Malëkë 5

Yeesu wabelusi muutu wuvwaatu ke biluunzi bibi

(Mat 8.28-34; Lik 8.26-39)

1Fë mbusë, Yeesu yimunë bilaanzi byaandi kutuukë ku samu-simu li liyaangë li masi, ku si basë Ngelaseenu#5.1 Mat 8.28.. 2Yeesu kwabasikë mu bwaatu, kususukulabu, muutu kubasikilë fë meeyi mëbuumbë i kwiisë kun'dyengënë. Muutu be woowo wabë wuvwaatu ke ciluunzi cibi. 3Cikalulu cyaandi fë meeyi mëbuumbë i wun'velë wukeeli ko wum'podi kun'kaangë bikonyi, keti mu mpaangë. 4Cibilë, mpaapë vyaasi bën'kaangë simpaangë mu myooko i mu maalu, kasi wutabulë simpaangë i butali. Muutu ve wabë yi myaanzi yi kun'kolikë. 5Kadë ntaangu, yi bwiilu i muunyi, naandi wuke zungunaangë fë meeyi mëbuumbë, mu myoongo, bwendi ke lookaangë, yike yilwaasyaangë nyitu mu mëmanyi. 6Cinaanu kwatalili Yeesu, naandi kukumbelëlë ntiinu i wusë fukëmë fë nduunzyaandi. 7Mu mbeembu nkamu, na kulosukë : « Mbi wun'toombë mu miinu, a Yeesu, njeeyi Mwaanë Nzaambi-Mpuungu? Miinu yakubondililë, mu lizinë li Nzaambi, wuleembu kun'yokulë! » 8Cibilë Yeesu wulëtubaangë : « A ciluunzi cibi, basikë mu muutu owo! » 9Yeesu kun'yufulë : « Lizinë lyaaku nanye? » Naandi kun'cikuninë : « Lizinë lyaami “Nkoongë”, cibilë mpaapë tukeeli. » 10Naandi wusë bondililë Yeesu kuleembu kubëkulë cinaanu yi libweeti.

11Kosuku, mu ndaambu moongo, mwabë n'kaangë wunenë wu singulu#5.11 Lev 11.7 i Det 14.8. silë ke toombaangë ndiiwu. 12Biluunzi bibi kubondililë Yeesu : « Tufili mu n'kaangë singulu osyo, bwiinji tukotë mu syaawu. » 13Naandi kubëvaanë n'swa. Biluunzi bibi kubasikë mu muutu i bisë ke kotë mu singulu. N'kaangë singulu kukulumukë mu ntiinu i bisë ke yifwaangë mu liyaangë li masi: fwaa! Fabë kwaasu ku biveefi byooli bi singulu. Bakë booso kufwa. 14Banë bëlëbëluungaangë kutiinë i bisë ke leelë mpolu bwendi libweeti, yike bo bëkalë mu maalë. Baatu kweendë mu ke moni mpilë lyaambu olyo. 15Bayisi fëke Yeesu i bisë kumonë muutu wabë wuvwaatu ke nkoongë biluunzi bibi, wukalë fësi i binkutu mu nyitu i buzitu bwaandi booso. Boomë kubësiimbë. 16Banë bëmonë manë mëvyookë bisë bëkwalulilë manë mëvangënë mu muutu wuvwaatu ke biluunzi bibi i mu singulu. 17Bwa boobo, baatu kubondililë Yeesu mo kubotukë fë libweeti lyaawu. 18Bunë Yeesu kulëkandëmë mu bwaatu, muutu owo wabë wuvwaatu ke nkoongë biluunzi bibi, kun'loombë n'swa mu kun'laandë. 19Yeesu kumaangë i na kun'kaambë : « Yeendë ku n'zwaaku, kuke cifuumbë cyaaku, we bëzabisi mo Fumu kwavaangë mu njeeyi i bunë kwakufwiili cyaali. » 20Mu lyaawu, muutu beenë wuyendë i wusë siimbë li kutendulë bwendi libweeti li Dekapoolë n'viipë mo Yeesu kwavaangë mu naandi. Bakë booso kusiminë, kubookë.

