Malëkë 1

Ndongulu yi Za-Batiisë

(Mat 3.1-12; Lik 3.1-6; Za 1.19-28)

1Ntonunu Mpolu Mboti yi Yeesu Kliistu, Mwaanë Nzaambi#1.1 Mu mëbuuku mën'ka më ntamë mëtubë maambu më Nzaambi cikumë ci « Mwaanë Nzaambi » voo mu kati.. 2Bunë bësonikinë mu libuuku li Ezayi m'bici :

« Miinu yin'filë ciluumbi cyaami fë ntwaalaaku njeeyi

mu kubelikilë nzilaaku.

3Mbeembu yilë mu kutendukë mu ntaandu ciyumi :

Belikaanwee nzilë Fumwee,

sulikaanwee tobulu twaandyee#1.3 Ezy 40.3.! »

4Bunë Za kwe yisi wunë wubatizyalaangë mu ntaandu ciyumi, naandi wulëtendulaangë lubatizyaalu lu luvilukulu lu lobukulu lu mësumu#1.4 lobukulu lu mësumu Kaambofo: n'leenvo lu mësumu.. 5Mboongu baatu yooso yi libweeti li Zudee i baatu bakë booso bë livulë li Yelusaleemë, bëlëkwendaangë ke naandi i ke fungulaangë fë ciyalëlë mësumu maawu i Za wulëbëbatizyaalaangë mu mwiilë Yulëdaanu.

6Za wuvwaatë ciyuungë ciziilu mu miikë samo i likaanji mu lucyeto#1.6 2 Mt 1.8. . Naandi wulëlyangaangë mëkoonkë i mëfutë më nyosi. 7Naandi wulëtendulaangë ke nkoongë baatu : « Wo wulë mu kwiisë ku mbusaami, mwiinji bunaangë yi miinu. Bosuku bubeeli, miinu yisye fwanëkënë kuve mu kufukumë i mu kukutulë misiingë mëpaapë maandi. 8Miinu yalubatizyaalë tokë mu masi, akasi naandi, mba wulubatizyaalë mu Ciluunzi ci Saantu. »

Lubatizyaalu i luseengulu lu Yeesu

(Mak 1.9-11; Lik 3.21-22; 4.1-13)

9Mu bilumbu be binë binaani, Yeesu kwisilë ku Nazaleetë, li libweeti li Ngalilee i Za wusë batizyaalë Yeesu mu Yulëdaanu. 10Bunë kwatapukë mu masi, wusë monë li yilu kuzibukë, Ciluunzi ci Saantu cisë kubetëmë fë yilwaandi buke libeembi. 11Ku yilu, mbeembu kutendukë : « Njeeyi Mwanaami wu mëdilë, mu njeeyi mwa muke sinyeenzi syaami syooso#1.11 Twi 2.7; Ezy 42.1.. »

12Kumanoofo, Ciluunzi ci Nzaambi cisë n'sindikilë mëlengë-lengë ku ntaandu ciyumi. 13Yeesu bunë kwabë mu ntaandu ciyumi mëkumë-na më bilumbu i Satënë wusë n'seengë n'timë. Naandi wulëzingilaangë fë cimweekë yimunë bibulu bi n'situ. Siyaanzi ke n'salilaangë.

Yeesu watelë bivubë-toongo bi na

(Mat 4.12-22; Lik 4.14-15; 5.1-11)

14Bunë bakosi Za mu peleeso#1.14 Za bën'tuulë mu peleeso: bën'tubilë mu Za-Batiisë. 6.17. , Yeesu wusë kweendë ku libweeti li Ngalilee. Naandi wulëtendulaangë Mpolu Mboti yi Nzaambi. 15« Ntaangë bëzitikë ye fwaani, kulëtubaangë, Lwaangu lu Nzaambi lwabelëmë! Lwe vilukaanu#1.15 kubalulë mëvaangë: kubalulë ndyatulu kaambofo kuvilukë. i lwe baanu ciminu mu Mpolu Mboti! »

16Yeesu bo kulëvyookë mu ndaambu liyaangë li Ngalilee, naandi kumonë Simu i nkoombaandi Andëlee, bëlëlakaangë mitaambwaawu mu liyaangë. Baawu bëyabë bivubë-toongo. 17Yeesu wusë bëkaambë : « N'daandyaanu, miinu yilucitulaanu bivubë baatu. » 18Mëlengë-lengë, baawu bisë kunyacikë mitaambwaawu i ke n'laandaangë. 19Bunë kwakwesini mwa cinaanu, na kumonë Zaakë mwaanë Zebedee i Za nkoombaandi. Bëyabë mu bwaatu bwaawu i bëlëloondaangë mitaambwaawu. 20Mëlengë-lengë Yeesu kubëtelë m'bilë i baawu kubiikë tataawu Zebedee mu bwaatu i bisasi byaandi, baawooso ke n'laandaangë.

