MAADOCO 5

Odo’sha ’jano Cadhaada ñano adonca’jödö

1Yaawä chu’jä mänsemjona cönä’döicho, Cadhaada ña. 2Yaawä cudiiyada acanno Jesuuquidiito wä’ta’jäcä dhanwa odo’sha ’jano cöneejä chäwwadäädä äwa döiñanno. 3Ñäädä töweiye cönä’jaacä äwa do’taca. Cadheena que jadä’jödöödä e’wadö’täjoojai’cha cönä’jaacä. 4Weiñäje dhamäädö jäcä soto töni’wadö’tä töweiye cönä’ja’to cadheena que, i’judu jäcä mmaja. Töwö yää sejaadadi tönaacä’e töweiye cönä’jaacä; töni’mo cönä’ja’dea tu’judu i’wadö’taajä, tödöötojo ’je’da tödööjoone. 5Ano, coijai mmaja töwäämannä’e cönä’jaacä äwa do’tai, jöö joi mmaja, töcä’tömjä’ancädä, täju que töwoocojä’ancädä mmaja. 6Yaawä amoinchenno Jesuuquidiito eneea’jäcä töwwä, ñäädä odo’sha ’jano cöneeca’tömöi chäwwadäädä; tä’mudhe cönä’döi ije’taca. 7Töwö töcä’de cöna’deuwacä Jesuuquidiito wwä; cönä’döaacä:

—¿Ane’cotoojo caquiimaanä, amäädä Jesuuquidiito, Wanaadi o’jodhaato nnedö? Wanaadi netaadöje yääje wä’döa äwwä, cämmaminchai; quee cönä’döaacä.

8Töwö yääje cönä’döaacä yääje Jesuuquidiito töwwä yä’dö’jödö weijäcä:

—Määdhä acanno adheeja’cacä, amäädä odo’sha; quee yä’dö’jödö weijäcä.

9Yaawä Jesuuquidiito ñäädä dhanwa cöneecamma’joi:

—¿Änääcö täätö amäädä? quee cönä’döaacä.

Ñäädä cönä’döaacä:

—Öwö yeetö Wanna, wanna ñaa weijäcä; quee cönä’döaacä.

10Yaawä ñäädä dhanwa cönä’döaacä Jesuuquidiito wwä:

—Canno odo’shancomo manenno’jaicho sadonno; quee.

11Yäätä jöö o’nä cönä’ja’to jooje cuushi, wääwashinchänääje. 12Ñanno odo’shancomo cönä’döa’to Jesuuquidiito wwä:

—Cuushi acaiñe ñaa amonno’jocä; chaacaiñe ñaa eiye; quee cönä’döa’to.

13Yaawä Jesuuquidiito cönaamonno’joicho. Ñanno odo’shancomo cöneeja’caicho yaawä ñäädä dhanwa acanno; tönwanno cuushi acaiñe cönoomomöicho. Ñanno cuushi cönä’ja’to aacä miide. Tönwanno cöneeca’tömöicho yaawä yaataca’jödö wwadäädä. Chu’jä aca cönä’meicho yaawä, na’cwaca töwä’jajoodöcoomoje mma.

14Cuushi edai’chännamo’jödö cönäänejeicho yaawä. Jataawoncomo wwä cöneecammajäätöicho yaawä, jata tö’woncomo wwä mmaja. Soto cöntonto yaawä ene. 15Yaawä Jesuuquidiito döiña töwä’döa’comjäcä yäätä odo’sha ’jano’jödö cöneedantoicho shuucu, töwonque mmaja. I’jeta’da cönä’jaacä yaawä. Tönwanno tösaade cönä’ja’to yaawä. 16Ñanno enennamo’jödö soto wwäiñe cöneecammajäätöicho yaawä odo’sha ’jano’jödö jäcä yeeja’dätä’jödö, cuushi jäcäiñe mmaja. 17Yaawä ñanno soto Jesuuquidiito cönenno’ja’to töjaatawonnoiñe.

18Cudiiyada aca Jesuuquidiito wä’tädaawä ñäädä odo’sha ’jano’jödö cönä’döaacä chäwwä:

—Ajaadä wötäiye; quee.

19Jesuuquidiito töjaadä anaadä’da cöneiyacä. Töwö cönä’döaacä chäwwä:

—Äjääne ämmai chaca, ajimmä döiñaiñe. Chäwwäiñe ecammajä’cä’de aashichaato Cajiichaana äjääcä nödöichö, wentumje adheene’jödö mmaja chäwwä; quee cönä’döaacä Jesuuquidiito.

20Ñäädä cöntämä yaawä. Decaapodi ñano jata weichö waadäi cöneecammajäätöi yaawä töjääcä Jesuuquidiito nödö’jödö. Tameedä soto cöneeta’jöjäätöicho etaadö’jo.

Jaido nnedö adonca’jödö, Wodi wwä Jesuuquidiito womö ajoojo’jödö mmaja

21Yääje mma yaawä cudiiyada awä chu’jä mänsemjona Jesuuquidiito wennaca’jäcä, jooje soto yöiña cöneejoto. Töwö Jesuuquidiito cönä’jaacä tuna jawä. 22Yaawä cöneejä judhío we’jummato’como edai’chänei, Jaidoje chäätö. Jesuuquidiito töwwä eneea’jäcä tä’mudhe Jaido cönä’döi yaawä ije’taca. 23Töwö wentumje cöna’deuwacä Jesuuquidiito wwä; cönä’döaacä:

—Önnedö wodi’chä wäämanääje nai. Ma’che, adhaamädö ye’wä mödöiye, aadoncaiye; ääma’da eiye yaawä; quee Jaido cönä’döaacä Jesuuquidiito wwä.

