Romanɛ 12
12
Kɛtakpu Esi Kpɛkpɛ Nɛidi Gɛ Apaleteɛ Adɛmɛɛ
1Mɛelɛ alɛ mɔ, nɛ Owusoso Akaa yɛashagabui nɛidi gɛeɖi ɔlɔ nɔ soɔ, ɛkpalà ɔnɔ ɔsɛ tɛ nɔlɔkɔ ishu ɔbhɛtɛ asɛ bɔdɔ̃ pɔpɔɛ gɛlɛ nɛkpã ana, gɛ ɛlɛishu dalɛ pɛ Owusoso Akaa adɛmɛ nɔɔ, kɛlɛinu wɔnɔ ɔfɔfuĩa mɛ ɛtakpu esi kpɛkpɛ. 2Nɔtɛ ɔzã nɛkpã asɛ kanɔ alɛ mɛanɛ, pɔ nɔkɔ Owusoso Akaa yɛetsyina wɔnɔ ekpeɖekpeɖe mɛ tɛbhɛbhɛtɛ yɛedzi avɔvɔ. Kɛlɛ̀ bakɔ ɔsɛ nɔpɔ̃ɛ Owusoso Akaa ebui tɔtɔɖɔɔ mɛ oɖi, kɛgɛ ɛpɛ nɛ̀ kɛgɛ yɛadɛmɛ nɔ, pɛ kɛlɛ ná piapii nɔ.
3Nɛ tibhui bhuibuɔ gɛ bakɔ mɛ nulũɔ, itseɖe wɔnɔ ɔmɛ anɔ ka nyia ka asɛ atɛ alɔkɔ yɛishu asɛ yɛadɛ. Nɛ kɛlɛ inye mɛɛ, nɔbhɛtɛ ekpeɖekpeɖe mɛ nɛ ishu esi zhizhinɔ ɛkpã zazãna shu boŋ, tɛ anɔ nyia anɔ ebhui ibui mɛ nɛ tɛyɛyɛkɛŋã nɛidi gɛ nɔyɛkɛ odenɔ Owusoso Akaa akɔ nɔɔ shu. 4Asɛ kɛlɛ́ɛ gɛ ishupi bɔwɔ̃pɛ lɛ bɔlɔ mɛ anɔ aka nyia aka ahɔɛɛ, pɔ anɛ kɛxɔ̃ɛ idi tinikpo bɔwɔa, 5kana ɛbe gana Kristo mɛɛ, bɔlɔ banɔ kpekpè alɛ pete bɔbhɛtɛ tenikpo, kɛlɛ bɔlɔ ishupi ɔwɔ̃pɛ nɔ kpɛ olũgbu nɛ bagɔlɔ mɛ. 6Bɔdɔ̃ kɔkɔ ediedi alɛ bɔlɔ ahɔɛ nɛ tibhui bhuibuɔ gɛ bakɔ ɔlɛ nulũ. Anunɔ gɛ yɛdɔ̃ kɔkɔ kɛlɛinu ɔsɛ tɛ aɖɔ ebui eluɔ, aɖɔ alɛ elu nɛ kɛkɔ gɛ bakɔɛ nɛ yɛibui tɛyɛyɛkɛŋã nulũ. 7Onupɛ kɛxɔ̃ɛ dɛdɛ anunɔ ayɛkɛɛ, nɔkɔ yɛadɛ ɛlɛ, kana ɛbe onupɛ kinu bɔdɔ̃ kakasɛ gɛ anɔ teli tsyɛ ayɛkɛ, nɔkɔ yɛakasɛ bɔdɔ̃ɔ, 8onupɛ anɔ teli yɛyɛ́ kɛlinu sɛ tɛ akpɛ banɔ emiɛ, nɔkɔ yɛakpɛ banɔ emi, anunɔ gɛ àkɔ bagɛ kɛdɔ̃ nanà ma balɛ ahɔɛɛ, azakɔ balɛ nɛ̀ ɛyamɛ gbangbã, onupɛ banɔ gbagbana ɛxɔ̃ɛ anunɔ ayɛkɛ, agbana banunɔ piapii, kɛlɛ onupɛ ashagabui ɖiɖi anunɔ ayɛkɛ tsyɛɛ, eɖi ashagabuiɛ nɛ same mɔmɔ mɛ.
