Matye 21

Yeesu wakotë ku Yelusaleemë

(Mak 11.1-11; Lik 19.28-40; Za 12.12-19)

1Bunë babelëmi ku livulë li Yelusaleemë i batuuci ku bwaalë bu Betëfaazë, ku nkoonzu moongo miti Oliivë#21.1 Mak 11.1., foofë, Yeesu wufilë bilaanzi byooli, 2wusë bëkaambë : « Yendaanu ku bwaalë buke fë ntwaaliinu. Bunë luke tuuci, lum'monë buulu yikangëmë, yimunë mwanaandi. Bëkutulyaanu i bëtwaalyaanu ke miinu. 3Ningë wun'viipë wubëluyufulë, n'kaambyaanu : “Fumu#21.3 Fumu : wunë wubakisi. wun'vwa n'ciinzë mu syaawu.” Naandi wun'lengë kusibikë syeendë. »

4Lyalyooli livangënë bwiinji manë mëtubë m'bici mëdedëkënë :

5« Kaambaanu nduumbë n'cyeetu yi Siyoonë :

“Tala, n'tinwaaku wakë n'kwisë ke njeeyi,

yi bubonzulu, wumakë fë yilu buulu,

i mwaanë buulu#21.5 Zakaali 9.9.” »

6Bilaanzi biyeendë i bisë vangilë bunë Yeesu kubëtuminë. 7Baawu bisë natë buulu i mwaanë buulu, bisë tuulë biyuungë byaawu fë yilwaawu i Yeesu wusë kukalë fë yilwaawu. 8Mpaapë baatu munë nkoongë bëye yalaangë n'vwaatwaawu mu nzilë, bëmesë bëlëcyelaangë bitafi bi miti bëye yalaangë bwendi nzilë#21.8 2 Mt 9.13.. 9Banë bëye lyaataangë fë ntwaalë Yeesu i banë bëye n'laandaangë fë mbusë, bëye tendulaangë : « Ozaana! Mpumu oyo ke Mwaanë Daviidë! Kwe sakumuni awu wun'kwisilë mu lizinë li Fumu Nzaambi! Ozaana! Mpumu kunë salaangë mëyilu#21.9 Twi 118.25-56.! »

10Fanë kwakotili ku Yelusaleemë, livulë lyakë lyooso lisë nikukë i bisë ke tubaangë : « Na wuuwu, nani kukeelye? » 11Nkoongë yilëtubaangë : « Yeesu, m'bici wunë wafuminë ku libweeti li Nazaleetë li Ngalilee. »

Yeesu mu n'zo-Nzaambi

(Mak 11.15-19; Lik 19.45-48; Za 2.13-22)

12Yeesu wukotë mu n'zo-Nzaambi i naandi wukulë babooso bëlësumbisyaangë i bo bëlësuumbaangë biimë munë n'zo-Nzaambi. Naandi wukundubulë sintalë si bangë kuvingësënë simboongo i sikiiti si banë bëlësumbisi mëbeembi. 13Naandi wusë bëkaambë : « Lisonëmë : “N'zwaami yin'teelu n'zo yi n'saambu#21.13 Ezy 56.7; Yel 7.11..” Kasi beeno, lwayicitulë civingë ci miifi! »

14Simpofo i bibolikinyi bisë m'belëmë munë n'zo-Nzaambi i naandi wusë bëbelusi. 15Kasi sifumu singangë-Nzaambi i miloonji n'kaakë bënyotëkënë abu bamoni bimaaku kulëvaangë i banë bëlëlosukë munë n'zo-Nzaambi : « Ozaana! Mpumu ke Mwaanë Daviidë! » 16Mu bwaawu, baawu bisë n'kaambë : « Njeeyi wulë mu kuwu manë bëlë mu kutubë? » – « Yeesu wusë cikuninë, ee mweeni yilë mu kuwu. Lutangisyaanu vyaasi ko manë mësonëmë : “Njeeyi wavangisi bibabanë i baanë bëndeenji kukudumisi#21.16 Twi 8.3.”? » 17Bunë kwabë biici, naandi kubasikë ku livulë be lyoolyo, mu kweendë ku bwaalë bë Betani, kwaawu kuvyosilë bwiilu.

Yeesu wasifë n'ti n'ngengë

(Mak 11.12-14,20-24)

18Fë menë-ngwaali, bunë kwavutukunë ku livulë, Yeesu wusë taatë nzalë. 19Kwamoni n'ti n'ngengë mu nzilë, naandi wusë belëmë, kasi mo mëkayi vwiili kumonë. Yeesu wusë kaambë n'ti n'ngengë : « Tee sakë yi sakë, njeeyi wusë bëbutë mëkuundi ko! » Fo fë cimweekë, n'ti n'ngengë wusë kuumë. 20Bilaanzi bamoni lyalyooli, bisë bwa libobo i bisë tubë : « Buni n'ti n'ngengë wakuminee? » 21Yeesu wusë bëcikuninë : « Cyelikë beeno yin'kaambë ningë luke ciminu i mpakë kufiindë ve, yaaku vwiili lilëvangënë mu n'ti n'ngengë, vandi, fanë lun'kambilë moongo owo : “Botukë ofo, weendë we yilaci mu m'bu”, lyaawu kuvangënë. 22Mooti luke ciminu, beeno lun'tambulë cyosuku lu kun'loombë mu n'saambu. »

Kuni kufuminë lutumu lu Yeesu

(Mak 11.27-33; Lik 20.1-8)

