Luka 3

Vari Vatatana Ia Jon Na Bapitema

(Matiu 3.1-12; Maka 1.1-8; Jon 1.19-28)

1Torana to vamanoga kalima na ave vari miasoka ia batu lavata Tiberus, Ponsio Pilato i Qavuna e Judia, Erode i batue Qalili. Pilipi kaena Erode, i batue kena Ituraea mana Trakonitis, Laesanias i batue Abilene, 2Torana ṉalu nae Anas mana Kaipas iru batu Patere go. Seko ia God, i lama doka ne Jon, sale ia Zakaria loborona ulana ne. 3Iago Jon izae osina kena na uquru Jodan, i tamana mana i sine ne qira basoero ne, “Tarua vasakata pataro ramu mana Bapitema, go God tina nanao ule ne qira go vasakata pataro ramu.” 4Gerena so ikaro banae go buka ia propeta Isaia,

“Kaki basoe iza koru me tepa ulana ne,

‘Vanama ne zuka ia Batu ne,

mana vatotoloṉe zuka ia, go tina goe go!

5Osina ro ovo tina puraka lupo,

osina popoka mana kubolo ro tina meloto lupo, zuka kuleqo tina va totoloṉe.

Mana zuka ni papaketo go tina va salutua.

6Osina to basoero tarina mia valeke ni turine mego God tina vakavele qita!’ ”

7Topu na basoero iri lama e dekoe Jon, go tina bapitema qira go, “Qamu gere qira dole ro, i vane qira! Akena tane i sine ne qamu go tamuna mazala go paqa nena vari vakimata ia God ni garogaro go valame na? 8Muna zazu ne pataro go tina vasadake, go ramu qamu manava sakata nego vasakata pataro ramu. Mana kasi sine na Abra-am i tamaqamu. Masine ne qamu, God i mazala so palana i pakaro dena mana zazu ze so basoero ia Abra-am! 9Pariko i kabaka banae to rabutuna moki ne, osina moki niki ure velaka go kaega, tina qeto mana vanaqe zaqe nako ne.”

10Basoero ne iri tana ne Jon, “Avana to timuna zazu ne go?”

11I vataule igo, “Basoe i kone go karua roku mara teke ne ia ni kaega nego kameka, mana ka basoe i kone go pata gege, mara kena.”

12Kakiaro vano palapala takisi iri lama go mara bapitema iri go, gonae iri tana ne ia, “Valeke vari vatatana avana to timuna zazu nego?”

13I vane qira dena, “Kasi pala va sivale na kesa volina takisi ne.”

14Kakiaro vano soldia ro iri tana napu ne ia, “Avigo remu? Avana tane timuna zazu nego?” I vataule ne qira igo, “Kasi va tutubo qira basoero ne, go tarina tekene qamu kesa, mana kasi poqe ne qira basoero ṉalu na varitanae, sauna pala naso kesa ro ria, do ramu muna pala so voli qamu.”

15Ruruqe ria basoero ne, iri nanao kade go Jon ba go tane ni Mesia go iri go. 16Do Jon i sine ne qira igo, “Era qa bapitema qamue so besi, do ia tina zalama go, i lete sivala nava era. Era iki torava kaega tuna lupase go qolo na makebotu ia. Mana ia ne tina bapitema qamue Spirit tabo mana nako go. 17I pala paepae iago tina vakuziki ne osina de sakata na ro vuiti ne, tina pala vuiti mana tina taru ze pade i tarutaru ze go pata gege ia, do deni sakata go ne tina pala mana subi zaqe nako niki rove go kaega le.” 18Topu na to de igogo zukazuka na vari vatatana i zazu ne, mana i sine vakaraputa ne qira, muna kavale too ro ramu.

Jon Na Bapitema I Koe Bara Ne

19Ṉalu nae Jon i karalapase batu lavata Erode, tanego i busia Erodiasi qole ia Pilipi, kaena, mana kakiaro napu vatovato sakata i zazu bana nego. 20Erode gonae, i zazu napu ne kameka pata sakata sivala. Ia i taru ze Jon loborona bara ne.

Jesu I Bapitema Go

(Matiu 3.13-17; Maka 1.9-11)

21Taramuzina osina basoero iri bapitema lupo, Jesu i bapitema napu, gonae ṉalu Jesu i pene, rani ne i papaqa. 22Mana Spirit tabo ne i qoqoro me de ikoego ia, i gere kurukuru, mana kameka ovaṉa ireqe me rani ne igo, “Aro Sale era, qa lete mamaligara nigo, kula era ikoe de qo koego aro.”

Tutusi Ia Jesu

23Jesu i pisaṉaulu to ave na, ia i vatupia to zazu nena zazu ia. Ria basoero ne iri nanao Jesu i sale ia Josepo, mana Josepo i sale ia Eli. 24Eli sale ia Matat, Matat sale ia Livae, Livae sale ia Melaki, Melaki sale ia Janai, Janai sale ia Josepo. 25Josepo sale ia Matataisi, Matataisi sale ia Emos, Emos sale ia Naum, Naum sale ia Esili, Esili sale ia Naqai. 26Naqai sale ia Ma-at, Ma-at sale ia Matataisi, Matataisi sale ia Semen, Semen sale ia Josek, Josek sale ia Joda. 27Joda sale ia Joanana, Joanana sale ia Resa, Resa sale ia Zerubabel, Zerubabel sale ia Silitel, Silitel sale ia Neri. 28Neri sale ia Malaki, Malaki sale ia Edai, Edai sale ia Kosami, Kosami sale ia Elamadam, Elamadam sale ia Ea. 29Ea sale ia Josua, Josua sale Elieza, Elieza sale ia Jorim, Jorim sale ia Matat, Matat sale ia Livae. 30Livae sale ia Simion, Simion sale ia Juda, Juda sale ia Josepo, Josepo sale ia Jonam, Jonam sale ia Eliakim. 31Eliakim sale ia Melea, Melea sale ia Mena, Mena sale ia Matata, Matata sale ia Netan, Netan sale ia Davita. 32Davita sale ia Jese, Jese sale ia Obeti, Obeti sale ia Boazi, Boazi sale ia Salemon, Salemon sale ia Neson. 33Neson sale ia Aminadab, Aminadab sale ia Ademin, Ademin sale ia Anai, Anai sale ia Eziron, Eziron sale ia Perezi, Perezi sale ia Juda. 34Juda sale ia Jekop, Jekop sale ia Aisak, Aisak sale ia Abra-am, Abra-am sale ia Tera, Tera sale ia Nao. 35Nao sale ia Serak, Serak sale ia Reu, Reu sale ia Palek, Palek sale ia Iba, Iba sale ia Sela. 36Sela sale ia Kenan, Kenan sale ia Apaksad, Apaksad sale ia Sem, Sem sale ia Noa, Noa sale ia Lemik. 37Lemik sale ia Metusela, Metusela sale ia Enoke, Enoke sale ia Jaret, Jaret sale ia Ma-alali, Ma-alali sale ia Kenan. 38Kenan sale ia Enos, Enos sale ia Seti, Seti sale ia Adamo, Adamo sale ia God.

Currently Selected:

Luka 3: VRSNT

Highlight

Copy