Tɛdɛdɛmɛ Nɛ Banɔ
9Nɔkɔ wɔnɔ tɛdɛdɛmɛ nɔ nɛ̀ banɔ nɔ̀ ode ɛya gbangbã mɛ. Nɔtɛ dɛmɛ nɔ nɛ kibui zizĩ, nɔnyana kibui gbangbã bhɛbhɛtɛ mɛ ovunɔ. 10Nɔlɔkɔ tɛpɛplɛnɔ ɔkɔ bagɔlɔ nɛ tɛdɛdɛmɛ nɔ̀ nɛ̀ bagɔlɔ mɛ, ɔmɔ asɛ bélɛɛ nɛ Kristo mɛ ana. Nɔkpɛ ɛtakpu esi ɔkɔ bagɔlɔ ɔdɛ wɔnɔ ahɔɛ ishu. 11Nɔtɛ shrɛrɛ nɛ wɔnɔ axɔ̃ɛ wɔawɔa mɛ, pɔ nɔkɔ kifu zã wɔnɔ mɛ nɛ ɔfɔfuĩa nɔ mɛ, ɔkɔ axɔ̃ɛ dɛdɛ ɔkɔ Apaleteɛ. 12Awɔ̃ lulu azã wɔnɔ same mɔmɔ mɛ, tɛdɔdɔ fɔ̃ɔ nɛ banɔ luhũ ikpɛ ibe, nɔlɔkɔ tɛyɛyɛkɛŋã okulu Akaa nɔ. 13Nɔplɛnɔ ɔhamɛeyi nɔnɔ́ gɛ kɛdɔ̃ nanà ma yɛahɔɛ. Nɔzã ɛyamɛ gbangbã tɛbhɛbhɛtɛ abha ɔkɔ befu.
14Noyula tutu esi ɔkɔ bagɛ atɔ̃nɔ wɔnɔ edeɛ, noyula ɔkɔ alɛ, pɔ nɔtɛɖɔ kibui ɔkpɛ alɛ. 15Nɔmɔ same nɛ̀ bagɛ amɔ same, kɛlɛ nobi yoyo nɛ̀ bagɛ ebieyoɔ. 16Nɔzã nɛ tenikpo bhɛbhɛtɛ mɛ nɛ̀ bagɔlɔ. Nɔtɛ ozofeke ishu, pɔ nɔdɛmɛ tɛ nɔzã tenikpo nɛ̀ bagɛ alɛ wɔnɔ esiɛ. Nɔtɛ ɔlɔkɔ ishu asɛ bebutianɛ nonu.
17Nɔtɛ bhɛtɛ ibui kpa ɔkpɛ ibui kpa lũ ɔkɔ anɔ na nà. Nolu awɔ tɛ nɔbhɛtɛ ibui gɛinu kɛgbangbã nɛ anɔ ka nyia ka amɛ. 18Onupɛ kɛbalà de wɔnɔ kawɔ̃pɛ mɛɛ, tɛnɔzã nɛ̀ anɔ ka nyia ka nɛ ishu yɔyɔ mɛ. 19Mɛɔbhia alɛ mɔ, nɔtɛ obisi otití ɔkɔ ishu, pɔ nobu kidzo ɔkɔ Owusoso Akaa yɛɔmɔpɔɛ nɔ, ɔmɔsɛ bafɔnɔ kibuiɛ elu asɛ, “Mɛxɔ̃ɛ kinu ɔsɛ tɛ mɛibisi otití nɛ wɔnɔ ulũ, tɛ mɛpɔ̃ batɔ̃,” Apaleteɛ yɛaɖɔ ɛlɛ. 20Nɛ kɛlɛ nɛinye mɛɛ,
“Onupɛ bɔbhɛ iyi anunɔ gɛ atɛ dɛmɛ nɛ wɔɔ, wɔ kɔɛ ɛŋaŋã yɛaŋã,
onupɛ oluwɔ̃ɛ oyi yɛɛ, kɔɛ kɛdɔ̃ tili yɛawɔ̃ɛ.
Nɛ kidzo ɛlɛ nabhaa, kɛbazã asɛ gɛ ɔlɔkɔ afɔɛifu ɔtɔɖɔ yɛada mɛ.”
21Nɔtɛkɔ kibui kpa ŋã wɔnɔ abha, pɔ nɔkɔ kibui gbangbã bhɛbhɛtɛ ŋã kibui kpa nabha boŋ.
Currently Selected:
Romanɛ 12: nyb
Highlight
Share
Compare
Copy
Want to have your highlights saved across all your devices? Sign up or sign in
© (Active), Ghana Institute of Linguistics, Literacy and Bible Translation. All rights reserved.
