MAADOCO 6
6
Naasade ña Jesuuquidiito wei’jödö
1Yääje mma yaawä Jesuuquidiito cönääma’täi yäätonno; töjaatacäi cönennacai. Ñoowanoomadö chääjadä cöntonto. 2Yaawä wäädeetatoojo anooto awä töwö soto cönoowanooma’to judhío we’jummato’como taca. Dhantai etannamo’jödö cönääcatoncaicho; cönä’döa’to:
—¿Äsha mädä wa’cä mä’dä cönoowanoomai chea? ¿Aaquene mädä wa’cä töseedujä’ne nai? Mädä wa’cä täneemö nödööaadö naane’. 3¿Ñäädäjöönö ca määdhä jatuuwa döjä’nei? ¿Yeenö jönca Madía, dhacontoncomo Jacoowo, José mmaja, Juudha mmaja, Simón mmaja? ¿Tameedä jönca cöjaadäiñe naicho ijaadui’chomo? quee cönä’döa’to soto.
Tönwanno cone’da cönä’ja’to chääjäcä. 4Yaawä Jesuuquidiito cönä’döaacä chäwwäiñe:
—Aneiñajancomo Wanaadi wa’deuwödö ecammanei aashicha tönnöe naicho. Ijaatawoncomo mmaane tönquiiñeme’que, yä’jimmä’tädö mmaja; quee cönä’döaacä.
5Yäätä täneemö tödööjai’cha töwö cönä’jaacä. Äächädä mma cädäija’como cönaadoncaicho, tamäädö ye’wäiñe tödöödö que. 6Töwö cone’da cönä’jaacä aneecamjö’da soto weichomjäcä. Yaawä töwö cönäämannä’acä jata amoinchemjönö waadäi, soto owaanomancädäiñe.
Ecammajä’e tönoowanoomadö anonto’jocoomo Jesuuquidiito wwä
7Yääje mma yaawä Jesuuquidiito cöni’jummaicho tönoowanoomadö, ñanno amoojadooto de’wä aaco’como. Aacäi cönaanontoicho. Töwö cuntui chäwwäiñe ijääduduucomo, odo’shancomo ija’canö’joto’como. 8Töuwaque’da töwö cönaanontoicho; chä’sejiichomo mma cönaadojoi. Chanwaichomo anaadojo’da cöneiya’dea, yuduucomo, ijöödataichomo anaadojo’da mmaja. 9Yää dea mma, shaajatuichomooje cönä’ja’dö dea mma, cönaadojoi chäwwäiñe, yoomöcoomo tooni mma, aacä’da. 10Töwö cönä’döaacä chäwwäiñe:
—Maa taca owoomonga’comjäcä yäätä eichäcä’de aneiñaja äätädööcomo wa’cä. 11Anejja jataawoncomo aashicha ayöödötäiñe’da yeiya’comjäcä, aneecammajäätödööcomo eta’se’da yeiya’comjäcä mmaja, yäätonno ojoncomo’de, ä’juduucomo she’secaadöje mma, eta’se’da yeichöcoomo ene’ju’tojooje. Chäänönge yääje wä’döa äwwäiñe, tönwanno imaaminchadööcomo jooje’cä na’de yaawä wätämmencajootojo anooto awä, Sodhooma ñancomo maminchadööcomo e’jodhe’cä, Comooda ñancomo maminchadööcomo e’jodhe’cä mmaja; quee cönä’döaacä Jesuuquidiito tönoowanoomadö wwäiñe.
12Ñanno cöntonto yaawä. Edääje töneecammajä’e cönä’ja’to soto wwäiñe:
—Aweichöcoomo sha’duminchatääcä; quee.
13Tönwanno jooje odo’shancomo tömja’canö’jo töweiye cönä’ja’to; cädäija’como töneejichö’täiñe cönä’ja’to dea, shimi che shiimi’jancädäiñe.
Juan Wautiita wääma’jödö
14Yääje mma yaawä cajiichaana Edoodhe cöneetaacä Jesuuquidiito ecaadö, tameedä yeichö wa’cä tacaade yä’dö’jödö weijäcä. Töwö Edoodhe cönä’döaacä:
—Juan Wautiita ñäädä, töwäämaajo jonno yaadoncaajä. Yääje yeijäcä jooje täneemö tönnöe weneene; quee cönä’döaacä.
15Anejjacoomo ’quene töwä’döe cönä’ja’to:
—Edía ñäädä; quee.
Anejjacoomo mmaane töwä’döe cönä’ja’to:
—Wanaadi wa’deuwödö ecammanei ñäädä, jenaado’jocoomo cönä’ja’todööje mmaja; quee.
16Jesuuquidiito ecaadö eta’jäcä Edoodhe wwä, töwö cönä’döaacä:
—Juan ñäädä, wijöncä’joneedö; töwäämaajo jonno cönaadoncai; quee.