Nduumbë n'cyeetu yi Zayuusë i n'cyeetu wusiimbë cinkutu ci Yeesu

(Mat 9.18-26; Lik 8.40-56)

21Yeesu kwatuuci ku samu-simu li liyaangë li masi mu bwaatu, nkoongë yinenë yi baatu kukukëmë fëke naandi i naandi kukalililë mu ndaambu masi. 22Kutuukë wun'viipë wu cizutununu bëlëteelë Zayuusë. Naandi wusë monë Yeesu, kubongëmë fë maalu maandi 23i kum'bondililë : « Nduumbaami n'cyeetu wabelëmë kufwa. Yiisë bwiinji wun'tendikë myooko, mo kuvuukë i kuziingë. » 24Tee Yeesu kweendë yaandi. Nkoongë yinenë yi baatu ke yendaangë yaandi i baawu ke n'fyetëkinyaangë.

25Kosuku, munë nkoongë baatu mwabë n'cyeetu wulëbeelë lukuumbë lu meengë, fë kuumi mivu wali. 26Naandi wumonë mpasi mu myooko mibuci i wusë kumanë simboongo syaandi syooso bunë kubakilë, akasi cin'kati kumonë ve, tiilyoko simpasi kutalë mu kulutilë. 27Bunë kwayuwu ndumu Yeesu, naandi wusë kukotë mu nkoongë, kuvyookë ku mbusë Yeesu i wusë siimbë cinkutu cyaandi. 28Kasi na n'cyeetu beenë wutubë : « Mooti yim'podi kusiimbë keti cinkutu ci Yeesu, miinu yim'belukë. » 29Fo fë cimweekë, meengë kusiitë mu kube kuumbë mu nyitwaandi i naandi kubelukë mu simpasi syaandi. 30Foofë, Yeesu wusë bakulë, n'viingu wabasikë mu naandi. Naandi kubalukë fë meeyi nkoongë i wusë kufulë : « Nani wasiimbë cinkutu cyaami? » 31Bilaanzi byaandi kun'vutulilë : « Talo njeveekë, nkoongë yilë mu kukufyetëkini, abu ti : “Nani wakun'siimbë?” » 32Kasi Yeesu kwazungini ntalu mu kumonë nani wavaangë lyalyooli. 33Bunë, n'cyeetu kwamoni boomë, lutekutu kun'kotilë bo kuzaabë manë mën'kwisilë i ke bongëmë mu maalu më Yeesu i kutubë cyelikë. 34Kasi Yeesu kun'kaambë : « A mwanaami, ciminu cyaaku cyakuvuuci. Yeendë kwaaku mu n'sikë, ncyeenzwaaku yamanë. »

35Ntaangu kulëtubilaangë mamoomë, baatu bëfuminë ku bwaalë bu Zayuusë, bisë kaambë Zayuusë : « Mwanaaku wafwa. Biikë kwaandi kube nyokulë N'loonji. » 36Kasi, Yeesu, wusye lengilë moonyi ko mu bikumë obyo, kukaambë Zayuusë : « Wubaci boomë ko, weta maanë mu Nzaambi. » 37Bunë kulëkwendë ku n'zo Zayuusë, naandi wusye zoolë ko mpaapë baatu mu kweendë yaandi, kanuku wo Pyeelë, Zaakë i Za nkoombaandi. 38Bo bëyituukë ku n'zo Zayuusë n'kuluutu wu cizutununu, Yeesu kumonë nkoongë yinenë yi baatu bëlëcitikaangë ncyeembi. Nkoongë yilëlilaangë i yilëlookaangë. 39Naandi kukotë i kubëkaambë : « Ncyeembi yi mbicye? Kulilë ku mbicye? Mwaanë wusye fwa ko, kasi walembikilë. » 40Baawu ke n'siilaangë n'tetu. Foofë, kwavangisi bakë booso kubasikë, wusë boongë yaandi lisya i mamë mwaanë i bo bëyisë yaandi. Naandi wukotë ko kwabë mwaanë. 41Wusë kun'siimbë nduumbë n'cyeetu mu kooko i kun'kaambë : « Talita kuumë! » – Dedë ti : « A nduumbë n'cyeetu, manë n'telë, njeeyi yin'kaambë. » –

42Nduumbë n'cyeetu kusundilooso kutelëmë i kulyaatë – wabë mwaanë wu kuumi mivu wali. Banë babë foofo kubwa libobo. 43Mu bwaboobo, Yeesu wusë bëkandiminë bëleembu kulibulili lukuungu ke wosuku muutu mu mo mëvangënë. Kumanoofo, naandi kubëkaambë mo bëvaanë nduumbë n'cyeetu bilya.

Currently Selected:

Malëkë 5: NTVIL

Highlight

Copy