23Yeesu wuyikotë mu n'zo-Nzaambi i fanë kulëlongilë. Bëkuluutu bë singangë-Nzaambi i mëkakëtë më Sizwiifë kum'belëmë i bisë n'yufulë : « Mu lutumu lu nani njeeyi wuke vangilaangë mamoomë i wukuveeni n'swa nani? » 24Yeesu kubëvutulilë : « Miinu yivaamë, limweekë yakuluyufulë. Lumwe kun'cikuninë, miinu yilukaambë mu lutumu lu nani yike vangilaangë mamoomë. 25Nani wufilë Za mu kubatizyaalë#21.25 3.6.? Nzaambi vo baatu? » Kasi baawu bisë kufusënë baveekë i baveekë : « Ningë tubëcikunë ti : “Nzaambi na wun'filë”, naandi wutuvutulilë, “Mu mbici lukaambulu kuteelë maanë mu Za?” 26Ningë tube tubë ti : “Baatu bën'filë”, kebë bëlëtubalukilë, kasi bakë booso bëlëbalaangë ti Za wabë m'bici. » 27Mu bwaawu, baawu bisë vutulilë Yeesu : « Tusye zaabë ko. » Naandi kubëcikunine : « Miinu, yivaamë yisë lukaambë ko mu lutumu lu nani yike vangililaangë mamoomë. »

Sasafë yi baanë bë bwaali

28« Buni lum'mweenë mu sasafë ayi? Muutu wun'viipë wabë yi baanë bwaali. Naandi wukaambë wun'tetë : “A mwanaami, yeendë we kusalë Cibubwayi mu solaami yi viinyi.” 29Naandi kun'vutulilë : “Miinu yibe maangë.” Akasi kwanyotëkini, naandi wusë kweendë mu kusalë mu solë viinyi. 30Kwakaambi wum'mesë bo bumweekë, mwaanë kun'cikuninë naati : “Mweenë-ngete, a ta, yibe vitikë”, kasi wusye kweendë ko. 31Nani mu babë bwaali wuvaangë n'vwiilu lisya? » Baawu kun'vutulilë : « Wo wun'tetë. » Yeesu wusë bëkaambë : « Licyelikë yilukaambë, binoongë mpaku i bëcyeetu bënduumbë, mba bën'twaamë ntetë yi beeno kunë Lwaangu lu Nzaambi. 32Cibilë, Za wuyisë wululeesi nzilë yi n'sulumunu, kasi beeno lusye n'teelë maanë ko. Kasi binoongë mpaku i bëcyeetu bënduumbë bën'teelë maanë. Kosuku beeno lumonë mamoomë, lusye ta maanë ko mu naandi. »

Sasafë yi bisasi bi bubaalu bi solë viinyi

(Mak 12.1-12; Lik 20.9-19)

33« Yuwaano sasafë yimesë : Fabë muutu, fumu solë, wuvatë solë miti viinyi. Naandi wuzukë m'pakë, wusikë libulu li kukaminë mëkuundi më viinyi. Na kube tulikë cibaangë ci biluungë n'zo. Fë mbusë na kubiikë solë be yooyi mu myooko bivasi#21.33 Ezy 5.1-2., naandi wusë ke yendaangë mu mweendo. 34Bunë ntaangu yikuvelilë yafwaani, naandi kufilë biseelu byaandi kuke bivasi mu ke laandë mbutë solaandi. 35Bivasi bëzudikinyi biseelu byaandi, baawu kutuutë awu nkubë, kuvoondë awuuwu i kulakë awunaani mëmanyi. 36Naandi wusë be filooso biseelu bin'ka, nkoongë yivyokilili kufunë yi yo yin'tetë. Bivasi bëvangilë mpilë mweekë buke bën'tetë. 37Fë siitu, naandi wusë filë mwanaandi i wusë tubë : “Baawu bëm'bakë mwanaami sisu.” 38Kasi, bivasi bunë bamoni mwaanë, bisë tubësënë : “Wunë mba wum'byalilë lifwa naandyaawu. Tun'vondyaanu, tuboongaanu libyalilë lyaandi!” 39Baawu bisë m'bwiilë, kum'baasi ku ngaandë solë miti viinyi i bisë n'voondë. »

40« Fanë fën'kwisilë fumu solë, buni kun'silë mu bivasi obyo? » 41Baawu kun'vutilë: « Naandi wun'vangisi kuvoondë bisasi bi bubaalu obyo i mba wun'sombisi solë ke bivasi bin'ka, bëkun'vaanë mëkuundi mu ntaangu yikuvelilë. »

42Yeesu wusë bëkaambë : « Beeno lutangisi vyaasi ko Libuuku li Nzaambi bunë bësonikinë :

“Limanyi lyo bituunji bëbaayi,

lyaawu lyacitukë limanyi linkumë,

lyalyooli lifuminë ke Fumu,

i lyaawu fë meeso miitu liboti i beeso tusë siminë, kubookë#21.42 Twi 118.22-23.!” »

43« Mati bwaawu yilukambilë : bëlubotulë Lwaangu lu Nzaambi i buluvaanë ke liloongu li kun'vaanë mëkuundi. 44Wunë wum'bwiilë fë limanyi be lyooli, mba wun'kwanzikë i wunë wulibwiilë, wun'kesëkënë#21.44 Lik 20.18.. »

45Bunë be yuwu sasafë be yooyo, bëkuluutu bë singangë-Nzaambi i Sifalisyaanu bisë bakulë ti mu baawu kulëtubilë. 46Baawu bëtoombë buni bukum'bwililë, kasi bësye podi ko, mu boomë bu nkoongë yi baatu, yilëmonaangë Yeesu m'bici.

Currently Selected:

Matye 21: NTVIL

Highlight

Copy