17Edoodhe yääje cönä’döaacä töwwä Juan jedeesoje tödööjo’jödö weijäcä, cadheena que imiijo’jödö weijäcä mmaja. Töwö yääje cönnöi Edoodhía woije, ñäädä tacoono Jediipe jiñamo. Töwö Edoodhe ñäädä Edoodhía cönnöi töjiiñamooje. 18Edääje Juan Wautiita töwä’döe cönä’jaacä Edoodhe wwä:
—Cone’da mädä adhaacono jiñamo dö’tä aweichö; quee.
19Yää jo’tädööje ñäädä Edoodhía Juan cuntu’de’taacä jooje; emaajo’se cönä’jaacä. Emaajojai’chaane cönä’jaacä, 20Juan tönnontä Edoodhe weijäcä. Töwö Edoodhe dhowaanäcä cönä’jaacä aashicha Juan weichö, chäänöngatooje yeichö mmaja. Yääje yeijäcä Edoodhía wwä töneewontä cönä’jaacä. Towaanäcä’da Juan necammajäätödö wäätataame Edoodhe eta’se dea töweiye cönä’jaacä. 21Äcuude yaawä Edoodhía woojo’totoojo cu’nädö cönoojodöi. Töwennu’jödö anootoi’chädö cu’nädö awä Edoodhe tösootoi cönaajä’maicho, suddau edhaajotoncomo mmaja, täneejuca’como Caadideea ñancomo mmaja. 22Yaawä Edoodhía nnedö cönoomomöi yääwashinchädööcomo döiña. Töwö cönänwai ñeenedööcomooje. Edoodhe wacö’je cönänwaacä, chääjadoncomo wääwashinchädö wacö’je mmaja. Yääje yeijäcä Edoodhe cönä’döaacä ñäädä wodi wwä:
—Ämjummadö ane’ca’cä öwwä, wäntuiye yaawä; quee.
23Töwö jäduuje cönääcammai chäwwä; cönä’döaacä:
—Ane’catäädö woije u’jai wa, tameedä öwwä naadö annai tödööene; quee cönä’döaacä Edoodhe.
24Ñäädä wodi cöneeja’cai yaawä. Senö cöneecamma’joi yaawä:
—¿Ane’cäämö wane’ca’anä; quee cönä’döaacä.
Yeenö cönä’döaacä:
—Juan Wautiita ju’jä e’ca’cä; quee.
25Yaawä dea mma ñäädä wodi cöntämä Edoodhe döiña; cönä’döaacä chäwwä:
—Eduuwa dea mma Juan Wautiita ju’jä wijumma, jadaaji aca; quee cönä’döaacä.
26Yaawä cajiichaana Edoodhe cone’da cönä’döjoi jooje. Yaawääne’, tönancödö netaadöcoomoje jäduuje ñäädä wodi wwä töwääcamma’jödö weijäcä, ta’deddu iiñaca’se’da cönä’jaacä. 27Yaawä dea mma cajiichaana Edoodhe suddau cönaanontäi Juan Wautiita ju’jä wetä. 28Ñäädä cöntämä yaawä; Juan cömjöncätäi. Iju’jä cönnejä yaawä jadaaji aca. Wodi wwä cuntui yaawä; ñäädä wodi cuntui yaawä senö wwä.
29Yää eta’jäcä Juan nowaanomaadö wwä tönwanno cöntonto yaawä Juan equeejödö wetä. Cönaadoicho yaawä ewaacadö wetä.
Ijaatoodea miide soto ewanshincho’jocoomo
30Ñanno anonta’como cöne’jummaicho yaawä Jesuuquidiito döiña. Chäwwä cöneecammajäätöicho tameedä tönnö’jocoomo, tönoowanooma’jocoomo mmaja. 31Yaawä Jesuuquidiito cönä’döaacä chäwwäiñe:
—Töudäje ma’chomo; soto ’jemjönö aca cäädeetätantäiye a’dhe; quee.
Töwö yääje cönä’döaacä jooje soto we’jätöödöcoomo weijäcä, täwanshinchojootäiñe’da’jödöödä. 32Yääje mma yaawä cudiiyada awä töjääcäjeeneiñe Jesuuquidiito cöntonto anonta’como jadä, soto ’jemjönö aca. 33Sotoocomo cöneenea’to iichädööcomo; dhowaanäcäiñe cönä’jaacä Jesuuquidiitoje yeichö. Yaawä ñanno soto, jata waadoinchomo, macääcä cöntonto tamjä’ne; Jesuuquidiito owaajodäiñe cönä’döicho iiña. 34Cudiiyada acanno Jesuuquidiito wä’ta’jäcä töwö cöneedantoicho ñanno jooja’como soto. Wentumje cöneene’ma’to, oweeja tädhaajäquemjöncomo nönge yeichomjäcä. Yaawä töwö cönoowanooma’to numa. 35Cho’momjai yä’döa’jäcä ñoowanoomadö cöneejoto chäwwadäädä; cönä’döa’to chäwwä:
—Cho’momöödö mädä; jata ’nacäi caato. 36Canno soto täwanshiche’da naato. Yääje yeijäcä enno’jacooto jataaca, amoinche’da naadö aca, täwanshiñööcomo aneejemaataiyeto; quee cönä’döa’to.
37Yaawä Jesuuquidiito cönä’döaacä chäwwäiñe:
—Änwannoone ewanshinchätääcä; quee.