Muutu wuvwaatu ke ciluunzi cibi

(Lik 4.31-37)

21Yeesu i bilaanzi byaandi bisë kotë ku livulë li Kapelënawuumë. Mu cilumbu ci saba, na wusë kotë mu cizutununu i naandi wusë toonë mu kubëloongë. 22Baatu bo bëlën'yuwaangë bisë tulumukë mu sindoongulu syaandi, bunë naandi wulëbëlongilaangë yimunë lutumu lwaandi looso, yaaku ti, buke miloonji n'kaakë. 23Mu ntaangu be yiina, mu cizutununu mwabë muutu mweekë wuvwaatu ke ciluunzi cibi i naandi wusë losukë mu mbeembu nkamu : 24« Nje mbi wun'toombë mu beeso, Yeesu li Nazaleetë, nje wakwiisë mu kutunyambëkënye? Miinu yizabisi ti : njeeyi Saantu Nzaambi kufilë! » 25Fa foofë, fa Yeesu kutundilë ciluunzi cibi i wusë n'kaambë : « Kaangë munwaaku i basikë mu muutu owo! » 26Ciluunzi cibi cisë n'nyikunë yi n'viingu wooso i cyaawu cisë lookë i cisë basikë mu naandi. 27Baatu bakë booso bisë tulumukë i bisë ke yufësënaangë baveekë i baveekë : « Mbici obyee? Oyo ndongulu yimoonë, yike lutumu! Naandi wun'tumi biluunzi bibi i byaawu bi kun'yuwulu! » 28Mu bwa boobo, saangwaandi yilengë nyambë bwendi libweeti lyooso li Ngalilee.

Yeesu wabelusi mpaapë bibeedo

(Mat 8.14-17; Lik 4.38-41)

29Babasikë mu cizutununu, bisë ke yendaangë ku n'zo yi Simu yimunë Andëlee i bayaawu Zaakë i Za. 30Kosuku, n'kwekisi Simu wabë fë ciikë cibilë libaawu lyabë yaandi. Yeesu abu kwatuuci, bisë kun'kaambë lyaawu. 31Yeesu kum'belëmë, wusë kun'siimbë mu kooko i kun'telikë. Libaawu lisë kum'botukë. Naandyooso wusë kuba mu kubësalilë.

32Mësikë matuuci, bwiisi abu bwayili#1.32 bunë bwiisi bulë kwiilë: saba (v. 21) bulëmaninaangë mu kubaasi simbotë., baatu bëtwaalë ke Yeesu ku n'zo ko kwabë bibeedo byakë byooso yimunë bo bëvwaatu ke biluunzi bibi. 33Mboongu baatu yooso yi livulë li Kapelënawuumë yabë yidukunë fë munu-n'zo. 34Yeesu wubelusi mpaapë baatu babë mu simpasi i mu sincyeenzu simpilë yi mpilë yaandi i wusë kulë biluunzi bibi. Naandi wusye biikë ko biluunzi bibi kubulë mbeembu, cibilë baawu bëlën'zaabaangë.

Yeesu wutaabë libweeti li Ngalilee

(Lik 4.42-44)

35Mu mbiingu menë-ngwaali, bwiisi bwabë bucili pipitii, Yeesu wusë manë n'telë, kubasikë ku n'zo, ke yendaangë ku mpeengë, yi kwa kunë ku nanaani, wusë ba mu kusambilë. 36Kasi, Simu i bayaandi bëye n'toombaangë. 37Bunë bam'moni, baawu bisë n'kaambë : « Baatu bakë booso bëlë mu kukutoombë! » 38Vandi kasi Yeesu kubëkaambë : « Twe yendyaanu mbiinji yin'ka, mu maalë mëbelëmë, mo ye loonji libuungu li Nzaambi yivaandi kwaawu, cibilë mu lyalyooli mwa yiyisilë. » 39Naandi wusë ke yendaangë bwendi libweeti li Ngalilee, mu ke loongaangë libuungu li Nzaambi mu bizutununu i mu ke yobulaangë bo bëvwaatu ke biluunzi bibi.

Yeesu wabelusi mungë bwaasi

(Mat 8.1-4; Lik 5.12-16)

40Cilumbu cin'viipë, mungë bwaasi wuyifukumë fëke Yeesu i wusë m'bondililë : « Ningë nje wulizolisi, njeeyi wum'podi kun'lyomisi. » 41Yeesu kun'fwiilë cyaali#1.41 wuwaalë yi cyaali mu naandi: wuwaalë yi likaanzi mu naandi. i kun'nonunë kooko i wusë n'siimbë i kutubë : « Miinu yilizolisi, we lyoomi! » 42I foofë, bwaasi busë botukë mu muutu beenë i naandyooso kubelukë. 43Mu zoolë beenë Yeesu, kun'vutulë i wusë n'kambilë mu mbeembu nkamu: 44« We yuwu buboti, bilii! We libulili lukuungu yi muutu ko, kasi yendë we yileesi kuke ngangë-Nzaambi, natë, we vaani mu kulyomisi kwaaku bunë bën'lombilë mu n'kaakë Moyiizë, bwiinji baatu booso bëzaabë ti njeeyi wabelukë#1.44 Lev 14.2-32.. » 45Kasi bunë kwayendi yi n'viingu wooso, ke leelë cikuumbu ci lubelukulu lwaandi. Mu bwaawu Yeesu wusye be podyooso ko kukotë fë ciyalëlë ku livulë. Naandi kukalilë ku ngaandë mu mbiinji yo yikaambu baatu. Kasi baatu bëlëkwisaangë ke naandi mu sinkoonzu syakë syooso.

Currently Selected:

Malëkë 1: NTVIL

Highlight

Copy