Jon 16

1“Qa sine ne pataro dena, go tiniki pela go kaega vaogoto ramu. 2Tarina kakale vasiporo qamue Pade Lotu ro, mana tina doka ṉalu, basoero tarina vae vale qamu, tarina go, iri zazu ne zazu ia God. 3Basoero ne tarina zazu ne pataro dena, de qamu koego ramu, tanego iriki rove kaega Mamae mana iriki rove ava kaega era go. 4Do pataro nae era qa sine ne qamu to dena, go ṉalu tarina zazu ne ze de qamu koego pataro nae, ramu muna nanao ule zaqe pataro qa sine bana ne qamu go.

Zazu Ia Spirit Tabo

Pataro dena qaki sine bana ne qamu kaega kokoso na me, tanego pasi nae ne, era qa ko tavisi qamu. 5Do ninidena, i garogaro to ṉalu era tuna ule za de ikoego ia ni turi nava mego, do kaega kakia ramu i tana ne, adepa tane qa vele zae go era. 6Mana ninidena qa sine ne qamu go pataro dena, qa rove ramu tamuna maqata. 7Do ma sine ne qamu pata ogoto, i velaka to era tuna zaza go, tanego ṉalu tuniki zaza go kaega era, Spirit tabo, basoe vari tatavisi ne tiniki lama ne qamu kaega. Do ṉalu era tuna zaza go, era ṉara turine mego. 8Mana ṉalu tina za lama go, ia tina vasadaka velaka ne qira basoero na kolabana pua dena, akena tane i vasakata pata mana akena tane i totoloṉe tarakenaqana God, mana akena tane tina koego vivine ia God go. 9Iago nanao qira i kebu mana iri vasakata pata go, tanego iriki vaogoto ava kaega era, 10iri kebue pataro i totoloṉo go, tanego era tuna ule za de ikoego Mamae, mana tamuniki miava kaega go. 11Mana iri kebue dego akena tina zazu ne ze vivine ia God, tanego God i zazu bana ze vivine ia de ikoego Satana ni kenaqa ne go kolabana pua dena.

12I ko topu na pata qa mazala sine ne qamu, do qa rove ninidena i makuru qamu nanao taru na. 13Do ṉalu Spirit tabo tina vasadaka ne qamu ogotona, lama na ia tina kenaqa ne qamue rove na pata ogoto ne. Ia tiniki seko ne kaega nanao ia tanuna, do tina seko ne pataro i gata go, mana tina sine ne qamu pataro tinara lama go. 14Ia tina pala pata qa sine go era mana tina sine ne qamu go, tina zazu ne ia igogo ne, tanego i vasadake karaputa mazala era. 15Osina pata itoṉove go Mamae, i ke era, iato go qa sine go, Spirit tabo tina pala pata qa sine go era mana tina sine ne qamu ramu go.”

Tatnuna Maqata Do Taramuzina Tamuna Kula

16Jesu i sine napu ne qira igo, “Taramuzina kavia musaqara, ramu tamuniki miasoba va kaega era, do taramuzina kavia musaqara napu, ramu tamuna miasoba va era.”

17Kakiaro ria disipoloro ia iri vari vatanatana tanuqira, “Avana tane ivatalupasa ze sekoro i sine go, igo taramuzina kavia musaqara tatana ki miasoba kaega ia, mana taramuzina kavia musaqara tatana miasoba ia, mana igo napu de, na ule za de i koego Mamae igo. 18Avana tane ivatalupasa ze seko, ‘kavia musaqara de,’ ita imakuru qita rove lupase na kapata i sine go Jesu!”

19Jesu i rove bana, iri soko tana ne ia, iago igo de, “Qamu soko rove na talupasana seko, taramuzina kavia musaqara tamuniki miasoba va kaega era, mana taramuzina kavia musaqara tamuna miasoba va go?” 20Masine ne qamu pata ogoto, “Tamuna maqata mana dae, do basoero na kolabana pua dena, tarina kula so, tamuna maqata, do maqata ramu tina taitana mana tamuna ra kula. 21Ṉalu qole i vele vapodo sale ia, ia i maqata, tanego ṉalu ia tina gata vokara i doka to, do ṉalu ivapodo lupo sale ia, i nanao kasupe neto vokara ia, tanego i kula, ne sale ne i podoe to pua ne. 22Igere napu qamu so ramu go, ninidena qamu maqata, do ṉalu tuna lama mia napu qamu, puṉuqamu tina purake kulakula. Kulakula nae ne, ikaega napu ka basoe tina mazala go pala vakuziki ne qamue go.

23Ṉalu nae, tamuniki ara tana ne kaega kaki pata de qa koego era. Masine ne qamu pataogoto, ṉalu qamu pene ze Mamae kaki pata loborona vitoṉoqu era, ia tina teke ne qamu so. 24Go I doka go ninidena, ramu qamuki pene ze so kaega kaki pata loborona vitoṉo qu era, iago pene go tamuna pala go, go kula ramu tina purake kulakula.”

Jesu I Vaqoqoro Bana Karaputa Na Pua Dena

25Jesu i sine napua igo, “Pataro qa sine ne qamu go, qa vazazua so seko vapadapada ro. Do na doka ṉalu na, era tuniki vazazua kaega seko vapadapada, do tuna seko vatatavata neso de i gogo Mamae. 26Tina doka go ṉalu nae, ramu tamuna pene ze Mamae loborona vitoṉoqu, era tuniki pene ze kaega Mamae sauqamu ramu, 27tanego tanuna Mamae i mamaligara ne qamu. I mamaligara ne qamu ramu, tanego qamu mamaligara nava era, mana qamu vaogote era qa reqe me de ikoego God go. 28I ogoto era qa reqe me de koe Mamae, mana qa lamae kolabana pua dena, iago tuna kasi ne kolabana pua dena, mana ule za de i koego Mamae.”

29Disipoloro ia iri sine ne ia, iri go, “Ninidena qo seko vatatavata ne qemu to, qoki vazazua to kaega seko vapadapada! 30Remu qi rove to, aro qo rove osina pata, ka basoe i kone tana do aro qo mazala so sine lukasa kenaqa nena ia, go tinara tana go basoe nae. Ianae to go, remu qi vaogote aro qo reqe me de ikoego God.”

31Gonae Jesu i vane qira de, “Ninidena qamu vaogoto to? 32Ṉalu, i lama doka bana to, osiqamu tamuna kasi nava era mana repe lupoe komakomalaro ro ramu, do era ne, tuniki ko miki kaega, tanego Mamae iko tavisi ava. 33Qa sine ne qamu pataro dena, go tamuna ko vanadue de qa koego era ko tamuna vae go kolabana pua dena, ramu tamuna soba topuna makuru. Do muna karaputa! Tanego era qa va qoqoro bana karaputa na kolabana pua dena!”

Currently Selected:

Jon 16: VRSNT

Highlight

Copy