Matye 20

Bisasi mu solë viinyi

1« Licyelikë, Lwaangu lu mëyilu fwiifu si fumu solë wubasikë yimenë-ngwaali, mu kuboongë bisasi bi solaandi yi viinyi. 2Wusë kuwusënë yimunë bisasi mu kutambulë mbakë cinkongulu cimweekë ci mboongo mu cilumbu i naandi kubëfilë mu solaandi yi viinyi. 3Bunë kwe basikë fë mëselukulu më ntaangu, naandi kubëmonë bën'ka babë faawu i cin'velë kusalë ve. 4Ke ba boobo, naandi wusë bëkaambë : “Yendaanu yiviinu mu solë i miinu mba yiluvaanë mbakë yifwenikini.” 5Baawu, bisë ke yendaangë i bunë kwe basikooso fë zoolë yin'samunu yivwa. Naandi wusë vangilë bo bumweekë. 6Kwaasu fë kuumi zoolë mweekë, naandi kube basikë kube takënë bën'ka babë foofë. Wusë bëyufulë : “Mbici, lukelili afë i cyosuku kusalë ve?” 7Baawu kun'vutulilë : “Cibilë muutu ve watuvaanë cisalu.” Naandi wusë bëkaambë : “Yendaanu yiviinu mu solë viinyi.” »

8« Bunë mësikë matuuci, fumu solë wusë kaambë cilaanzi cyaandi : “telë bisasi i futë kadë muutu mbakaandi, kutoninë ke bësiitu i kusitikilë ke bo bën'tetë.” 9Banë bëyisë fë kuumi zoolë mweekë bisë tambulë kadë muutu cinkongulu cimweekë. 10Bunë bën'tetë bëyituukë bëbalë ti bën'tambulë mbakë yivyokilili, i baawu yivaawu bisë tambulë kadë muutu cinkongulu ci cimweekë. 11Bunë batambuli, baawu kunyonginë fumu solë. 12Bisë tubë : “bisasi abi byakwisilë fë siitu, baawu basalë fë zoolë mweekë tokë i njeeyi wabëfutë buke beeso. Mu kumonë, beeso twavidë moonyi muusë wooso i twasalë fë libabëlë li muunyi.” 13Naandi wusë vutulilë wun'viipë mu nkoongaawu : “A mwa, miinu yisë kupuutu ko. A buni njeeyi tusye kuwusunu kwe mu kutambulë cinkongulu ci mweekee? 14Boongë mbakaaku i we yendi. Miinu yin'vwa n'ciinzë mu kuvaanë ke wu siitu mpilë mweekë yi njeeyi. 15Abu miinu yikeeli yi n'swa kwe mu kuvangilë bunë yizolili mu simboongo syaami? Kaambofo, n'soci wake m'monë abu miinu yike muutu wum'botyee?” 16Yeesu wusë bëtubë, bësiitu, bëm'ba fë ntwaalë i bën'twaalë bëm'ba fë siitu. »

Yeesu wan'kuzabikini fë vyaasi yin'tatu lufwa i luvulumuku lwaandi

(Mak 10.32-34; Lik 18.31-34)

17Bunë Yeesu kulëkwendë ku Yelusaleemë, naandi wunatë ku mpeengë likuumi bë bwaali li bilaanzi i mo mu nzilë si kweendë, wusë bëkaambë : 18« Yuwaano, twakum'makaanu ku Yelusaleemë, kunë Mwaanë muutu wun'vakulu kuke bëkuluutu bë singangë-Nzaambi i ke miloonji n'kaakë. Baawu bëkun'tabë lufwa. 19Bëkun'lekulë mu myooko sipayi, mu kun'dyeengë, kum'bulë sikoti si nzibulë-mbumë, bëkum'baandë fë kuluusu i fë cilumbu cin'tatu, naandi wun'vulumukë. »

Lulombulu lu mamë Zaakë i Za

(Mak 10.35-45)

20Mu lyaawu, nkasi Zebedee kubelëmë Yeesu yimunë baanë baandi. Naandi kufukumë mu kun'loombë lin'viipë. 21Yeesu kun'kaambë : « Mbici wun'toombee? » Naandi wusë kun'vutulilë : « Tubë ti baanë baami bë bwaali aba, bëkalilë awu ku mëbakëlë maaku, wum'mesë ku mëcyeetu maaku fanë wun'kotilë ku lwaangu lwaaku. » 22Yeesu wusë n'vutulilë : « Beeno lusye zaabë ko lyo lulë mu kuloombë. Beeno lum'podi kunwa mbuungu yo miinu yifwenikini kunwe? » Baawu bisë n'vutulilë : « Mweenë-ngete, beeso tum'podi. » 23« Licyelikë, beeno lun'nwa mbuungwaami, bunë Yeesu kubëkambilë#20.23 Mëv 12.2.. Kasi likukalilë ku mëbakëlë maami, kaambofo ku mëcyeetu maami, olyo lyaami miinu ko. Bikalulu obyo bibelikulu mu banë Tataami kusoolë. »

24Bunë likuumi li bilaanzi bayuwu lyalyooli, baawu kunyotëkënë mu baanë bë nguli bë bwaali. 25Yeesu kutelë bakë booso i wusë tubë : « Luzabisi ti sifumu si mëloongo, bën'tuminë baatu baawu yi bubaalu booso yivaandi mëkundaalë yi bumbakë-bakë. 26Ke beeno, busye fwanëkënë kubeelë boobo ko. Kasi wunë wun'toombë kuba n'kuluutu mu nkoongiinu, kwe ba ciseelu ci bakë booso. 27Wosuku wun'toombë kuba fë ntwaalë mu nkoongiinu, kwe ba n'doongwiinu. 28Bo bumweekë, Mwaanë muutu wuyisilë mu buloongo yaaku ti baatu bën'salilë, kasi mu kusalilë baatu i mu kuvakulë luziingu lwaandi mu kobulë lilaangu linenë li baatu#20.28 26.28; 1 Ti 2.6.. »

Yeesu wabelusi mpofo wali

(Mak 10.46-52; Lik 18.35-43)

29Bunë babasikë ku livulë li Yeliko, nkoongë yinenë yilaandë Yeesu. 30Mpofo wali syabë sikalë mu ndaambu nzilë, bayuwu ti Yeesu wulëvyookë, bisë siimbë likulosukë : « Tufwiili cyaali, a Fumu, nje Mwaanë Daviidë! » 31Kasi, nkoongë baatu yisiimbë li kubëfuungë, bëleembu biyoko. Tiilyoko, bisë lutilë kube losukë : « Tufwiili cyaali, a Fumu, nje mwaanë Daviidë. » 32Yeesu wusë sikëmë, kubëtelë i wusë tubë : « Mbici lun'toombë yivaangë mu beenwe? » 33Baawu bisë n'kaambë : « A Fumu, meeso miitu mëzibukë. » 34Cyuundë cyan'kotili, Yeesu wusiimbë meeso maawu i kuzimbukulabu, baawu bisë bëmonë, i bisë ke n'laandaangë.

Currently Selected:

Matye 20: NTVIL

Highlight

Copy