Malëkë 6

Basë livulë li Nazaleetë bësye ta maanë ko mu Yeesu

(Mat 13.53-58; Lik 4.16-30)

1Yeesu kubotukë mbiinji be yooyi i wusë kweendë ku livulë kuyonzukilë#6.1 livulë : Nazaleetë Mat 13.54.. Bilaanzi byaandi kun'landëkënë. 2Cilumbu ci saba cyatuuci, naandi wusë ba mu kuloongë mu cizutununu. Nkoongë baatu yabë munë, bayuwu nsinunwaandi kubwa libobo i bisë tubë : « Mamoomë kun'fumininë kunyee? Nani wun'veeni mpilë luzaabu olo? Kwisilë buni yivaandi mu naandi mu kuvaangë mpilë bimaaku obyo? 3Naandi kwe salëpaantye, mwaanë Maali#6.3 Za 6.42., cibutu ci Zaakë, Zoosë, Zuudë yimunë Simu? Baanë baandi bëcyeetu, bëkeeli yiitu faafa kwe? » Mu lyaawu, bisë maangë Yeesu. 4Yeesu wusë bëkaambë : « M'bici bëkun'cinzikaangë fosuku, kanuku vwiili ku bwaalë bwaandi, cifuumbë cyaandi i ku n'zwaandi, bën'kaambu kun'cinzikaangë#6.4 Lik 4.24; Za 4.44.. » 5Yeesu wusye podi kuvaangë foofë cyosuku cimaaku, kanuku bo kulëtendikë myooko mwa mpooko bibeedo, i kubëbelusi. 6Yeesu wusë kubwa libobo, mu lukaambu lu ciminu lu baatu bë livulë lyaandi.

Cisalu ci likuumi bilaanzi byooli

(Mat 10.5-15; Lik 9.1-6)

Yeesu wulë ke tabaangë bwendi maalë mu ke loongaangë. 7Naandi wusë kutelë likuumi bilaanzi byooli i wusë bëfilë bwaali-bwaali i wubëvaanë lutumu lu kukulilë biluunzi bibi. 8Naandi wusë bëvaanë mëkomini : « Nuboonjyaanu ko cyosuku ciimë mu mweendo, kanuku lo luveengu fë kooko. Limpa ve, nkutu ve, luboongo ve mu bolusu, 9kasi vwaataanu mëpaapë i nunaatyaanu ko binkutu byooli. »

10Yeesu wusë be bëkaambë : « Bunë luke tuuci mbiinji n'viipë, kukalilaanu ku kati ku n'zo, yo yilutambulë tee ntaangu yo lum'botukulë faawu. 11Ningë ti basë libweeti bëbëmaangë kulutambulë, kaambofo mu kuluyuwulu, botukaanu foofë i kukumunaanu n'kunkuunvu yi maalu miinu#6.11 Mëv 13.51; 18.6. i yendaanu kwiinu. Oboobo, bum'ba lukumini mu baawu. » 12Bilaanzi bisë ke yendaangë mu ke tenduli ke bakë booso bëbalulë mëvaangë maawu. 13Baawu kukulë mpaapë biluunzi bibi mu baatu i baawu kubëdoci mwa mëbeti më mëfutë fë yilu n'tu#6.13 Zak 5.14., kubelusi mpaapë bitolëkini.

Lufwa lu Za-Batiisë

(Mat 14.1-12; Lik 9.7-9)

14Kosuku, Eloodë, fumu-lwaangu, kwayuwu bunë bëlëtubilaangë mu Yeesu, cibilë ndumwaandi yinyambë mwakë mooso. Bën'ka bisë tubë : « Yeesu be woowo, bunimbalë naandi kwe Za, wo wulëbatizyalaangë. Buni, naandi wavulumukë mu nkoongë bëfwa! Bwaawu, naandi ke lutumu mu kuvangilë bimaaku. » 15Kasi bën'ka bëlëtubaangë : « Naandi Eli. » Bën'kooso bëlëtubaangë : « Naandi m'bici, mpilë mweekë yi wun'viipë mu mibici yi ntamë. »