24Yaawä Jesuuquidiito cöntämä chääjadä. Jooje soto cönta’to dea chääjadäiñe. Tönwanno Jesuuquidiito cönanwacö’ja’to. 25Soto do’tacaiñe cönä’jaacä wodi, munu ’jano; amoojadooto de’wä aacä wedu yääje chäädäicha’jödö. 26Ñäädä wodi jooje töwäätä’maminchajo töweiye cönä’jaacä äjiichö’tännamo wwäiñe. Täjiichö’tännamoojato’jödö ejeematoojoje tameedä tönnöjäätödö acoicha’jödö weichaame äächädä ä’dö’da cönä’jaacä; töweewoma’cä mma töweewoma cönä’jaacä. 27Jesuuquidiito ecaadö eta’jödö weijäcä ñäädä wodi cöneejä soto do’taiñe Jesuuquidiito ncadheedä; yoomö cönaajojoi yaawä. 28Edääje cöntö’tajä’acä ñäädä wodi: “Yoomö ajoojodö que mma ja’ aadoncajai wanä;” quee cöntö’tajä’acä. 29Yaawä dea mma munu cöneedennai. Töwö dhowaanäcä cönä’jaacä yaawä töwääjichö’tä töweichö. 30Jesuuquidiito dhowaanäcä cönä’jaacä töjäädudu weja’cadö. Töwö cönä’jedennacai soto wwadäädäiñe; cönä’döaacä:

—¿Änääcö woomö najoojoi? quee.

31Yaawä ñoowanoomadö cönä’döa’to chäwwä:

—¿Canno jooja’como soto wwäiñe adhanwacö’jotaame adhaajojoonei’jödö mecamma’jaanä? quee cönä’döa’to.

32Töwö Jesuuquidiito tawoodhecääcä cöneeneaacä, tajoojonei’jödö edantädö wetä. 33Ñäädä wodi cöntätä’nöngacä tösaadöje; dhowaanäcä cönä’jaacä töwääjichö’tä’jödö. Töwö cöneejä yaawä Jesuuquidiito wwadäädä; tä’mudhe cönä’döi ije’taca. Tameedä cöneecammai chäwwä. 34Yaawä Jesuuquidiito cönä’döaacä chäwwä:

—Amäädä wodi’chä, äwwä ecamjödö weijäcä maadoncai. Täncanoode’da äjääne eduuwa; töwääjichö’tä ma; quee cönä’döaacä.

35Yääje Jesuuquidiito wa’deutaame ñäädä judhío we’jummato’como edai’chänei sotoi cöneejoto immai chacanno. Tönwanno cönä’döa’to Jaido wwä:

—Ännedö näämai. ¿Ane’cotoojo Owaanomaanei manaaquiimadö deeade’ eduuwa? quee cönä’döa’to.

36Yääje ya’deuwödööcomo eta’jäcä Jesuuquidiito cönä’döaacä ñäädä judhío we’jummato’como edai’chänei wwä:

—Määcatoncai; täcaanö’e mmaane ecaanö’cä; quee cönä’döaacä.

37Töwö Jesuuquidiito töjaadä soto anaadä’da cöneiya’to. Ñanno mma cönaadoicho, Peedhodo mma, Jacoowo mmaja, Juan mmaja, ñäädä Jacoowo acoono. 38Judhío we’jummato’como edai’chänei mmai chaca töwä’döa’jäcä Jesuuquidiito cöneedantäi soto wewoodoichadööcomo. Tönwanno cönaamoa’to; cöneecadaujä’a’to dea. 39Maa taca töwoomonga’jäcä Jesuuquidiito cönä’döaacä chäwwäiñe:

—¿Ane’cotoojo mädä wa’cä adheewodoichaato? ¿Ane’cotoojo maamoaato? Ääma’da dajaane na mä’dä wodi’chä; iiñöcöödö mma mädä; quee cönä’döaacä.

40Tonno’e mma ñanno soto cönennojöicho yaawä. Jesuuquidiito cömja’canö’joicho yaawä tameedäädä. Töjaadä cönaadoicho yaawä ajei’choto’jaato umö, yeenö mmaja, ñanno töjaadoncomo we’a’como mmaja. Cönoomomöicho yaawä ajei’choto’jaato döiña. 41Ñäädä amäädö Jesuuquidiito cönaajäi; cönä’döaacä:

—Tadiita cumi; quee. Aanöncä wodi’chä, quee wä’döa äwwä; quee töwä’dö’se yeichö.

42Yaawä dea mma ñäädä ajei’choto’jaato cönammöi; cönoojoimaacä yaawä. Töwö cönä’jaacä amoojadooto de’wä aacä wedu. Töwääcatonca ñanno soto cönääcatoncaicho yaawä. 43Jesuuquidiito soto wwäiñe aneecammajoojätö’da cöneiyacä yääje tönnö’jödö jäcä. Chäwwäiñe ajei’choto’jaato cöneewashinchajoi yaawä.

Currently Selected:

MAADOCO 5: MCH

Highlight

Copy