Ñoowanoomadö cönä’döa’to chäwwä:
—¿Aaquene mmaja amoojadä sotooto ’cäwa’cä jödaata äwanshi ñaa aneejemaadö deeade’ canno ewanshiñööcomooje? quee cönä’döa’to.
38Jesuuquidiito cönä’döaacä chäwwäiñe:
—¿Ä’waasa’cä uu nai äwwäiñe? Yä’cä eneetantäcä; quee.
Töwwäiñe eneea’jäcä ñoowanoomadö cönä’döa’to:
—Ijaatoodea uu i’yaca’jödö na, na’cwacaano’cä aacä mma; quee cönä’döa’to.
39Yaawä Jesuuquidiito soto cönaajimaajoicho wannai, woi a’taanö de’wä. 40Soto cönaatajiimajäätöicho yaawä wannai, aneetaja ijaatoodea soto soto, aneetaja aacä soto soto. 41Jesuuquidiito uu cönannäjöi yaawä, yää ijaatoodea i’yaca’jödö, na’cwacancomo’cä mmaja, a’nädäncädä. Caju ña ene’mancädä yää äwanshi jäcä cöna’deuwöi. Uu cöni’yajäätöi yaawä. Tönoowanoomadö wwäiñe cuntui yaawä soto wwäiñe ecaamodö wetä. Ñanno aaconcomo na’cwacancomo’cä mmaja cöneecamoi chea chääwaadäiñe. 42Tameedäädä cönääwashinchoicho yaawä, töwensu’tädööcomo wa’cä. 43Yää ’jeje uu i’yajä’ajä wäädetö’jödö cönancuicho yaawä, na’cwacancomo’cä wäädetö’jödö mmaja, amoojadooto de’wä aacä wöwa. 44Ñanno töwääwashinchaamo’jödö cönä’ja’to ijaatoodea miide dhanwaacomo.
Tuna de’wä Jesuuquidiito wötä’jödö
45Yääje mma yaawä cudiiyada awä Jesuuquidiito tönoowanoomadö cönenno’jaicho towaajo, Wesaada ña, chu’jä mänsemjona. Töwö mmaane cöno’nomjoi yäätä, soto wwäiñe wääcammanääje. 46Yaawä soto enno’jadööcomo’jo töwö cöntämä jöö de’cäi, Wanaadi wwä a’deuwe. 47Yaawä cho’monga’jäcä ñoowanoomadö cönä’ja’to cudiiyada aca chu’jä ännawääne. Jesuuquidiito mmaane macäi cönä’jaacä töjääcäjeene. 48Töwö cöneeneaacä töweetamincha yeichöcoomo sheequimmaatö, aneiñajaadädä jejeichä wwä adäädöcoomo weijäcä. Yaawä yääwadöncataame yöiñaiñe Jesuuquidiito cöntaacä tuna de’cäcä. Töwö ija’dätä’seiñe cönä’jaacä. 49Tuna de’cäcä iichädö edanta’jäcä ñoowanoomadö wwäiñe, tösaadöcoomoje cöncä’tömöicho yaawä; äcaatomjä atäi cöneecanö’a’to. 50Tameedäädä tönwanno cönääcatoncaicho eneedö’jo. Yaawä dea mma Jesuuquidiito cöna’deuwöi chäwwäiñe; cönä’döaacä:
—Ääcatonca’daane eichäcä, öwö mma. Tösaade’daane eichäcä; quee cönä’döaacä.
51Töwö cönä’täi yaawä cudiiyada aca, yää dhawä cönä’ja’todö aca. Jejeichä cöneedennai yaawä. Tönwanno yeicho’como ’je’da cönä’jaacä yaawä töwääcatonca’jocoomo weijäcä. 52Tönwanno yää täneemö tödö’jödö äntö’tammecö’da cönä’ja’to, yää uu ejannäjö’jödö, chäänönge’da dea chö’tajäätödööcomo weijäcä.
Jeneesade ña cädäija’como adonca’jödö
53Mänsemjona tönwanno cönä’döicho yaawä, Jeneesade ña, cudiiyada i’wadö’tädööje mma. 54Cudiiyada acanno yä’ta’jäcäiñe soto cöneedantoicho Jesuuquidiito. 55Yaawä ñanno soto ä’sa waadäi cönäätujiiya’to; cädäija’como cönaadäa’to Jesuuquidiito döiña, chä’wötööcomo jo, yäätä yeichö töneeta’jocoomo döiña. 56Jata she’coto’cä aca iicha’jäca, adai’joto aca jeiñe mma, jata tö’cäcä jeiñe mma, ñanno soto cädäija’como tömja’ca cönä’ja’to jödo’na. Ñanno cädäija’como töwä’döe cönä’ja’to Jesuuquidiito wwä:
—Owoomö a’sadö mma ñaa najoojo’ñojo; quee.
Tameedä ajoojonnamo’jödö töwaadonca cönä’ja’to.
Currently Selected:
MAADOCO 6: MCH
Highlight
Share
Copy
Want to have your highlights saved across all your devices? Sign up or sign in
© 2014 Reservados todos los derechos
