Marku 11
11
Suuri uwike Jeruzalẽ kiti
1Asui kuayentuana aintausika arama Jeruzalẽ sui Betifaje Betania yuiri asui iwitera uyupirungawa upe sera Ulivera Jesus umundu mukuĩ umbuewaita.
2Unyee ainta supe:
—Pesuana suaxara kiti tendawa kiti ape kuri pewike irumu kuri pewasemu jumentu miri aintaupukuariwaa upuamu, tire awa uwapika sese, peyurawa peruri ixe arama ae.
3Aintaupurandu rame penye:
—Marantaa peyurawa ae? Pembeu kuri ainta supe arama, yaneruixawa uputari ae, asui kuri umundu peirumu kua kiti ae.
4Asui aintausu aintauwasemu jumentu miri aintaupukuariwaa upuamu ukara kiti pee rupi, asui aintauyurawa ae.
5Asui yepeyepe apewaraita aintaunyee ainta supe:
—Marantaa peyurawa kua jumentu miri?
6Asui aintaumbeu ainta supe maye Jesus unyeewaa ainta supe, asui aintauxari aintausu.
7Asui aintaurasu Jesus ipiri kua jumentu miri, asui aintauxari aintaupupekawaa jumentu miri iarupi asui Jesus uwapika sese.
8Asui siya aintauxari aintaupupekawaa pee rupi amuita aintaumunuka kaa kampu kiti asui aintauxari aintauyenu pee rupi.
9Asui kuaita usuwaita sunde kuaita yuiri usuwaita sakakuera aintausasemu kirimbawa:
—Uzana, purangawaa kua uriwaa yaneDeus rera rese.
10Purangawaa kuri kua Davi guvernu uriwaa, uzana aintaunyengari ixupe iwate kiti iwaka kiti.
11Asui aintauwike Jeruzalẽ kiti usu umaa templu kiti, asui umaa rire panye usu Betania kiti aintairumu kuaita duzi nyãse karukana ainta.
Figera tiwa uriku iya
12Asui wirande kiti aintausu irumu Betania sui sasi ixupe arama yumãsi.
13Asui apekatu sui umaa yepe figera urikuwaa sawa, asui usu umaa sã uriku iya, asui kuayentuana umaa tiuriku iya anyunte sawa nyãse tire usika sangawa uriku arama iya.
14Asui Jesus unyee ixupe:
—Tikuri awa uu neiya. Asui umbeuwaita usendu umbeuwaa.
Umusemu ainta templu sui
15Asui aintausu Jeruzalẽ kiti. Asui uwike irumu templu kiti uyupiru umusemu ainta kuaita uvenderiwaita kuaita yuiri upiripanawaita templu upe, asui umuyereu aintameza kuaita utrukariwaita dinyeru aintauwapika arama yuiri kuaita uvenderiwaita pumba.
16Asui usaisu aintaururi maantu templu kiti.
17Asui umbue ainta, umbeu:
—Kuxima aintaumpinima, kua seruka yapuranduwaa arama Deus irumu panye kuaita mundu puraita, maa pexari ae mundawasu uikuwerawaa.
18Asui kuaita saserdutita ruixawaita kuaita yuiri umpinimawaita aintausendu umbeuwaa aintauputari aintaumaa maye aintauyuká arama ae, aintausikie isui, nyãse kuaita siyawaita aintaakayemu aintausendu kua umbuewaa.
19Asui pitunana aintausu tendawa sui.
Kirimbawa yaruyarisawa
20Asui kuemaite aintausu irumu pee rupi aintaumaa kua mirá figera umanuana panye sapu yuiri.
21Asui Pedru umanduari sese asui unyee Jesus supe:
—Inde rembuewaa remaa kua figera rembeuwaa ixupe arama puxuwera umanuana.
22Asui Jesus unyee ixupe:
—Perikute pexari pepia Deus rese.
23Supiwa hambeu penye arama:
—Kua umbeuwaa iwitera supe arama repuamu repuri parana kiti, umunya kuri ixupe arama kuaye umbeuwaa yawe tirame mukuĩ umanduariwaa.
24Ape hambeu penye arama:
—Maa kuri pepurandu Deus irumu perikute pekuawa pepia upe asui uxari kuri penye arama ae.
25Asui pepurandu rame Deus irumu sã puxi rame pemanduari amu rese peperduari peirumu ae uperduari arama kuri penye kua yanepaya iwaka kiti pepuxuwerasawa sui.
26Maa tirame peperduari peirumu ainta timaa kuri pepaya iwaka kitiwara uperduari penye pepuxuwerasawa sui.
Upurandu ainta Juão batizmu rese
27Asui aintauyuiri Jeruzalẽ kiti. Asui uwata irumu templu upe aintauri ipiri kuaita saserduti ruixawaita umpinimawaita yuiri serakuenawaita yuiri.
28Asui aintaupurandu ae:
—Awa ukuawasawa irumutaa remunya kuaita remunyawaita? Awataa uxari inde arama rekuawasawa remunya aramawaa ainta?
29Asui Jesus unyee ainta supe:
—Ixere hapurandu penye, pesuaxara ixe ape kuri hambeu penye arama awa ukuawasawa irumu hamunya kuaita hamunyawaita.
30Maa suiwarataa Juão batizmu u iwaka suiwara u apigawaita suiwara? Pesuaxara ixe.
31Asui aintauyupurungita aintapawa:
—Yambeu rame ixupe iwaka suiwara ae, umbeu kuri yande arama: "Marantaa tiperuyari ae?"
32Maitaa yambeu apigawa suiwara ae. Aintausikie miraita sui nyãse panye miraita aintaumanduari utitikawaa kua Juão.
33Asui aintausuaxara Jesus:
—Tiyakuawa. Asui Jesus unyee ainta supe:
—Ape tihambeu penye arama awa ukuawasawa irumu hamunya kuaita hamunyawaita.
Currently Selected:
Marku 11: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