16Bunë Eloodë kwayuwu makë mooso mëlëtubwaangë i wusë tubë : « Owo Za, wo wulëbatizyalaangë! Miinu, yivangisi kun'cyelë n'tu, kasi naandi wabë vulumukë! » 17Naandi wusë kutubilë obo, cibilë Eloodë wuvaanë n'swa mu kubwiilë Za i kun'lakë mu peleeso, bunë kwabë kukangëminë mu mpaangë. Naandi Eloodë wusilë katiboobo mu kudedulë n'timë Elodyaadë kukweelë. Kosuku, Elodyaadë wabë n'kasi nkoombaandi, Filiipë. 18Cibilë Za wukaambë Eloodë : « Busye fwaanë ko, njeeyi mu kuboongë n'kasi nkombaaku#6.18 Lev 18.16; 20.21.! » 19Elodyaadë wuwaalë likaanzi mu cibilë cyaandi i wulëtoombaangë kun'voondë, akasi wusye podi ko. 20Licyelikë, Eloodë wulëtiinaangë Za boomë, cibilë naandi wuzaabë ti, wabë muutu wusulëmë, wu saantu i wulën'kelaangë. Bunë kulën'kuwaangë, naandi wulënyotëkënë beenë. Tiilyoko, naandi wulëzolaangë kun'yuwulu. 21Lyabwiili obo, luvoto luboti kumonikë mu Elodyaadë, mu cilumbu cyo Eloodë wulëvaangë n'saangu wu lubutulu lwaandi. Naandi wusë vaangë n'saangu wu kwaatë-yekë fë meeyi bënaangë bë lutumu lwaandi, bëkuluutu bë mësodaadi i mëkakëtë më libweeti li Ngalilee. 22Mwaanë wu n'cyeetu wu Elodyaadë wusë kotë ku civingë ciba n'saangu i wulëcinë. Naandi kudedulë Eloodë yimunë bo bëtelu ku n'saangu. N'tinu wusë kukaambë nduumbë n'cyeetu : « N'doombi kwaaku cyosuku wun'toombë i miinu yikuvaanë. » 23Naandi kun'lefilë mpesë yi kwaatë-yekë : « Miinu yalefë mpesë mu kukuvaanë cyosuku wukun'doombë keti ndaambu lwaangu lwaami. » 24Nduumbë n'cyeetu kubasikë i wukaambë mamaandi : « Mbici yifwenikini kun'loombee? » Naandyaawu kun'vutulilë : « N'loombi wukuvaanë n'tu wu Za-Batiisë. » 25Nduumbë n'cyeetu mëlengë-lengë wusë vutukë kuke fumu-lwaangu i wusë n'loombë : « Miinu yin'toombë njeeyi wukum'paanë buyifanwabu n'tu wu Za-Batiisë mu lubuci! » 26Fumu-lwaangu cyuundë kun'kotilë, kasi wusye zolë kuve kumanginë mu cibilë ci mpesë kulefë fë meeso mu bo bëtelu. 27Naandi mëlengë-lengë kufilë lisodaadi li civaku cyaandi i kuvaanë n'swa wukun'twalilë n'tu wu Za-Batiisë. Lisodaadi wusë kweendë ku n'zo peleeso i kucyelë n'tu Za-Batiisë. 28Tee naandi kutwaalë n'tu mu lubuci i kuwuvaanë ke nduumbë n'cyeetu, i naandyooso kuvaanë ke mamaandi. 29Abu bilaanzi bi Za bayuwu mpolu, bisë kuboongë vuumbi i ke yituulë mu libuumbë.

Yeesu walikilë biveefi bi taanu bi bëbakëlë

(Mat 14.13-21; Lik 9.10-17; Za 6.1-14)

30Ntaangu yo bëvutukënë, mimbunzi kudukënë fëke Yeesu, i baawu kun'kaambë makë mooso bunë bëvangilë i makë mooso bëye sinaangë baatu. 31Abu Yeesu kubëkaambë : « Yisaanu ku mpeengë, faamë fë vengëmë, vuundaanu fwaati. » Na wutubilë obo mu cibilë mpaapë baatu bëlëkwendë, bëlëkwisë, tee baawu bësye be bakooso ko ntaangu yi kwambulilë. 32Baawu bisë kandëmooso mu bwaatu, mu kweendë ku mpeengë, faamë fë vengëmë. 33Kasi mpaapë baatu kubëmonë ntaangu bëlëkwendilë i bëzaabë kunë bëlëkwendë. Mu lyaawu, mu maalu baatu bëfuminë ku mëvulë mooso, kukumbelëlë ntiinu i bisë kudeelë ntetë fë mbiinji beenë.

