Luka 4

Satana I Pada Ne Jesu

(Matiu 4.1-11; Maka 1.12-13)

1I purake Spirit tabo, Jesu i kasine Jodan mana Spirit i kenaqa ne ia, iva zao ze ia loborona de iki koe kaega ka basoe na. 2Gonae Satana i pada ne ia torana vasiṉaulu musaqara. Ṉalu nae Jesu iki ṉaṉa so kaega. Va lupolupo na to nae Jesu i lete saqo.

3Gonae Satana i sine ne Jesu, “Ṉalu aro qo sale ia God, sine ne aro ipaka dena mara kavala go mara bureri.”

4Do Jesu iva taule ne Satana, “Buka tabo igo, ‘Basoe iki too ne so kaega miki bureri!’ ”

5Gonae Satana i lulu vazao ze Jesu de i lete zakazaka ne, mana iva mia ze ia osina dia kolabana pua ne. 6Mana Satana i sine ne Jesu igo, “Era tuna teke nigo aro karaputa mana osina vavagado ro dena tanego osina pataro dena i teke bana nava era, mana qa mazala so teke nena kakia basoe qa soko ze go. 7Iago ono va batu ava era, mana osina pataro dena tina ke aro lupo so.”

8Do Jesu i sine ne Satana igo, “Buka tabo ne igo, ‘Ono va Batua so God Batu aro mana ono osaka ne so tanuna!’ ”

9Gonae Satana i pala vazao ze Jesu Jerusalema, mana iva degere ze ia de i lete zakazaka sivala na Pade Lotu ne, mana i sine ne Jesu igo, “Ṉalu aro qo sale ia God, ono soru za dona. 10Tanego Buka tabo ne igo, ‘God tina sine ne qira aqelo ro ia tarina miasoka go.’ 11Mana igo napu dena, ‘Tarina toqo va zakazaka goe karisi qira, niki go vae ne ze makemu ipaka ne.’ ”

12Do Jesu iva taule ne Satana igo, “Buka tabo ne igo dena, ‘Oniki pada ne God Batu aro.’ ”

13Ṉalu Satana i pada lupo ne Jesu osina zuka ro dena i kasi ne ia mana zaza tekere.

Jesu I Vatupi Ze Zazu Ia Qalili

(Matiu 4.12-17; Maka 1.14-15)

14Gonae Jesu i ule za Qalili, mana karaputa ia Spirit tabo i kotavise ia. Mana osina tarama na ia igoe lupoe kena igogo ne. 15Jesu iza mana i vari vatatana loborona pade pepeu ria vano Jiu mana osiqira iri vazaka ia!

Ria Vano Nazaret Iriki Soko Kaega Jesu

(Matiu 13.53-58; Maka 6.1-6)

16Jesu gonae izae Nazaret de i lavate go, mana ṉalu musaqara Sabat izae Pade Lotu gerena de igogo bana mego. Iago i degere mana toere Buka tabo ne. 17Iri teke ne Jesu buka ia propeta Isaia. I papaqa vivolo na pepa ne mana i soba de ni karo bana ego sekoro dena.

18“Spirit ia Batu ne ikoe de qa koego era

tanego ivine bana ava era tuna pala me Tarama Velaka de iri koego vano situ.

I turi nava era tuna sine ne qira vano iri koego bara ne tarina siporo!

Talupasa, mana ria iri kodo go tarina mimia napu mana va velaka qira ria iri va sasakata ne qira go.

19Mana sine vasadake, ṉalu i lama to,

Batu ne tina va kavele qira basoero ia.”

20Jesu igo nae, i vivolo vaule pepa ne i teke vaule ne valeke izazu e go Pade Lotu ne, mana i koloku. Osiqira ria iri koego Pade lotu ne iri reṉa vale ne so ia. 21Gonae Jesu i sine ne qira igo, “Ninidena seko dena i lama ogoto, gerena qa toere ne qamu iato qamu gata go.”

22Osiqira iri lete kula, mana iri go napu dena, “Valeke dena sale ia Josepo?”

