncomo; ecammajä’tantäcä’de ñoowanoomadö wwäiñe, Peedhodo wwä mmaja. Chäwwäiñe ecammatääcä’de Caadideea ña odhoowajoiñe iichädö. Iiña meneeato’de, äwwäiñe cönääcamma’döje dea; quee cönä’döaaca ñäädä ääjömaanö ñanno wodiiñamo wwäiñe.
8Yääje mma yaawä tönwanno cöneeja’caicho äwa tacanno. Tamjä’ne cöntonto, tösaadöcoomoje tötäätä’nöngancädäiñe. Tönwanno aneecammajäätö’da cöneiya’to anejjacoomo wwäiñe, tösaade töweijäcäiñe.
Madía Maacadeena wwä Jesuuquidiito wäänejo’jödö
9Töwäämaajo jonno Jesuuquidiito waadonca’jäcä, semaana waajäntädö anooto wawaanadaawä, töwö cönäänejoi awa’deene Madía Maacadeena wwä. Ñäädä cönä’jaacä aacä amoojato odo’sha dhacanno Jesuuquidiito nija’canö’jo’jödö. 10Madía Maacadeena cöntämä yaawä, cöneecammajäätöi Jesuuquidiito jadoncomo’jödö wwäiñe. Ñanno wentumje cönä’ja’to, waamonääje. 11Jesuuquidiito nudä yeichö eta’jäcä töwwäiñe, Madía wwä ene’jödö eta’jäcä mmaja, tönwanno aneecamjö’da cöneiya’to.
Aacä tönoowanoomadö wwäiñe Jesuuquidiito wäänejo’jödö
12Yää ’jeje Jesuuquidiito anejjeja mmaja cönäänejoi chea aacä tonoowanoomadö wwäiñe, jata tö’cäi ääma tai iichädaawäiñe. 13Ñanno cöntonto yaawä; töjimmä wwäiñe cöneecammajäätöicho. Ijimma aneecamjö’da dea cönä’ja’to.
Jesuuquidiito wwä tönoowanoomadö anonto’jocoomo
14Yää ’jeje mmaja jeene Jesuuquidiito cönäänejoi chea ñanno amoojadooto de’wä tooni’chomo wwäiñe, yääwashinchädaawäiñe. Töwö cömjiiyemeecöicho aneecamjö’da yei’jocoomo jo’tädööje, chäänönge’da chö’tajäätödööcomo weichö jo’tädööje mmaja, töwäämaajo jonno töwaadoncaajä tänennamo’jödö aneecamjö’da yei’jocoomo weijäcä. 15Töwö cönä’döaacä chäwwäiñe:
—Ojoncomo’de tameedä nono weichö wa’cä. Aashichaato wätunnä ecammajä’täcä’de tameedä soto wwäiñe. 16Ñäädä ecaanö’nei, wautisaaje yä’dödö, nääwanaaca’de. Aneecanö’jönö mmaane nännanö’a’de. 17Edääje na’de täneemö ecaanö’nnamo ene’ju’to’como: Tönwanno odo’sha nija’canö’jaato’de öwö yeetö joi. Anejja a’deucwe na’deuwaato’de. 18Äcääyu annä’a’jäcä, jönaatamoi enga’jäcä jeiñe mma, ääma’da naato’de. Tönwanno tamäädöcoomo nödööaato’de cädäija’como de’cäcäiñe; ñanno naadoncaato’de yaawä; quee cönä’döaacä Jesuuquidiito tönoowanoomadö wwäiñe.
Caju ña Jesuuquidiito wäncu’jödö
19Chäwwäiñe yääje töwa’deuwödö’jo Cädhaajotoncomo Jesuuquidiito cönaatadoojoi yaawä caju ña. Wanaadi nnäcä cönaatajiimai yaawä, ämu’demjönö dö’se. 20Ñanno ñoowanoomadö cöntonto yaawä, tameedä yeichö wa’cä aashichaato wätunnä cöneecammajäätöicho. Cädhaajotoncomo Jesuuquidiito dea töni’wa’täiñe cönä’jaacä. Ta’deddu töneene’ju’jo töweiye cönä’jaacä täneemö aashichaato que. Amén.
Currently Selected:
MAADOCO 16: MCH
Highlight
Share
Copy
Want to have your highlights saved across all your devices? Sign up or sign in
© 2014 Reservados todos los derechos