34Bo Yeesu kwabasikë mu bwaatu, na kumonë nkoongë yinenë yi baatu. Cyaali kun'kotilë cibilë babë buke mëmemë mëkaambu n'liici. Naandi kusiimbë li kubëloongë mu mpaapë maambu#6.34 Lut 27.17; 1 Mt 22.17; Ezk 34.5-6.. 35Ntaangu yabë yasiindë, bunë bilaanzi bi Yeesu bisë belëmë fëke naandi i bisë n'kaambë : « Ntaangu yasiindë i mbiinji ayi cyosuku ciimë voo. 36Vutulë baatu aba bwiinji bëtoombë mu sinzo si miliici i mu maalë mëbelëmë mu kusuumbë ndiiwu yi kulya. » 37Yeesu wusë bëvutulilë : « Bëvaanyaanu benuveekë ndiiwu! » Kasi baawu bisë n'loombooso: « Buni, njeeyi wuzolisi beeso tweendë twe suumbi mëmpa mëfwenikini mu nkamë-wali si binkongulu#6.37 cinkongulu ci mboongo: cin'leesi lifutë li cikunë. Mat 20.2. bi mboongo, bwiinji tubëvaanë mo bëlya? » 38Mweeni, Yeesu wusë bëyufulë : « Mëmpa mëkwa mëke yiinu? Ye monaanu. » Baawu bisë ke monë i bisë tubë : « Beeso tuke yi mëmpa më taanu i yivaandi mbisi wali. » 39Bwaawu, Yeesu wusë vaanë n'swa wu kukucikë mboongu baatu yooso mu mëkomo i kubëkasi fë mwa bitiiti bi ntaandu. 40Baatu bisë kukalë mu n'taandë wu nkamë i mu n'taandë wu mëkumë-taanu. 41Tee Yeesu wusë boongë mëmpa beenë më taanu i simbisi beenë si wali i wusë kusendulë meeso ku yilu i kun'toondë Nzaambi. Naandi kumukënë mëmpa i kumëtambikë kuke bilaanzi bwiinji bëkabilë baatu. Naandi wusë kabilooso yivaandi simbisi siwali ke bakë booso. 42Kadë muutu kulya yi kukutu. 43Bilaanzi kutwaalë bitini bi mëmpa i bi mbisi bisyaalë i kuwaasi kuumi mikutë wali#6.43 2 Mt 4.42-44.. 44Banë bëlya mëmpa babë lutaangu li biveefi bi taanu bi bëbakëlë.

Yeesu walyaatë fë yilu masi më liyaangë

(Mat 14.22-33; Za 6.15-21)

45Bamanyoofo, melengë-lengë Yeesu wusë kandikë bilaanzi byaandi mu bwaatu bwiinji beendë fë ntwaalaandi, ku samu-simu li liyaangë, mbiinji livulë li Betesayiidë, ntaangu yo naveekë kun'vutulilë nkoongë mu maalë maawu. 46Abu kwavutuli nkoongë baatu, wusë kweendë ku yilu moongo mu kusambilë. 47Bunë bwiisi bwayili, bwaatu beenë bwabë fë meeyi liyaangë i Yeesu wabë naveekë fë n'toto. 48Naandi wusë monë bilaanzi babë mu simpasi mu kusambilë, cibilë mpeemo yilëpukaangë ku lweeku lo bëfuminë. Munë bicyecyelu bi bwiisi, Yeesu wulë ke lyaatë fë yilu masi mu kweendë ke baawu i naandi wufitë bëvyookë. 49Bunë bam'moni kulyaatë fë yilu masi, baawu bëbalë ti n'kulu i bisë losukë. 50Licyelikë, bakë booso bëlëm'monaangë i bëwaalë yi lufufu. Kasi fo cimweekë, naandi wusë bëkaambë : « Lwe baanu luciindë! Awu miinu. Nubacyaanu boomë ko! » 51Naandi wusë kotë mu bwaatu fabë bilaanzi, i mpeemo kusiitë. Bilaanzi bisë kubwa libobo li kwaatë-yekë, 52cibilë bësye zikulë kuwu ko cimaaku ci mëmpa, mu bukafëkini bu mitimaawu.

Yeesu wabelusi bibeedo bi libweeti li Ngenezaleetë

(Mat 14.34-36)

53Bamani kusabukë liyaangë, Yeesu i bilaanzi byaandi kutuukë ku libweeti li Ngenezaleetë i bisë seesë. 54Bunë batuuci mu bwaatu, baatu kulengë bakulë Yeesu. 55Bisë siimbë li kutaabë bwendi libweeti n'viipë mu ke nataangë bibeedo mu bipooyi, fosuku fanë bën'kuwu fëke Yeesu. 56Fosuku faamë kulëkwendë mu maalë, mu mëvulë i mu maalë mëbelëmë më miliici mëmemë, baatu kun'natinaangë bibeedo, ke bëtulaangë fë mëvaambu mëke fë ciyalëlë, ke m'bondilaangë bwiinji bësiimbë keti sosu n'vwaatwaandi. Bakë booso banë bën'siimbë, bëlëbelukaangë.

Currently Selected:

Malëkë 6: NTVIL

Highlight

Copy