23Do Jesu i sine ne qira, “Pata ogoto qa rove tamuna teke nava era seko vapadapada dena valeke vari vole mo va velaki go tekere tanumu. Mana tamuna vane napu ava era dena, mo zazu ne ze komala aro dena pataro qimu gata bana zigoe qo zazu bana ne ze Kapanaum.” 24Ma sine ne qamu pata ogoto igo Jesu, “Kaega kaki propeta iri soko zego komala ia tanuna.” 25Gatava era igo Jesu, “Pata ogoto topu ria qole ro nanaro iri koe Izirel torana ko ivae go propeta Ilaiza, ṉalu iki nare kaega torana kapisa ave mana kaonomo inaqa mana saqo lavata ipala lupo osina dia vudu. 26Gonae tane do, Ilaiza iki zae kaega de koe basoero Izirel, do ia izae so de ikoego qole nanaro na Zerepat kaki komala tepa kena na Saidon. 27Mana torana ko ivae go propeta Elisa, topu ria vano i pala qira voremake iri koe Izirel, do kaega kaki kameka ria dena iva velake go, tanuna so Neman valeke na Siria.” 28Ṉalu Jesu i sine seko dena, osiqira ria iri koego Pade Lotu ne iri lete muma.

29Gonae iri tapa degere iri raqasa vasipore Jesu, mana vazao ze ia kubolo ikoego komala ria ne, go mara ria vasoru zaqe Jesu baba ne iri go. 30Do Jesu igoe so vari lobori qira basoero ne mana i zaza.

Jesu I Vari Vatatanae Tepa Kapanaum Mana Iva Velake Valeke Isiqane Manuru Sakata

(Matiu 7.28-29; Maka 1.21-28)

31Gonae Jesu izae Kapanaum kaki kameka komala na Qalili, iva tatana qira basoero ṉalu Sabat. 32Osiqira basoero iri lete poloso ne de igogo vari vatatana ia, tanego i lulua karaputa. 33Loborona Pade Lotu ria vano Jiu ikoe kaki valeke isiqane manuru sakata, ikoru va lavata, 34“Ke! Ava patana tanego qo soko qemue go remu, Jesu na Nazaret? Avigo qo lama ne vasakata qemu remu? Era qa rove go aro qo kameka valeke Tabo ia God.”

35Jesu i seko lavate manuru ne igo, “Kasi seko, mo kasi ne valeke nae.” Gonae manuru ne i vana va soru ze valeke ne tarakenaqa qira basoero ne, mana i paqa siporo za, do iki vapaleka kaega valeke ne.

36Basoero ne iri lete nureke sakata mana iri vari sine ne tanuqira, “Avigo tatalina tane seko ro dena? Seko i sine go valeke dena i koe mazala mana karaputa, go manuru sakata ro ne iri siporo go.” 37Gonae tarama na Jesu i liqutu e kena igogo ne.

Jesu I Vatavoese Sinana Qole Ia Pita

(Matiu 8.14-17; Maka 1.29-34)

38Jesu gonae i kasi ne Pade Lotu ria vano Jiu mana izae pade ia Saimon, torana nae ravana Saimon, i pala mokoso poloqotoro gonae iri sine ne Jesu go mara tavisi ne ia. 39Jesu iza mana i degere rikisina vesu ia qole ne mana i kakale mokoso ne, mokoso ne i kasi ne ia, qole ne i katikili degere mana i vanama ne qira ria pata gege.

Jesu I Vatavoese Qira Basoero Topu

40Taramuzina zununa saṉa osiqira ria iko go vakitaka ro ria i pala qira soso mokoso ro ne, iri pala qira me de ikoego Jesu, ia i siba nogonogoto qira, mana iri velaka lupo so go. 41Manuru sakata napu to go iri kasi ne qira basoero topu ne. Gonae iri koru va lavata iri go dena, “Aro qo Sale ia God!” Jesu i muma ne qira manuru ro, i vakaega qira tarina seko go, tanego iri rove ia i Kristo.

Jesu I Kasine Kapanaum Mana Izae Tepa Judia

(Maka 1.35-39)

42Iara tavuara me ia, Jesu i kasine pade ne mana izae kaki dia i kaega go ka basoe na. Do basoero ne iri taqia Jesu, mana ṉalu iri za soba ia iri vakaega ze ia go mara kasi kasine qira iri go. 43Do Jesu i sine ne qira igo, “Era tuna vari vatatana bana ne so Tarama Velaka ia God de iri koego kero ne komala, tanego sauna to ia igogo ne God ituri nava era tuna zazu nego.” 44Iago Jesu i zaza mana i tamanae loborona pade teṉoteṉo ro ria vano Jiu, tepa Judia.

Currently Selected:

Luka 4: VRSNT

Highlight

Copy