Jon 15

Jesu I Vino Ogoto

1“Era to qa moki na vino, mana Mamae to i valeke miasoka barui ne. 2Paqara ro iriki ure go kaega, i koboro vakuziki ne, mana paqara ro iri ure go, iva dalo ne qira, go tina dalo mana ureure go. 3Ramu qamu dalo banae vari vatatana qa teke bana ne qamu go. Ka paqara iki soma go kaega moki na vino ne i makuru tina ure go. Igo napu so de, ṉalu qamuki ko vanadue kaega de qa koego era, imakuru qamu tamuna ureure go. 4Ko vanadue de qa koego era, go era tuna ko vanadue de qamu koego. Ka paqara iki soma go kaega moki na vino ne, i makuru tina ure go. I gerena napu so, ṉalu ramu qamuki ko vanadue kaega de qa koego era, i makuru qamu tamuna ureure go.

5Era to qa moki na vino, mana ramu to paqapaqarana ro, basoe iko vanadue de qa koego era, era qa koe de ikoego ia, mana ia ne tina ureure go, tanego i makuru qamu vapuro na kapata, ṉalu qamuki ko vanadue kaega de qa koego era. 6Ṉalu basoe iki ko vanadue kaega de qa koego era, tina gere to paqara iri koboro vakuziki ne go mana iri vanaqe, go i za le go, paqara ro igogo de go, tarina pala mana vanaqe qira qe nako ne. 7Ṉalu qamu ko vanadue de qa koego era, mana seko ro era i ko vanadue de qamu koego, qamu mazala so pene na kaki pata qamu soko go, mana Mamae tina teke ne qamu so. 8Ṉalu ramu qamu ure velaka go, qamu vasadake qamu disipoloro era, mana ṉalu nae karaputa mazala ia Mamae tina va sadaka me. 9Qa mamaligara ne qamu, gere na so Mamae i mamaligara nava era, iago ko vanadue loborona mamaligara era. 10Ṉalu qamu lulua tamana ro era, ramu tamuna ko vanadue mamaligara era, gere na era qa lulua go tamana ia Mamae mana qa ko vanadue mamaligara iago.

11Qa sine ne qamu go pataro dena, go ramu tina ko ne qamu kulakula i ko nava go era. Qa soko kulakula ramu mara lavata. 12Iato dena tamana era, muna vari mamaligarae gere na era qa mamaligara ne qamu go. 13Ka basoe i le ne sauqira vakitaka ro ia, i vasadake basoe nae to i ko nego mamaligara ilete lavata sivala, i sivala ne qira kero ne basoero ne. 14Ramu to qamu vakitaka ro era, ṉalu qamu zazu nego pata ro qa sine ne qamu go era. 15Ninidena qaki koru qamue kaega vano seka, tanego basoe seka iki rove kaega pata i zazu ne go batu ia. Era ne qa koru qamue vakitaka ro era, tanego osina pata ro qa gata ze go Mamae, qa sine lupo ne qamu. 16Ramu qamuki vine ava kaega era, do era tane qa vine qamu go, mana qa teke ne qamu zazu go tamuna va ure go, ureure nae tiniki rove kaega lupo. Mana Mamae tina teke ne qamu pata qamu pene zego ia loborona vitoṉoqu era. 17Iato dena tamana era, muna van mamaligarae.”

Basoero Na Kolabana Pua Dena Tariniki Soko Qamu Kaega

18“Ṉalu basoero na kolabana pua dena iriki soko qamu go kaega, muna rove iriki soko banava kaega era. 19Ṉalu tamu basoe na kolabana pua dena, ria tarina mamaligara ne qamu, tanego qamu basoe na pua dena. Do era qa vine bana qamu go, mana qamuki ke ia kaega kolabana pua dena go, iato go basoero na kolabana pua dena iriki soko qamu go kaega. 20Nanao tarua seko qa sine bana ne qamu go, ‘Basoe seka iki sivala ne kaega batu ia. Ṉalu iri vasasakata nava era, ria tarina vasasakata napu ne qamu go, ṉalu iri lulua vari vatatana era, ria tarina vaogoto qamu ramu go. 21Basoero ne tarina zazu ne pataro nae de qamu koego, tanego i sauqu era, tanego iriki rove kaega Mamae ni turi nava go era. 22Ṉalu go tuki lama va pepeu bana qira kaega basoero na kolabana pua, ria tariki mia rove kaega vasakata pata ro ria. Do ninidena kaega ka basoe i mazala go legu va kaega na vasakata pata ia. 23Basoe iki soko ava go kaega era, iki soko napua so kaega Mamae go. 24Kaega ka basoe i mazala go zazu ne na pataro qa zazu nego era. Ṉalu tuki zazu nego kaega era, pataro igogo ne, ria tariki mia rove kaega vasakata pata ro ria. Do ria, iri mia to pataro qa zazu nego era, do iriki ara soko qaru so kaega raru Mamae go. 25Pataro dena tina sadaka bana so, go karo ikoego Tamana ro ria tina lama ogoto go, igo de, ‘I kaega so ka kutamana, go iriki soko ava go kaega.’

26Era tuna turi ne me basoe vari va tatavisi tina reqe me de koe Mamae, basoe vari va tatavisi nae ne iato Spirit tabo, ia tina vasadake ogoto na God. Ṉalu ia tina za lama go, ia tina sine ne qamu sauqu era. 27Mana ramu to tamuna sine ne qira go basoe ne sauqu era go, tanego ramu to qata kameka go ṉalu qa vatupia go era zazu dena.

Currently Selected:

Jon 15: VRSNT

Highlight

Copy